Akuhtuhn luhn Moul
Sel Prestuhn Thomas S. Monson
Kuht tuhkuh oyac me? Efuh kuht oasr inge? Kuht ac som nuh oyac tukun moul se inge? Tilac enenuh kihsen siyuck facluh inge in tiac topukyucklac.
Tamuhlwel ac tahmtahel wolacna wiyuck an, olutu nga luhngse sramsram nuh suwos ke ma pwacye luhn ma pahtpaht uh—ma pwacye ma e ahkwoye moul lasr uh ac liye kuht in wo ohiyac sun yen sesr uh.
Acn nuh kwewa mwet uh suhlahklahk. Aksohk uh muhi ke wucnyacn kuhfa sacohk luhn mwet nuh ke muhtuhn facl sahyac ac inkof uh in muh miting luhn pisnis uh kuh in oreklac, orekma uh oreklac, muhtwacta uh engankihnyuck, kuh sucu uh in kuh in amuhtwactai. Inkacnek ke acn nuh kwewa—weacng inkacnek sralacp, inkacnek loeloes, ac inkacnek luhlahp uh—wucn stosah miliacn, nwacklah ke kuhtuh pac miliacn ke mwet, ke tiac tui fahsriyac uh ac ke puhs kain in srihpac ke kuht suhlahklahk pisnis ke kais sie lwen.
Ke moul muhi se inge, kuh kuht na tui ke kihtin pacl in ami in nuhnak—finne nuhnak ke ma pwacye wacngihn sahflahiyac?
Ke kapsrweyacn ma pwacye ma pahtpaht uh, inkaiyacn kihsen siyuck ac elyah ke moul ke kais sie lwen arulacna wacngihn srihpac na pwacye. Meac kuht ac mongo in ekuhkihn uh? Tuhn fuhkah kuht ac sroalkihn ke infuckihl luhlahp an? Kuh kuht ac isaclwacng Nena lacn wi soccer? Kihsen siyuck inge ac puhkantweniyac sahyac ma oacna wacngihnlac yohk srihpac lalos ke pacl elyah sikyak uh, ke mwet pahkotwen lasr ngalyak kuh kihneta uh, ke mwet lihksreni na masack uh, ke mwet se mas upac uh ac apkuhran in misac uh. Nuhnak lasr uh muhtwacwacack lohacng, ac fihsracsr kuht in nuhnkuh ma yohk srihpac na pwacye ac ma wacngihn srihpac.
Nga tuhfahna muhtwactalah nuh yurin sie muhtwacn suc masmaskihn mas na upac se ke lusacn yac luo kuhtuh. El fahk lah ke el muhtwacwacack masack ah, pacl lal ah sesseslah ke mukwikwi ma oacna ahknwacsnwacsye lohm sel in arlac wo ac nwacklah ke kuhfa lun lohm kahto. El fahsri mwet in orek insucf se lal ah pacl luo ke wik se ac sislah mani ac pacl ke kais sie mahlwem moul nuknuk. Tuhlihk nuhtin nahtuhl ah solsol in muhtwacta ke kais kuhtuh na pacl, ke srihpen el elyahkihn ke pacl nuh kwewa lah ma el nuhnkuh muh sacohk lal ah kuh in muhsahllah kuh koluklac sin paho srihsrihk ac ingunyacr ah.
Na fwackyuck nuh sel lah pweng na lut se lah moul lal uh koluklac ac lah pacl lal facluh fototome. El fahk lah ke pacl se el lohng fahk luhn taktuh sac, el sana etwacack lah el enenuh in sislah pacl luhlah lal ah yurin sucu ac kawuck ac wosasuc in pa yohk srihpac ke moul lal uh, tuh ma inge ahollah ma sacohk emet nuh sel.
Kain pacl in ahkpwacye se tuhkuh nuh sesr ke pacl sefanna kuh sie sahyac, tuhsruhk sahp tiac pacl nuh kwewa ke ohiyac upac. Kuht liye na suwohs lah meac oasr srihpac ke moul lasr uh ac e fuhkah ohiyacn moul lasr uh.
Mwet Lahngo el fahk:
“Nimet elohsack mwe kahsruhp nuh suwos fin facluh, yen watihl ac ras ac kuhnahoslah, mwet pihsrapasr elos ac kuhnahoslah acn ma oan we ac pihsraclah:
“A kowos in elasack mwe kahsruhp nuh suwos inkuhsrao, yen watihl ac ras tiac kuh in kuhnahoslah, ac mwet pihsrapasr elos tiac kuh in utyak nuh we ac pihsraclah.
“Tuh yen ma sacohk lowos oasr we, nuhnkowos ac oan pac we.” 1
Ke puhlan pacl lasr ke motko yohk kuh enenuh yohk, nguhnin mwet se som sun inkuhsrao, suk ke top wolacna nuh ke kihsen siyuck yohk luhn moul uh:Kuht tuhkuh oyac me? Efuh kuht oasr inge? Kuht ac som nuh oyac tukun kuht som liki moul se inge uh?
Top ke kihsen siyuck inge tiac sukokyak ke kulun puk luhn lutlut luhlahp kuh ke sukyac ke Internet. Kihsen siyuck inge tuhpallah moul uh. Kihsen siyuck uh sruohkwacni ma pahtpaht.
Kuht tuhkuh oyac me? Kihsen siyuck se inge pa nuhnak na pwacye se, fin tiac fwackyuck, sin mwet nuh kwewa.
Mwet Sap Paul el fahk nuh sin mwet Athens ye Muhtuhn Mwet Pwacpa Fuhlwact lah “kuht tuhlihk nuhtin God.”2 Ke kuht etuh lah mahnosr ma nuhtin pahpah ninac kiyacsr uh, kuht enenuh in suk ke kalmacn fahk lal Paul. Leum el fahkwack lah nguhn ac mahno uh pa nguhnin mwet uh.”3 Pwacnwacng pa nguhn se ma tuhlihk nuhtin God. Mwet sihm se Hibru fahk Kacl lah El pa “Pahpah tuhmasr in nguhn,”4Nguhn luhn mwet nuh kwewa pa tuhlihk mukul ac muhtwacn sacohklacna nuhtin God.5
Kuht etuh lah mwet sihm pohloh fahk mokleyuck uh oasr, ke lutlut lasr ke mwe luti se inge, sihmihs pweng mokleyuck ac suhmuhslah nuhnak wo liki nuh kwewa. William Wordsworth el suhmuhslah ma pwacye:
Isuslac lasr fin facluh uh oacna in som mutullac ac muhlkuhnlah:
Nguhna oasr lasr ke isuslac uh oacna Itu,
Ac tuhkuh ke acn loessuhlah:
Ac tuhkuh ke acn loessuhlah:
Kuht tiac muhlkuhnlah ma nuh kwewa,
Ac tiac arlac wacngihn ahkolah la,
Ke srihpen kuht kais sie isuslac ke ipin wolacna in kuht
Sin God, suc pa lohm sesr uh:
Ke kuht ahwowo uh inkuhsrao srwackna oan in kuht!6
Pahpah ninac uh motko kunohkohn lalos in luti, in mokle, ac in sang kolyuck, srihsrsrihsr, ac mwe srihkasrak. Ac ke pahpah ninac uh motko uh, tuhlihk uh—yohk na nuh sin mwet fuhsr—siyuck kihsen siyuck yohk srihpac se, efuh kuht oasr inge? Kwacna sruhmuhnyuck kahkahsrihk nuh sin sie nguhna ac fahkyuck, efuhngaoasr inge?
Kuht enenuh in sruikihn lah Mwet Orwaclah lahlmwetmwet se orwaclah facluh ac fihlikuhti inge ke lihsrlihsr ke muhlkuhnlah oasr lasr met ah kuht in muh kuh in puhlakihn sie pacl in srihkeyuck, pacl wowo se in ahkpwacyei kuht sifacna in muh kuh in fal nuh ke ma nuh kwewa God el ahkolah nuh sesr in eis uh.
Pwacye, sie ma yohk srihpac ke oasr lasr fin facluh uh pa in eis mahno luhn ikoac ac sri. Utuckuh pac nuh sesr mwe sang luhn sukohsohk in sulaclah. Ke inkacnek tausin, wo nuh sesr in sulaclah nuh sesr sifacna. Inge kuht lutlut ke enenuh upac ke puhlakihn la sifacna. Kuht akihlen inmahsrlon ma wo ac ma koluk. Kuht akihlenyac in oacna ma mwen ac emwem. Kuht konwacack lah oasr ohiyac kuhpahsr nuh ke mukwikwi uh.
Ke ahkostwen nuh ke masap luhn God, kuht kuh in fal nuh ke “lohm” se ma sruhmuhnyuck sel Jisus ke El fahkwack: “Puhkantwen acn in muhta in lohm sin Pahpah tuhmuhk. …nga ac som in ahkolah acn suwos…tuh yen Nga muhta we kowos fah oacyacpac muhta we.”7
Kuht ne tuhkuh nuh ke moul facluh uh “Ke srihpen kuht kais sie isuslac ke ipin wolacna in kuht
God, Pahpah tuhmwacsr, ac Jisus Kraist, Leum lasr, akihlenyac inkacnek se nuh ke suwohs. Elos suli kuht in ukwe ma pwacye ma pahtpaht uh ac in suwohsna, oacna Elos suwohsna.8
Mwet Sap Paul el luhngse moul uh in akuhtuhn. Nuh sin Mwet Hibru el kwacfe, “Lwelah kuht in sislah … ma koluk ma lihksrweni na sruok kuhti, ac lwelah kuht in moniyuckyang in kahsruhsr lasr suc oan ye muhtahsr uh.”9
Ke elyahlac lasr, lwelah kuht in lohacng nuh ke kahs in kahsruh lahlmwetmwet ke Ecclesiastes: “Akuhtuhn uh tiac ma in muhi se, ac mweun uh tiac ma in fokoko se.”10 Pwacyeiyac uh opi uh ma nuh sel suc kutong ne ke sahflah.
Ke nga liye ke akuhtuhn luhn moul uh, nga esamwack sie pac kain akuhtuhn, finne ke pacl luhn ohiyacn tuhlihk. Nga ac kawuck se luhk ah utuck mitmit kuhf wi kuht ac, ke sahk fihsrwacsrsrwacsr ke sahk willow soko, orwaclah oak srihsrihk uh. Ke atacn nes kuhtin kohsrohsroh se kac, kuht ac kais sie fihliyac ke kof ah in akuhtuhn nuh ten ke mukwikwi luhn kof ah ke Infacl Provo Utah ah. Kuht ac kahsruhsr ukwe siskacn infacl soko ah ac liye oak srihsrihk ah ke kuhtuh pacl uh srosro ke for upac ke acsr ah ac kuhtuh pacl uh ac tui ac kof uh nwacklah.
Ke akuhtuhn se kuht etwaclah lah oak soko pwen ma luhlah ah nuh ke sahflahiyac ah. Lihksrweni, acsr ah use apkuhran nuh ke sie for luhlahp infacl ah, ac oak uh lwenglweng nuh siskac ne lwenglah. Na furokyuck som, tiac kuh in fohlohkyak nuh ke acsr uh. Sahflahiyac ah oruh sie monglac tiac fihsracsr, wi pahtpaht infulwacn kutkut ac, srwemlah ke koan mah srwemsrwem inkof uh.
Oak in sritacl ke ohiyacn tuhlihk uh wacngihn fokokoiyac, wacngihn mwe ikwik in kol kahsruhsr la an, ac wacngihn kuhiyac. Acn ac som nuh we an pa in weoht infacl an—inkacnek soko ma wacngihn kutongyac.
Tiac oacna oak in mwe sritacl uh, utuckuh nuh sesr atac wolacna se in kol acn kuht fahsr nuh we. Kuht ilyak nuh ke moul uh in tiac pahtpaht ke mukwikwi luhn acsr luhn moul uh tuhsruhk ke kuh in nuhnak, in kotai, ac in eis.
Pahpah tuhmwacsr Inkuhsrao el tiac fihli kuhti ke kalkal luhn ma pahtpaht lasr uh ac tiac use ke kahsrweyac ke kuht eis Sel kolyuck in luhlahlfongi pain moullac in fohlohk lasr. Nga sramsram pac ke pruhe. Nga sramsram pac ke mahmah sin puhsra efahl, srihsrihk se; ac nga tiac pihlesruh ma suhmuhslah muhtahl uh, suc nwek kahs luhn Leum ac kahs luhn mwet pahluh uh—utuckuh nuh sesr in kahsrwe kuht in orwaclah wo in ahluhkwelah sahflahiyac uh.
Ke kuhtuh pacl ke misin luhn moul lasr uh, oasr ohiyac tahfuh luo sikyak, isracsr srihsrihk muhnahs se, ngal luhn mas—weacng sahflahiyacn mwet fuhsr lasr uh, fototoyang nuh ke pacl ohu, mahtohoh, ac puhlakihn se kuht pahngon misac uh.
Mwet etuh nuhnak nuh kwewa siyuck sel sifacna kihsen siyuck soko siyuckyuck wo sel Job mahtuh sac: “Kuh mwet se fin misac, yac el kuh in sifil moulyak?”11 Srihke ke kuhiyacsr in eslah kihsen siyuck se liki nuhnak lasr uh, ac fohlohk pacl nuh kwewa. Misac uh ac sun mwet nuh kwewa. Ac sun mwet mahtuh uh ke elos ac fahsr ke niyac muhnahs lalos. Pahng luhn misac uh pa lohngyuck selos suc fototoyang nuh ke infulwacn fuhfahsryuck in moul lalos, ac misac uh kwacna mwe isracsr se luhn tuhlihk srihsrihk.
Tuhsruhk meac ke oasr se tukun misac uh? Ke misac uh pa sahflahiyacn ma nuh kwewa? Robert Blatchford, ke puk se lal ahGod ac Mwet Tuhlan Luhk, lain yohk luhlahlfongi luhn Mwet Kristin ma oacna God, Kraist, pruhe, ac yohkna nuh ke moul kawihl. El fahk na suwohs lah misac pa sahflahiyacn moul lasr uh ac lah wacngihn mwet kuh in ahkpwacyei lah suhtuhuh. Na mwe lut se sikyak. Sinkac in suhlahlahlfongi lal lihksrweni na rahki mukutkut uh. El muhkwelacna muhta ac wacngihn loangweyacl. El kahkahsrihk na puhlahack fohlohk lal nuh ke luhlahlfongi se ma el ahkkolukye ac sislah ah. Meac oruh eklac usrnguck se inge ke liye lal uh? Muhtwacn kiyacl ah misac. Uslah insiyacl el som nuh lun infuckihl sac ma muhtwacn kiyacl ah oan we ah. El sulpac ngwetwacng nuh ke muhtuhn ngwetngwet se el luhngse wo ah. El tifoklac ac fahk nuh sin kawuck se la: “El tuh tiac pac el. Ma nuh kwewa eklac. Sie ma tuh oasr met itucklac. Tiac el met ah. Meac kuh in oreklac fin tiac nguhn se?”
El suhmuhslah tohkoh: “Misac uh tiac sie ma kuhtuh mwet uh luhma. E oacna in som nuh ke sie infuckihl sahyac. Ke infuckihl se sahyac an kuht fah sokwack … muhtwacn ac mukul wolacna ac tuhlihk sacohk kuht luhngse ac tuhlac uh.”12
Tamuhlwel ac tahmtahel wiyuck an, kuht etuh lah misac tiac pa sahflahiyac uh. Ma pwacye se ma lutiyuck sin mwet pahluh moul ke pacl loeloes me. Sukokyak ke ma suhmuhslah muhtahl nahtuhsr uh. Ke Puk luhn Mormon kuht riti ke kahs pwacye ac kahs in ahkkweye uh:
Nuh ke ohiyacn nguhna inmahsrlon misac ac moulyak uh, lihpufacn se fahk nuh sel Alma lah nguhn luhn mwet uh, in pacl se ma elos som liki mahno se uh, nguhn uh finne wo kuh koluk, utucklac nuh lohm ac yurin God se ma sang nuh selos moul.
Nguhn luhn mwet suwohswohs uh ituck nuh ke ohiyac luhn mwe engan, suc pahngpahng pacruhtais---acn in monglac, acn luhn mihslac, acn ma elos ac monglac liki elyah lalos ac liki karihngihnyuck ac ahsor nuh kwewa.13
Tukun Mwet Lahngo el srihpsrihpyak ah ac Mahnol fihliyucki lun kuclyuck uh ke lwen tolu, nguhn sac sulpac ilyak, ac Mwet in Molwelah moulyak se tifoklac liki kuclyuck uh, nuklac ke mahno kawihl ke ikoac ac sri.
Top nuh ke kihsen siyuck lal Job, “Fin mwet uh misac, yac elos ac sifil moul?” tuhkuh ke Mary ac kuhtuh sahyac apkuhranyang nuh ke kuclyuck sac ac liyacack mwet luo nuknuk fasrfasr sahromrom suc sramsram nuh selos: “Efuh kowos kuh suk el suc moul inmahsrlon mwet misac? El tiac oasr inge, el ahkmoulyeyuckyak tari.”14
Ke ma sikyak ke kuhtanglah luhn Kraist liki kuclyuck uh, kuht nuh kwewa fah moulyak. Pa inge molwelah luhn nguhna uh. Paul el suhmuhslah: “Ac oasr … mahno luhn ma inkuhsrao, ac mahno luhn ma fin facluh. Wolacna luhn mahno ke ma inkuhsrao sie liki wolacna luhn mahno ke ma oan fin facluh.” 15
Wolacna luhn moul pa kuht suk uh. In muhta yurin God pa kuht kena in ilyak nuh kac uh. Sucu ma pahtpaht pa kuht ke wi uh. Kain mwe insewowo inge ituckyuck ke moul srihke, suk, auliyak, ac sahflahiyac ah orwaclah.
Kuht tuhkuh oyac me? Efuh kuht oasr inge? Kuht ac som nuh oyac tukun moul se inge? Kihsen siyuck luhn facluh inge tiac enenuh in tiac topukyucklac. Ke loaliyacn nguhnihk ac ke puhsisacl nuh kwewa, nga fahkwack lah ma nga sramsramkihn uh pwacye.
Pahpah tuhmasr Inkuhsrao el engan selos suc karihngihn masap uh. El elyah pac sin tuhlihk tuhlac, tuhlihk fuhsr pahtlac, mwet fuhsr ma loessuhlah liki ip yohk luhn wosasuc, pahpah ninac tiac elyah. Emtuhngiyac, Mwet Luti Fuhlwact el fahk nuh selos inge, ac nuh sin mwet nuh kwewa: “Fohlohkoh. Fanyak. Utyak. Tuhkuh nuh lohm uh. Fahsruh nuh yuruk.”
Wik fahsruh uh kuht ac ahkfuhlwactye Istuh. Nuhnak lasr uh ac fah forlah nuh ke moul luhn Mwet Lahngo, misac Lal, ac Moulyak Lal. In ekihn mwet loh yohk srihpac se Lal, nga fahkwack nuh suwos lah El moul ac El tuhpan fohlohk fuhlwact lasr uh. Lah kain fohlohk sacn fah ma na lasr, nga pruhe ke ine muhtahl Lal—finne Jisus Kraist, Mwet Lahngo ac Mwet in Molwelah lasr, amen.