Kopwe Wenewen non Pwara, Pochokun, me Foffor
Seni Pisop Gary E. Stevenson
Pisop Unusan
Ami oupwe nimenimoch usun chok ekkewe 2,000 sounfiu ren ami oupwe wenechar non pwara pwan forochu wisemi chon pristut.
Nepwinei ua kapas ngeni ekkewe anuon, chon ewe Pristut seni Aaron, mi chufengen seni ekkis meinisin won fonufan ren ei mwichenapen pristut. Upwe poraus seni ewe Puken Mormon a awewe Ilaman me noun kewe 2,000 sounfiu. Ewe wokisin epwe awewe nikinikinin manauan ekkewe atin nom—me pwarata fan itemi, atin souneng. Ai aea wokisin a apasa pwe meinisin ir anuon, me ra fakkun pwara, me non pochokun me foffor; Nge esap ina chok—ir mwan mi ennet non fansoun meinisin.”1 Pwara, pochokun, foffor, me ennet—nikinikinin manau mi och!
Ua mochen aucheani eu nikinikinin manau a awewe ir: “fakkun pwara.”Me rei, ei a awewe an ekkei anuon mochen ne ennetin fori met mi pung, are usun Alma a awewe, “utano pwe ami chon pwarata Kot ren mettoch meinisin … me non sokkopaten neni ami mi nom non. 2”Ekkewe 2,000 sounfiu ra weri chommong fansoun ne awewe ar pwara. Emon me emon ami oupwe pwan weri fansoun non manauemi mi namwot pwara. Emon chienei, John, a aporausa ngeniei eu fansoun.
Ekkoch ier ra no John a etiwa ngeni eu college mi napanap non Japan. Epwe eu kinikinin ewe prokramin chon sukun chon wasona ren pwan ekkoch chon sukkun seni ekkis meinisin won fonufan. Ekkoch ra fiti ren ar mochen anapano ar weweiti oreni me kapasen ewe fonu, ekkoch ra kuna pwe mi eu kinikinin ar repwe angang non Japan, nge meinisin ir ra su seni imwer pwe repwe kaeo won eu fonu touau.
Mwirin chok John a war, porausen eu parri epwe fis won osun imwen emon a choufetan nein ekkewe chon sukun chon wasona—meinisin mi etiwa. Ena pwinin, John me ruemon chienan kewe ra feino ngeni ewe neni.
Mwirin ar feita won osun ewe imw, John me chienan kewe ra tota ekkewe kinikin me ra chiechi fengen ren ekkewe ekkoch. Mwirin ekkis fansoun, a siwini nikinikinin ewe parri. Mi watteno akurangen ewe kon, poraus, me ewe sakkaw, me John ese chuen kinamwe. Mwirin chok, emon a poputa ne ochufengeni ekkewe chon sukun non eu kukkumos ren ar mochen un maruo. John a mesen song me a ereni ruemon chienan kewe pwe a tori fansoun ar repwe suno. Emon, non an kapasen takiri, “John, mi mecheres ei—sipwe chok uta non ewe kukkumos, me nupwen a tori kich, sipwe chok pwan pasini ngeni ewe emon nge sisap un seni. Iwe ina usun sisap asawa kich fan mesen meinisin me ren ach suno.”Ekkei mi mecheres ngeni John, nge ese pung. A sinei pwe epwe pwarata netipan me epwe fiti foffor. Mwirin ekkis a pwara me a erenir pwe repwe fori met ra mochen, nge epwene suno. Emon chienan a fini pwe epwe chok nom me epwe fiti ewe kukkumos; ewe pwan emon a fiti John ne totiw seni osun ewe imw. Ir ra mairu pokiten chon police ra suki ekkewe asam, feiniu senir, me ra muttir feita won osun ewe imw. John me chienan ra totiw me ra feino seni ewe imw.
Nupwen ekkewe chon police ra pwa asan ekkewe kinikin, ekkewe chon sukun ra moneno ewe maruo pwe esap pwa ar tipis. Nge, mwirin ra war, ekkewe police ra atettenei meinisin won osun ewe imw me a tingorei emon me emon ne eitau poun kewe. Ekkewe police ra fetan, me ra tini poun emon me emon chon sukun. Meinisin ra komoch ewe maruo, ina mo ika rese un seni, ra tipi ngeni, me a watte niwinin. Napengeni, ekkewe chon sukun ra nom won osun ewe imw ra oturau seni ewe sukun. Ekkewe chon akkomw aea maruo ra tipi ngeni me ra oturau seni Japan, me rese tongeni niwin fan fitu ier. Ar mochen fiti sukun, chommong ierin ammonata, me ewe tufichin ar repwe angang non Japan mi muttir tano.
Iei upwe erenuk met a fis ngeni ekkei unumon chiechi. Ewe emon a nom won osun ewe imw a oturau seni ewe sukun non Japan minne a fakkun angang weires ne fiti me niwin ngeni nenian. Ewe emon a fiti John non ena pwinin ne su seni ewe parri a awesano an sukun non Japan me a feino pwan sukun non Merika non sukun mi napanap. A niwin ngeni Asia, me a fefeita non an angang. A chuen kinisou ngeni John ren an nenien appiru. Iwe niwinin manauen John mi fakkun napanap. An fansoun non Japan a emweni an epwe pupunu me ra nounou ruemon at. A fakkun fefeita non angang me a winiti emon sense non eu sukun non Japan. Oupwe ekieki ifa sokkofesenin manauan ika ese pwara ne su seni ewe parri non ena pwin non Japan.3
Ami kana anuon, epwe wor chommong fansoun nupwen ami, usun chok John, oupwe pwarata ami pwara fan mesen chienemi kewe, me niwinin mi tongeni usun ar repwe takiruk me kopwe sau. Pwan, non ach ei fansoun, a wor chommong sossot sipwe fiu ngeni nupwen sia anaemon nupwen sia nengeni mettoch won computer. Mi wor mettoch mi och ren fisin technology nge a pwan wor sossot minafo aramas rese mo kuna. Mi wor eu poraus minne a pwar pwe serafon ikenai ra sossot napanap non sukun iteitan ran nge pwan ren ar fansoun won computer. A pwar pwe serafo ra weri sossotun niosen un sakau are safei mi ngaw won computer ra fakkun sossot ar repwe sotuni ekkena mettoch. Emon cabinet secretary seni nom a apasa: “Ei poraus a pwarata pwan eu sokkun sossot nefinen chiechi—sossot won computer. Sossot won computer a nap seni chienen emon semirit me ekkewe ir ra kukuno fengen. A tonong non ewe imw me non nenien emon semirit fan ewe Internet.”4 Ewe pwaratan pwara epwe nikinikinin emon epwe etiki are esap etiki. Misineri ra kaeo seni Preach My Gospel,“Met ka fini kopwe ekieki me fori nupwen ka anaemon me ka nuku pwe ese wor emon a katon mi wewe ngeni ukukun om nimenimoch.”5 Oupwe pwara! Oupwe pochokun.”6
Ami kana anuon, ua pwon pwe ewe Samon epwe apochokunakemi. “Pwe ewe Ngunupin, ewe Kot a fen fang ngeni kich, ese fori kich pwe sipwe pireir, nge a fen aurakicheno ren manaman.”7 Epwe efeiochukemi ren ami pwara me fofforoch—ren pwapwa me kinamwe. Ena pwara epwe niwinin om nuku non Jises Kraist me An we Achasefan, om iotek, me aneasochisi ekkewe annuk.
Preseten N. Eldon Tanner a apasa: “Emon at non sukun a tongeni fakkun pwarata pochokunen met mi och. Emon anuon mi fiti urumoten football, are non sukun, are nein chienan kewe a tongeni fofforoch, me ren an manaueni ewe kapas allim, sufoniti an pristut, me uta ren met mi pung. Fan chommong oupwe weri esit me takir seni ekkewe ir ra pwan nuku usumi chok, ina mo ra sufonituk ren om fori met mi pung. Nge oupwe chechemeni pwe ewe Chon Amanau a pwan weri esit, takir, aramas ra otuf won i, me a irapenges pokiten esap apwangapwang non nuku. Oua ekieki usun met epwe fis ika a apwangapwang me a apasa, ‘O, met chok popun?’ me a fangeta? Sia mochen fangeta, are sia mochen winiti chon angang mi pochokun ina mo mi chommong mettoch mi ngaw won fonufan? Sipwe pwara ne uta me annea nein ekkewe ennetin chon tapweno Kraist.”8
Ua tingoreikemi pwe oupwe nimenimoch usun chok ekkewe 2,000 sounfiu me ren ami oupwe pochokun non pwara non wisemi chon pristut. Oupwe chechemeni, pwe met oua fori, ia oua feino ia, me met oua kuna epwe fini ifa usun oupwe winiti. Met oua mochen winiti? Oupwe winiti emon tiiken, sense, me prist mi nimenimoch. Oupwe finata pwe oupwe nimenimoch pwe oupwe angei wisemi nupwen a tori ierimi me pwan angei ewe Pristut seni Melkisetek. Ewe manamanen Kot a pwarata non efeiochun ewe Pristut seni Melkisetek. Ina ewe anen wenechar minne a tingor ren aninnis mi pin. Ewe Samon a apasa, “Non ekkewe foffor mi pin, ai we manaman a pwa.”9
Sam me in kewe, chon emwen non ewe pristut, me kokkor kewe seni ekkewe soufos sia kuna non omw we Duty to God me For the Strength of Youth repwe emwenuk won ewe an.
Preseten Thomas S. Monson a kapas:
“Ne fini met mi och, mi namwot pwara ewe pwara ne apasa apw, ewe pwara ne apasa ewer. …
“Ua tingoreikemi pwe oupwe finata [iei] pwe ousap rikino seni ewe an minne a emwenikich ngeni: manau ese much ren Semach won Nang.”10
Usun chok ekkewe 2,000 sounfiu ra uta ngeni ewe kokkon maun seni ar souemwen, Helaman, me ra ochufengeni ar pwara, ami oua pwan tongeni fori usun chok me ren ami tapweno ewe souemwenin soufos, Preseten Thomas S. Monson.
Nei kana chon ewe Pristut seni Aaron, ua pwarata ai kapasen pwaratan Kot ewe Sam me Jises Kraist me ekkewe kapasen Joseph Smith nupwen “a pesei kich ach sipwe sopweno non eu angang mi napanap. A era sipwe sopweno me sisap niwinno Pwe sipwe pwara, sopweno ngeni ewe win!”11 Non iten Jises Kraist, amen.