Akkom Katon, Mwirin Angang
Seni Linda K. Burton
Presetenin Fin Anisi Unusan
Ren angang, sia tongeni winiti usun chok ewe Chon Amanau nupwen sia angang ngeni noun Kot kewe.
Eu nein ekkewe minen pwarata mi fakkun napanap pwe ach sofuos, President Thomas S., mi noun ewe Samon chon angang ina pwe a kaeo ne tapweno an ewe Chon Amanau nenien appiru—a angang ngeni emon me emon. Ekkewe ir ra tonong non konikin papatais ra pwon pwe repwe fori usun chok. Sia pwoneni ne “chechechemni [ewe Chon Amanau] fansoun meinisin me anneasochisi An kewe annuk,”1me A apasa, “Iei ai annuk: oupwe tong fengen, usun chok ua tongei kemi.”2
Nengeni ifa usun ekkei kapas seni Preseten Monson ra pwan tingor usun chok: “Mi wor chommong neich mi namwot aninis seni kich, ach kapasen pesepes, ach pochokun, ach kinamwe, ach kirokiroch.… Kich mi ekkewe poun ewe Samon ikkei won ewe fonufan, me a annuku ngenikich ne angang me ekieta Noun kewe. A anongonong won emon me emon kich”3
Oua rongorong—ewe tingor ne tong fengen nefinach? Ren ekkoch aramas, angang ngeni emon me emon ese mecheres, usun tapweno mwirin ewe Chon Amanau me An awewe. Nge ren angang, sia tongeni winiti usun chok ewe Chon Amanau nupwen sia angang ngeni noun Kot kewe. Ne anisikich ne tong fengen nefinach, ua mochen sipwe chechemeni ruanu kapas: “Akkom katon, mwirin angang.”
Chipu 40 ier a no, am me punuei we aua feinno ngeni ewe tempel fan eu pwinin Enimu. Aua pupunu ekkis chok fansoun, me ua ekkis noninen pokiten mi chok oruan ai fansoun mwirin ua pupunu. Emon fefin, a mommot arap ngeniei a kunaei. A kinito me a kapas, “Kosap noninen. Upwe anisuk.” Ai nioukus a kisikisino, me ua tufichin apwapwaiti nusun ewe fansoun non ewe tempel. A akkom katon, mwirin angang.
A wor eu tingor ngenikich meinisin ne tapweno an Jises kewe afanafan me angang ngeni ekkoch. Ei tingor ese chok kouk ren fefin. Nupwen ua aporausa ekkoch awewen chon mwichefen ra kaeo ne katon me angang, oupwe ausening ngeni awewen an Jises kewe afanafan.
Emon chon Kinter a onu ierin a apasa: “Nupwen ua kefinita ne emon chon aninisin klas, ua tongeni fini emon chiechi ne angang rei. Ua fini [emon at non ai we klas a kirikiringaw ngeniei] pokiten ekkoch rese mo fini. Ua mochen pwe epwe mefi pwapwa.”4
Met ei semirit a kuna? A kuna pwe ei semirit a kirirkingaw ese mo fini. Met a fori ne angang? A fini pwe epwe chiechi ngeni i non wisan chon aninisin klas. Jises a aiti, “Oupwe tongei chon koum ngeni kemi o iotekir ekkewe mi eriaffou kemi.”5
Non eu wart, chon ewe Pristut seni Aaron ra akkom katon me iei ra angang. Iteitan wik ekkewe anuon ra warekai me ra uta me nukun ewe imwen fel nupwen a pung ran, pung snow, are a pwichikar, me ra witi ekkewe chon ar wart mi chinnap. Ra ekki wheelchair me pisekin aninis ne fetan seni ekkewe taraku, ra awora pour kewe mi pochokun pwe repwe komoch, me ra emweni ekkewe chinnap non ewe imw. Ra ennetin fori ar angang ngeni Kot. Nupwen ra katon me angang, ra nenien appirun an ewe Chon Amanau afanafan: “Fansoun meinisin oua fori ei napanap ngeni emon pwii kei mi kisifochofoch, oua pwan for ngeniei.”6Nupwen ekkewe nesenin serafo mi fifis, mesen ekkei anuon repwe fakkun suk ngeni pwan ekkoch tufichin angang non eu napanap usun Kraist.
Fan ekkoch mi namwot akkachocho ne katon me angang. Emon fopun itan Alexandria a kuna pwe pwiin we Madison ese tufichin awesano ekkewe kinikinin an Pwisin Fefeita pokiten a wor terin. Alexandria a ochufengeni ekkewe fopun non an wart, kapas fengen ren ekkewe souemwen, me ra finata pwe repwe fori och mettoch fan iten Maddy minne ese tongeni pwisin fori fan itan. Emon me emon fopun a fori eu kinikinin ekkewe foffor me non angangen Pwisin Fefeita fan iten Maddy pwe epwe angei pwisin noun we mwaramwar.7
Ekkei fopun repwe fefeita ngeni wisen in me chon Fin Anisi pokiten ra kaeo ne katon me angang non napanapan tong ennet.
Preseten Monson a achema ngenikich pwe “tong ennet, ennetin ewe tongen Kraist” 8—wewen katon me angang—“a pwar nupwen aramas ra chechemeni emon niipich mi chinnap me a tongeni fiti fofforun ewe wart” me “nupwen ewe fefin mi anaemon non Fin Anisi a tingor, ‘Kopwe feito—mommot rech.’”9Ewe annukun kolt mi fich ikkei: “Mettoch meinisin minne oua mochen pwe aramas repwe fori ngenikemi, epwe chok iei usun ami oupwe fori ngenir.”10
Emon mwan a angang non ru napanap mi auchea. A awewe:
“Ua anisi punuei we fan eu Raninifel ren an sukunenKinter mi uren semirit mi fisu ierin. Nupwen a poputa fansoun aea fengen non Kinter, ua kuna emon chon klas a mommot won an we seia me a nikinikinin a semwen. Ewe Ngun mi Fel a pwar ngeniei pwe mi namot aninis, iwe ua mommot arap ngeni me ua eisini ifa usun. Ese ponueni … , iwe ua poputa ne kon ngeni i.
“Chon Kinter ra kaeo eu kon minefo, me nupwen aua kon, ‘Ika ua ausening ren netipei ua rongorong mongungun ewe Chon Amanau,’ ua mefi saram me pwichikar mi napanap non nguni. …Ua angei pwarata usun ach Chon Amanau tong fan itan … me fan itei. …Ua kaeo pwe kich poun ach [Chon Amanau] nupwen sia angang ngeni emon.”11
Esap chok ei mwan a kuna namwotan epwe anisi punuan we ren an mwichen sukun mi uren semirit mi mesepat; a pwan angang ngeni emon semirit mi namot an aninis. A tapweno ewe Chon Amaau, minne a aiti, “Oua kuna seni ekkewe angang ua fori, ina oupwe pwan fori usun chok.”12
Ekkis ano eu noter a atufuchi ngeni chommong chon kunon Jises Kraist ne akkom katon mwirin angang. Mwan, fefin, serafo, me semirit ra kuna sitowa me imw ra tano me ra feinno aninis ne animenimochu me forochu neni mi ta. Ekkoch ra kuna namotan ne aninis ren sopw. Ekkoch ra tonu sasing, taropwe, me pwan ekkoch mettoch mi auchea, mwirin ra pachereta pwe repwe pwaseno. Katon me angang ese fis non fansoun mi och iteitan fansoun me ese kuch non ach kokkot iteitan.
Ese wor pwan eu neni mi och ne akkom katon me mwirin angang nap seni non ewe? Eu awewe seni manauan Elter Richard G. Scott:
“Fan eu pwin noum we at Richard, minne a wor semwenin ngasangasan, a neno fan an kechiw. … Napengeni punuei we a feino anisi emon monukon a kechiw, nge ei fansoun ua apasa, ‘Upwe tumunu.’
“Pokiten an osukosuk, nupwen a kechiw, ngasangasan epwe muttireno. Epwe mwusi me angaweno ewe mangaku. Ena pwinin ua komoch arap ngeniei me ua achocho pwe epwe kinamwe ngasangasan nupwen ua ekkesiwini ufan me isettiw mangak minefo. Ua komoch i tori a pwan annut. Use sinei pwe fitu chok maram mwirin epwene mano. Upwe chechemeni ai ua komoch i nukunepwin tori feinfeino.”13
Jises a apasa, “Ika emon me neimi a mochen pwe epwe tekia, epwe chon angang ngeni kemi meinisin.”14
Fan ekkoch sia sossot ne angang non eu napanap sia pwisin mochen angang nge esap non ewe napanap mi namot. Nupwen Elter Robert D. Hales a aiti ewe nongonongen pwisin aninis, a awora awewen a kamo eu niffang fan iten punuan we. A eisini, “Ka kamo ei mettoch fan itei are fan itom?”15 Ika sia aea ena kapas eis ngenikich nupwen sia angang, “Ua fori ei fan iten ewe Chon Amanau, are ua fori fan itei?” ach angang epwene nikinikinin angangen ewe Chon Amanau. Ewe Chon Amanau a eisini me sipwe pwan eisini, “Met oua mochen pwe upwe for ngeni kemi?”16
Ekkoch wik ra no ua mang me osukosuk, me a chommong mettoch upwene fori. Ua anean upwe feinno tempel non ena ran nge ua mefi pwe ua chok osukosuk. Nupwen chok ena ekiekin ai ua osukosuk iwe usap feinno tempel a tonong non mokurei, ua weweiti met mi namot upwene fori. Ua feino seni ai ofes ngeni ewe Salt Lake Tempel, ua ekieki inet epwe wor fansoun upwe fori ekkewe mettoch ua kokkot ngeni. Kinisou chapur, ewe Samon a tipetekison me uren chen me a aitiei eu nesen ena ran.
Nupwen ua motiw non ewe rumw, emon fefin a kinito ngeniei me a kapas, “Ua fakkun noninen. Iei chok ai oruan fansoun non tempel. Kose mochen kopwe anisiei?” Ifa usun epwe sinei pwe ekkena kapas mi usun chok met mi namwot rei pwe upwe rongorong? Ese sinei, nge Semach won Nang a sinei. A kuna met mi fakkun namot rei. Mi namot upwe angang. A pesei ngeni ei fefin ne angang ngeniei me ren an tingorei pwe upwe angang ngeni i. Ennet ua erenikemi pwe ngang ewe emon mi ennetin efeioch.
Ren ennetin ai kinisou ua esinna chommong ekkewe chon Kraist ra angang ngeni ai famini non fansoun nom. Ua ennetin pwarata ai kinisou ngeni punuei we me ai famini, minne ra angang nge rese maicha me ren tong ennet.
Amo ita kich meinisin sipwe akkom katon, mwirin angang. Nupwen sia fori ena, sia anneasochis ekkewe annuk, me ach angang, usun chok Preseten Monson, epwe minen pwaratan ach nuku. Ua sinei ewe Chon Amanau a manau, me An achasefan awora ewe tufich pwe sipwe fori An kewe annuk me ua sinei Preseten Monson i ach soufos ikenai. Non iten Jises Kraist, amen.