Sucu Ma Orwaclah Olwelah
Sel President Henry B. Eyring
Mwet in Kahsruh Se Met ke Prestuhnsi Se Met
Wacngihn ma tuhkuh tari kuh fah tuhkuh nuh ke sucu lowos an yohk srihpac oacna mwe insewowo luhn siliyac.
Nga kuloh lah nga oasr yuruwos ke toeni se inge tuh mwet nuh kwewa fin facluh ma sruok pristut luhn God suliyuck in wi. Kuht ahkinsewowoyeyuck in kolyuck sel Prestuhn Thomas S. Monson. Ekihn Prestuhn luhn Alu uh, el pa mukul sefanna ma moul suc oasr kunohkohn nuh ke ki in siliyac sucu ac akwuck luhn pristut nuh kwewa ma enenweyuck in sun moul ma pahtpaht uh, mwe sang wo se emet luhn God.
Oasr pahpah se ma lohng ofong suc fohlohk nuh ke alu uh ke srihpen el luhngse ma pwacye ke mwe sang sac ke insiyacl nohfohn. El ac muhtwacn kiyacl luhngse tuhlihk srihsrihk luo nahtuhlos ah, tuhlihk mukul se ac tuhlihk muhtwacn se. Oacna pahpah ninac sahyac uh el kuh in nuhnkuh engan inkuhsrao ke el riti kahs inge uh: lah ohiyacn mukwikwi oasr yohrohsr ke moul se inge fah oasr yohrohsr ke moul se fahsruh uh, tuhsruhktuh kuht ac eis wolacna ma pahtpaht, suc pa wolacna se kuht soenna eis inge uh.”1
Pahpah se suc wi kuht lohng ofong uh etuh ke inkacnek ma som nuh ke acn wolacna se ingacn. Tiacna fihsrwacsr. El etuh tari kac. Enenuh luhlahlfongi ke Jisus Kraist, auliyak loal, ac sie eklac ke insiyacl ma tuhkuh ke pisap kuhlwacng suc kahsrwel puhla nuhnak muhnahs luhngse luhn Leum uh.
Eklac wolacna tuhtahflah ke el som nuh ke tempuhl muhtahl ke mwe sang muhtahl ma Leum el ahkuhtweyac nuh sin mwet suc El sang kuh nuh kac ke tempuhl se met ke fihl in pacl se inge. Oasr Kirtland, Ohio. Leum el fahk kac:
Leum el sang masap se nuh selos in som nuh Ohio. We El ac sang nuh selos masap Lal ac elos ac eis mwe sang muhtahl ke kuh ma tuhkuh lucng me.
Elos ac enenuh in som liki acn se inge, mweyen oasr orekma yohk Lal nuh sin Mwet Luhlahlfongi in oruh, in molwelah Israel. El ac kohlohltahl nuh ke acn El luhngse elos in som nuh we, ac wacngihn kuh kuh in tulokihnilyac.”2
Nuh sin kawuck luhk suc tuhfahna sulpac wi alu ac nuh sin mwet nuh kwewa suc sruok pristut, orekma yohk se ma enenuh in sikyak pa in molwelah ip luhn Israel tuh pa ma kunacsr, sucu lasr. Kawuck se luhk ah ac muhtwacn kiyacl ah etuh lah ma se inge enenuh in siliyucki ke kuh luhn Melchizedek Pristut lun tempuhl muhtahl luhn God.
El siyuck tuh nga in oruh siliyac lal. El ac muhtwacn kiyacl ah luhngse in oreklac ke pacl na sa. Tuhsruhk ke kahfofo luhn pacl ke toeni luhlahp uh apkuhranme uh, nga lwelah elos ac pisap lalos in liye sin mwet in sihm luhk in konwacack lwen ma wo an.
Motko ke ma lut ac engan luhk ke pahpah sac fahk nuh sihk ke alu ac lah siliyac sac fah sikyak ke Eprel 3. Pa ingacn lwen se ke 1836 ke Elijah, mwet pahluh wolacna, el suhpweyucklac nuh ke Tempuhl se Kirtland ah in sang kuh luhn siliyuck nuh sel Joseph Smith ac Oliver Cowdery. Ki ingacn srwackna oasr ke Alu uh mihsenge ac fah tuhtahflah nuh ke sahflahiyacn pacl uh.3
Kuh se inge pa kuh lucng oacna sie ma Leum El sang nuh sel Peter, ke El olwelah ah: “Nga fah usot nuh sum ki nuh ke tohkohsrahi luhn inkuhsrao. Ma kom tiac lwelah fin facluh ac fa tiac pac lwelah inkuhsrao, ac ma kom lwelah fin facluh ac fah lwelah pac inkuhsrao.”4
Fohlohkoh lal Elijah ahkinsewowoye mwet nuh kwewa suc sruok pristut an. Elder Harold B. Lee el ahksuwohsye ma se ingacn ke el sramsram ke toeni luhlahp uh: fahk ke fahk lal Prestuhn Joseph Fielding Smith. Lohng ahkwoyac: “Nga sruok pristut uh; kowos tamuhlwel inge sruok pristut uh; kuht eis tari Melchizedek Pristut—ma sruokyuck sel Elijah ac mwet pahluh sahyac ah sel Peter, James, ac John. Tuh ke oasr wal lasr in pacptais, ke oasr wal lasr in fihliyac paho nuh ke mwe sang luhn Nguhn Muhtahl ac in akmuhsrai mwet sahyac in oruh ma inge, fin wacngihn kuh luhn siliyac kuht tiac kuh in oruh kuhtwena ma, mweyen wacngihn kuh suwohs in oruh ma kuht oruh uh.”
Prestuhn Smith tahfwelah in fahk:
“Akwuck lucng, mwe insewowo yohk ma enenweyuck nuh ke moul ma pahtpaht ke tohkohsrahi luhn God, ac suc kuh in eisyuck ke acn suleyucklac tari, wacngihn mwet oasr suwohs la in oruh el fin tiac eis wal in oruh sin sie suc sruok ki uh tari. …
“…Wacngihn mukul se fin facluh se inge ma oasr suwohs la in som ac oruh kuhtwena akwuck ke wosasuc se inge ne ke na Prestuhn luhn Alu uh, suc sruok ki uh, lwelah. El use wal nuh sesr, el sang kuh luhn siliyuck nuh ke pristut lasr uh, ke srihpen el sruok ki ingacn.”5
Ma pwacye ingacn pacna tuhkuh sel Prestuhn Boyd K. Packer ke el suhmuhslah ke kuh luhn siliyac. In etuh kahs inge pwacye pa ahkkweyeyuc uh, oacna nuh ke sucu nga ac fah siliyac ke Eprel 3: “Peter el suleyucklac in sruok ki uh. Peter el suleyucklac in sruok kuh, … in kapriyac kuh siliyac ke facluh kuh fuhlwelah ke facluh ac ma inge fah oacna sie nuh ke inkuhsrao. Ki inge oasr yurin Prestuhn luhn Alu uh—nuh sin mwet pahluh, mwe liyactwen, ac mwet eis fwackyuck. Kuh muhtahl in siliyac oasr yurin Alu uh ingena. Wacngihn ma sahyac nuhnkweyuck muhtahl likina wal se inge. Wacngihn ma sahyac karihngihnyuck ohinge. Oasr kuhtuhna mukul suc [sruok] kuh in siliyac se inge fin facluh ke kuhtwena pacl ituckyang an—ke kais se tempuhl oasr tamuhlwel suc eis kuh in siliyac. Wacngihn mwet kuh in eis el fin tiac eis sin mwet pahluh, mwet liyactwen, ac mwet eis fwackyuck ac Prestuhn luhn Alu luhn Jisus Kraist luhn Mwet Luhlahlfongi ke Lwen-sahflah.”6
Ke tuhkuh lal Elijah ah, tiac kuh muhkwena pa ituckyang nuh ke pristut uh, tuhsruhk oacyacpac insiyacn mwet uh in eklac pac: “Nguhn, kuh, ac pahng lal Elijah pa, tuh kowos kuh in eis kuh in sruok ki luhn fwackyuck, akwuck, lahlmwetmwet, kuh ac mwe sang muhtahl ke ma fal nuh ke Melchizedek Pristut ac ke tohkohsrahi luhn God fin facluh; ac in eis, karihngihn, ac oruh akwuck nuh kwewa ma enenweyuck nuh ke tohkohsrahi luhn God, finne nuh ke ekuhllah insiyacn pahpah nuh sin tuhlihk, ac insiyacn tuhlihk nuh sin pahpah, finne elos oasr inkuhsrao.”7
Puhla se ke insiyacl eklac ah sikyak tari nuh ke kawuck luhk ac sucu lal ah. Sahp tuhkuh nuh suwos ke toeni se inge. Sahp kowos liye ke nuhnak lowos, oacna nga, muhtuhn pahpah tomowos kuh ninac kiyowos. Kuh sahp sie muhtwacn kuh mukul wiyac. Kuh in sie tuhlihk muhtwacn kuh mukul nahtuh.
Sahp elos oasr ke facluh luhn nguhn kuh oasr ke acn loes liki kowos. Tuhsruhktuh puhla in engan tuhkuh ke mwe tahfwelah se ma olwelah tari ke srihpen kowos kuh in kapriyac yohrohlos ke akwuck luhn pristut ma God El ac ahkfuhlwactye.
Mwet suc sruok Melchizedek Pristut ac pahpah ke sucu ma siliyucki tari pa lutiyuck tari ke ma elos enenuh oruh. Wacngihn ma tuhkuh kuh ac fah tuhkuh nuh ke sucu lowos yohk srihpac liki mwe insewowo luhn siliyucki. Wacngihn ma yohk srihpac likina ahkfuhlwactye wuhlweacng luhn pahyuck ac sucu kowos orwaclah tari kuh ac fah oruh ke tempuhl luhn God.
Ohiyac in oruh ma se inge kahlwem. Nguhn Muhtahl luhn Wuhlweacng, ke ahkostwen ac kihsackuhnlah lasr, enenuh in siliyac wuhlweacng lasr ke tempuhl fin ac akihlenyuck ke facluh tok uh. Prestuhn Harold B. Lee el ahkuhtweyac kalmacn siliyucki ke Nguhn Muhtahl luhn Wuhlweacng ke fahkwack fahk lal Elder Melvin J. Ballard: “Kuht kuh in ahkfohsye mwet uh tuhsruhktuh kuht tiac kuh in ahkfohsye Nguhn Muhtahl, ac mwe insewowo lasr ac tiac oan ma pahtpaht tuhsruhktuh fin elos siliyucki pac sin Nguhn Muhtahl luhn Olwelah. Nguhn Muhtahl pa riti nuhnak ac insiyacn mukul uh ac sang lwelah lal nuh ke mwe insewowo ma ac ahkinsewowoyaclos. Na kapriyucki, wo, ac orekma na pwacye.”8
Ke Tahmtahel Eyring ac nga siliyucklac ke Tempuhl Logan Utah ah, nga tiac kahlwem suwohs ke yohk srihpaciyacn olwelah sac. Nga srwackna srihke in kahlwem ke ma nuh kwewa kac, tuhsruhktuh muhtwacn kiyuck ah ac nga sulwaclah ke muhtwacwacackiyacn yac luhmngaul ke pahyuck lasr uh in suli Nguhn Muhtahl ke kuhiyacsr nuh ke moul lasr ac sucu lasr uh.
In oacna pahpah fuhsr se, siliyucki ke tempuhl ac ke insiyuck forwacng nuh sin muhtwacn kiyuck ac sucu fuhsr luhk uh, nga ohsun nuh sel Prestuhn Joseph Fielding Smith ke pacl se emet. Ke infuckihl kahsruh luhn Prestuhnsi Se Met, acn se nga suliyuck kac, oasr mwe loh suwohs tuhkuh nuh sihk ke Prestuhn Harold B. Lee el siyuck sihk, ke srihsrngiyac nuh sel Prestuhn Smith, suc muhta siskuck, “Yac kom luhlahlfongi lah mwet se inge pa mwet pahluh luhn God?”
Prestuhn Smith el tuhfahna utyak nuh infuckihl se inge ac soenna fahklah sie kahs. Nga kuloh nuh pwacye lah nga kuh in topuk ke srihpen ma tuhkuh nuh insiyuck uh, “Nga etuh lah el.” ac nga etuh oacna ke nga etuh muh faht ah ac kahlwem uh lah el sruok kuh luhn pristut in siliyac ke facluh nohfohn.
Puhlakihn sac oruh kahs lal in fokoko sihk ac nuh sin muhtwacn kiyuck uh ke, lun sie tuhkweni ke toeni ke Eprel 6, 1972, Prestuhn Joseph Fielding Smith el sang mwe kahsruh se inge: “Pa ma luhngse luhn Leum in ahkfokokoye ac karihngihn sucu. Kuht siyuck sin pahpah uh in eis acn lalos in sifac ke lohm uh. Kuht siyuck ninac an in ahkkweye ac tahpuhk mukul tuhmwaclos an ac in oruh kahlwem se nuh sin tuhlihk nahtuhlos an.”9
Lwelah sruhkwack ma ahkosr ma kowos kuh in oruh in ekihn pahpah pristut in sulpac sruhk ac kol ekuh luhn sucu an in oasr yurin Pahpah Lucng ac Mwet Lahngo.
Ma se met, ahkyohkye ac karihngihn mwe loh lah ki luhn pristut oasr yohrohsr ac sruokyuck sin Prestuhn luhn Alu uh. Pruhe ke ma inge lwen nuh kwewa. Top uh ac fah tuhkuh ke oaru yohk in kol sucu lowos, ke puhla luhn finsrak lowos, ac engan yohk likina met ke kuhlwacnsap lowos. Kowos ac fah yohkwelihk ke engan ac finsrak, ac mwe insewowo yohk se nuh sin muhtwacn kiyowos ac sucu lowos an.
Ma yohk srihpac se ahkluo pa in luhngse muhtwacn kiyowos. Enenuh in oasr luhlahlfongi ac inse puhsisacl in sang kena lal met liki kena lowos ke ma upac luhn moul. Oasr kunohkohn lowos in weluhl sang ac karihngihn sucu an ke pacl kuhlwacnsapuh mwet sahyac pac. Kuhtuh pacl uh ma inge kuh in eis kuhiyowos nohfohn. Mahtuhlah ac mas kuh in ahkyohkyelihk enenuh luhn muhtwacn kiyowos an. Fin kowos sulaclah ke pacl se inge in oruh engan lal yohk likina engan lowos, nga olwelah nuh suwos lah luhngse lowos nuh selos fah yohkwelihk.
Ma ahktolu, oruh in sucu an nohfohn in aluhngsei. Prestuhn Ezra Taft Benson el luti:
“Ke liye ma pahtpaht, molwelah pa kunohkohn luhn sucu. …
“Yohk srihpac likina ma nuh kwewa sahyac, tuhlihk uh enenuh in etuh ac puhla lah elos luhngseyuck, ac karihngihnyuck. Elos enenuh ma inge pacl pucspucs. Kahlwem lah, ma se inge enenuh in tuhkuh sin pahpah ninac, tuhsruhk pacl pucspucs ninac uh oruh wo emet.”10
Tuhsruhk sie pac ma elyah nuh ke puhla in luhngseyuck se pa luhngse sin tuhlihk sahyac ke sucu an. Karihngihnyuck luhn tamuhlwel ac tahmtahel wiyac nuh sin sie sin sie ac fah tuhkuh ke oaru luhn pahpah ninac ac kahsruh sin God. Kowos etuh ma inge pwacye mweyen sikyak tari ke sucu lowos an. Ac ahkpwacyeiyuck kais sie pacl kowos riti ke ma upac ke sucu suwohs lal Lehi ac muhtwacn kiyacl, Sariah, ke Puk luhn Mormon.
Ohiyac wo elos orwaclah uh pa mwe kol nuh sesr. Elos luti wosasuc luhn Jisus Kraist arlac wo ac oruh pacl nuh kwewa ma tuhlihk ac kuhtuh sucu ke fihl tohkoh uh puhla inse puhsisacl nuh sin God ac nuh sin sie sin sie. Nuh ke sie ohiyac, Nephi ac mwet sahyac suhmuhslah ac saplakyang nuh sin mempucr luhn sucu suc mwet lokoalok lalos met. Nguhn ke kuhtuh pacl ahkfihsracsrye insiyacn mwet tausin ac eslah sruhnga nuh ke luhngse.
Sie ohiyac kowos kuh in oruh oacna Pahpah Lehi pa ohiyac kowos kol pruhe luhn sucu ac pacl luhn sucu, ma oacna ekuh in toeni luhn sucu. Sang pacl wo luhn tuhlihk an in pruhe ke pacl elos kuh in pruhe, nuh sin sie sin sie ke raun se suc enenuh mwe insewowo an. Akihlen sa muhtwacwacackiyacn akuhkuhin ac akihlen in kuhlwacnsap sekuhtasrihk, yohk na nuh sin sie sin sie. Ke elos pruhe ac kuhlwacnsap nuh sin sie sin sie uh, insiyac uh fah fihsrwacsrsrwacsrlah ac forwacng nuh sin sie sin sie ac nuh sin pahpah ninac kiyaclos an.
Pacl wo ahkahkosr in kol sucu lowos ke ohiyac luhn Leum tuhkuh ke kaiyuck enenweyuck. Kuht kuh in sun wuhlweacng lasr in ahksuwohsye ke ohiyac luhn Leum na kol tuhlihk nahtuhsr uh nuh ke moul ma pahtpaht.
Kowos ac fah esam kahs uh, tuhsruhktuh sahp kowos tiac liye kuh lalos ke sie mwet suc sruok Melchizedek Pristut in ahkolah sucu lal in moulkihn ohiyac oacna sie ma fah lalos ke tohkohsrahi luhn celestial. Kowos esam kahs uh. Elos etweyuck wo:
Wacngihn kuh kuh kaiyuck kuh in sikyak ke ohiyacn pristut, tuhsruhk ke kaiyuck, mong fihsracsr, ke mihslac, ac luhngse yohk.
Kuhlwacng, ac mwe etuh suwohs, ma ac fah ahkyohkye nguhna ke tiac wosonkacs, ac tiac suhlallacl.
Kuhtuh pacl uh kuht enenuh in kai sa ac suwohs ke kolyuck sin Nguhn Muhtahl, na tok ahkkahlwemye luhngse yohk nuh sin mwet se kuht kai ah, el in muh tiac liyeyuc oacna sie mwet lokoalok.
Na mwet suc kuht kai ac fah etuh lah luhlahlfongi lasr uh fokokoi likina sein luhn misac uh.”11
Ac tohkoh olwelah sac tuhkuh ke nwacsnwacs nuh sesr oacna pahpah fin acn Sion. Nguhn Muhtahl ac fah wi kuht pacl nuh kwewa, ac osra lasr pa osra luhn suwohswohs ac pwacye. Kuh lasr ac fah sun kuh ma pahtpaht, ac tiac ke ahkkohsyeyuck luhn kuh lasr ac fah tuhkuh kacsr nuh ke ma pahtpaht.”12
Pa inge ohiyac fuhlwact nuh sesr uh, tuhsruhktuh ke kuht karihngihn ke luhlahlfongi in tiac foloyak ac inse fuhlwact, Nguhn Muhtahl kuh in sang insese Lal, ac uli ac olwelah muhtahl uh kuh in tuhkuh suwohs.
Kowos ac etuh ke luhlahlfongi lowos lah Leum El fohlohkohnma ki luhn pristut, ma srwackna oasr yohrohsr—ke kuhpahsr suwohs luhn luhngse yurin muhtwacn kiyowos, ke kahsruh luhn Leum in ekuhllah insiyacn tuhlihk nuhtuwos nuh sie sin sie ac nuh sin pahpah ninac kiyaclos ke luhngse, ac ke luhngse in kol kowos in kai ac kwacfe ke ohiyac ma suli ke Nguhn.
Nga etuh lah Jisus pa Kraist ac El pa Mwet Lahngo lasr. Nga fahkwack lah Prestuhn Thomas S. Monson el sruok ac orekmakihn ki nuh kwewa luhn pristut fin facluh mihsenge. Nga luhngse ac ahkkweyacl. Nga luhngse ac pruhe keiwos. Ke ine muhtahl luhn Jisus Kraist, amen.