Ewe Achasefan
An Preseten Boyd K. Packer
Presetenin ewe Mwichen ekkewe Engon me Ruemon Aposel
Ia chok nouch kewe mempa ika missineri ra feino, ach poraus mi uren nuku me apinukunukoch non ewe Chon Amanau Jises Kraist.
Ai poraus a aporausa ngeni ekkewe aramas neich ir ekkewe mi riaffou, chou ren niamam me apwangapwang, netipengau, me osupwang.
Non irin 1971, wisei pwe upwe fiti ekkewe mwichen steik non Nótón Samoa, ewer fengen me förutan eu Steik söfö non fönuen Upolo. Mwirin ekkoch interview aua sata won fönuen Savai me sepenien ne fiti eu mwichen steik me ikan. Ewe sepenien a ósoutiw won eu nenien sipa me won Faala me ita epwe niwensefan ngeni fonuen Upolo non an neanowas.
Ranin ita aupwe niwinsefan me Savaii, a pung ran. Ra sinei pwe esap tongeni soutiw won sipa mi chochon, iwe aua sa noto nepekin ewe fonu ian a wor eu nenien ósoutiw sepenein minen angnget. Aua mwo witiwit tori nepwin, nge ewe sepenein ese war. Mwirin, awa rong me radio pwe a wor eu mönümön, me ewe sepenein ese tongeni sá. Aua koko me radio pwe aupwe sai me won mota. Emon ita epwe churi kem me Mulifanua.
Nupwen aua satiw seni Savaii, kaptin ewe mota minne taman epwe 40 fit (12 m) a eisini ewe presetenin ewe mission ika a wor etin noun tenki. Feiochun, pwe a wor me a niffang negni ewe kaptin. Aua feino aukukun 13 mail (21 km) tori fonuen Upolo won sat mi nóónó. Ese wor emon neich a sinei pwe eu mönümön watte a pung won ewe fonu, me aua sainong nukunapan.
Aua wareiti nóómwun Mulifanua, mei wor eu ánúk ita aupwe kuna me nukunapen ewe wooch. Etin tenki me neman mi asan ewe pi me pwan etin tenki me fan ra pwari ikifai ewe an mi chokisikis. Nupwen ewe mota a nom mwen ekkewe tenki pwe repwe etetenoch ina epwe tongeni sanong nefinen ekkewe fau minne ra nom unukun ewe an.
Nge non na pwinin mei wor eu chok tenki. Ruemon elter ra nom witiwit me won ewe oror ne churikem, nge non am we sai aua kon mang. Mwirin ar nennou fan fitu awa ne kuna esisinen noum we mota, ekkewe elter ra pekus me annut, iwe rese etiki orutikin ewe tenki, ewe tenki me fan. Iwe pokiten ei mettoch ese fat ánúken ewe wooch.
Ewe chon emwen a emweni ewe mota ren aukukun an tongeni ngeni ewe tenki me asan won ewe pi me nupwen emon sou mota a etikatiw ewe kokunen tenki mwen ewe mota ne kutta ekkewe fau mwach. Aua tonegni rongei ekkewe nónó mi minatiw won ewe wooch. Nupwen aua kan ne kuner ren ewe tenki, ewe chon emwen a kokko ne sa kosang me sasefanino ne sotun kutta ewe an.
Mwirin fitu sossot, a kuna ese tufich ne kutta ewe an. Aua chok tongeni achocho ne sano ngeni ewe nóómwun Apai ina epwe 40 main (64 km) seni ikei. Ese wor am pochokun mwen messan ei nono watte. Use chechemini eu fansoun epwe tori ukukun rochopwakan ei fansoun.
Ause mwitireno ren ewe aeiuin awa, inamwo ika a much pakirin ewe mwesin. Ewe mota a sata won och noom watte usun eu chuuk o a mwo nom me asan ewe noom ren tapen ewe mota ra mwo nom nukun ewe sat. Chechechin tapen ewe mwessin ita nge epwe chechecheno tori a mwufesen ewe mota me mwen a satiw epekin ewe noom.
Aua chapweno won pisekin ewe mota, me amochu epekin ekkewe pisek ren poum o pwan epekin ren etun pecheiem, pwe ausap torutiw nesat. Pwich we Mark Littleford a nu seni poun o a turutiw won efoch mecha minen iron. A ku mokuran, nge ewe mecha a epeti pwe esap poutuno nesat.
Nge iwe, aua soposopweno me ina epwe arapakan ne ran nge aua war ngeni nómwun Apia. Ekkewe mota mi ririfengen pwe rete toropaseno. O ra eppeti nukuchön ewe oror pwe ausap sanong. Aua tota wor, me achocho pwe ausap fongunir mi annut won teekin ekkewe mota. Aua feino ngeni Pesega, apwasata ufem, me feino ngeni Vailuutai ne kauta eu steik sofo.
Use kon sinei ion a ita repwe autikem neppin Mulisanua. Use mut ngenir ar repwe ereniei. Nge mi pung pwe ika ese nom we tenki me fan, namen am aupwe pouteno nesat.
Mi wor non nouch puken kon eu kon minen nom me sise kon sou ani pwe a wor wewen auchea ngeniei.
Feiochun Kot usun saram.
Saramto seni imwan,
Ngenikich pwe sipwe aani,
Asaramen fonufan.
Om saram, epwe tineto,
Asaramano won sat;
Ngeni kich pwe sipwe ani,
Repwe weri manau ren.
A rochuno nepwinin tipis.
O akurangen nónón song,
Mesen pwos mi nengeni,
Ekkewe saram nom nepi.
Ua kapas ikenaei ngenir ekkewe namen ra poutuno me ra kutta ewe tenki me fan an epwe emwenir sefanito.
Mi chok wewe seni nepoputan pwe non manauach kich sisap tongeni unusoch. Esap ekiek pwe sisap tongeni manaueni manauach nge sisap apwonueta eu nein ekkewe annuk.
“Pokiten aramasen fonufan ra ani oput Kot, seni chok non fansoun an Atam turutiw, iwe ewe netip epwe chok nom rer fenfeino chok, chinon chok ika emon a fakkun mochen etiwa ewe Ngun mi Fen non netipan, iwe, epwe pwiniti seni I ekkewe mettochun fonufan, iwe, tonong non ewe it aramas pin ren ewe asoren fangeno manauan an Kraist ewe Samon. 2
Seni ewe Foun fau mi Auchea, sia weweiti pwe ese wor nimeningaw epwe nom non mwun Kot, 3iwe eu an a for fanitach minne sia tipis ne aier me winiti nimenimochun nom mwen mesan Samach won Nang sefan.
Emon Chon Achasefan, o Manausefan a finata, pwe epwe manaueni manauan non unusoch, me esap tipis, o epwe ani “manauan pwe och niwinin tipis, ne apungu itichikin ewe annuk, ngenir ekkewe mi mosonoson me netiper, me ngunun omusomus; me sap wor emon mi tongeni apungano itichikin ewe annuk.”4
Ren auchean ewe Achasefan, Alma a afanafana, “Pun mi auchea pwe eu achasefan epwe fis; … are aramas meinisin repwe poutmwanino.”5
Ika ouse tipis, iwe ese namot ngonuk ewe Achasefan. Ika oua tipis, me ewer kich meinisin sia fen tipis, ika mwo kisikis are watte, iwe mei wor namwotan watte pwe oupwe kuna ifa usun ra tongeni nimotisenikemi pwe ousap nom non kiroch.
“[Jisus Kraist] I ewe saram me ewe manauen fonufan.”6 Nupwen sia nefocheno won I me An afanafan kewe, sipwe emwen ngeni ewe nóómun tumun ngun.
Ewe aunungatin annukun nuku a appasa, “Sia nuku pwe ren ewe Achasefanin Kraist, aramas meinisin mi tongeni manausefan, ren anneasochis ngeni ekkewe annuk me angangen ewe Kapas Annim.”7
Preseten Joseph F. Smith a afanafan: “Mwan esap tongeni omusano pwisin tipisir; rese tongeni nimot senir niwinin tipisir. Mwan a tongeni kau ne tipis me fori ewe pung non fansoun mwach, o ren aukukun murinnon ar foffor mwen ewe Samon ra tongeni winiti nimenimochun an epwe ekiekin omuser. Nge ion epwe apungu foforungawer ngeni pwisin ir o ngeni chon orur, ika mwo nge usun ese tufich pwe repwe pwisin apungu? Seni ewe achasefanin Jisus Kraist tipisin chon omusomus repwe totono; ika mwo mi par repwe pwechepwech usun chok unen siip [nengeni Isaiah 1:]. Iei ewe pwon ngenikemi.”8
Sise sinei tichikin ifa usun ewe Samon a apwonueta ewe Achasefan. Nge sia sinei pwe feingawan ewe irapenges mi chok eu kinikinin ewe feiengaw minne a poputa non Gethsemane—ewe neni pin usun an weiris—me a wesino me won Golgotha.
Luke a makkei:
“Iwe a feino senir ukukun towawen moneian emon fau o a fotopukutiw o iotek,
“A apasa, “Semei, ika ka mochen, kopwe angei ei kapen riafou seni ei, nge esap netipei, nge netipom epwe pwonueta.”
“Emon chon nang a pwa ngeni o a apochokunata i.
“Non an riaffou wachemuk a fakkun achocho ne iotek, mononan a chok ussun supun chcha a suputiw won ewe pun.”9
Usun aukukun ai sinei, mei chok wor eu poraus mi mak me non pwisin anon ewe Samon, pwe a tichikatiw met a fis ngeni I me non ewe Ataken Gethsemane. Ewe kapas pwarata a era:
“Nge nengeni, Ngang, Kot, U fen weri ekkei mettoch faniten meinisin, pwe resap riaffou ika repwe aier;
“Nge ika resap aier repwe riaffou usun Ngang;
“Minne riaffoun a for pwe Ngang, ewer pwe Kot, ewe napanap, pwe upwe chechech ren feiengawan, me cha seni unusan inisi. ”10
Ren unusan manaemi, meni mi wor fansoun nupwen oua nom non neni ita ousap nom ia me fori och mettoch ita ousap fori. Ika oupwe kunuseni tipis, eu ran oupwe tongeni sinei usun ewe kinamwe a war seni om tapweno won anen aier unusoch.
Ese nifinifin ifan ach tipis, ina mwo ifan aukukun ach fofor ra effeiengawa chon oruch, ewe netipengaw epwe tongeni totono. Ngeniei, namen ekkewe kapas mi kon ningeno non pukefen ina nupwen ewe Samon a era, “Nengeni, I ewe a aeir seni an kewe tipis, I ewe epwe museno, me Ngang, ewe Samon, usap checheminir sefan.”11
Ina popun ewe kapas allimen Jises Kraist me ewe Achesefan: ne angei ir meinisin mi feito, ir meinisin repwe chufengen, me ngenir och mettoch non manauer pwe nesopun manauer, repwe tongeni tonong non ewe katen ren aeir seni tipisir me ra nimenimocheno ren chaan Kraist. 12
Ina met ekkewew aramas mi pin non fansoun soponon ra for non unusen fonufan. Ina ewe Saram sia ngenir mi nom non rochopwak me ra poutuno. Ian nouch kewe memper me misineri ra fenio ia ach poraus ina porausen nuku, me apinukunuk non ewe Samon Jises Kraist.
Preseten Joseph Fielding Smith a makei kapasen ewe kon “Mi Nangatam ewe Sai?” Minne a wor kapasen nukunuk me eu pwon ngeni ir minne ra achocho ne tapweno afanafanen ewe Samon:
Mi Nangatam ewe Sai?
Mi weires me tameta?
Mi wor fönúfön won ewe an?
Ekkewe fau mi ken ra ku pecheom?
Non om achocho ne tota
Tori asan me nukunapan pwichikaren ewe ran?
Mi weires me netipengaw netipom,
Ngunum mi pekus me non en,
Non om angang fan osum osen tumun?
Mi chou ngonuk osum
Minne wisom kopwe eki?
Ese wor emon epwe ekifengen osum reom?
Amo netipom esap fangeta.
Iei ewe sai a poputa;
Mei wor emon mi chuen pesei ngonuk.
Iwe neta non pwapwa
Me amwochu poun we;
Epwe emwenuk ngeni neni asan sofo—
Eu fonu mi pin me unusoch,
Me ian ese wor osukusuk,
Me manauom epwe ngaseno seni tipis meinisin,
Ian ese suputiwen chonun mas,
Pwe ese wor netipengaw.
Amochu poun me tonong ren.13
Non iten Jises Kraist, amen.