Tungorei ekkewe Misineri! Ra Tongeni Anisuk!
Seni Elter Russel M. Nelson
Seni Ewe Mwichen Engon me Ruemon Apose
Meinisin ekkewe misineri ese nifinifin ierir, ra angang ren ewe chok eu epinukunukun ar repwe anisi aramas ne anapano ochun manauer.
Nei pwi, fefenei me chienei kana achengicheng. Aau kapwong ngenikemi emon me emon ren tong. Sa fakkun pwapwa ren President Thomas S. Monson essigin non nesesor, minne a siwini ier ren angangen misineri ngeni Engon me waru ier ren emon mwan me engon me tiu ren emon fefin. Seni ei mettoch, a chommong serafo repwe ra tongeni angei ne pwapwaiti ekkewe feioch angangen misineri.
Ru ier ano, me apochokun ne era sefani nesesor, Presitent Monson a apasa “pwe itetan enuan mi nimenimoch epwe ammonata ne angangen misineri. Angangen misineri a wisan pristut—an wisen ewe Samon a annuku ngeni kich mi chapur.”1Sefan, a wewen pwe ekkwe fopun, Angangen misineri mi usun ngenir nge esap usun wiser. Sefan, I a pwan pepei ekkwe ponu ra pwan tongeni aninis.
Ach amonnata ren angangen misineri a fakkun auchea. Angangen misineri a eu angangen aninnis ngeni Kot pwan aramasen fonufan. Ekkewe misineri ra awora ei tufich ren pwisin nour monien isois. Ekkewe in me sam fiti chiener are pwan chon watiw moni fan itan ewe General Missionary Fund ra pwan tongeni aninnis. Meinisin ekkewe misineri ese nifinifin ierir, ra angang ren ewe chok eu epinukunukun ar repwe anisi aramas ne anapano ochun manauer.
An emon finata pwe epwe fiti angangen misineri epwe anapanapa manauan non pekin ngun, fiti punuan me noun kewe non chommong ier. Ewe mochenin ach sipwe fiti ewe angang a eto seni ach nuku, nimenimoch, pwan ach ammonnata.
Ren meinisin ami chon katon won unusan fonufan, chommong neimi esap ami chon ewe Mwichefenin Jises Kraist ren Aramas mi Pin non Fansoun Soponon, ese pwan watte ami sinei usun am me neum kewe misineri. Oua fiti ei mwich pun oua mochen sinei usun ekkewe Mormon, pwan met neum kewe misineri ra afanafan. Ren ami oupwe sopweno ne kakaeo usun am, oupwe kuna pwe a wor chommong mettoch sia nonnofengen won. Aua tungor ami oupwe chok amochu ekkewe mettoch mi och a fen nom reimi pwan katon ika oua pwan tongeni pachenong pwan ekkoch. Non ei fonufan a uren osukouk, fan ekkoch a namwot sipwe kutta aninnis. Namanam, ennet ese much, me neum kewe misineri ir mettoch mi auchea non ena sokkun aninnis.
Neuch kewe misineri ra nikitano ar sukun, angang, nour kamwet, pwan ekkewe ekkoch mettoch anuon me fopun ra fofori non ena fansoun non manauer. Non ukukkun 18 are 24 maram, ra nikitano meinisin pokiten ar mochen angang ngeni ewe Samon.2 Nge pwan ekkoch misineri ra angang nupwen ra pwan ekis chinnap. Ua sinei pwe ar kewe famini ra feioch. Non am famini pwisin, wanumon ra fiti angangen misineri—unumon neum nengin fiti punuer kewe, pwan emon neum tettenin neum we nengin me emon tettenin neum weat.
Ekkoch me neimi oua kan ekieki ewe it Mormon. Mi pwan eu it fan item. Esap ina wesewesen item, nge napengeni aramas ra chok sineikem ren ewe it Mormon. Ra angei ena it seni eu pukfel itan ewe Puken Mormon.
Wesewesen itan ewe Mwichefen, Ewe Mwichefenin Jises Kraist ren Aramas mi Pin non Fansoun Soponon. An Jises ewe Mwichefen a niwin sefan. Nupwen a fefetan won fonufan, A forata an Mwichefen. A kekeri Aposel, Ekkewe Fik, me pwan ekkoch chon emwen. A ngenir mwumwutan pristut pwe repwe angang fan itan.3 Mwirin Kraist me noun kewe Aposel ra mano, aramas ra siwini ekkewe angangen efeioch me afanfan. Ewe ennetin Mwichefen me pristut a poutuno. Mwirin ewe fansoun rochopwak, Jises a aniwinato an ewe Mwichefen fan aururen Semach non Nang. Iei ewe Mwichefen mi manausefan, a niwinsefan nge mi chok pwan mwokutokut fan an aurur mi fel.4
Aua tapweno mwirin Jises Kraist me afanafan usun i. Aua sinei pwe mwirin an pworacho ngeni mano non ning, ewe Samon mi manausefan a pwa ngeni noun kewe chon kaeo fan chommong. A monge rer. A fetan rer. Me mwen an niwinta nang, a ngenir wiser ar repwe “Feino… ren aramas meinisin won fonufan, oupwe papataisir fan iten ewe Sam, ewe Nau, me ewe Ngun mi Fel.”5 Ekkewe Aposel ra apwonueta an kapas. Ra pwan kekeri ekkoch pwe repwe anisir ne apwonueta an ewe Samon annuk ngenir.
Fan nemenien ekkewe aposel me soufosun ikenai, ena chok eu anuuk a tou ngeni ekkewe misinerien ewe Mwichefenin Jises Kraist Ren Aramas Mi Pin Non Fansoun Soponon. Ekkei misineri ra angang non nap seni 150 fonu. Non ar fetan fan itan Jises Kraist ra achocho ar repwe apwonueta ena annuk mi pin, ewe annuk ewe Samon a pwisin asofosefani non ach kei ran. Sipwe uwei unuasan ewe kapas annim ngeni unusan fonufan me efeiochu manauan aramas ekkis meinisin.6
Ekkewe misineri ra kukkun are fen ekis watte seni 20 ier, ir mi kukkun non pekin mettochun fonufan. Nge ra feioch ren chommong niffang—usun niffangen ewe pechekunen ewe Ngun mi Fel, ewe tongen Kot, pwan kapasen pwaratan ewe ennet—ekkei niffang ra anisir ar repwe pechekun non fetan fan itan ewe Samon. Ra aporausa ewe poraus mi murrino usun ewe kapas annim epwe wato ennetin pwapwa ese much ika repwe ausening. Nge pwan napengenir ra angang non pwan eu fonu esap fonuer, pwan kaeo fosun pwan eu fonu.
Ekkewe misineri ra achocho ne appiru Jises Kraist non kapas me foffor. Ra afanfan usun Jises Kraist me An Achasefan.7 Ra afanafan usun ewe niwinsefaniton an Kraist ewe Mwichefen akkom me ren noun ewe Samon aeuin soufous non ranin soponon, Joseph Smith.
Naman oua fen churi ika fen pwan emunungau seni neum kewe misineri. Amo ita ousap niuokusitir oupwe kaeo senir. Ir eu niffang seni nang.
Ina met a fis ngeni Jerry, emon Protestant a watte seni 60 ierin, a nonnom non Mesa, Arizona. Seman Jerry i emon meinapen Baptist; inan pwan emon meinapen Methodist. Fan eu ran, chienan Jerry itan Pricilla a aporausa ngeni Jerry usun an riaffou seni manon emon noun monukon pwan ren an kaimu seni punuan ewe. A weires ren an a emon inenap nipich, a wor foemon noun, unumon nengin me emon at. A suki netipan ngeni Jerry, a pwarata pwe a fen achangei an epwe pwisin amuchu manauan. Ren unusan an pechekun me tong Jerry a achocho ne anisi chienan pwe epwe sinei pwe manuaun a fakkun auchea. A tungorei an epwe fiti non an ewe fan, nge Pricilla a ereni pwe a fen fangeta won mettochun Kot.
Jerry ese sinei met epwe for. Pwan ekkis mwirin, nupwen a ounnu ekkewe ira non an atake, ei mwanin nuku a iotek ngeni Kot fan itan aninnis. Nupwen a iotek, a rongorong eu mongungu non an ekiek, a apasa, “Akouno ekkewe at won ekan bicycle.” Jerry a osukosuk ren met wewen ei fos. Ren an anchangei ei memmef a neta me a kuna ruemon at non ufouf uf mi pwech, ra satiw won war kewe bicycle. A mairu ren ei mettoch a fis, a katon ir ren ar satiw, nge nupwen a weweiti pwe iei autun ita epwe fos, a puchor, “Ay! Ouse mochen oupwe mo kouno! Ua mochen fos ngeni kemi!”
Non ar osukosuk nge pwapwa chok, ekkewe anuon ra kouno. Ren ar fetan ngeni Jerry, Jerry a kuna pwe a wor nour esinesinen it mi pwarata pwe ir misineri seni ewe Mwichefenin Jises Kraist Ren Aramas Mi Pin non Fansoun Soponon. Jerry a nengenir me apasa, “naman oupwe fen ekkis osukosuk ren met upwe era nge nupwen ua iotek eu mongungu a ereniei ‘akouno ekkana at won ekan bicycle.’ Ua neta won ewe an iwe ua kunakemi. Oua tongeni anisiei?
Ekkewe misineri ra emenimen me apasa, “Ewer, aua tongeni.”
Jerry a aporausa ngenir an Pricilla ewe poraus mi anoninen. Ekisano chok mwirin ena, ekkewe misineri ra poputa ne churi Pricilla, noun kewe, pwan Jerry. Ra poraus usun popun manauach me an Kot kokkotun manau esemuch. Jerry, Pricilla, me noun kewe ra mamarita non nuku seni ar ennetin ikiotek, ar akanneani ewe Puken Mormon, pwan ewe tong me chiechieoch seni chon ewe Mwichefen. An Pricilla kewe tipemwaramwar me an ekiekin pwisin amuchu manauan ra siwin ngeni apinukunuk me pwapwa. Ra papatais me winiti chon an Kraist ewe Mwichefen mi niwinsefan.8
Ewer, ekkewe misineri ra tongeni aninnis non sokopaten napanap. Awewe chok, ika ka mochen usun neum kewe newo. Naman ka sinei itan inom me semom pwan neum kewe inenap me semenap, nge met ren iner me semer kewe? Ka sinei iter? Ka mochen kaeo usur? Tungorei ekkewe misineri! Ra tongeni anisuk!9 Ir mi tufichin katon ekkewe chommong uruon famini an ewe Mwichefenin Jises Kraist Ren Aramas mi Pin Non Fanoun Soponon.
Ekkoch me neimi ami chon ewe Mwichefen nge ouse chok fiti. Ka tongei ewe Samon pwan fan chommong ka anchangei om kopwe niwin. Nge kese chok sinei ifa usun kopwe poputa. Ua pesei kemi, tungorei ekkewe misineri!10 Ra tongeni anisuk! Ra pwan tongeni aninnis ren ar repwe aiti aramasom kewe. Am me ekkewe misineri aua tongeikemi pwan mochen uwei ngenikemi pwapwan me saramen ewe kapas annim.
Ekkoch me neimi oua mochen sinei ifa usun oupwe pworacho ngeni ami fofforungau mi weires oupwe poutano pwe oupwe manauetam me pechekun. Tungorei ekkewe misineri! Ra tongeni anisuk! Ekkewe pwan angangen stuti a pwarata pwe chon ewe Mwichefenin Jises Kraist Ren Aramas Mi Pin Non Fansoun Soponon ra pwan fakkun pechekun non inis. Ukukkun nour mei ma ese pwan watte, pwan non ekkewe stuti non fansoun tam a pwa pwe tamen manauer mi tam seni ekkewe ekkoch mwich.11
Ekkoch me neimi oua mefi osukosuk me fitikoko, nge anonnon non netipemi oua mefi pwe mi po, ese wor popun. Tungorei ekkewe misineri! Ra tongeni anisuk! Ra tongeni anisuk om kopwe kaeo usun ennetin popun manauach—pwata sia nom won fonufan, pwan ia sipwe feino ia mwirin ach mano. Ka tongeni kaeo ifa usun ewe kapas annimnn Jises Kraist mi niwinsefan a tongeni anisuk nap seni mettoch meinisin.
Ika a wor om noninen fan itan om famini, tungorei ekkewe misineri! Ra tongeni anisuk! Angangen apechekuna famini a fakkun auchea me ren chon ewe Mwichefenin Jises Kraist. Ekkewe famini ra tongeni nonnom fengen feinfeno. Tungorei ekkewe misineri ra tongeni aituk ifa usun a tufich fan itan om famini.
Ekkewe misineri ra tongeni anisuk om mochen anapano om sinei. Ewe ngunun aramas a mochen kakaeo ennet. Ika ewe ennet a eto seni ekkewe nenien angangen science are fen seni Kot, kich mi chok kukutta. Ewe ningen Kot mi ennetin an mirit.12
Non ach anapano ach kaeo mi pachenong mettoch non pekin ngun pwan pekin inis. Aua tiniken non am poraus usun auchean ach weweiti ekkewe pukfel. Eu stuti a pwarata pwe chon ewe Mwichefenin Jises Kraist ra numpa eu non sinei usun Christianity me ewe Paipen.13 Ika ka mochen anapano om sinei usun ewe Paipen, ewe Puken Mormon, pwan anapano om sinei usun aramas me wisan Kot wisen sam, tungorei ekkewe misineri! Ra tongeni anisuk!
Chommong me neimi a wor ami mochen anisi aramas. Pokiten am aua tapweno mwirin Jises Kraist, Aramas mi Pin non fansoun soponon ra pwan angang fan ena mochen mi pechekun.14 Meinisin ra tongeni fitikem non am angang ngeni chon riaffou non osukosuk won unusan fonufan. Ika ka mochen fitikem, tungorei ekkewe misineri! Ra tongeni anisuk!
Pwan ika ka mochen sinei usun manau mwirin ach mano, usun nang, usun an Kot kokkot, ika ka mochen sinei usun ewe Samon Jises Kraist, An angangen Achasefan, pwan ewe Niwinsefaniton An ewe Mwichefen usun a for akkom, tungorei ekkewe misineri! Ra tongeni anisuk!
Ua sinei pwe Kot mi manau. Jises i ewe Kraist. An ewe Mwichefen a niwinsefan. Ua ikiotek pwe Kot epwe efeiochu emon me emon ami pwan meinisin neuch kewe misineri mi achengicheng, fan itan Jises Kraist, amen.