2010–2019
Welah Wosasuc Lal ke Alu Lal
April 2012

Welah Wosasuc Lal ke Alu Lal

Sel Elder Donald L. Hallstrom

Ke Prestuhnsi luhn U luhn Itngucul

Srihpac luhn Alu uh pa in kahsrwe kuht moulkihn wosasuc uh.

Nga luhngse wosasuc luhn Jisus Kraist ac Alu luhn Jisus Kraist luhn Mwet luhlalfongi ke Lwen-sahflah. Kuhtuh pacl uh kuht aikihli ke kahs luo wosasu ac Alu, tuhsruhk elos tiac oacna sie. Elos, ne ohinge, akuhpahsri kahto na pwacye, ac kuht enwenwaclos na kwewa.

Wosasuc an pa plwacn na wolacna se luhn God suc kuht, pa tuhlihk Nahtuhl, ituckyang pacl wolacna la in eis ma nuh kwewa oasr lal Pahpah uh (liye D&C 84:38). Ma se inge pa moul ma pahtpaht ac ahkuhtweyucki muh “mwe sang se ma yohk emeet sin God” (D&C 14:7). Ip na oa se nuh ke plwacn se inge pa fuhfahsryucsr lasr facluh uh—pacl in ahkyohkye luhlahlfongi lasr (liye Moroni7:26), auliak (liye Mosiah 3:12), ac ahksuwohye kuht yurin God(liye Jacob 4:11).

Ke srihpen muhnahs luhn moul uh ac “ma lain ma nuh kwewa” (2 Nephi 2:11) e oruh moul se inge arulacna upac, ac ke srihpenkuht tiac kuh in ahknwacsnwacsye ma koluk lasr sifacna, enenweyuck Mwet Lahngo se. Ke Elohim, God Ma Pahtpaht ac Pahpah tuhman nguhnasr kwewa uh, ahkkahlwemye plwacn in molwelah Lal uh, oasr sie inmahsrlosr suc fahk, “Nga inge, suhpweyuclac” (liye Abraham 3:27). Inel pa Jehovah.

Isuslac sin sie Pahpah Lucng, kwewa na ke ip luhn nguhn ac ikoac, El sruok kuh in kuhtanglah facluh. Osweyucklac sin ninac facluh se, El enenuh elan sun waiok ac kweok luhn misac uh. Jehovah fuhlwact tuh pahngpahng pac Jisus ac sie wal ituckyang nuh sel pa Kraist, suc kalmac pa Messaia kuh Sie suc Ahkmuhsralah. Orekma fuhlwactlacna Lal pa ke Iwaclah an, ma Jisus suc Kraist El “puhtati ye ma nuh kwewa” (liye D&C 88:6), ahkmwesahsyelah nuh Sel in kuh in molwelah ma kuluk luhn kais sie sesr nuh kwewa.

Alu uh tuh akwucki sel Jisus Kraist ke orekma Lal facluh ah, “muhsahlah ke pwelucng luhn mwet sap ac mwet pahluh” (Met Efesus 2:20). Ke ma inge, “fihl ke fohnlah luhn pacl uh” (D&C 128:18), Leum El sifilpac fohlohkohnwack sie ma tuh oasr ac, fahkweng na nuh sel Joseph Smith lah El fah akiac sie alu ke pahol Joseph Smith (liye D&C 31:7). Jisus Kraist pa tuh ac fah sifac ke Alu Lal aholyucklac fin facluh sin mwet pahluh suc sruok kuh luhn mwet sap.

Alu na wowo se pa inge. U lalos, srihpac wowo lalos, ac puhslacna ma askuh ahkfuhlwactyeyuck sin mwet suc kena pwacye in suk ac etuh kac an. Oasr prokracm nuh sin tuhlihk srihsrihk, mwet fuhsr, mukul ac muhtwacn. Oasr Iwen alu na kahto suc puhs liki18,000. Tempuhl luhlahp—ingena ma136—oaclihk fahluh, wi ma30 srwack muhsahiuck kuh sruhmuhnyuck. U na luhlahp se ke misineri puhs liki 56,000, sesseslah ke mwet fuhsr ac elos suc tiac arlac fuhsr, kuhlwacnsap fin muhtuhn facl150. Orekma ke kahsruh mwet fin facluh nohfohn luhn Alu uh pa sie srihkasrak wo ke pahkomuhta luhn mempucr ke Alu uh. Inkacnek in kahsruh mempucr an ac kahsrwelos in kuh in ekasaclosyak sifacna an tiac ma kuht etahi sahyac. Ke Alu se inge oasr mwet kol na etatwen ac U na luhlahp se ke Mwet Luhlahlfongi suc luhngse in kuhlwacnsapuh sie sin sie ke ohiyac na utuftuf se. Wacngihn ma oacna Alu se inge fin facluh nohfohn.

Ke nga isuslac ah, sucu luhk uh tuh muhta ke kihtin lohm sahk fin acn se ma sie iwen toeni pwengpweng luhn Alu uh, Honolulu Tabernacle. Ingena nga taltal koluk nuh sin kawuck na wowo luhk ke U luhn Pisap, suc karihngihn iwen alu luhn Alu uh, tuhsruhk ke nga tuhlihk ah nga fanuckyac ac tihl nuh yac ac tiltil nuh lun lohm sac nohfohn, ke kapihn mwe lihklihk ke luhluh in kof sac ne lucng fin taor sac. Kuht ahtot pac (oacna Tarsan) ke okan op ahtaht ke sahk luhlahp ma oasr ke acn sac.

Alu sac oruh ma nuh kwewa nuh sesr. Kuht wi miting na puhs, puhs liki na miting kuht oruh mihsenge uh. Kuht wi U luhn Tuhlihk Srihsrihk ke tahfuhn lwen tok ke Tuhstuh. Miting luhn Rilif Sosaiti ke lotu in Tuste. Toeni luhn mukul fuhsr ac muhtwacn fuhsr orek ke ekuh in Weniste. Mukwikwi luhn ward ke Sactte. Ke Sacnri mukul ac mukul fuhsr e som nuh ke miting luhn pristut ke lotutacng an. Infulwen lwen uh kuht ac wi Sacnri skul. Ke ekuh an kuht fohlohk nuh ke miting ke kuhfa luhn Leum. Ke som ac fohlohk ac miting uh, pacl lasr uh oacna in som yohk ke mukwiwki luhn Alu uh ke Sacnri an ac inkaiacn lwen ke wik sacn.

Ke luhngse yohk luhk ke Alu uh, ke pacl nga tuhlihk mukul se ah pa, ke pacl se met, nga luhmahack muh, oasr ma yohk ye. Ke nga yac limekohsr matwuck, toeni luhlahp se orek ke lohm in alu sac. Kuht fahfahlac inkacnek soko kuht muhta siskac ah ac tuhpallah kihtin sohs suwohslah nuh ke lohm alu luhlahp sac ac muhta ke tahk ahksingucul ke lohm alu sac. Kolyuck ac sramsram ke miting sac pa David O. Mckay, Prestuhn luhn Alu uh. Wacngihn ma nga esam ke sramsram lal ah, tuhsruhk nga esam srihsrihk ma nga liye ac puhla ah. Prestuhn Mckay el tuh nukum sut tuhnan krim se ac weacng aunsucf fasrfasr ahsrosr arulacna askuh se. Ke ma mahtuh luhn tuhka lasr uh, el oluh ah in ros sruhsrah se pacl tolu mahtoltoliac. Ke el sramsram ah, nga puhlakihn ma na yohk ac siena se. Tohkoh nga kahlwemwack lah nga puhlahack mokleyuck luhn Nguhn Muhtahl. Kuht yucklah on in kaliyac ah.

Suc oasr ke lwacyacn luhn Leum? Suc?

Inge pa pacl in ahkkahlwemye.

Kuht tiac sahngweng in siyuck:

Suc oasr ke lwacyacn luhn Leum? Suc?

(“Who’s on the Lord’s Side?” Hymns, no. 260)

Ke kahs ingacn onkihnyuck sin apkuhran in mwet 2,000 tuhsruhk oacna in sie kihsen siyuck in siyuckyuck sihk, nga luhngse in tu ac fahk, “Nga!”

Kuhtuh nuhnkuh muh mukwikwi luhn Alu uh pa srihpac sahflah luhn Alu uh. Ke ma se inge sensen. Kuht kuh na in fahsri mukwikwi an a tiac lohacng nuh ke wosasuc an. Lwelah ngan ahkuhtweyac kuhtuh srihsrihk: Mukwikwi luhn Alu uh ma na enwenweyuck se; ne ohinge, tiac fal. Mukwikwi ke Alu pa mwe akucl se ke enenuh ke ip luhn nguhn. Kuht fin wi miting an, sruok ac ahkfalye kunohkohn ke Alu an, ac kuhlwacnsapuh mwet sahyac, mwet uh akihlen.

In kapsruh, ma luhn wosasuc uh kwacna silongihnyuck ac upac in srihkasrakuh, tuhsruhktuh pa yohk srihpac nuh ke moul ma pahtpaht uh. Mwe srihkasrak se, luhpahkah luhlahlfongi lasr uh? Luhpah suc auliak lasr uh? Luhpah suc kalmacn akwuck muhtahl luhn Alu uh nuh ke moul lasr uh? Fuhkah ahkostwen lasr ke olweacng lasr uh?

Ngan kalweni: kuht enwenuh wosasuc ac Alu uh. Ma na pwacye se, lah srihpac luhn Alu uh pa in kahsrwe kuht in moulkihn wosasuc uh. Kuhtuh pacl uh kuht ke etuh: Fuhkah tuh mwet se arulacna fahsri mukwikwi ke Alu uh ke el fuhsr ac tiac ke el mahtuhack an? Fuhkah ke mwet mahtuh se fahsri ac kuhlwacnsap tui tilac fahsr? Fuhkah ke sie mwet lwelah toasrlah se lal sin sie mwet kol kuh sie mempucr in tulokihnilya ke fahsriyen Alu uh? Sahp srihpac an pa elos tiacna auliak pwacye nuh ke wosasuc an—ma luhn ma pahtpaht an.

Nga luhngse sruhkwack inkacnek na yohk sripac tolu in eis wosasuc in oruh pwelucng lasr:

  1. In ahkyohkye etwacack lasr ke God. Etwacack ac luhngse lasr ke mempuhr tolu ke God head arulacna yohk srihpac. Esam in pruhe nuh sin Pahpah, ke inen Wen, ac suk kolyuck sin Nguhn Muhtahl. Pruhe lukoac wi oaru in lutlut ac mongfihsracsr in nuhnkuh in tahfwelahna in ahkyohkye luhlahlfongi tiac kuh in mokleyuck ke Jisus Kraist. “Kuht ac etuh fuhkah mwet luti suc pa sie mwet fahsr nuh sesr, ac loes nuh ke nuhnak ac kena luhn insiyacsr uh?” (Liye Mosiah 5:13).

  2. Lohacng nuh ke akwuck muhtahl ac olwelah an. Fin oasr kuhtuh sin akwuck muhtahl inge enwenweyuck in orek ke moul lowos an, oaru in ahkoo in eis kais sie selos. Na kuht enenuh in akiac kaiyuck uh kuht in kuh in moul suwohs ke olweacng lasr uh, orekmakihn na pwacye mwe sang ke kuhfa luhn Leum ke wik nuh kwewa. Puhs sesr tiacna ahknwacsnwacsyeyuck ke kuh in ahknwacsnwacs la uh ke srihpen wacngihn ahkfuhlwact lasr ke akwuck muhtahl sacn.

  3. Kapsreni wosasuc an ke Alu an. Ke kuht lohacng wo ke wosasuc an, Alu uh e fah oruh mwe insewowo yohk se, tiac srihk nuh ke moul lasr uh. Ke kuht tuhkuh nuh ke miting an ahkolah in “suk etwacack, finne ke lutlut ac oacyacpac ke luhlahlfongi” (liye D&C88:118), Nguhn Muhtahl e fah mwet luti lasr. Kuht fin tuhkuh na ke pwacr, kuht e wacna suhpwacrlac. Prestuhn Spencer W. Kimball el tuh siyuck ke sie pacl ah, “Meac kom oruh ke kom konwacack tuh kom oasr ke sie miting ke kuhfa luhn Leum na wacngihn usrac se?” El tohpuk: “Nga tiac etuh. Nga soenna sun sie” (sruhmuhnyuck sel Gene  R. Cook, ke Gerry Avant, “Learning Gospel Is Liffetime Pursuit,” Church News, Mahs 24, 1990, 10).

Ke moul lasr uh kuht enenuh in kena suk ma sikyak tukun Leum El tuhkuh nuh ke Facl Sasuc sac ac akiac Alu Lal ah. Ma suhmuhslah uh fahk lah mwet tuhma lutlut Lal ah som inmahsrlon mwet Nephi, ac luti wosasuc uh nuh sin mwet nuh kwewa fin acn sac; ac mwet ah auliak nuh sin Leum, ac elos tuhkweni ke Alu luhn Kraist; ac oacyacpac mwet nuh kwewa ke fihl sac ahkinsewowoyeyucklac” (liye 3  Nephi 28:23).

Leum El luhngse mempucr ke Alu Lal an in auliyak na pwacye nuh ke wosasuc Lal an. Pa inge inkacnek na pwacye se in oasr na nguhn ingena ac insewowo ne tok. Ke inen Jisus Kraist, amen.