Kuh luhn Inkuhsrao

Sel Elder David A. Bednar

Ke U luhn Mwet Sap Singucul Luo ah

Mwet sruok pristut fuhsr ac mahtuh an enenuh kwewana wal ac kuh—lwelah fal ac kuhiyen nguhn in ahol God ke orekma in molwelah uh.

Tamuhlwel sacohk wiyuck, nga sruikihn lah kuht kuh in tuhkweni alu oacna sie u luhlahp luhn mwet sruok pristut uh. Nga luhngse ac yuckihn kowos ke nwacsnwacs ac mokleyuck lowos ke ma wo fin facluh uh.

Nga suli kais sie suwos in motko ohiyacn top lowos nuh ke kihsen siyuck ten inge ma oreklac nuh sin mempucr ke Alu uh ke yac pucspucs somlah ah sel Prestuhn Davis O. McKay: “Fin ke pacl se inge kais sie suwos siyuckyuck in fahklah ke soko lain in kahs kuh pohloh kahs ma ma etweyuck emet ke Alu luhn Jisus Kraist luhn Mwet Luhlahlfongi ke Lwen-sahflah uh, meac top lom an?” (“The Mission of the Church and Its Members,” Improvement Era, Nohfuhmpuh 1956, 781).

Top lal Prestuhn McKay ma el sang nuh ke kihsen siyuck soko lal sifacna an pa “wal wolacna” ke pristut uh. Alu luhn Jisus Kraist luhn Mwet Luhlahlfongi ke Lwen-sahflah uh sifacna tu liki alu sahyac ma fahk muh kuh lalos uh ituckyang ke kuh sin kais kuhtuh mwet e met me, ke ma suhmuhslah uh, kuh ke lutlut in ahkpah ke alu. Kuht orwaclah mwe fahkwack sessahlah ma kuh luhn pristut ituckyang ke fihliyac luhn paho sin mwet utuck pweng inkuhsrao uh nuh sel Mwet Pahluh Joseph smith.

Pweng luhk uh sramsram yohk ke pristut wolacna inge ac kuh inkuhsrao uh. Nga pruhe na pwacye nuh ke kahsruh ke Nguhn luhn Leum ke kuht ac tuhkweni lutlutkihn ma pwacye yohk srihpac inge uh.

Wal ac Kuh luhn Pristut

Pristut uh pa kuh sin God ma ituckyang nuh sin mukul fin facluh in orekmakihn ke ma nuh kwewa nuh ke molwelah nuh sin mwet uh. (liye Spencer W. Kimball, “The Example of Abraham,” Ensign, June 1975, 3). Pristut pa ma Leum el orekmakihn mukul uh in molwelah nguhna uh. Sie sin ma wolacna ke Alu luhn Jisus Kraist, kwewana ke pacl somlah ah ac mihsenge uh, pa kuh Lal. Koflah in oasr Alu pwacye fin wacngihn kuh wolacna uh.

Mukul uh ituckyang nuh se kuh luhn pristut. Nwacsnwacs ac kena—tiac ke pah, etuh, kuh lutlut—pa enenuh nuh ke akwuck luhn pristut uh.

Atac nuh ke eisyacn kuh luhn pristut uh ahkuhtweyucki ke ip yohk ke luhlahlfongi ahk limekohsr: “Kuht luhlahlfongi muh mukul se enenuh in pahngpahng sin God, ke pahluh uh, ac ke fihl paho an lalos suc oasr kuh la, in luti ke wosasuc ac karihngihn ke akwuck ma oasr kac.” Ke ma inge, sie tuhlihk mukul kuh sie mukul ma eis kuh luhn pristut ac akmuhsraiyucklac nuh ke ohfohs se sin sie mwet ma sruok tari pristut ac ahkkweyeyucklac sin sie mwet kol ma oasr ki in pristut fal se uh.

Sie mwet sruok pristut enenweyuck in ahkyohkye kuh muhtahl inge oacna ke nuhnak, kena, ac srihpac muhtahl luhn God uh. Wacngihn ma ke pristut uh ma nuhnkuh kac sifacna. Pristut uh orekmakihnyuck in kuhlwacnsap, in ahkinsewowoye, ac in ahkkweye mwet sahyac uh lwen nuh kwewa.

Pristut fuhlwact sac eisyuck ke sie olwelah ma oasr pac kunohkohn in orekma ke kuh (liye D&C 68:8) ac ohfohs (liye D&C 107:99) ma eisyuck tari an. In oacna mwet sruok kuh muhtahl luhn God, kuht pa mwet kuhlwacnsap in orekma ac tiac orekma nuh kac (liye 2 Nephi 2:26). Pristut uh fokoko na upac liki in muhnahs.

Prestuhn Ezra Taft Benson el luti:

“Tiacna fal in eis pristut na muhta na ac sano nuh ke sie mwet sukkuhti nuh ke orekma. Ke kuht eis pristut uh, oasr kunohkohn lasr in eklac fokoko ac rahrah in ahkolah nuh ke eisyacn srihpac luhn suwohswohs fin facluh, ke srihpen Leum el fahk:

“ ‘... El suc tiac oruh kuhtwena ma nuh ke sapkihnyuck el, ac eis sie masap ke inse tahfuh luo, ac liyacacng na ke alsracngwesr, mwet ingacn pacna ac mwacta’ (liye [D&C 58:29]” (So Shall Ye Reap [1960], 21).

Prestuhn Spencer W. Kimball el oacyacpac ahkyohkye ohiyac fokoko luhn pristut uh: “Sie mwet el kuhnahoslah olwelah ke pristut ke ahkkolukye masap uh—tuhsruhk oacyacpac ke fihliyac kunohkohn tiac sahflah kunacl uh. Pwacnwacng, in kuhnahoslah olwelah se inge sie mwet tiac enenuh in oruh kuhtwena ma” (The Miracle of Forgiveness [1969], 96).

Ke kuht oruh kuhiyacsr in ahkfalye kunohkohn ke pristut lasr uh, kuht kuh in ahkinsewowoyeyuck ke kuh luhn pristut. Kuh luhn pristut pa kuh luhn God ma orekma ke mukul ac tuhlihk mukul ma oacna kuht uh ac pa ma sikyak ke luhlahlfongi yohk, ahkostwen, oaru, ac suwohswohs la sifacna uh. Sie tuhlihk mukul kuh sie mukul kuh in eis wal luhn pristut ke fihliyac luhn paho uh tuhsruhk ac wacngihn kuh luhn pristut el fin seahkostwen, tiac nwacsnwacs, kuh tiacna ke kuhlwacnsap.

Suwohs luhn pristut uh tuhkweni orekweni ke kuh luhn inkuhsrao, ac kuh luhn inkuhsrao tiac kuh in sruhuh kuh sruokyuck sahyacn ip ke suwohswohs.

Suwohs luhn pristut kuh in utuck nuh facsr, tuhsruhk ke kuht srihke in okanlah ma koluk lasr kuh luhngkihn insefuhlwact lasr kuh orwaclah koluk, kuh in ahkyohkye kuh nuh fin mwet, kuh ahkkohsye nguhna luhn tuhlihk nuhtin mwet ke kuhtwena atac sesuwohs, inkuhsrao ac fah eslah ac Nguhn luhn Leum fah ahsor. Ke Nguhn luhn Leum ac itucklac uh, ac fah wacngihnlac pristut kuh wal luhn mukul sacn (liye D&C 121:36–37; mwe ahkuhtweyac weacng).

Tamuhlwel, nuh sin sie tuhlihk mukul kuh sie mukul in eis kuh luhn pristut tuhsruhk tiacna oruh fal nuh ke ohiyac ke kuh luhn pristut el tiacna lwelahkihnyuck sin Leum. Mwet sruok pristut, fuhsr ac mahtuh an enenuh kwewana wal ac kuh—lwelah fal ac fokokoiyacn nguhn in ahol God ke orekma in molwelah uh.

Sie Mwe Luti sin Pahpah Tuhmuhk

Nga tuhfweyucklac ke sie lohm yurin sie ninac yohk luhlahlfongi la ac sie pahpah na wowo. Ninac kiyuck ah el sie usru luhn pioneer suc kihsackuhnlah ma nuh kwewa nuh ke Alu uh ac tohkohsrahi luhn God. Pahpah tuhmuhk ah el tiacna mempucr ke Alu lasr uh ac, ke sie tuhlihk mukul fuhsr ah, kena in eklac sie prist ke Catholic. Yohkna, el sollac in tiac wi ahkpah ke lutlut ke alu uh ac sahyacna in eis sie orekma oacna sie kuhfa ac mwet orwaclah kuhfa uh.

Inkaiyacn moul in pahyuck lal an, pahpah tuhmuhk an wi miting ke Alu luhn Jisus Kraist luhn Mwet Luhlahlfongi ke Lwen-sahflah wi sucu lasr uh. Tuh, inkaiyacn mwet ke ward lasr ah tiacna etuh lah pahpah tuhmuhk an tiacna mempucr ke Alu uh. El wi sritacl ac luti u in yakyu ke ward lasr ah, kahsruh mukwikwi ke Scout, ac ahkkweye ninac kiyuck an ke pahng ac kunohkohn puhkantwen lal an. Nga luhngse sruhmuhn nuh suwos ke sie mwe luti na wowo nga lotwelah sin pahpah tuhmuhk ah ke wal ac kuh luhn pristut uh.

Ke sie tuhlihk mukul ah nga siyuck sin pahpah tuhmuhk ah pacl puhkantwen ke kais sie wik lah ngac elac muh pacptaislac uh. El topuk ke luhngse tuhsruhk kais sie pacl nga tohrkahskahs nuh sel: “David, nga ac tiac welac Alu uh ke ninac kiyom, keim, kuh oacna sie mwet. Nga fah welah Alu uh ke nga etuh muh ma pwacye se in oruh uh.”

Nga luhlahlfongi muh ke nga oasr ke nga fahna oasr ke moul in mwet fuhsr luhk ah ke sramsram se ten inge sikyak yurin pahpah tuhmuhk ah. Kuht tuhfahna fohlohk nuh lohm ah ke tuhkweni wi alu lasr ke miting in Sacnri se, ac nga siyuck sin pahpah tuhmuhk an pacl el ac pacptaislac uh. El isracsr ac fahk, “Kom muhkwena pa kwacna siyuck sihk ke nga in pacptaislac uh. Mihsenge oasr kihsen siyuck se luhk nuh sum.” Nga arlac sa ac pwacrwack in nuhnkuh lah ingena kuht orwaclah arlac wo!

Pahpah tuhmuhk ah kalweni, “David, alu lom ah luti lah pristut uh itucklac liki facluh emet ac fohlohkihnyuckyak sin mwet utuck pweng inkuhsrao nuh sel Mwet Pahluh Joseph Smith, pwacye?” Nga topuk lah pohloh kahs soko lal ah pwacye. Na el fahk, “Pa inge kihsen siyuck luhk uh. Kais sie wik ke miting luhn pristut nga lohng pisap ac kuhtuh pac mwet kol pristut an ahkacsmakihnye, ngihsre, ac siyuck sin mukul uh in oruh forfor luti yurin sucu uh ac in oruh kunohkohn ke pristut lalos uh. Fin alu lom an pwacye oasr pristut fohlohkyak luhn God an se, efuh puhs sin mukul ke alu lowos an tiac eklac ke kunohkohn muhtahl lalos an likina mukul ke alu luhk ah?” Nuhnak fuhsr se luhk ah sana tulokihnyucki. Wacngihn top luhk nuh sin pahpah tuhmuhk ah.

Nga luhlahlfongi muh tiac pwacye sin pahpah tuhmuhk ah in nuhnuhnkuh ma pwacye lasr ke Alu uh in ahkuhtweyac kuh ke ma koluk luhn mukul ma el wi ke ward lasr ah. Tuhsruhk oasr ke kihsen siyuck lal nuh sihk pa sie luhmah ma mukul ma sruok pristut muhtahl luhn God uh enenuh in siena liki mukul sahyac uh. Mukul ma sruok pristut uh tiacna wo liki mukul sahyac uh, tuhsruhk elos enenuh in mukwikwi siena. Mukul ma sruok pristut uh enenuh in tiac eis muhkwena kuh luhn pristut tuhsruhk oacyacpac in nwacsnwacs ac mwet orekma yohk luhlahlfongi la ke kuh luhn God. Leum el fahk lah mwet suc sruok mwe nenyuck luhn Leum uh enenuh in nwacsnwacs” (liye D&C 38:42).

Nga tiacna muhlkuhnlah mwe luti ke wal luhn pristut ac kuh ma nga lotwelah sin pahpah tuhmuhk ah, sie mukul wowo ma tiac wi kuht luhlahlfongi, suc etweyuck ke mukul uh ma eis in mwet sruok pristut luhn God. Sramsram ke ekuhn Sacnri se yurin pahpah tuhmuhk an ke yac pucspucs somlah ingacn orwaclah nuh sihk sie kena in sie “tuhlihk wowo.” Nga tiac ke sie mwe srihkasrak koluk ac ikori nuh ke orwaclah luhn pahpah tuhmuhk in luti ke wosasuc fohlohkyak uh. Nga kena in sie tuhlihk mukul wowo. Leum el enenwekuht nohfohn oacna mwet in us kuh Lal in tuhlihk ahkfuhlwact, suwohs, ac wowo ke pacl nuh kwewa ke acn nuh kwewa.

Sahp kom ac kuh in luhngse in etuh lah yac pucspucs tohkoh, pahpah tuhmuhk ah pacptaislac. Ac ke pacl fal, nga eis pacl wowo in sang nuh facl Pristut luhn Aaronic ac Melchizedek. Sie sin puhlakihn wowo emet ke moul luhk pa in liye pahpah tuhmuhk eis wal, yohkna, kuh luhn pristut.

Nga akacsruhi nuh suwos mwe luti mahkiyucki inge ma nga lotwelah sin pahpah tuhmuhk ah in ahkyohkye sie ma pwacye fihsrwacsr. Eisyacn kuh ke pristut ke fihliyac luhn paho el sie muhtwacwacack na yohk srihpac, tuhsruhk tiacna fal. Akwuck uh ekuhllah kuh, tuhsruhk suwohswohs enenuh in orekma ke kuh ke kuht kampare in sruhk nguhna uh, in luti ac fahkwack, in ahkinsewowoye ac kahsruh, ac in pahtok orekma ke molwelah uh.

Ke pacl na yohk se inge ke ma mahtuh luhn facluh, nga ac kom ma sruok pristut enenuh in mukul suwohswohs ac mwe kahsruh fokoko ke poun God. Kuht enenuh in tuyak oacna mukul luhn God. Ac wo nuh sesr in luti kac ac long srihkasrak lal Nephi, nuhtin nahtuhl Helaman ac mwet se emet ke mwet sap singucul luo ma pahng sin Mwet Lahngo ke muhtwacwacyacn luti Lal inmahsrlon mwet Nephi ah. Ac Nephi el luti ma pucspucs yurin mwet ah. Ac el luti ke kuh ac ke wal fokoko (liye 3 Nephi 7:17).

“Nuhnak Muhnahs Kahsruh Mukul Tuhmuhk in Kahlwem”

Ke sahflahiyacn lohlngohk nuh tempuhl ah, nga kol oacna sie pisap ac prestuhn luhn stek, nga kwacna siyuck sin tamuhlwel pahyuck uh ohiyac wo emet nga kuh in kuhlwacnsuhpwaclos ac sucu lalos uh. Top pacl nuh kwewa ma nga eis sin muhtwacn yohk luhlahlfongi la inge kwewana kahsruh ac mwe lut. Tahmtahel uh suhkwac tohrkahskahs ac isohs ma, tuhsruhk eltahl kwacna topuk oacna inge: “Nuhnak muhnahs kahsruh mukul tuhmuhk uh in kahlwem ke kunohkohn lal oacna sie mwet kol ke pristut in lohm sesr ah. Nga engan in kol lutlut ke ma suhmuhslah, pruhe in sucu, ac ekuh in toeni luhn sucu, ac nga fah kalweni in oruh. Tuhsruhk nga finsrak mukul tuhmuhk uh kuh in sie partner oacna sie ac sang mwet kol ke pristut fokoko ma el kuh in sang muhkwena. Nuhnak muhnahs kahsruh mukul tuhmuhk uh in luti ohiyac in eklac sie patriarch ac sie mwet kol ke pristut in lohm sesr in kol ac karihngihn.”

Nga kwacna nuhnkuh ke inse pwacye luhn tahmtahel ingacn ac kena lalos. Mwet kol ke pristut uh lohng kain nuhnak ingacn mihsenge. Muhtwacn pahyuck puhs siyuck ke mukul pahyuck ma tiac sruok wal luhn pristut muhkwena tuhsruhk oacyacpac kuh luhn pristut. Elos kena yohk in kuhpahsryang nuh sin sie mukul pahyuck yohk luhlahlfongi la ac mukul pristut ke orekma in orwaclah sie lohm ma Kraist el infulwac ac lohacng nuh ke wosasuc.

Tamuhlwel, nga olwelah tuh kom ac nga fin pruhe in motko enenuh luhn tamuhlwel inge uh, Nguhn Muhtahl fah kahsrwe kuht in liye atacsr sifacna (liye D&C 93:24) ac kahsrwe kuht in akihlen ma kuht enenuh in ekuhllah ac ahkwoye uh. Ac pacl in orekma an pa ingena!

Srihke in Srihkasrak ke Suwohswohs

Ofong nga sifil ahkkahlwemye luti lal Prestuhn Thomas S. Monson suc suli kuht oacna mwet sruok pristut in “mwe srihkasrak ke suwohswohs.” El ahkacsmakihnye kuht pacl nuh kwewa lah kuht oasr ke orekma luhn Leum ac kuh in eis kahsruh Lal fal nuh ke suwohswohs lasr (liye “Examples of Righteousness,” Liahona ac Ensign, Mei 2008, 65–68). Kom ac nga sruok kuh luhn pristut ma fohlohkihnyuckme nuh facluh ke fihl in pacl se inge sin mwet utuck pweng inkuhsrao uh, finne John Pacptais ac Piter, Jemes, ac John. Ac ke ma inge mukul nuh kwewa ma eis Pristut luhn Melchizedek uh kuh in ukwe ohiyacn kuh lal sifacna nuh sin Leum Jisus Kraist. Nga finsrak kuht in tarilacna ke mwe insewowo usrnguck inge. Nga pruhe tuh kuht in fah nwacsnwacs ac suwohs in ahollah Leum ke kuht ahkyohkye kuh muhtahl Lal uh. Lwelah kais sie sesr in fal nuh ke kuh luhn pristut uh.

Nga fahkwack lah pristut muhtahl uh pwacyena fohlohkihnyuckyak nuh fin facluh ke lwen sahflah inge ac sukokyak ke Alu luhn Jisus Kraist luhn Mwet Luhlahlfongi ke Lwen-sahflah uh. Nga oacyacpac lohohkihn lah Prestuhn Thomas S. Monson pa prist fuhlwact in karihngihn pristut fuhlwact ke Alu uh (liye D&C 107:9, 22, 65–66, 91–92) ac mwet sefanna fin facluh ma sruok kwewana ac oasr suwohs la in ahkyohkye ki in pristut nuh kwewa uh. Ke ma pwacye inge nga fahkwack ke ine muhtahl luhn Leum Jisus Kraist, amen.