Ekiek Usun ekkewe Feioch
Seni Preseten Thomas S. Monson
Semach won Nang mi sinei met mi namwot ngenikich me epwe anisikich nupwen sia kokkori I ren aninis.
Pwi me fefinei mi acheingicheing, non ei mwichenap a fen tori 49 ier seni ewe fansoun ua sekita ngeni ewe Mwichen Engon me Ruemon Apostel won October 4, 1963. Faik me tiw ier a eu fansoun nangatam. Nge, ua pwisin mefi pwe ese fansoun nangatam seni ewe atun ua uta won ewe rong non ewe Tabernacle me ani ai we aewin afanafan non eu mwichenap.
Chommong mettoch a siwin seni October 4, 1963. Sia manau non eu fansoun mi sokono. Sia feioch ren chommong mettoch. Nge fan ekkoch a weires ach sisap netipengau pokiten ekkewe osukosuk me tipis mi nom unukuch. Ua pwisin kaeo pwe ika sise chok ekieki usun ekkewe mettoch mi ngau, nge sia fen ekieki usun ekkewe feioch non manauach, pwan mo ekkewe kukun feioch, sia tongeni kuna pwapwa chapur.
Nupwen ua ekieki usun ekkewe 49 ier, ua kaeo fitu mettoch. Eu mettoch ua kaeo pwe chommong me nein ekkewe mettoch mi fis ngeniei rese kon amwarar. Me pwan nupwen ra fis, ua mefi pwe rese wesewesen amwarar me rese kon auchea. Nge, nupwen ua ekieki usur iei, ua kuna pwe ra anisi me efeiochu manauen aramas—pwan mo pwisin manauei. Ua pesei ngenikemi oupwe pwan fori usun chok—oupwe ekipwichi usun manauemi me kutta ekkewe feioch ka fen angei, ekkewe mi watte me pwan ekkewe mi kukun.
Ai ekieki usun ekkewe ier me nom a apochokunata ai sinei pwe Kot a rongorong me ponueni ach kewe iotek. Kich mi fen sinei usun ewe afanafan mi ennet mi nom non 2 Nifai non ewe Puken Mormon: Aramas mi manau “pwe repwe mefi pwapwa.”1 Ua pwarata pwe ewe pwapwa a feito nupwen sia esina pwe kich mi tongeni poraus fengen ren Semach won Nang non iotek me i epwe rongorong me ponueni ach kewe iotek—esap pokiten ifa usun ika inet sia nuku pwe repwe ponu, nge repwe ponu me repwe ponu seni Semach won Nang ion a ennettin sineikich me tongeikich me a mochen sipwe pwapwa. I a fen pwon ngenikich, ika sipwe tipetekison, epwe emwenikich ren pouch, me epwe ponueni ach kewe iotek?2
Non ei fansoun, ua mochen aporausa ngenikemi usun fitu me nein ekkewe mettoch ua kuna non manauei nupwen Kot a rongorong an aramas iotek me a ponueni me nupwen ua ekieki usun, ekkei mettoch mi awora feioch non manauei me pwan manauan ekkoch. Ai we kukun puk ua mak non iteiten ran, non ekkewe ier, a anisiei ai upwe chechemeni ekkewe kukkun mettoch mi fis, minne usap fen tongeni chechemeni ika use maketiw.
Non 1965, ua wisen fiti eu michenapen steik me pwan ekkoch mwich non ewe South Pacific. Ena ewe aewin fansoun ua tori ena kinikinin fonufan, me use tongeni monukano. Chommong mokutukutun ngun mi fis nupwen ua chufengen ren ekkewe sou emwen, chon Mwichefen, me misineri.
Won Ammon me Raninifel, February 20 me 21, aua nom non Brisbane, Australia, ne fiti ekkewe mwichenapen ewe Brisbane Steik. Non am kewe mwich non Ammon, ua chufengen ren ewe presetenin distrik seni pwan eu neni. Nupwen aua kapong, ua mefi pwe mi namwot ai upwe kapas ngeni i me ngeni i kapasen fon, iwe ua tingor ngeni i an epwe fitiei ngeni ewe mwich nesesorun Raninifel pwe aupwe tufichin kapas fengen.
Mwirin ewe mwich non Raninifel aua tufichin chufengen. Aua kapas usun wisan kewe ren wisan presetenin distrik. Nupwen aua poraus fengen, ua angei eu memef ai upwe ereni usun och mettoch a tongeni fori ren angangen misineri me ifa usun i me ekkewe memper mi tongeni anisi ekkewe misineri ren ar angang non nenian. Mwirin ua kaeo pwe ei mwan a fen iotek pwe epwe angei emwen usun ei mettoch. Mefien atewe am chufengen mi pwarata pwe Kot a rongorong me ponueni an iotek. Aramas ra tongeni ekieki pwe ei mwich ese amwarar nge ngang mi sinei pwe ena mwich mi fis fan emwenian ewe Ngun mi Fel me a efeiochu ewe presetenin distrik non manauan me wisan, me pwan manauan ekkewe memper, me ewe angangen misineri.
Pwi me fefinei, ewe Samon a afisata an angang nupwen sia ausening ngeni emwen seni ewe Ngun mi Fel. Ua nuku pwe ika sipwe anapano ach aponuenta ekkewe emwen me memef mi tori kich, ewe Samon epwe anapano an nuku non kich pwe sipwe fori an angang.
Ua fen kaeo, usun chok met ua fen apasa me nom, pwe sisap witiwit ne aponueta eu memef sia angei. Chommong ier me nom, ua tuken non ewe Deseret Gym non Salt Lake City nupwen ua angei eu memef ai upwe feino ngeni ewe University piwing ne churi emon chienei mi rei pechan pokiten a semwenin kanser me ewe reirei ra fori. Mwitir chok ua tou seni ewe nenien tuken, ufouf, me feino ne churi ei mwan mi murino.
Nupwen ua tori rumwan, ese nom. Nupwen ua kapas eis, ua kaeo pwe a feitiw ngeni ewe nenien tuken non ewe puing, eu neni minne ra aea ne anisi ekkewe rese tongeni fetan. Iwe mi pung. A fen feitiw won wan winchair me a akanemon non ewe rumw. A nom nepekin ewe nenien tuken, unukun ewe neni mi anonon. Ua kokori, me a feito rei won wan winchair ne kapong ngeniei. Aua chufengen fiti pwapwa, me ua pwan fiti i ngeni rumwan sefan me ua efeiochu i.
Mwirin ua kaeo seni chienei pwe a fokkun netipengau won ena ran me a ekiekin angei pwisin manauan. A iotek pwe epwe ngasano nge a poputa ne mefi pwe Kot ese ponueni an kewe iotek. A feino ngeni ewe nenien tuken pwe epwe tongeni awesano an riaffou—ren an satiw won wan winchair non ewe nenien tuken mi anonon. Ua keran war non ewe fansoun mi fokkun auchea, pokiten ua aponueta ewe memef ua angei minne ua sinei pwe a feito seni nang.
Chienei a tufichin manau ren pwan fitu ier—ekkei ier mi uren pwapwa me kinisou. Ua fokkun kinisou pwe non na fansoun ngang mi eu pisekin angang non poun ewe Samon non ena ran mi auchea non ewe nenien tuken.
Pwan eu fansoun, nupwen ngang me Sister Monson aua niwiniti imwem mwirin aua churi chienem kewe, ua mefi pwe aupwe feino ngeni pwan eu soup—a fitu main seni imwem—pwe aupwe churi emon fefin nipich seni am wart me nom. Itan Zella Thomas. Non ewe fansoun, a nom non eu nenien tumunu chinap. Won ena neanowas aua kuna i me a fokkun apwangapwang nge a kokon non kinamwe won an pet.
Zella a mesen chun ren fansoun nangatam, nge a tongeni esina emon seni mongungur. A tingor ai upwe efiochu i, a pwan era pwe a monneta an epwe mano ika ewe Samon a mochen epwe niwiniti imwan. Mi wor eu memefin kinamwe non ewe rumw, me aua sinei pwe esap manau ren fansoun nangatam. Zella a komoch pei me a ereniei pwe a ikiotek pwe upwe feito churii me efeiochu i. Ua ereni i pwe ua feito pokiten aua angei memef seni Semach won Nang. Ua kisi mokuran, ua sinei pwe naman usap kuna i sefan non ei manau. Iwe ena met a fis, a mano won ewe ran mwirin. Ai tufichin echipa i me awora ekkis kinamwe ngeni Zella a eu feioch ngeniei me pwan ngeni i.
Fan chommong ewe tufich ne efeiochu manauen emon a feito nupwen sise ekieki epwe feito. Won eu pwinin Ammon mi fokkun patapat non ewe fansounen patapat non 1983–84, ngang me punuei mi sai ren chommong main ngeni imwem non Midway, Utah. A tori 24 degri fan ziro non Fahrenheit, (–31°C), me aua mochen pi ika mettoch meinisin mi och non imwem. Aua cheki me aua kuna pwe mi och, iwe aua poputan ne niwiniti Salt Lake City. Aua chok sai fitu main won ewe aan me wach a kouno. Ause tongeni feino ekis. Use mo mefi ena ukukun patapat non manauei ewe ua mefi won ena pwin.
Iwe aua poputa fetan ngeni ewe soup mi kan ngeni kem, ekkewe wa won ewe aan rese kouno. Mwirin efoch wa a kouno, me emon anuen a kapas eis ika a tongeni anisi kem. Aua kaeo pwe ewe dis non wach a froz pokiten a fokkun patapat, iwe ause tongeni sai non wach. Ei anuon a uweikem ngeni imwach non Midway. Ua achocho ne ngeni moni ren niwinin an aninis, nge a pupuni. A apasa pwe i emon Boy Scout me a mochen anisi aramas. Ua ereni i pwe ngang io me a apasa pwe a kinisou pwe a tufichin anisikem. Ua ekieki pwe i a tori ierin misineri, me ua eiseni ika a ammonata ne feino fori angangen misineri. A apasa pwe ese sinei met a mochen fori.
Won nesesorun ewe Serafan, ua makei echo taropwe ngeni ei anuon me ua apasa ai kinisou ren an umumoch. Non ewe taropwe ua pesei ngeni i pwe epwe fori angangen misineri. Ua pwan wanong echo ai kewe puk me ua fori esinisin non ekkewe sopun usun angangen misineri.
Eu wik mwirin inan ewe anuen a kokori ei won fon me a ereniei pwe noun we a emon anuen mi murino nge pokiten och mettoch non manauan, a kukunitiw an mochen feino fori angangen misineri. A era pwe i me seman ra echikipin me iotek pwe netipan epwe siwin. Ra pwan maketiw itan won ewe nisten iotek non ewe Provo Utah Tempel. Ra apinukunuk, pwe non och napanap, netipan epwe mochen ochuno, me epwe pwan mochen feino sefan won eu misin me angang ngeni ewe Samon. Inan a mochen ai upwe sinei pwe ekkewe mettoch mi fis won ewe pwin mi patapat a ponuen an iotek. Ua apasa, “Ua pwan tipew reom.”
Mwirin fitu maram me pwan och poraus fengen ren ei anuen, ngang me Sister Monson mi tongeni fiti an mwichen feino me mwen a feino ngeni ewe Canada Vancouver Misin.
Ese wor namwotan ach chufengen won ena pwin mi pat non December? Use ekieki pwe ena mi pung. Nge, ua nuku pwe am chufengen a eu ponuen an inan me seman kewe iotek fan iten nour we at minne ra weswesen tongei.
Sefan, pwi me fefinei, Semach won Nang a sinei ach osupwang me a mochen anisikich nupwen sia tingor an aninis. Ua nuku ach kewe osukosuk mi kukkun mi pwan auchea ngeni i. Ewe Samon a ekieki usun mokutokuten manauach.
Ua mochen osupwano ren ai aporausa eu mettoch a fis ngeniei minne a efeiochu fitu puku aramas. A fis non ewe apwapwan meinisin sokun aramas non ewe Kansas City Tempel, nimu maram mwen ikenai. Usun chok chommong mettoch mi fis non manauach, non ewe fansoun ua ekieki pwe ekkewe osukosuk repwe chok pwisin punguno. Nge, nupwen ua kaeo met a fis won ewe mwichen apwapwa won ewe pwin me mwen ewe epinipinin ewe tempel, ua weweiti pwe ewe sipai mi sokono. A weswesen amwarar.
Usun meinisin ekkewe mokutokut mi fis me mwen ewe epinipinen ewe tempel, ekkewe serafon ewe Kansas City Missouri Tempel Distrik ra ammonata ar sipai non pwisin nenier. A kokot pwe repwe chufengen non ewe municipal center nesesorun Ammon me mwen repwe fori ar sipai pwe repwe kaeo ian repwe tonong me ia, ian repwe uta, ifa watten ewe neni nefinen emon me emon, ifa usun repwe tou, me pwan ekkoch—mi namwot repwe kaeo ekkei mettoch won ena ran nupwen ekkewe mi wisen nemeni ewe sipai repwe tumunu pwe ewe sipai epwe fisioch nupwen repwe fori.
Nge mi wor eu osukosuk mi watte. Meinisin ewe sipai mi angonong won och kacheto epwe pacheta won eu watten tv mi iteni ewe Jumbotron. Ekkei kacheto mi weswesen auchea ngeni ewe sipai. Rese chok a chufengeni meinisin ekkewe kinikinen ewe sipai nge ekkewe kinikinen kacheto epwe aitir met epwe fis mwirin. Ekkewe kacheto mi awora ewe nongongen unusen ewe sipai. Me ewe Jumbotron ese pwak.
Ekkewe chon angang mi wesen achocho ne awesano ewe osukosun me ekkewe serafo ra chok witiwit, fitu puku serafo, a sonapano ar fansounen ammonata. Ra poputa ne ekieki pwe ese tongeni pwak sefan.
Ewe chon emweni ewe mwichen apwapwa, Susan Cooper, a apasa mwirin, “Nupwen aua fori am kokot numpa eu me pwan numpa ru me pwan ekkoch kokot aua sinei pwe esap chuen pwak ren am chok. … Nupwen aua katon ewe kokoten fansoun aua sinei ausap tongeni fori, nge aua sinei pwe mi wor 3,000 serafo mi tongeni anisikich. Am aua feitiw me erenir met a fis me tingor pwe repwe anganga ar nuku.”3
Eu awa me mwen ekkewe chon katon repwe feito, ekkewe unungatngoru serafo mi fotupukutiw me iotek fengen. Ra iotek pwe ekkewe mi angang won ewe Jumbotron repwe angei pwarata pwe repwe sinei ifa usun repwe fori sefani; ra tingor ngeni Semer won Nang pwe epwe anisir ne fori met rese pwisin tongeni fori pun ese chiwen wor ar fansoun.
Mwirin emon a makei, “Ena eu iotek ekkewe serafo resap monukano, esap pokiten pochokunen ewe pap, nge fen pokiten ewe Ngun mi Fel mi pochokun non netiper.”4
Ese fansoun nangatam mwirin, emon chon angang a feito erenir pwe ra kuna ewe osukosuk me ra fori sefani. A era pwe ra chok lucky, pwe ra kuna ewe osukosuk, nge ekkewe serafo mi sinei pwata a fis.
Nupwen aua tonong non ewe municipal center won ena pwin, ause sinei usun ekkewe osukosuk ra kuna won ena ran. Aua chok kaeo usur mwirin. Nge aua katon eu sipai mi weswesen ningoch me mi fisioch—a numpa eu me nein ekkewe sipai ua fen kuna. Meinisin ekkewe chon fiti mi tongeni mefi ngunun ekkewe serafo mi ning. A usun ra sinei ian repwe tonong me ia, ian repwe uta, me met repwe fori ren ekkewe ekkoch unukur. Nupwen ua kaeo pwe ese watte ar fansounen ammonata me rese tufichin ammonata fengen ren chommong kinikinin ar sipai ua fokkun mairu. Chon katon rese sinei. Ewe Samon a weswesen anisir ren met rese tongeni pwisin fori.
Ngang mi chok mairu ifa usun ewe Samon a tongeni amasanga me emweni ekkewe kinikin meinisin non An muu nge a pwan wor an fansounen awora pwarata ngeni emon chok—ika eu mwichien apwapwa are eu Jumbotron. Pokiten a tufichin fori, me a fori, ena a eu pisekin pwarata ngeniei.
Pwi me fefinei, ewe Samon mi nom non manauach meinisin. A tongei kich. A mochen efeiochukich. A mochen sipwe kutta An aninis. Nupwen A emwenikich me aitikich me nupwen A rongorong me ponueni ach kewe iotek, sipwe kuna ewe pwapwa minnei A mochen sipwe angei ikei me iei. Amo ita kich meinisin sipwe esina An kewe feioch non manauach, ua iotek fan iten Jises Kraist, ach Chon Amanau, amen.