Mokedong er Ngii el mo Omerk er a Tekingel
Mla er a Elder Randy D. Funk
Er a Rokeuid
Alsekum e ngariou a rengmiu e olngesenges e orrenges er a odbechel Chedaol Reng, e ko mo metik er a klou el deureng er a omesiungiu el misionari.
Sera kmokedong el mo General Authority er tial mlo merek longeua el bui, e ak mle merreder er a mission er a India. Chelsel a taem er a urerek e ak milsuub aikel le dilu er ngak a uleak kuchei er ngak el merreder: “A remisionari er tial Ikelesia a mechas a rengud er tir.”1
A ta er a kmal ungil misionari el ngak me a Sister Funk a dilak loureor lobengkel a Elder Pokhrel el chad er a Nepal. Uriul er a eru el rak el chedal a Ikelesia, eng mlokedong el mo misionari er a India Bangalore Mission, el rechad a melekoi a tekoi er a Merikel. Ng blechoel melekoi el kmo ng dimlak el sal kldmokl. Tia di dodengelii. Ng dirkak a ta me lesa misionari ruchei er a le bo le misionari, leng dirkak e remisionari er Nepal. Ng dimlak el sal meduch el menguiu a tekoi er a Merikel luchul e bo lodengei tekoi er a chelsel okedong el mo er ngii. Tia er a le bocha er a blil omesuub er a re mo misionari, eng dimlak lolab a ungil subelengel, becheleleu el bail, me a nektai, ng bai kildmokl, ngii a melekoi, a “kleim el mekemanget ochil subong, tela el chelchedal a bail, me a kmal betok el chiltel a chui.”2
Uriul er a lengai aikel ngii a kirel loubail, eng millekoi el kmo ng kora omelchesiu er ngii el di klsakl er a bek el sils er a chelsel aikel kot el tela el sandei. Ng milsaod er tiaikid el taem er a mission er ngii el kmo: “Ng dimlak di le meringel a Tekoi er a Ngebard, a ureor meng dirrek el kmal mle meringel. … E sel kmal merngelel e ak mle songerenger, mesaik, e melatk er a rechad er a blik. … Ng uaisei el mle meringel a teletael, eng di ng mle blak a renguk. Ak mlo omelchesiu el mechitechut e ko er a klsakl. Ak blechoel meluluuch er a chelsel aikaikid el taem lolengit er a Chedam er a Babaeluades me lengesukak. Meng dimlak meterob, le bek el taem el kululuuch, e ak mlo melchesuar ongelaod.”3
Ng uaisei el urerel a klemisionari a mle meringel er a Elder Pokhrel, eng di ngii a milesiou loba mesisiich el klaumerang me a blakelreng, losiik el mo medengei e oltirakl aikel lulsuub er a chedaol llechukl, Preach My Gospel, me a tirkel loungerachel er ngii. Ng mlo mesisiich lolisechakl er a ebangkelio—lousbech er a tekoi er a Merikel—e kmal meduch el merreder. Uriul er a mission er ngii me a sesei el taem le ngara Nepal, eng liluut el mo er a India el mo melemolem er a skulel. Sera January eng mlo merreder er a branch er a New Delhi. Ngultuil er a teletael dilubech el mo er ngii er a le misionari, eng melemolem lolngeseu er a ulekerulel a Iklelesia er a India.
Ng mekera ngeasek el chad el dirkak a ta me lesterir a remisionari e mo chimo er tir e kmal mesisiich? Ke mekera kau el misionari e ngmai chedaol klisiich el mo soiseb er a obliil, in-boxes, me a rengrir tirkel ngara mission el kau a mo mesiou er tir? Ng osisiu, a nger a debetik er a chelsel chedaol llechukl me a tekingir a rengar el profet me a reapostol.
A ebangkelio er a le kot loberk er a England er a July 1837, e a Rubak a ulechotii [el mo er a reapostol] el kmo ngii di el techang lodureklii el ngara Ngklel, lokiu a ngor er a rodam, el Teruich me a Terung, el mla modars e mengai a kengei er tir, a mo er ngii a klisichel mekengii a chesimer er a Rengedel er a chelsel a ngii di el beluu le modurokl el mo er ngii.”4
Ngii di el basio el modurokl el mo er ngii, me a ngii di el mission le bo er ngii, e bo modengei el kmo a chedal a Teruich me a Terung a mla kongei er tial okedong e kau a mla mokedong er a profet er a Rubak. Kau a mla mokedong “lokiu a ulaoch, me a omor er a chim.”5
A Rubak a lilecha mo teletelel tial yaksok eng mo mekedmokl. A Rubak a dilu el kmo alsekum [belkul a kmo tial yaksok a mo mekedmokl alsekum] e tir [tirkal misionari el mla modurokl] a mo [1] ngariou a rengrir er Medal, e mo [2] oltirakl a Tekingel, e mo [3] orrenges er a ngerel Chedaol Reng er Ngii.6
A yaksok er a Rubak a bleketakl. Alsekum eng soad el mo oba chedaol klisiich el mo mekengii a chesmerel a rengedel a Dios er a beluu el kau a modurokl el mo er ngii, eng kirel mo ngariou a rengum, olngesenges, e mo meduch lorrenges e oltirakl er a Chedaol Reng.
Aika el kldei el tekoi a kmal kabekbuk. Alsekum e ngariou a rengum, eng soam el mo olngesenges. E a lsekum e ke olngesenges, e ke mo melchesuar Chedaol Reng. Ng klou a belkul Chedaol Reng; el uaia osischeklel, a President Ezra Taft Benson el kmo, “A lak Chedaol Reng, eng kmal diak el sebechem el mo ungil el diak el iior r er a duch er kau me a sebechem.”7
Me ngak el merreder er a mission, e ak blechoel berrotel el mengedecheduch er a remisionari el tir a ngara ringel le ng dimlak el sal mui el klikiid. Te kiliei riou er sel ngii a chedaol ultekellir. Meng diak el iior er a meringel el urerir malechub el klungiaol lurruul, ng dimlak el sebechir el melchesuar a budech e mui el ngara deureng lobengkel Chedaol Reng el dimerekmo bo el ngariou a rengrir, mera louchel el kirel a kngterir, e lenguu a chubechub me a krasia er a Osobel.
A Rubak olisechakl er a Remesiungel el mo ngariou a rengrir le teletael el uchul eng mesumech a rengud a omuchel lobengkel a chelam el reng. Ka momdasu a klungiaol el mo er ngii er a telemall el klalo: A chutem a decherdengii e dualem a wheat. A wheat a metebtib e rullii a blauang. E a blauang a metebtib lolengchelel a sacrament. Se el sekum a chad a mla ouchel a rengul er a kngtil e nguu a sacrament loba chelam el reng me a ngariou el reng, e ngii a mo cherrungel.8 Se el douchel e bo decherrungel lokiu a Tngakireng er a Jesus Kristo, eng kmal betok a sebeched lodars el mo er a Osobel se el dosiou er Ngii. Kede mla nguu ongit el mo er a Kristo lokiu sel dodersii a rengud el rokir el mo er Ngii.9
Alsekum e ko berraod er a klengit e ousbech el mo ouchel a rengum el kirel, e a kulengit me morchedau. A Osobel er a lomekungil er tirkel mla er a ringel, eng mle blechoel lolengit er tir me le bekiis el mo dechor. A chedaol llechukl a melekoi el kmo te mle mereched a rechad el mo dechor.10A mo uchul e ke mo ungil er a chedaol ringel el mnga er ngii, e a kulengit me mkengei er a Ongtil el mekiis el mo dechor. Lak mongiil, bo mongedecheduch er a bisop er kau, merreder er a branch, malechub a merreder er a mission e momuchel er a rael el kirel ouchel el reng.
Se el omekungil klisichel a Tngakireng a mo meskau a budech er a rengum e rullau el mo omelchesiu er a Chedaol Reng. A ringel le blo er ngii Osobel a diak a tekoi el smodii, eng di a kngtid, a le sal betok e loberaod, a sebechel mochur e mesuld, mechoit e mousubes. A Rubak a mla kmo Ngii a ngara klou el deureng er ngike el ouchel a rengul er a kngtil!11
Tiakid el yaksok el ngara Doctrine and Covenants a kmal mesisiich: A Rubak a rirellii a mesisiich el yaksok er a le du el kmo alsekum e kede mechere kldung meng klebekelel a uldesued el diak el ngemed, e kede mo ansing er kid er a rengedel a Dios.”12 Se el mkiei er a klikiid el klengar, e ko mo melchesuar a budech er a rengmiu el klikiid er a medal a Dios e a klisichel Chedaol Reng a mo obengkemiu.13
A rebebil el beches el chedal a Ikelesia malechub ete dirk liluut el mei a locha kmo, “Chelecha e ak mla mo klikiid e soak el mo er a omesiou, eng di diak kudengei el kmo ng klebech aika el kudengei.” Sera Ongeua el buil, e a President Thomas S. Monson a ulsisechakl el kmo, “A klemedengei el kirel a klemerang me a nger el kirel a meklou el ker a bo dengai sel sekum e kede olngesenges a llechul a Dios.”14 Ng meral smisichii a rengud el mo medengei el kmo ngokiu a blekongesenges er kid e kede ngmai a llomes.
A rebebil a locha omelchesiu el ngesonges a duch er tir, sebechir, me a lodengei. Alsekum e tia ngara uldesuem, e molbedebek er a teletael dilubech el mo er a Elder Pokhrel. Mkedmokl aike el rokui el sebechem e modengei el kmo a Chedam er a Babeluades a mo choisois lultuil er a blakelreng me a blekongesenges er kau. A Elder Richard G. Scott a milskid tiakid el mesisiich el tekoi: “Sel dolngesenges a llechul a Rubak e demui el mesiou er a Rengelekel, e a mo olchotel ruriul a klisiich er a Dios—klisiich el muut el remuul a betok er a ike el ngii a sebeched. A llemesed, duch er kid, me a sebeched a mo klou le kid el ngmai a klisiich er a Rubak.”15
Sel motilii a klaumera er kau er a Rubak me a Klungiolel, e a Mesisiich el Dios a mo omekngeltengat er a Rengelekel lokiu kau.16 A Elder Hollings er a Nevada a silubii tiang er a uchelel a mission er ngii. Sel sils er a lekerd er a India, eng mirrael lobengkel a Sister Funk me a ngak el mo er a Rajahmundry, el basio le bo er ngii. A mocha sueleb e a Elder Hollings me a Elder Ganaparam a mlo oldingel er a chedal a Ikelesia me a delal. Ngika el chedil a mle soal mesuub el kirel a Ikelesia, le ng mla mesa el kmo ng mekera ebangkelio e mla omekngeltengat er a klengar er a ngelekel. A Sister Funk a ulebengterir el ko er a di mo mengelim. Meng tial suobel el kirel di mosisechakl lokiu a tekoi er a Merikel e ngika el chedil a kuk di melekoi a tekoi er a Tegulu, a uchul e a ta er a odam er a branch a ulebengterir me loleiuid a tekoi.
A ngerchelel a Elder Hollings er tial kot el ketengel losischeklel a mo mesaod el kirel a Kot el Ues, lousbech a tekingel a Profet Joseph. Tiaikid el taem e ngulbult el mo er a Sister Funk e oker, “Ng locha kirek el kmal mo bleketakl?” e mle ungil medengei el kmo tia mo moiuid.
Ng dilu el kmo, “Bo bleketakl el dulii me a Chedaol Reng bo el sebechel louchais a omolekoi.”
Ngika el misionari er a le sal kmal blak a rengul lolisechakl el kirel a Kot el Ues, lousbech a tekingel a Profet, e a medal ngika el odos a mlengodech. Ng longelang. A Elder Hollings er a bo el merek er tial klebokel el klumech e uchei er a lemoiuid aika el tekingel, e ngika el mechas a lilangel e uleker lousbech er a tekingel, “Ng sebechek el mo metecholb? E sebechemiu losischeklii a ngelekek el sechal?”
Kemiu el ngeasek el ngara omesiou, a chesimer me a reng a blok er a bek el sils el kirel a klemechel ebangkelio—el ngii a klumech er a urunguled me a budech me a deureng el mo er a rengelekel a Dios er a beluulechad el rokir. Alsekum e ngariou a rengmiu, e olngesenges, e orrenges er a odbechel Chedaol Reng, e ko mo metik er a klou el deureng er a omesiungiu el misionari.17 Ng mera el klebokel el taem el bo de misionari—taem el Rubak a orreched er a Urerel!
A kuuchais er a sioning er ngak el kirel Osobel, el Jesus Kristo, me a “chedaol Tekingel”18 el kmo “morael mong, e molisechakl a rokui el beluu.”19 Tia Ikelesia er Ngii. Ngii omekrael er ngii lokiu a ngar el profet me a reapostol. Chelsel a ta el sikang, e a First Presidency a mo olisechakl er kid. Mei e bo de “mereched el omtab,”20 el uaia Mormon, me sel mei okedong, e kede klikiid e sebeched el mo ouchais loba klisichel Chedaol Reng lullekoi er ngii a Mormon el kmo ngii a chedal a Jesus Kristo, el Ngelekel a Dios, el mla mokedong er a Jesus Kristo el mo omerk er a Tekingel er a delongelir a Rechedal, me luchul e bo lenguu a diak a ulebenglel klengar.21 El ngara ngklel a Jesus Kristo, amen.