Omkar a Telemall er Tir
Mla er a President Henry B. Eyring
Kot el Counselor er a First Presidency
Nglunguchek me de kedmeklid el mo odars a ngii di el ngeso er a priesthood el Rubak a meskid er tial klengar kid er a beluulechad.
Kede ngeltengat el rokui er a ngerachel el mo omekerreu er a rebebil. Sel doba priesthood er a Dios e ngercheled me a diak a ulebenglel klengar a mo e ra Rengelekel. Tia klemerang, e klebokel, e a bebil er a taem eng kmal mo oberaod.
Te ngar er ngii a remerreder er a chelechad er a re elders lorrenges er chelecha el kesus e medengelii a kusaod er ngii. Tiakid a dilubech el mo er a ta er kemiu. Ng locha mla mo betok el duubech—el mo er a rebebil er kemiu. A komakai el omesodel a mo kakerous, eng di a teletael a diosisiu.
A elder el diak msal medengelii a olengit a ngeso er kau. Ng dirk mlo medengei el kmo ng kirel ngii me a bechil me a tolechoi el ngelekir el sechal el melukl el mo er a ta er a lengiil el blai el kmeed er tia el le kiliei er ngii.
Ngii me a bechil a ulengit a ngeso er a sechelirir me lengir a mlil lotak aikal kloklir. Ngika el sechelei a milsterir a mlil. Ngika el ngeasek el chedam a mocha olngemai a kloklir el mer tia el mlai, eng di chelsel a sesei el bung, eng merngela ulekel. Ngika el sechelei el milsterir a mlai a kmal mle mechesang meng dimlak el sebechel lolngeseu. Ngika el ngeasek el chedam a kmal mlo bekikl. Ng ulemdasu er kau, kau el merreder er a chelechad er a re elders.
A bocha el sebechel lolengit a ngeso, eng mocha sueleb. Ng sel sils el temel a miting er a Ikelesia. E kau a kuk mla tibir el mo ngoseuir a bechim el kirel a ureor er a blai er tiaikid el sils. A rengelekm a mla olengit er kau el mo meruul a kmo ngera lobengterir, e dirkak a temem el mo rullii lobengterir.
Ke dirrek el mle medengei el kmo a rechedal a chelechad el mnga er ngii, tokuni tirkel kmal blak a rengrir, tirke el tir a momekedong er tir el kirel a ngeso, a locha dirrek el di uai kau el kmal mechesang.
A Rubak a mle medengei el kmo ke mo chelbangel a uaikaikid el sils er se er a lokedongau el mo er tia el deruchall, meng milskau a cheldecheduch el mo melisiich er kau. Ng cheldechederir a re kmal mechesang loba priesthood el chad. A bebil er a taem e kede omekedong er ngii el cheldechedechal a ungil chad er a Samaria. Eng di mera er ngii a cheldechedechal a oba priesthood el chad er chelechal, meringel el beluulechad.
Tia el cheldecheduch a kmal chatter er a oberedang el mesiungel a priesthood. Bo molbedebek el kmo kau ngike el chad er a Samaria ng diak prist malechub e ke Levite el mirrael lengelakl er a mla metemall el chad.
Ng locha dirkak bo momtab er tia el cheldecheduch se el bo mchebangel a uaisei el teletael. E ng di nglunguchek me bo molbedebek er ngii se el bo mchebangel a ikaikid el sils, el ngii a mo er ngii.
A chedaol llechukl a diak louchais er kid el kmo ngera uchul me ngika el chad er a Samaria mla er a Jerusalem e merael el mo er a Jericho. Ng ko er a diak el melemalt el tekoi a di ble lengii el tang el merael le ng mle medengei el kmo te locha ngarngii a remekngit el chad er a rael. Ng mla er ngii a belkul tia el omerollel, e mle siukang, le ng uleba cheremel me a cheluch me a bilong.
A tekingel a Rubak a kmo ngika el chad er a Samaria, er a lesa ngika el telemall el chad e ng mlo mesang, “le ng mlo chubur.”
Ng dimlak el di el chebur el merekong, ngilseuir. Bo blechoel melbedebek aikel komakai el teletael er tia el cheledecheduch:
“Meng [mocha] er ngii, e lmechet aikal telemall er a bedengel, el melecha cheluch me a bilong, e nguu el otekir er a chermel, e nguu el mo er a lengiil el blai, me ng kudmeklii.
“E a bo el kukuk er a lorolang, e ng mocha otobed a teblo el udoud, el msa ngika el oungerachel er ngii el blai, e dmu er ngii el kmo, Ke mengedmokl er ngii; e sel kluut el mei, e a kmo kokad a ngelsengesel, a ilecha el udoud.”1
Kemiu el mla mokedong el mo omekrael er a roba priesthood a sebechiu el mo olab a kldei el tekoi. A kot, a Rubak a mo meskemiu, alsekum e ko molengit, sel chubechub el reng erNgii el melatk el kirir a rengesool. Ongerung, Ngii a mo osiik er a rebebil, el uai ngike loungerachel er a lengiil el blai, el mo teloi er kemiu el mesiou. E a ongedei, a Rubak, el uai ngike el ungil chad er a Samaria, a mo mesterir a ngkedir tirkel rokui el mo dmak e odars a ngeso el mo er a rengesool.
A remerreder a chelechad er kemiu a locha mla mo betok loruul aika el kldei el tekoi. Ko mla olengit er a rebebil er a roba priesthood er a Rubak el mo olngeseu, el medengei el kmo te kongei loba chubechub el reng. Ng dimlak ko medakt lolengit er tirkel kilengei le ko mle medengei el kmo te chubechubechad. Ko mullengit er tir, el medengei el kmo tir a mla melchesuar a blekerurau er a Rubak se el lolilt el mo olngeseu. Ko mla olengit er a rebebil el tir oberaod er a betok el tekoi, el medengei el kmo a bol charm er a klou el ringel, eng klou a omeksullir el bo el ngai er a Rubak. Tirkel tir a mla olngeseu a mla melchesuar a klou lomereng el saul el kirel a Osobel.
Ko mlocha mla mukrael el diak bo molengit a ngeso er a chad el lolengasech e olekerd a klalo er a mlai. Me kau el oungerachel a ungil medengelterir a rechedal a chelechad er kau me a telungalek er tir. A Rubak a kmal ungil medengelterir.
Ngii a medengei el kmo a redil bechil techang a kmal oberedang le bechil a mlo diak el sebechel remuul aike el ngii a ousbech el kirel a urerel. Ngii a medengei el kmo te ngelekel techang a mo ngeltengat lomes er a demerir el muut el mo olngeseu er a rebebil malechub e a rengalek a ulusbech el mo melchesiu el kmo ng meklou a belkrir el mo er a demerir meng sebechel chemoit a temel lobengterir er sel sils. Eng di Ngii a dirrek el medengei el kmo ng techa ousbech er a siotai el mo mesiou eng di osenged er ngii a locha diak el semeriar malechub el soal mo olngeseu.
Ng diak el sebechem el kmal mo ungil medengelterir a rechedal a chelechad er kau, eng di Dios a sebechel. Ng d,i uaia ikel bla moruul el betok el taem, e ke mla meluluuch el mo medengei el kmo ng techa bo molengit er ngii el mo olngeseu er a rebebil. A Rubak a medengei el kmo ng techa mo ngeltengat lokiu ongit el mo olngeseu e ngera el telungalek a mo ngeltengat a lak el mongit el mo olngeseu. Tiaikid ocholt el kirel mei er kau sel mo mekrael er a roba priesthood.
Ng dilubech er ak ngeasek el chad. Ak mle kot el chad lolngeseu er a chelechad er a prist. A bisop a ulemekedong er ngak er a blik er a ta er a klebesei. Ng mle soal a kungelim er ngii el mo oldingel er a mla melakl el redil el kmal ousbech a ngeso. Ng dilu el kmo ng ousbech er ngak.
Tia er a kungiil er ngii el me oltak er ngak er a blik, e ng ko er a mlo ngodech a renguk. Ak mle medengei el kmo ngika el bisop a ngar er ngii a remesisiich e mellomes el counselor ngii. A chimong a merael chisel chad er a kerkeriil. E ngika el chimong a orrurt er a klou el kombalii el di kmedung eng mo General Authority. Ngika el bisop a dirrek el ta er a klebesei eng mo General Authority. Ngera uchul me ngika el bisop a melekoi er a diak a ngera lodengei el prist el kmo, “A kuusbech a ngeso er kau”?
Chelecha, eng bleketakl er ngak el kmo ng mle sebechel kmu er ngak el kmo: “A Rubak ousbech el mo omekngeltengat er kau.” Tia el blil ngika el mla melakl el dil, e ak milsa el kmu er ngika el redil el kmo ng diak a ngeso er a Ikelesia lolai el dimerekmo lekedmeklii a babier el kirel a tekoi er a udoud el ngii a ngiluu el msa ruchei. Aki morola el mo remei, e ngulcherechur er ngak le ng ko er a mechas a renguk, e dula el kmo, “Hal, sel bo el meduch el mengereomel a chitel er a udoud, e ngii a mo meduch lolngeseu er a rebebil.”
A kuk ta er a teletael e a bisop er ngak a ngilikak el mo er a blil a nombe el chedam me a chedil luldercheterir a reteru el medekta el ngalek el redil el me er a medal a tuangel. Uriul er a longedecheduch er tirka el teru ngalek, e a ki mirrael eng dula el kmo, “Ng diak el sebeched el ngodechii a kerior er a klengar tir, eng di sebechir el mo medengei el kmo a Rubak oubeltikelreng er tir.”
A kuk ta er a kesus e ngilikak el mo er a blil a chad el kmal meketeketa el rak el diak el mei er a ikelesia. A bisop a silbedii el kmo ng kmal betik a rengul er ngii me a ward a kmal ousbech er ngii. Ng uaia le mlak a ngera el rellii el mo er ngika el chad. Eng di tiaikid el taem, me a bek el taem el bisop a ngilikak lobengkel, a mle klou a le rellii er ngak.
Ng diak el sebechek el mo medengei el kmo ngika el bisop ng mla er a nglunguuch el mo medengei el kmo ng techa el prist a mo mukngeltengat er a ika el odingel. Ng locha mle sebechel melai er a rebebil er a re prist el mo obengkel. Eng di a Rubak a mle medengei el kmo a ta er a klebesei e ngak a mo bisop el mo siotai er tirke el mla mo mechitechut a klauemra er tir el muut el mei er a ebangkelio. A Rubak a mle medengei el kmo a ta er a klebesei e ak mo oba ngerachel er a priesthood el kirir a redart me a dirrek el telael el ngelekel a Chedam er a Babeluades el tir a ulsiik a ngeso el kirel a usbechellel a bedengir.
Kemiu a rengeasek el sechal a diak modengei el kmo ngera el teletael er a omesiungel a priesthood a longedmokl er kemiu a Rubak el bo moldars. Eng di merngelel el mo er a roba priesthood a sel odars a chedaol ngeso. Kid el rokui loba tia el ngerachel. Ng mei lokiu sel de chedal a chelechad. Ng mei lokiu sel de chedal a telungalek. Alsekum a klaumerang er a ngii di el chad er a chelechad malechub a telungalek a modechelakl er a Diablong, e ko mo melchesuar chubechub. El di uaia ikel omesiou me a chubechub luleldars a ungil chad er a Samaria, me kemiu me ko mdirrek el mo olngeseu lolab a chilt el kirel a telmellir er a taem lousbech a ngeso.
Me a chelsel omesiungiu el misionari, e kemiu a mo er a retelael chad el tir ousbech chedaol ngeso. Betok, alsekum eng diak mosischekelterir, e te diak bo lodengei el kmo ngar er ngii a telmellel a rengrir, el lak el mukar, eng mo uchul a diak a ulebengelel klengitelreng. Kemiu a mo oderchelel a Rubak el mo osiik er tir. Ng di ta el Rubak a sebechel omkungil a telmellel a rengrir sel le kengei chedaol ruoll el uchul e te mo nguu a diak a ulebengelel klengar.
Me kemiu el chedal a chelechad, roldingel e olisechakl, me a remisionari, a diak el sebechiu el ngosuterir a rechad el sumechokl a telmellel a rengrir alsekum eng diak el mesisiich a klaumera er kemiu. Ng belkul a kmo ng kired el muut el meruul a betok el diak di donguiu chedaol llechukl e doluluuch el kirir. A kedeb el nglunguuch me a kedeb lomenguiu er a chedaol llechukl a diak el klebech el kudmeklid. Sel mo ungil medengei aikel bo mousbech a mengai er tiakid el llach el ngara 84th el bliongel er a Doctrine and Covenants: el kmo ng diak el kired lomdasu a tekoi el bo dolekoi, e bai molemolem el melbedebek a tekingel a klengar, e sel blingeled a bo denguu er a taem el dousbech er ngii.2
Tial yaksok a sebeched el mo nguu alsekum e kede “melbedebek” a tekingel a klengar e melemolem el meruul er ngii. A melbedebek el tekoi el ngara chedaol llechukl a omelchesiu er a kmo ngera er a tekoi. El uaia, sel kulasm lolngeseu er a chad el mesmesim a klaumera er ngii el kirel a Profet Joseph Smith me a chedaol okedong er ngii, e a kmo omelchesiu er a kmo ngera el muut el mei er ngak.
Ng diak el di el tekoi el ngara Babier er a Mormon. Ng sel mesisiich el klemedengei er a klemerang el mei lokiu omengiuek er a di kesai el bades er a Babier er a Mormon. Ng diak yaksok el kmo ng mo er a rebek el chad el tir a oumededenger el kirel a Profet Joseph Smith malechub a Babier er a Mormon. Ak medengei el kmo a Joseph Smith a Profet er a mla Moluut el Ebangkleio. Ak medengei el kmo a Babier er a Mormon a tekingel a Dios le ak mla melbedebek er ngii.
Ak medengei el kmo ng sebechiu el nguu sel klemerang el kirel a klaumerang lokiu Chedaol Reng e le ng mla mei er ngak. Kau me a ngak a kired el nguu tia el klemerang ruchei er a Rubak a le ngikid loiia er a rolel a betik er a rengud el ngii a mla metemall a rengul er a recherreuel a klemerang.
Ng dirrek el ngar er ngii a ta er a tekoi el kired el kudmeklii. Ng blekerdelel a chad el mo kedidai a rengul el kirir a rebebil el ngara ringel. Tiaikid a ta er a uchul e a Osobel a mlo omeketakl el kirel a Tngakireng er Ngii me a ringel me a klengitelreng el Ngii a ngilai el kirir a rokui el ngelekel a Demad er a Babeluades me luchul e Ngii bo lodengei el kmo ng mekera lolngeseu er tir.
Ng uldimukl er tirkel kmal ungil oba priesthood er a Chedam er a Babeluades a dirrek el diak el beot el mo chubechubechad. Ng kse er kid el mo seselk a rengud er a chad el ngii a diak lesa klemerang el ngii a kuk kmal bleketakl er ngii. Ng kired el mo kerekikl me a klechecherdereng a diak luchul e bo doltuub malechub e douketiu er a rebebil.
Me sel dongedmokl el mo oldars a ngeso el mo er a Rubak kid el loba priesthood el Mesiungel, e ngarngii a bades er a chedaol llechukl lomekrael er kid. Ng olecholt er a sengk el dousbech er ngii er a tia el omerolled, er sel ngii a Rubak a mo odureklid el mo er ngii. A ungil chad er a Samaria a uleba tia el sengk. Kid me kede mo ousbech er ngii, e a Rubak a mla subedid el kmo kede mekera metik er ngii.
“Me a leuaisei e betik er a renguk lodam er ngak, alsekum eng diak mobang a beltikelreng, e kemiu a diak kom ngerang, le beltik el reng a diak el sebechel nguemed. Me a le uasiei, e morkedii a beltik el reng, el ngii a kot er a rokui, le rokui el tekoi a di mo nguemed—
“Eng di a beltik el reng a bliochel el beltkil a rengul a Kristo, meng melemolem el diak a ulebengelel: me ngike el bol betik er ngii lobang er a uriul klebesei, a kmal mo ungil besul.
Me a leuaisei, e betik er a renguk lodam er ngak, moluluuch el mo er a Chedam lolab a rokui el klisichel a rengum, me bo mui er a beltik el reng er ngii, el bla lebesterir a rokui el merang loltirakl er a Ngelekel Jesus Kristo; me bo mngelekel a Dios; me sel be lecholt e bo de uaingii, le kede mo mesang el kmal Ngii; me bo dobang tiang el ongiil; me bo de klikiid el di uai Ngii el klikiid.”3
Nglunguchek me dekedmeklid el mo odars a ngii di el ngeso er a priesthood el Rubak a meskid er tial klengar kid er a beluulechad. El ngara chedaol ngklel a Jesus Kristo, amen.