Mado er a Babeluades

Mla er a Elder David A. Bednar

Er a Chelechad er a Teruich me a terung el Apostol

A chedaol klengeltengat me a klengeltengat er a klechad a mei er a klengar kid sel doltirakl er a llach er a ongeltacher.

Ng soak el mo smaod a eru el meklou a belkul suobel el blak suub el kirel a llach er a ongeltacher. A kot el suobel a melutk el kirel a klengletengat el mei er a dersta el chad me a telungalek sel le blak a rengrir loltirakl er tial llach. A ongeru el suobel a melutk el kirel a klou el belkul ongeltacher el kirel okerulel a Ikelesia er a Jesus Kristo er a Uriul-klebesei el Santo er a beluulechad el rokir. Nglunguchek me a Chedaol Reng bol beketeklii el mei er a dersta er kid el kirel a klemerang er tial llach el bo kusaod er ngii.

Kot el Suobel—Meklou a belkul eng di Diak el meues el Klengeltengat

A delal a Sister Bednar a meduch a rengul redil el mle meduch lomekeroul er a rengelekel. Uchelel a sils er a chebechielel, e ngii a mle kerekikl el kirel orretel a udoud er a telungalek. Ng mle meketeket el rak el ngii a omtebechel e orrurt a otebedellel a udoud er a telungalek lousbech er a babier. Chelsel a betook el rak e a ikel rokui el llechukl er a babier a kmal kldmokl e olab a meklou a belkul el tekoi.

Sera le dirk ngeasek el redil a Sister Bednar, ea delal a mle ulusbech aikal llechukl el ochur er a babier lolisechakl er ngii a suobel el kirel a ungil kerruul me a orretel a udoud. A tara klebesei er a lomes aikal ochur er a kakerous el chitel a udoud, ea delal a miltebengar a ongasireng el teletael. A cheral a ukeruul me a kar el kirel a telungalek a kmal mle ngariou el ngii a dimlak lodesuar el kmo ng uasiei. Ng ulumerang el kmo tiang a telengtengil a osisechakl er a ebangkelio er a Jesus Kristo e silodii el mora ngelekel a mesisiich el klemerang: sel doltirakl er a llach er a ongeltacher, e kede blechoel ngmai a meklou a belkul eng di mekekerei el klengeltengat el ngii a diak de blechoel mtab e sebechel diak el moes. Tial telungalek a dimlak a lmuut el uchul a kerkerengel. Ng bai, oubeltikelreng el Chedam er a Babeluades a mla mesterir a beot el kelngeltengat lokiu a ngodech el teletael. A Sister Bednar a di mla blechoel melbedebek er tial klou a belkul suobel er a delal el kirel a ngeso el dengai lokiu a mado er a babeluades, el ngii a ble el yakso er ngii a Malakai er a Uodel Renged (mesa Malakai 3:10).

Ng blechoel sel dosaod er a llach er a ongeltacher, e kede blechoel lomes a mereched, meklou a belkul, e kldmokl el sebeched el mes el klengeltengat el dengai. Ea ikal klengeltengat a meral duubech. Eng di bebil er a kakerous el klengeltengat el dengai sel doltirakl er tial llach a meklou a belkul eng di uaia lak el meues.. Aikal klengeltengat a di sebechel mutab sel dultuil er a chedaol reng e domtab (mesa 1 Korinth 2:14).

Sel uaia le “mado” er a babeluades losaod er ngii a Malakai a kmal bedochel el suobel. A mado a uchul ea llomes a soiseb er a blai. Ngosisiu el teletael, ea chedaol llomes a mechubel er kid lokiu a mado er a babeluades el me soiseb er a klengar kid sel doltirakl er a llach er a ongeltacher.

Okesiul tiang, a diak el meues eng di meklou a belkul klengeltengat el dengai a chedaol sengk er a omereng el saul el kirel a ulserechakl el reng er a ikel soal a rengud. A mereng a saul el chad a meteet er a ikel ngarngii er ngii. Ea diak loureng a saul chad a mo chuarm er a diak a ulebengelel chelebuul e diak bo lungil a rengul (mesa Lukas 12:15).

Ng kired el mo ngara nglunguuch e olengit a ngeso el kirel a ureor. Ng kired el mo ultuil er a klaumerang (mesaEther 12:19), eng di, a ultebenged er a chedaol sengk el mo meduch lomtab el uchul a klisiched el kirel a techall er a ureor el sebechir a rebetok el chad el diak lesang—malechub a klengeltengat el kirel a blakelreng el mo mesisiich el osiik er a techall er a ureor el ngii a rebebil er a rechad a locha blak a rengrir e semeriar el mong. Ng locha mo soad a techall er a ureor, eng di a klengeltengat el mei lokiu a mado er a babeluades a locha klou el techall el bo dolodech er kid me a teletael el de ngara chelsel e bai diak dolatk el kmo a teletael el de ngara chelsel a mengodech lokiu a kmo ng techang malechub a kmo ngerang.

Ng locha soad el mo oureor e soad a ngarbab ludoud el uchul e kede mo mesiou a klechad er kid. A blakelreng er a klaumerang a klou a belkul, eng di, a ultebenged el kirel a chachisois el chedaol techall me a techall er a klechad (mesa Lukas 2:52) el mo sumechokl a kedmeklel a klechad lolab aikel kerkerenged, e mo meduch el sumechokl a meklou a belkul e kiei er a beot el klengar, e mo mengedmokl aikel ngarngii el klokled. Ng locha soad a klou el udoud, eng di a klengeltengat el mei er kid lokiu a mado er a babeluades a mesisiich el ngmodech a teletael el de ngara chelsel e bai diak dolatk el kmo a teletael el de ngara chelsel bol mengodech er a kmo ng techang malechub a kmo ngerang.

Tirkel erul telael el soldau er a Babier er a Mormon (mesa Alma 53; 56–58) a mle blak a rengrir el meluluuch me a Dios bo lolisiich er tir el sebechekelterir er a rechereuir. Ng ongasireng, le mle nger er a ikal nglunguuch a dimlak bol betook a klekedellir er a mekemad malechub el medechel a iidisir. Ng bai, Dios a milngellakl a rengrir el kmo Ngii a mo sobechekelterir, ea budech a mora rengrir, me a mesisiich el klaumerang el kirel a ngbetir lokiu Ngii (mesa Alma 58:11). Meng uaisei, el tirkal ngelekel a Helaman a mlo blak a rengrir, el mle mesisiich a rengrir el mo kats, e ulemakes el mo ruchei loba blakelreng e mlora mekemad lobengeterir a re Lamanites (mesa Alma 58:12–13). Kllouelreng, budech, klaumerang, me a urunguled a locha diak el klengeltengat el rechad el ngara mekemad a sorir, eng di aikaikid a kmal ngii a kelngeltengat el tirkal blak a rengir el ngeasek el chad a ulusbech el uchul eng mlo sebechir el mosebechakl a bedengir me a reng er tir.

Bebil er a taem e kede olengit a klungiaol er a Dios, e Ngii ameskid a klisichel a bedenged me a uldesued. Kede locha olengit el mo ungil besud, e nguu a bleketakl losenged er a tekoi me a chachisois el kllouelreng, malechub e kede olengit a chedaol ulekeroul e mo ngeltengat el nguu a sengk er a chbechub. Ngii a sebechel meskid a mesisiich el klauemerang me ked emo ansing er kid el kudmokl a ungil moktek er kid. E sel dolengit a ngeso el kirel a ringel er a bedenged, uldesued, me a chdaol tekoi, e Ngii a locha meskid a blakelreng e mo sebeched loutekangel.

Ak yaksok el kmo alsekum e kau me ngak a omtab e oltirakl er a llach er a ongeltacher, eng meral tekoi el mado er a babeluades a obok ea chedaol klengeltengat me a klengeltengat er a klechad a mochubel el mo diak a basio lotekau (mesa Malakai 3:10). Kede dirrek el mo dobedebekii a tekingel a Rubak el kmo:

“Le uldesuek a diak el ua uldesuiu, me a rolek a ngodech er a roliu, ng dilu Rubak.

“Ng ua eanged el ngarbab er a bebul a chutem, me ng uaisei a rolek me a uldesuek, el kuk ngarbab er a roliu me a uldesuiu” (Isaia 55:8–9).

A kuuchais el kmo alsekum e kede oba chedaol reng e omtab, e kede mo ngeltengat el mo ungil osenged el mes, me a dingad el blechoel lorrenges, mea rengud el mui el medengei a meklou a belkul e diak el meues el Teletelel, Uldesuel, me a klengeltengat er Ngii er a klengar kid.

Ongeru el suobel—Sel Betengel a Teletelel a Rubak

Uchei era kmokedong el mo chedal a Chelechad er a Teruich me a terung, eng mle betook el taem el kungui er a Doctrine and Covenants el kirel a chelechad el mle ngerchelir lomes e oltobed a chedaol tenget er a ongeltacher. A Chelechad Loltobed a Tenget er a Ongeltacher a milkedmokl lokiu ocholt e mlarngii a rechedal a First Presidency, Chelechad er a Teruich me a terung el Apostol, me a Presiding Bishopric (mesa D&C 120). Me sera December 2004 er a kungedmokl er ngak el mora kot el miting, e ak ulelsingch el kirel a kmal ungil techall el bo kusuub.

A kmal dirk medengei teletael el dilubech me a blo kumelchesiu er tial council. Ng mlo dmolech a omereng el saul me a omengull er ngak el kirel a llechul a Rubak er a tekoi er a udoud el kirir a re dersta el chad, telungalek, me a Ikelesia er Ngii. Sel kmal klou a belkul el prokuram er a udoud er a Ikelesia er a Jesus Kirsto er a Uriul-klebesei el Santo—er a ikel soiseb me a tuobed— a kleuadel er a 119 me a 120 bliongel er a Doctrine and Covenants. Eru el tekoi el debetik er a ngii er a chelsel aikal ocholt a meskid a dodai el kirel a orretel a udoud er a Ikelesia.

Chelsel a 119 el bliongel, ea Rubak a bleketakl el kmu el kmo a rokui el chedal a ikelesia a harau er a teruich el basent er a ikel rokui el kerkerengir er a tal rak. Tiaikid a llach el bo lulsirs er ngii el mo cherechar (bades 4).

Chelsel, tial tekoi er a otebedellel a udoud er a ongeltacher, ea Rubak a dilu el kmo a[ongeltacher] a mo motobed lokiu a First Presidency er a Ikelesia er a Ngii me a bisop me a council er ngii, lokiu Ngii ngarbab el council er a [Rubak], me a Tekingel el mo er tir (D&C 120:1). . A “bisop me a council er ngii” me a “council er ngak” losaod er ngii tial ocholt a dodengelterir er chelechal sils el kmo Presiding Bishopric me a Chelechad er a Teruich me a terung el Apostol, a ngara chelsel. Aikal chedaol udoud a usbechall el kirel tial di meleketek el ikelesia el mo omekngeltegnat er a dersta el chad me a telungalek lokiu okedecherul me a urerel a templo me a blil ongdibel, olngeseu er a ureor er a misionari, oleiuiid me a omelchesel chedaol llechukl, melisiich a tekoi er a ureor er a reksi er a telungalek, olngeseu a skuul me a omesubel a klechelid, e dirrek el mengedmokl a bebil er a moktek er a Ikelesia lokiu a tekingir a remesiungel a Rubak.

Ng mechas a renguk er a bleketakl e kedeb lomesodel aikal eru el ocholt sel kungaisisiu el mora cheliseksikd lomesodel me a orretel a udoud er a chelsel a meklou el chelechad me a kabelment el meliuekl er a beluulechad. Ng mekera orretel a chelechad el uaia mla moluut el Ikelesia er a Jesus Kristo a sebechel motaut er a beluulechad el rokir el di ousbech er tial kedeb lomesodel? A dengu er ngak ea nger a kmal bleketakl: tia urerel a Rubak, Ngii a sebechel di Ngii el meruul a Urerel (mesa 2 Nephi 27:20), ea Osobel a omekrael er a Remesiungel sel loltaut a dereder er Ngii e loureor el Kirel.

Chelsel tial kot el council miting eng mlo mechas a renguk er a betengel tial osisechakl el ngii omekrael a ureram me a uldesuam. Chelsel orretel a udoud er a Ikelesia, e a eru el meklou a belkul e diak el mengodech el teletael a ki moltirakl. A kot, a Ikelesia ousbech aikel kerkerengel e diak longoit a betook er a ikel lengai. Ongerung, a telkib er sel soiseb ludoud er a tal rak a mocheuekl lometech a bkaischemrungel el tekoi me a di kiul duubech el tekoi er a ngeso. Klemengetel a taem, ea Ikelesia a mla olisechakl er a rechedal el mo olcheuekl a sesei el kall, cheluch, me a udoud lometech a bkaischemrungel el tekoi a le dubech. A Ikelesia oltirakl er a osisiu el osisechakl el ngii a mosisechakl el mora rechedal a ikelesia.

Tia er a lolemolem a miting, e ak mlo metik er ngak loureng el ulekum me a rokui el chedal a Ikelesia a mo mtebengar a betengel, e bleketakl, e chelderoder, beltikelreng, me a klisichel a teletelel a Rubak (mesa D&C 104:16) el kirel orretel a teletael er a Ikelesia er Ngii. Ak mla teloi er a Chelechad Loltobed a Tenget er a Ongeltacher el betook el rak. A omereng el saul me a omengull er ngak el kirel a teletelel a Rubak a mla mukeroul er a bek el rak, ea suobel el blak suub a kmal meklou a belkul.

Ak mui er a beltikelreng e chemat er a re blak a rengrir el chedal a Ikelesia er a bek el beluu, kebliil, omelekoi, me a rechad. Sel kumais er a beluulechad, e ak medengei a urunguliu me a somiu, a teletael el kemiu a seluk er a chelsel, me a ringel el mngarngii. Ak mla ngara Ikelesia el teloi er kemiu e mla oldingel er kemiu er a rekeblimiu. A klaumera er kemiu a smisichii a klaumera er ngak. A blakelreng er kemiu a rullak el mo blak a renguk. E sel blakelreng er kemiu loltirakl er a llach er a ongeltacher a ngosukak el mo ungil chad, ungil buch, ungil chedam, e ungil mengeteklel a Ikelesia. Ak melbedebek e melatk er kemiu er a bek el taem el ngara Chelechad Loltobed a Udoud er a Ongeltacher. Ko mesulang er a klungiolel a rengmiu me a blakelreng er kemiu el mengull a telbiliu.

A roungerachel er a mla moluut el Ikelesia er a Rubak a oba mesisiich el ngerachel el mo ungil omtebechel a tengetengir a rechedal a Ikelesia. Aki kmal ungil medengelii a chedaol ngerachel el kirel tiang.

“Me a Jesus a dilengchokl er bita er a blil a tenget er a templo, e ulemes er a rechad er a bo lorrebet a ududir: betok el merau el chad a lilecha kmal betok ludoud.

“E mlei a chebuul el mellakl dil, e lilecha teblo, el bekerekard ludoud.

“Me nguleker er a rubengkel el mo kldibel, e dmu er tir el kmo, Ak subedemiu, Ngika el chebuul mellakl dil, a lilecha betok er tirkal rokui:

“Le tir el rokui el millecha ikel dikea lousbech er a ududir; eng di ngii el chebuul redil a lilecha ikel rokui, el mla er ngii er ngii el kmal lousbech er a klengar ngii” (Markus 12:41–44).

A kmal ungil medengei el kmo a Chelechad er a Otebedel a Tenget er a Ongeltacher a kmal kerekikl el kirel tial teletael. Ak mereng a sulel a President Thomas S. Monson me a re counselors er ngii el kirel a ungil dereder er a tial chedaol ngerachel. E mereng a saul er a ngerel (mesa D&C 120:1) me a chimal a Rubak el ngii a melisiich er a Remesiungel el meruul a ngerachel lomtechei er a Ngii.

Siotai me a Olchotel a Klaumerang

A meral melecha ongeltacher a lmuut el ngaruchei er a di ngerachel, ng klou a belkul telengtengil a teletael el mo klikiid. Tirkel tir a melecha ongeltacher er tir, e a kmal chemat er kemiu.

E tirkel tir a diak loltirakl er a llach er a ongeltacher, e ak siotai er kemiu el mo omtab el kirel a bo mouchel a rengmiu. A kuuchais el kmo sel moltirakl er tial llechul a Rubak, ea mado er a babeluades a mo obok el kiriru. A kulengit me lak mo mosech er a sils el kiriu louchel a rengmiu.

A kuuchais el kmo a chedaol klengeltengat me a klengeltengat er a klechad a mei er a klengar kid sel doltirakl er a llach er a ongeltacher. Ak sioning el kmo aikal klengeltengat a blechoel meklou a belkul eng di diak el beot el meues. Ak dirrek louchais el kmo a betengel a teletelel a Rubak a bleketakl er a chelsel a Ikelesia er Ngii e meskid a teletael el sebechel mekrolid me a telungalek er kid. Nglunguchek me a dersta er kid bo de mukngeltengat er a ikal meklou a belkul suobel, el ngara chedaol ngklel a Rubak el Jesus Kristo, amen.