Aaronic Pristut: Tuyak ac Orekmakihn Kuh luhn God

Sel Adrián Ochoa

Mwet in Kahsruh Ahkluo ke Prestuhnsi Luhlahp luhn Mukul Fuhsr

Pristut uh enenuh in ahkyohkye in orwaclah kuhtwena ma wo. Kowos pahngonyuck in “tuyak ac fahsr nuh met,” in tiac okanlah kahlwem lowos ke lohsr uh.

Pacl na fototo somlah ah nga weluhl Thabiso muhtwacta nuh ke sie lohm fin acn South Africa, mwet in kahsruh se met ke u luhn prist ke Kagiso Ward. Thabiso ac pisap se lal, suc kol ac sruok ki nuh ke u sac, pruhe ke mwet ke u sac ma suhkwac alu an, suk kolyuck ke mwet in muhtwacta yohroh ac ohiyac in kahsrwelos. Elos puhlakihn mokleyuck in muhtwacta nuh lohm sel Tebello ah, ac elos suliyuc in weluhlos som.

Ke kuht tuhfahna ahluhkwelah soko kosro topang ngalnguhl, kuht sifacna suk kuhtyak lun infuckihl se yohrohl Tebello, sie mukul fuhsr oa suc tui tilac wi alu ke srihpen el kahfofo ke ma sahyac ke lwen Sacnri. El arlac tuhfal tuhsruhk engan in eis kuht in lohm se an ac finne in suli sucu lal an in weluhl. Pisap sac ahkkahlwemye luhngse lal nuh sin sucu sac ac kena lal in kahsrwelos eklac sie sucu ma pahtpaht ke in sili lun tempuhl uh. Elos mokleyuckyak na pwacye ac kuht nuh kwewa kuh in puhla oasr ma fokoko luhn Nguhn Muhtahl kol kahs nuh kwewa ac puhlakihnyuck nuh kwewa an.

Tuhsruhk kahs lal Thabiso ah pa oruh sielacna se ke muhtwacta sac uh. Nuh sihk oacna in prist fuhsr se inge sramsram ke kahs luhn lihpufacn uh—kahs kuhlwacng ma kuht nuh kwewa kahlwem kac tuhsruhk ma puhsrallah kawuck se lal ingacn yohk. “Nga luhngse na pwacye sramsram nuh sum pacl nuh kwewa ke alu ah,” el fahk. “Kom kahs kuhlwacng nuh sihk pacl nuh kwewa. Ac kom etuh, lah u in sritacl soccer lasr uh tiacna wo ingena ke kom wacngihnlac ah. Kom arlac wo kac.”

“Sislah koluk luhk,” Tebello el topuk. “Nga fah fohlohk wi komtacl.”

“Ac fah arlac wo,” Thabiso el fahk. “Ac kom esam ohiyac kuht kwacna orekmakihn in ahkolah in kuhlwacnsap oacna misineri uh? Yac kuht kuh in sifil muhtwacwacack oruh kain sacn?”

“Ahok,” Tebello el kalweni. “Nga luhngse in fohlohk.”

Sahp engan yohk emet nga puhlakihn oacna sie mwet in kahsruh ke prestuhnsi luhlahp e Mukul Fuhsr uh pa in liye mwet sruok Aaronic Pristut fin facluh uh in ahkyohkye kuh luhn Aaronic Pristut uh. Tuhsruhk kuhtuh pacl uh nga mwet lohoh se pac, suc ahsor, mukul fuhsr puhkantwen ekahsr tiacna kahlwem ke wolacnaiyacn ma elos kuh in oruh ke kuh elos sruok an.

Pristut pa kuh ac wal luhn God Sifacna in orekma ke kuhlwacnsap nuh sin tuhlihk Nahtuhl uh. Kuhsel, ac ma wolacna se fin mukul fuhsr nuh kwewa, mwet sruok Aaronic Pristut nuh kwewa, kuh in kahlwem na pwacye lah pristut lal uh sruok ki in luti luhn lihpufacn uh. Ac ma wolacna se fin elos kuh in kahlwem kac lah oasr kunohkohn muhtahl se lalos in kahsruh kawuck lalos in sokwack inkacnek ma kol nuh yurin Mwet Lahngo uh. Ac ma wolacna se muhkwena fin elos etuh lah Pahpah Lucng el ac fah sang nuh selos kuh in ahkuhtweyac ma pwacye ke wosasuc fohlohkyak ke kain kahlwem ac puhsisacl ma mwet sahyac uh fah puhla ke kahs pwacye kacn Kraist uh.

Pain kowos mukul fuhsr ke Alu uh, lwelah nga in siyuck suwos soko kihsen siyuck ma nga finsrak tuh kowos fah luhngse ke moul lowos nohfohn. Kuh fuhkah emet kowos kuh in eis fin facluh likina pristut luhn God? Kuh fuhkah ma kuh liki na kuh in kahsruh luhn Pahpah tuhmasr Inkuhsrao in ekuhllah moul luhn mwet wiyowos an, in kahsrwelos ke inkacnek luhn engan ma pahtpaht ke nwacsnwacslah luhn ma koluk ac oruh ma koluk uh?

Oacna kuhtwena kuh sahyac uh, pristut enenuh in ahkyohkyeyuck in orwaclah kuhtwena ma wo. Leum el pahngon kowos in tuyak ac fahsr nuh met (liye D&C 115:5), in tiac okanlah kahlwem lowos ke lohsr uh. Elos muhkwena suc puhlaik fah wi inmahsrlon mwet sollac uh. Ke kowos ahkyohkye kuh luhn pristut muhtahl lowos an, puhlaik ac luhlahlfongi lowos an fah yohkwelihk. Mukul fuhsr an, kowos etuh lah kowos oruh kuhiyowos nohfohn ke kowos oasr in kuhlwacnsap luhn God uh. Kowos etuh lah kowos engan na pwacye ke kowos rahrah nuh ke sie orekma wo uh. Ahkyohkye kuh luhn pristut lowos an ke in nwacsnwacs ac in suwohs.

Nga kalweni ac ahkkweye pohloh kahs ma Elder Jeffrey R. Holland el orwaclah nuh suwos ke mahlwem ohnkohsr somlah ke acn in sramsram se inge ah. “Nga suk,” el fahk, “mukul fuhsr ac mahtuh ma nuhnkuh yohk mweun se inge inmahsrlon ma wo ac ma koluk uh in weacng ac fahk puhsra. Kuht oasr ke mweun uh.” El kalweni, “… Nga siyuck ke sie puhsra fokoko ac kwacfweacng, sie puhsra ma tiac lain ma koluk muhkwena … , tuhsruhk sie puhsra ke ma wo, sie puhsra luhn wosasuc, sie puhsra luhn God” (“We Are All Enlisted,” Liahona ac Ensign,, Nohfuhmpuh 2011, 44, 47).

Ahok, mwet sruok Aaronic Pristut an, kuht oasr ke sie mweun. Ac ke mweun se inge, inkacnek wo emet in mweun lain ma koluk pa in oaru in fahkwelihk ma suwohswohs. Kom tiac kuh in lohng kahskahs koluk ac oruh muh kom tiacna lohng. Kom tiac kuh in liye, muhkwena kuh wi mwet sahyac, petsac kom etuh muh koluk, ac oruh muh kom tiacna liye. Kom tiac kuh in kahl kuhtwena ma fohkfohk ac oruh na muh wacngihn mwacta. Kom tiac kuh in muhta na ke Setuhn el srihke in kuhnahoslah ma ma wo ac nwacsnwacs uh. Sahyacna, lain in kuh ma kom etuh muh pwacye uh! Ke kom liye kuh lohng kuhtwena ma ma ahkkolukye srihkasrak luhn Leum uh, esam lah suc kowos uh—sie solse ke armi luhn God Sifacna, ituckyang nuh se pristut muhtahl Lal. Wacngihn kuhfa in mweun in lain mwet lokoalok, pahpah tuhmwacn ma koluk, likina ma pwacye ac fah tuhkuh liki inwaclum ke kom ahkyohkye kuh luhn pristut uh. Inkaiyacn mwet matwom an fah ahkfuhlwactye kom ke puhlaik lom ac pwacye lom an. Kuhtuh fah tiac. Tuhsruhk tiacna elyah. Kom fah eis ahkfuhlwact ac luhlahlfongi luhn Pahpah Lucng ke srihpen kom orekmakihn kuh Lal in ahkfahsryelah srihpac Lal.

Nga pahngon u ke prestuhnsi luhn Aaronic Pristut nuh kwewa in sifil kohlwack sifac luhn sukohsohk ac orwaclah ac kol u in mweun lom an. Orekmakihn kuh in pristut lom an ke suli mwet siskom an in tuhkuh nuh yurin Kraist ke auliyak ac pacptais. Oasr lom sap ac kuh luhn Pahpah Lucng in oruh.

Yac luo somlah ah, ke muhtwacta nuh Santiago, Chile ah, nga arulacna fwefwelac sel Daniel Olate, sie mukul fuhsr suc kwacna wi misineri uh. Nga siyuck sel in sihm nuh sihk, ac ke lwelah lal nga fah riti nuh sum ip se ke e-mail se lal: “Nga tuhfahna sun yac 16, ac Sacnri ah nga akmuhsralah nuh ke ohfohs luhn prist se. Lwen sac pacna nga pacptaiselah kawuck se; inel pa Carolina. Nga lotwel wosasuc uh, ac el wi alu lwen nuh kwewa ac finne eis opi ke Personal Progress lal ah, tuhsruhk pahpah ninac kiyacl ah tiacna lwelah elan pacptaislac nuh ke eltahl etweyuclac ac luhlahlfongiyuc. El ke nga in pacptaisellah, oruh kuht enenuh in sano mahlwem se nuh ke Sacnri, ke nga yac 16 lac ah. Nga puhla wo in kahsruh sie mwet wi in pacptaislac, ac nga puhla engan lah nga pa mwet se ma pacptaisellah ah.

Daniel el sie sin mukul fuhsr pucspucs fin facluh ma moulkihn oacna kuh ma God el sang nuh selos uh. Sie pac pa Luis Fernando, fin acn Honduras, suc akihlen lah kawuck lal an orwaclah sulaclah sensen luhn nguhn ke moul lal an ac weluhl akacsruhi fahkwack luhlahlfongi lal an, molwelah moul lal na pwacye (liye “A Change of Heart,” lds.org/youth/video). Olavo, fin acn Brazil, el sie pac srihkasrak. Sie mwet luti wowo pwacye in lohm sel ah (liye D&C 84:111), Olavo el mokle ninac kiyacl ah in fohlohk in ahkfalyelah mukwikwi ke Alu uh (liye “Reunited by Faith,” lds.org/youth/video). Kom kuh in sokwack kain sramsram inge ac ma puhkantwen oacna sahyac ke website luhn mwet fuhsr ke Alu uh. youth.lds.org. Tuh, Internet, social media, ac technology sahyac pac uh pa kuhfa ma Leum el fihliyac in poum in kahsrwe kom in ahkyohkye kunohkohn lom ke pristut ac tahfwelah mokleyuck ke ma pwacye ac suwohs.

Pain mukul fuhsr an, ke kom ahkyohkye Aaronic Pristut ke inkacnek nga ahkuhtweyac inge, kom ahkoekomlac sifacna nuh ke kunohkohn ke pacl fahsruh lom uh. Tuhsruhk oruh yohk likina ingacn. Oacna John Pacptais ah, sie mwet srihkasrak wowo ke Aaronic Pristut, kom oacyacpac ahkolah inkacnek luhn Leum ac orwaclah inkacnek Lal in suwohs. Ke kom puhlaik in fahkwack wosasuc luhn auliyak ac pacptais, oacna John el oruh ah, kom ahkoelah mwet uh nuh ke tuhkuh luhn Leum (liye Mattu 3:3; D&C 65:1–3; 84:26–28). Kwacna fwackyuck nuh sum kuh wowo lom uh. Oruh, ingena pa pacl in orekmakihn kuh sacn, in orekmakihn kuh ma God el usot nuh sum in ahkinsewowoye mwet sahyac an, usaclosme liki lohsr an nuh ke kahlwem, ac ahkolah inkacnek luhn Leum.

Alu uh usot nuh sum puk ke Duty to God oacna sie puk srihsrihk in kahsrwe kom in lutlut ac ahkfalyelah kunohkohn lowos an. Lutlutkihn in fusus. Sikuck muhtuhntelac, liki tifi kuh internet an, ac suk kolyuck luhn Leum. Na tuyak ac orekmakihn kuh luhn God. Nga olwelah tuh kowos fah eis top an sin Pahpah Lucng ke ohiyac in ahkfahsrye moul lowos sifacna an ac ohiyac in kahsruh mwet sahyac an.

Nga tahfwelah kahs lal Prestuhn Thomas S. Monson uh: “Nimet na ahkkolukye mokleyuck yohk ke fahkwack luhlahlfongi lowos an. … Oasr kuh lowos in akihlen mwet ma tiac akihlenyuck sin mwet sahyac uh. Ke oasr muhta lowos in liye, insroac in lohng, ac insiac in puhla uh, kom kuh in ahsroelah in kahsruh ac molwelah mwet sahyac ah” (“Be Thou an Example,” Liahona ac Ensign, Mei 2005, 115).

Nga fahkwack nuh suwos lah kuh luhn pristut uh pwacye. Nga sifacna eis mwe loh luhk in ahkyohkye pristut. Nga liye ma usrnguck pucspucs oreklac sin elos suc oasr kuh luhn Aaronic Pristut se. Nga mwet loh ke kuh in luti luhn lihpufacn uh oacna ke mwet sruok Aaronic Pristut yohk luhlahlfongi la sramsram ke kahs mokleyuck sin Nguhn ke finsrak, ikacslah insiacn sie mwet ke enenuh kahlwem ac luhngse. Ke inen Jisus Kraist, Leum lasr, mwet kol lasr, ac Mwet Lahngo lasr, amen.