Omengemedaol el mei er a Ongdibel
Mla er a President Thomas S. Monson
Nglunguchek me bo demui er a Reng er a Rubak sel dorrenges e dosuub.
Ng klebokel, e rodam me a rodos, el deluut el mocha kebetech. Ng dirk ke kmeed el 183 el rak er a lemechederoder a Ikelesia lokiu a Profet Joseph Smith, el mlara cheungel a dereder er a Rubak. Chelsel sel miting er sera April 6, 1830, eng di mle telolem a rechedal a Ikelesia.
Ng dmeu a renguk louchais el kmo eru el sandei er a memong, e a iidisir a rechedal a Ikelesia a mla mo 15 milion. A Ikelesia a melemolem el meleketek el mo melodech a klengar er a rebetok el chad er a bek el rak. Ng meleketek er a beluulechad el misionari er kid a osiik er tirkel tir osiik er a klemerang.
Ng kmal dirk locha ta el rak er a kuuchais el kirel ongengetel a rekil a re mo misionari. Seikid el taem e a iidisir a recherrungel el misionari el ngara omesiou a mla chengelakl er a 58,500 er sera October 2012 el mo 80,333 er chelechal sils. Kede mla sioning er a kmal klou el ulekrael teletael!
A chedaol llechukl a diak lolab a ngii di el tekoi el kmal bleketakl, me a mesisiich el ngerachel, bleketakl lomesodel el uai sel mildung er a Rubak er a bol duum er a Galilee el mo er tirkel teruich me a ta el Chedal. Ngii a millekoi, “Morael mong, e molisechakl a rokui el beluu, el melcholb er tir el ngara ngklel a Chedam, me a Ngalek, me a Chedaol Reng.”1 A Profet Joseph Smith a millekoi, “Aikel rokui el mla medung, e sel kot el ngarbab el klou a belkul ngerachel a mo omerk er a Ebangkleio.”2 A rebebil er kemiu el ngar tiang a dirk dobedebek a tekingel a President David O. McKay, el dillii tial dodengelii el tekoi “A bek el chedal a ikelesia a misionari!”3
Me ak dochel a tekingel er a tekingir. Chelechang taem el rechedal a ikelesia me a remisionari a mo dmak, dmak loureor, el oureor er a sersel a Rubak el melai er a rechad el mo er Ngii. Ngii a mla kudmokl a teletael el kired lomerk er a ebangkelio er a chelsel a betok el teletael, e Ngii a mo ngosukid sel doureor alsekum e kede ultuil er a klaumerang e meruul a Urerel.
Me a mo uchul eng melemolem tial ureor er a misionari, e ak mla olengit er a rechedal a ikelesia el mo odars aikel sebechir, el udoud el kirel a ureor er a misionari el mora General Missionary Fund er a Ikelesia. A nger er tial ongit a kmal ungil e mla ngosuterir a rebetok el misionari el chelbulir a uchul eng diak el sebechir el di tir mesiou er tir er a mission. A kuureng a suliu er a blekerurau el uldersiu. E a usbechellel a ngeso a melemolem, me dolemolem el lolngeseu er tirkel semeriar el mo mesiou eng di diak, el sebechir, el di tir el mesiou er tir.
Chelecha, e rodam me a rodos, e kede mla me kldibel el mo melai a klubeled e mukrael. Betok el klumech, el mesaod a kakerous el tekoi, a mo medung er a ikal eru el klebesei. Tirkal sechal me a redil el mo mengedecheduch a mla olengit a ngeso er a babeluades el kirel a klemechir.
Nglunguchek me bo demui er a Reng er a Rubak sel dorrenges e dosuub. El ngara ngklel a Osobeled, el Jesus Kristo, amen.