Finohl in Fanfan
Sel Prestuhn Henry B. Eyring
Mwet in Kahsruh Se Met ke Prestuhnsi Se Met
Fin oasr luhlahlfongi lasr ke Jisus Kraist, pacl upac ac fihsrwacsr emet ke moul uh kuh in sie mwe insewowo.
Nga lohngohl Prestuhn Spencer W. Kimball ke sie pacl in toeni, siyuck tuh God elan sang nuh sel ma upac in kuhtanglah. El fahk: “Oasr ma na upac met liki kuht, pacl wowo yohk in oreklac. Nga engankihn ma ac sikyak ingacn ac luhngse in fahk nuh sin Leum, ke puhsisacl, ‘Use nuh sihk finohl soko inge,’ use nuh sihk ma upac inge.”1
Insiyuck mokleyuck, etuh, ke nga oruh, kuhtuh ma upac ac pacl upac ma el sun tari uh. Nga puhla sie kena in oacna el yohk, sie mwet kuhlwacnsap suwohs luhn God. Na nga pruhe ke sie fong ah nuh ke sie mwe srihke in ahkpwacyei puhlaik luhk. Nga kuh in esam arlac kahlwem. Ke ekwelah ah nga sikuck muhtuhnteyak ke infuckihl sihk ah ke sie luhlahlfongi ma apkuhran na in nwacklah insiyuck nuh ke in fokwelihk.
Tukun lwen se kuh luo pruhe luhk ah topukyucklac. Ma upac se emet ke moul luhk uh ahklutyeyuc ac ahkpuhsisaclyeyuclac. Use nuh sihk lesin ke ip luo. Ma se met an, oasr mwe ahkpwacyei luhk lah God el lohng ac topuk pruhe luhk uh ke luhlahlfongi. Tuhsruhk ahkluo, nga muhtwacwacack ke sie lesin ma nga srwackna lutlut kac mihsenge in luti lah efuh nga puhla ke luhlahlfongi lah fong sac sie mwe insewowo yohk kuh in tuhkuh ke ma upac ma ac fohlohkihnyuck upac likina ma ac sikyak uh.
Ma upac ma nga puhlakihn ke pacl loeloes se somlah ah ingena srihkweni kapsra nuh ke ma tuhkuh tohkohme—nuh sihk ac elos suc nga luhngse uh. Puhs suwos ingena ahluhkwelah ma upac ke mahno, mwe nuhnak, ac puhla ma oruh kowos in tuhng oacna sie mwet kuhlwacnsap yohk luhlahlfongi luhn God ma nga etuh arlac wo. Nurse se lal ah lohng el fahk ke mwe oan kiyacl ah ke el puhla ngal an, “Ke nga srihke moul luhk nohfohn in wo ah, efuh ma inge sikyak nuh sihk?”
Kowos etuh top luhn Leum nuh ke kihsen siyuck soko ingacn nuh sel Mwet Pahluh Joseph Smith ke acn in kaclpous lal ah:
Leum el fahk nuh sel Joseph Smith lah fin enenuh in tolyuckyang el nuh in luhf uh, kuh nuh in poun mwet suhlallacl uh, ac in acnwucki ituckyang nuh sel; fin enenuh el in sisilac nuh inkof loal uh; fin noa luhlahp uh orekma laenuhl; fin eng upac uh eklac mwet lokoalok lal; fin inkuhsrao orwacni lohsr uh; ac ma nuh kwewa tuhkweni kosrwaclah inkacnek uh; ac yohk liki nuh kwewa, ac inwaclun hell fah ikackwelihk inwacluh an yohk ukwacl, el enenuh in etuh lah ma nuh kwewa inge fah sang puhlakihnyuck nuh sel, ac fah ma wo nuh sel.
Leum el fahk lah Wen nuhtin Mwet el puhtati nuh yohrohltahl nohfohn ten. Yac Joseph el yohk srihpac Luhkwel?
Leum el fahk in sruokyacna nuh inkacnek, ac pristut enenuh in oan na yohrohl; tuh acn lalos uh ahkolah, elos tiac kuh in ahluhkwelah. Lwen lal Joseph uh etweyuck, ac yac lal fah tiac ahksrihkyeyucklac; el tiac enenuh in sahngweng ke ma mwet uh kuh in oruh, tuh God el fah weluhl nuh tok ma pahtpaht.”2
Oacna in wacngihn top wo nuh ke kihsen siyuck ke lah efuh ma upac uh tuhkuh ac kuht enenuh in oruh likina kahs luhn Leum Sifacna, suc kuhtanglah ma upac uh kacsr yohk likina ma kuht kuh in kahlwem kac.
Kowos esam kahs Lal ke El sang kahs in kahsruh tuh kuht enenuh, ke luhlahlfongi in El, auliyak:
Mwet Lahngo el sapkihn nuh sesr in auliyak tuh fin te El fah uni kuht ke osra ke inwacluhl ac kasrkuhsrak Lal, ac ke foloyak Lal, ac kweok lasr fah arlac upac—kweok fuhkah ma kuht tiac etuh, kahto fuhkah ma kuht tiac etuh, upac in us fuhkah ma kuht tiac etuh.
Mwet Lahngo el fahk lah el kweok ke ma inge kacsr nohfohn elos in muh tiac kweok fin elos auliyak;
“Mwet Lahngo el fahk lah mwet uh fin tiac auliyak, elos enenuh in kweok oacna ke el oruh ah.
Kweok lal oruh el, finne God, mwet yohk liki nuh kwewa se, in rarrar ke srihpen ngal, sohrohr ke pat nuh kwewa, ac kweokkihn kwewana mahno ac nguhn. Ngal ingacn upac pwacnwacng el siyuck ac fin kuh nuh sel in itucklac liki.
“Ne ohinge, El sang wolacna uh nuh sin Pahpah. El ipeis ac ahksahfyelah ahkolah Lal nuh sesr.”3
Oasr luhlahlfongi luhk kom ma inkacnek in tuyak ahluhkwelah ma upac uh pa in luhlahlfongi lah oasr “ono in Gilead”4 se ac Leum el olwelah, “Nga fah tiac … muhlkihnkowoslac.” 5 Pa ingacn ma Prestuhn Thomas S. Monson el luti kuht in kahsrwe kuht ac elos suc kuhlwacnsap ke pacl ma oacna ma upac uh in muhkahimtacl ac kuhtangyucklac uh.6
Tuhsruhk Prestuhn Monson el oacyacpac luti lahlmwetmwet lah sie pwelucng ke luhlahlfongi ke ma pwacye ke ma uliyuckme an ac eis pacl in muhsahiyuck. Sahp kom ac kuh in liye enenuh nuh ke pwelucng ingacn oacna nga, ke sisken mwe oan luhn sie mwet ma ahkolah in fuhlweack mweun an in kahsrwelos kampare nuh ke sahflah. Fin pwelucng ke luhlahlfongi uh tiacna sie ip ke insiacsr uh, kuh in kampare uh fah puhtatlac.
Srihpac luhk mihsenge uh pa in ahkuhtweyac ma nga etuh ke ohiyac ma kuht kuh in orwaclah pwelucng fokoko se ingacn. Nga oruh ke puhsisacl yohk nuh ke srihpac luo. Ma se met ah, ma nga fahk uh kuh in ahkkolukye mwet ma tikuclkucl ke infulwacn ma upac yohk uh ac elos kuh in puhla lah pwelucng lalos ke luhlahlfongi uh muhkahlkahl uh. Ac ahkluo, nga etuh lah finne mwe srihkasrak upac uh oan met likiyuc met liki sahflahiyacn moul uh. Ke ma inge, kahs in kahsruh ma nga usot nuh suwos uh soenna ahkpwacyeiyucklac ke moul luhk sifacna ke kampare nuh ke sahflahiyac uh.
In oacna sie mukul fuhsr, nga orekma wi sie mwet kamtuh muhsahi acn falfucl ac pwelucng nuh ke lohm sasuc uh. Ke sun summer uh orekma na upac se in ahkolah infohk uh nuh ke atac ma kuht ac uki simacn nuh ke falfucl an. Wacngihn insin. Kuht orekmakihn sie mwe fukfuk ac sahfuhl se. Muhsahi pwelucng ma ac oan paht nuh ke muhsah uh orekma na upac ke pacl sac.
El sang pac mongfihsrwacsr. Tukun kuht okwacacng falfucl ingacn, kuht ac sano in paholah. Yohk likina ke kuht kena in ahkfahsrye orekma an nuh met, kuht oacyacpac sano tukun kuht okwacacng pwelucng an met liki kuht ac eslah fohm an uh.
Ac usrnguck pacna nuh sin sie mwet kamtuh sasuc pa ma oacna sie atac na ullac ac eslah pacl in sang osra par an ahkwoyac nuh lun fohm an in sang fokoko nuh ke pwelucng tari ingacn.
Ke sie inkacnek fihsrwacsr, infohk an enenuh in ahkoeyucklac wo nuh ke pwelucng in luhlahlfongi lasr in lain pahkah ma ac fah tuhkuh ke moul nuh kwewa uh. Ma kwekwe fokoko nuh ke sie pwelucng ke luhlahlfongi el suwohs la sifacna se.
Ke sulaclah ma pwacye suwohs ke oacna sie pacl ma sulaclah se fihliyucki met liki kuht uh kuht ac fah orwaclah infohk fokoko uh ye luhlahlfongi lasr uh. Kuh in muhtwacwacack ke tuhlihk srihsrihkyak e kena nguhn nuh kwewa isuslac ke sie mwe sang sukohsohk ke Nguhn luhn Kraist. Ke Nguhn se ingacn kuht kuh in etuh ke kuht ac orwaclah ma pwacye ye muhtuhn God ac ke kuht orwaclah ma koluk ye Muhtahl uh.
Sulaclah ingacn, suc ma sikyak ke pacl puhkantwen ke inkaiyacn pacl uh, ahkolah infohk fokoko ma muhsah luhlahlfongi lasr uh muhsahiyuck uh. Osra ke atacn orekma raunweack ma yohk srihpac ke luhlahlfongi lasr uh ukiyucklac uh pa wosasuc luhn Jisus Kraist, ke wuhlweacng, akwuck, ac ip yohk nuh kwewa kac uh.
Sie sin ki nuh ke sie luhlahlfongi wacngihn sahflahiyac pa in nuhnuhnkuh suwohs pacl ma kuht enenuh in sang in ahkolah uh. Pa oruh nga lahlfonlac in sana in pruhe ke moul luhk nuh ke finohl fuhlwact in fanuhk ac mwe srihke yohk uh.
Onwelah sac tiac sana tuhkuh ke fahsr luhn pacl uh, tuhsruhk ac eis kuhtuh pacl. In mahtohoh el tiac sifacna oruh muhkwena. Pa in kuhlwacnsapuh God ac mwet sahyac uh fal ke insiacsr ac nguhnasr nohfohn ma ekuhllah fahkwack luhlahlfongi lasr ke ma pwacye uh nuh ke kuh luhn nguhn fokoko.
Ingena, nga finsrak in ahkkweye mwet suc tuhfahna puhlakihn ma upac yohk uh, suc puhla muh luhlahlfongi lalos uh srihkweni ke nuhnkweyacn ma koluk uh. Ma upac an sifacna kuh in ohiyac lom in ahkkweye ac tari eis luhlahlfongi fokoko. Moroni, wen nahtuhl Mormon ke Puk luhn Mormon, el fahk nuh sesr ohiyac ma mwe insewowo uh kuh in sikyak. El luti ma pwacye fihsrwacsr ac wolacna ma orekma nuh ke finne kihtin luhlahlfongi ac lwelah God elan kahsruh yohkwelihk.
Moroni el luti lah luhlahlfongi pa ma finsrak nuh kac ac tiac liyeyuck uh; tuhsruhk kuht tiac enenuh in akuhkuhin ke srihpen kuht tiac liye, tuh wacngihn loh kuht eis nuh ke tukun ma upac ke luhlahlfongi lasr.
El fahk lah ma ke luhlahlfongi tuh Kraist el ahkkahlwemyeyacl sifacna nuh sin pahpah tuhmwaclos an, tukun el moulyak liki misac; ac el tiac ahkkahlwemyacl sifacna nuh seltahl nuh ke tukun oasr luhlahlfongi lalos Kacl; ke srihpac ingacn, enenuh in oasr kuhtuh mwet luhlahlfongi Kacl, tuh El tiac ahkkahlwemyacl sifacna nuh sin facluh.
Tuhsruhk ke srihpen luhlahlfongi luhn mwet uh El ahkkahlwemyacl sifacna nuh fin facluh, ac ahkwoyelah inen Pahpah, ac ahkolah soko inkacnek ma mwet sahyac uh kuh in ipeis ke mwe sang inkuhsrao ma elos finsrakkihn nuh ke ma ingacn uh, ma elos soenna liye uh.
Ke srihpac ingacn, kuh pac in oasr finsrak lasr, ac in mwet ipeis ke mwe sang, kuht fin ac oruh tuhsruhk ke luhlahlfongi.”7
Ip yohk srihpac se emet ke luhlahlfongi ma kom enenuh in liyacacng ac orekmakihn ke kuhiyowos pa luhlahlfongi ke Leum Jisus Kraist. Moroni el luti kuh ke luhlahlfongi se ingacn ke fahk lah wacngihn sie pacl ma kuhtwena mwet oruh ma usrnguck uh nuh ke tukun luhlahlfongi laltahl an; ke srihpen elos luhlahlfongi met ke Wen nuhtin God.”8
Nga muhtwacta nuh yurin sie muhtwacn suc eis sie ma usrnguck ke kuh fal in kuhtanglah ma koluk upac ingacn ke na kuh fihsrwacsr se in kalweni na kahs inge “Nga etuh lah Mwet Molwelah luhk el moul.”9 Luhlahlfongi se ingacn ac kahs ke fahkwack luhlahlfongi ingacn srwackna oasr ke mwe esamyuck ke tuhlihk lal wacngihnlac tuhsruhk tiacna wacngihnlac nohfohn.
Nga lut in etwaclah sie pacna muhtwacn nuhnak muhnahs nuh sins sie mwet ma oruh koluk nuh sel ke yac pucspucs. Nga lut ac siyuck sel lah efuh el sulaclah in nuhnak muhnahs ac muhlkuhnlah yac puhspuhs ke ahkkoluk na yohk ingacn.
El kahkahsrihk fahk, “Pa ma upac se emet nga orwaclah uh, tuhsruhk Nga etuh lah nga enenuh in orwaclah. Oruh nga orwaclah.” Luhlahlfongi lal lah Mwet Lahngo el ac fah nuhnak muhnahs nuh sel el fin nuhnak muhnahs nuh sin mwet sahyac ah ac ahkoellah nuh ke sie puhla ke mihs ac finsrak ke el sun misac mahlwem se na tukun el nuhnak muhnahs nuh sin mwet lokoalok lal suc tiac auliyak.
El siyuck sihk, “Ke ngwac sun acn we, ac fuhkah inkuhsrao?”
Ac nga fahk, “Nga etuh na ke ma nga liye ke kuhiyom in ahkyohkye luhlahlfongi ac in nuhnak muhnahs tuh in sie painyuck nuh lohm na wowo se nuh sum.”
Oasr sie pac mwe ahkkweye luhk nuh suwos suc ingena nuhnkuh fin luhlahlfongi lalos ke Jisus Kraist uh fah fokoko fal nuh selos in kampare wo nuh ke sahflah. Kuhtuh pac suwohs sahyac ma lohng ingena, ahkinsewowoyeyuck nga in etuh ke kowos fuhsr, fokoko, ahkinsewowoyeyuck yohk likina mwet siskowos an, tuhsruhk kowos sulaclah in oruh ma Mwet Lahngo elac oruh uh. Tuhkuh liki mwe insewowo pucspucs lowos an kowos sokwack inkacnek in kahsruh ac karihngihn mwet ma kowos srihkkihn kuh tiac lohacng nuh se ke acn lowos ke moul uh.
Ke pacl upac tuhkuh uh, luhlahlfongi in kuhtanguhloslac wo uh ac oasr, muhsahiyucklac ke kom ac kuh in akihlen ingena tuhsruhk kom soenna ke pacl sacn lah kom orekma ke luhngse nwacsnwacs luhn Kraist, in kuhlwacnsap ac nuhnak muhnahs nuh sin mwet sahyac oacna ke Mwet Lahngo el ac oruh uh. Kowos muhsahelah sie pwelucng ke luhlahlfongi ke luhngse oacna ke luhngseyuck Mwet Lahngo ac kuhlwacnsapuh El uh. Luhlahlfongi lowos nuh Sel kol nuh ke mukwikwi in luhngse pwacye ma ac fah usot finsrak lowos uh.
Tiacna pahtlac in ahkfokokoye pwelucng ke luhlahlfongi uh. Oasr pacl lwen nuh kwewa. Ke luhlahlfongi ke Mwet Lahngo, kowos kuh in auliyak ac siyuck ke nuhnak muhnahs. Oasr sie mwet kowos kuh in nuhnak muhnahs nuh se. Oasr sie mwet kowos kuh in sang kuloh nuh se. Oasr sie mwet kowos kuh in kuhlwacnsapuh. Kowos kuh in oruh acn nuh kwewa kowos oasr we an ac finne kowos puhla muhkahimtacl ac srwenglah.
Nga tiac kuh in olwelah sie sahflah ke ma upac lowos an ke moul se inge. Nga tiac kuh in ahkpwacyei lah ma upac lowos an ac sahflah ke kihtin pacl na. Sie atac ke ma upac ke moul uh pa oacna elos in orwaclah atacn pacl uh in suhmuhilac na apkuhran na in tui.
Oasr srihpac nuh kac. In etuh srihpac ingacn tiac sang ahkkweye yohk, tuhsruhk ma inge kuh in sang sie puhla ke mongfihsrwacsr. Srihpac ingacn tuhkuh ke sie ma pwacye: ke luhngse pwacye Lalos nuh suwos, Pahpah Lucng ac, Mwet Lahngo kena kom in ahkolah in Weluhlos in moul ke sucu ma pahtpaht. Mwet ma nwacsnwacslah wo muhkwena ke Iwaclah luhn Jisus Kraist kuh in oasr we.
Ninac kiyuck ah lain cancer apkuhran in yac 10. Ono ac laslas uh ac sahflahiyac in oan ke mwe oan kiyacl an pa kuhtuh ma upac nuh sel.
Nga esam ke pahpah tuhmuhk ah fahk ke el liye ke el eis momong sahflah se lal ah, “Sie tuhlihk muhtwacn srihsrihk elac som nuh lohm ah in monglac.”
Sie sin mwet sramsram ke mas lal ah pa tuhmuhn wiyacl ah ac kawuck Prestuhn Spencer W. Kimball. Inmahsrlon kaksak el orwaclah ah, nga esam sie ma sikyak oacna inge: “Kuhtuh suwos ac kuh in nuhnkuh lah Mildred kweok na upac ke pacl loes ke srihpen sie ma el oruh ma koluk sang ma upac ingacn.” Na el fahk, “Moh, sikyak ke srihpen God el luhngse in ahkwoyacl kihtin pacl pac.” Nga esam ke pacl sac nuhnkuh, “Fin sie kain muhtwacn wo ingacn enenuh yohk ahkwoyeyuck ingacn, meac oan met likiyuc uh?”
Fin oasr luhlahlfongi lasr ke Jisus Kraist, pacl upac ac fihsrwacsr emet ke moul uh kuh in sie mwe insewowo. Ke ohiyac nuh kwewa, kuht kuh in sulaclah ma pwacye ke kolyuck luhn Nguhn. Oasr wosasuc luhn Jisus Kraist in ahkwoye ac kol moul lasr uh kuht fin sulaclah. Ac ke mwet pahluh uh fahkwack nuh sesr acn sesr ke plwacn in molwelah uh, kuht kuh in moul ke finsrak wowo ac sie puhla ke mihs. Ke pacl kuht tiac enenuh in puhla lah kuht muhkwena kuh tiac luhngseyuck ke kuhlwacnsap luhn Leum ke srihpen kuht tiacna. Kuht kuh in puhla luhngse luhn God. Mwet Lahngo el olwelah lihpufacn uh ke lacsac ac lacyot lasr uh in sruhk kuhtyak.10 Ac El liyacacng kahs Lal pacl nuh kwewa.
Nga fahkwack lah God Pahpah el moul ac lah Wen Kuloh Nahtuhl pa Mwet Molwelah lasr uh. Nguhn Muhtahl ahkpwacyei ma pwacye ma lutiyuck ke toeni se inge ac fah sulpac ke kowos suk ac long ac tok ke kowos fah lutlut ke pweng luhn mwet kuhlwacnsap, sollac sin Leum ma oasr inge uh. Prestuhn Thomas S. Monson pa mwet pahluh luhn Leum nuh fin facluh nohfohn. Leum el karihngihn kowos. God Pahpah el moul. Wen Kuloh Nahtuhl, Jisus Kraist, pa Mwet in Molwelah lasr. Luhngse Lal tiac tui. Nga fahkwack ma inge ke inen Jisus Kraist, amen.