14:12

Uaia Telemall el Bilas

Mla er a Elder Jeffrey R. Holland

Er a Chelechad er a Teruich me a Terung el Apostol

Ke mekera omolngeseu sel sekum e a secher er a uldasu me a ringel a subecheii er kau malechub tirkel betik er a rengum?

A Apostol Paulus a milluches el kmo tirkel loltirakl er a Jesus Kristo a kirir el mo “chubechub el mo er a ta me a tang.” ¹ Tiaikid a uchul eng soak el mengedecheduch el kirir tirkel ngara ringel er a secherel a bterir malechub secherel a rengrir, a le mekekerei malechub a le meklou el ringel, di kedeb el taem malechub eng kemanget el taem. Kede melchesuar a berredel a ikal tekoi sel dorrenges er a resemmong el mesaod el kirel a ringel er a reng me a secherel a uldasu, el chad a di mlechell e olab, me a lechub eng kuk di dilubech, malechub eng iior er a mekngit el kse, e dirrek luldimukl er a secherel a uldasu. Me a le sal kmal oberaod, e a ika el ringel a telengtengil a klengar, e diak el kired el merur ngii leng di uaia rua high blood malechub a kasinoma.

Msall e ba kdelii el kmo sel dolasm losiik er a budech me a klemedengei el kirel aikal chetituokel el tekoi, eng klou a belkul bo dodengei el kmo kid a kiei—e millilt el mo kiei—er a chelsel a mla ruebet el beluulechad el sel skel a kledios er kid a kirel mora skeng. E a ngaruchei er a chelsel a uldesuel a Dios e a Osobel a mlekedmokl, el Olsobel, lokiu a klaumera er Ngii eng mo sobecheklid er a ringel, el kmal meringel er a Chedam el luldureklii Ngii el ngelekel Sechal mlei. Ngultuil er a omereng el saul er tial chedaol beltikelreng eng mo kebekakl a ringel el sebeched lotekau, e mo medengei, e a uriul e kede mo suobel.

Ak mo mechei aikal kmal meringel el secher e di mo mesaod el kirel a MDD—“meringel el secher er a uldasu”—malechub, eng okedongall el, “secherel a uldasu.” Sel kusaod el kirel tiang, eng diak di kusaod aikel kuk ko er a di mekngit el sils er kid mo harau a tax, malechub amekngit el taem. A rebek el chad el di mo suebek a rengrir e mekngit a tsios er tir a le bebil er a taem. A Babier er a Mormon a melekoi er a Ammon me a rodam er ngii el mlo mekngit a rengrir er a chelsel a kmal meringel el taem er a urerir, ² e osisiu er kid el rokui. Eng di chelechal sils e ak mesaod er a telkib loberaod el tekoi, secher malechub a ngeldengodech el blekeradel el kmal oberaod meng uchul e a chad a diak el sebechel mui el meruul a ngerchelel, me a kngtil a rengul el kmal oberaod meng diak a chad el di kmo ng sebechel mo diak alsekum e tirka el chad el ngara ikal ringel a di mo mesisiich a rengrir e mo ungil lomdasu—le ngak a kmal loldubech er a mesisiich el reng me a ungil uldasu!

Ng diak, aikal berraod er a uldasu me a reng a lmuut el mesisiich er a di mekngit a tsios er ngii. Ak mla mesa el duubech el mo er a kmal ungil chad er a le mad a bechil el mla mo okeim el rak el kaubuch. Ak mla mesa er a re dirk mlo chedil lomekedong er ngii el kmo “klengitelreng ruriul er a cheroll.” Ak mla mesa er a re suebek a rengrir el ngalek er a skuul, resoldau, rechedil el tir a bekikl el kirel a klechad er a rengelekir.

Ak mla mesa er a rengeasek el chedam el melasm el mesiou er a telungalek er tir. E tia dirrek el bla kisa er a klengar ngak. A ta er a taem er a chelsel a chebechielam el mlo kosekodel a rolel a udoud el kmal mle meringel er a uldesuek, e ak mlo omelchesiu el ngara ringel el ngii a dimlak kulsingch er ngii el kmo ng mera el tekoi. Eng di ngultuil er a krasia er a Dios me a beltikelreng er a telungalek er ngak, e ak millemolem el meruul a ngerchelek e melemolem loureor, eng di ak millemolem er a chelsel aikal rak el chubteterir a rebebil er tirkel mlara ringel el uai ngak. Eng di aki di diul mlo mesisiich a rengmam, er a tekingel a Profet Joseph el “ulsiik [e] … omdasu [er] a chelsel a dmolech el teletael” ³ e tilobed er ngii—el bebil er a kmal chetengakl el chad el rua Abraham Lincoln, Winston Churchill, me a Elder George Albert Smith, el ngii a tara kmal lolab a blekerdelel a Kristo el chad er chelechal temed, el mlara ringel el tela el rak ruchei er a bo longeai el profet e Merreder er a Ikelesia er a Jesus Kristo er a Uirul-klebesei el Santo.

Me kede mekerang alsekum a secher er a uldasu me a reng a mo er kau malechub a rebetik er a rengum? A kot e ngaruchei, bol ngarngii a klaumera er kau er a Demam er a Babeluades, el kau a ngelekel e betik a rengul er kau el diak el ngii el beltikelreng a diak modengelii. El uaia tekingel a President Monson el mora rodos er a Relief Society er tial mlo merek el Sabadong er a klebesei: “Tial beltikelreng a diak el mengodech. … Ng medechel a om ngara klengitelreng malechub a deureng, mekngit a rengum malechub e ngungil a rengum. A beltkil a rengul a Dios a medechel el kirem a omomelchesiu lousbech er [ngii] me a lak. Ng kmal di medechel.” ⁴ Ng kmal, diak el bol rraua rengum, e lak bol medecherecher a rengum. Bol blak a rengum losiik aikel tekoi el uchul e a Reng er a Rubak a mei er a klengar kau. Mosiik a tekingir tirkel lolab a kiis el kirel a chedaol klechad er kau. Molengit e molbedebek a klisichel a klengeltengat er a priesthood. Molai er a sacrament er a bek el sandei, e bo murrekodel a yaksok er a Tngkaireng er a Jesus Kristo. Moumerang ongasireng lomeruul. Ak mla mes a betok er ngii el duubech luldimukl aikel taem el uaia bla le bo lak a urunguled. A urunguled a diak el ngemed.Alsekum eng diak el mereched el mei malechub el mui malechub eng kmal diak, e molbedebek er a ringel er a Osobel: chelsel tial klengar eng kired el kongei er sel soal a Dios, luldimukl a le kired el mo melim er a mecheuached, el diak de mochib er kid. ⁵

Ng dorrob a secher meng diak el mei er kid, e momes er a klungel a berraod er a uldasu el mei er kau me a rebebil el kau a locha sebechem el ngosuteri. Ng di uaia mlai, el momes er a telkelel a kleald, kuk kmal mla mo bekerurt, malechub a keizi er a blil a cheluch. Sel mo mchebengelii a “meringel luldasu,” e bo meduch el merech er kau. Sel bo mesaul el berraod er a uldasu a uchul e—bom soro, molengull, kuk mngai a klisichem, me bo mesisiich. A retoktang a melekoi er kid el kmo alsekum eng diak domekerreu er kid, eng klou el temed ruriul a mechoit el di smecher.

Alsekum a tekoi a melemolem lomekringel er kau, e mosiik a ngeso er a rechad el tir a mla mesuub, olab a duch, e ungil a blekerdelir. Bo bleketakl el mo er tir el kirel a teletelem el chad me a ringel el mngarngii. Mngara nglunguuch e bo meduch lomtab aikel tekoi el tir a kmu er kau me a nger el beskau. Alsekum e ke motzio, e a Dios a mengelechel er kau losiik a klengeltengat er a priesthood me a ikel kot el ungil ukeruul el ngarngii. Ngosisiu el mora ringel er a reng. A Chedam er a Babeluades a mengerechir kid el mo ousbech aikel rokui el sengk el Ngii a mla meskid er chelechal taem.

Alsekum e kau a ngara ringel malechub e komecheliu er a chimong, e molasm el diak msal kmal kuk mo meriked er a urerem. Lak momdasu el kmo ng sebechem el remuul a rokui, di mruul aikel sebechem. Alsekum eng mekekerei el tekoi el mruul, bo moureng a saul el kirel e bol klou a rengum. Betok el taem er a chelsel a chedoal llechukl, el Rubak a kmu er a rechad el mo “dechor el chelellakl” malechub e “bom chelellakl”—e mongiil. ⁶ A klou a rengud el mengiil a telengtengil a klengar kid er tial beluulechad.

Kemiu lomekerreu, sel blakelreng er kemiu lomekerreu er a tang, e lak kuk mosecherii a bedengem. Bol mellomes a rengum er a ikal rokui el tekoi. Lak moruul el kuk chengelakl er sel klisichem. ⁷ A ikel kuk mlo diak el sebeched el remuul, eng sebeched lodars a nglunguched me a diak lengemed el beltkil a rengud. ⁸ “Ea beltikelreng a chuarm el kekemanget, e chubechubechad; … e diak el mechechei, … ng bai … outekangel a rokui el tekoi, … mengiil a rokui el tekoi. Le beltikelreng a diak lengemed.” ⁹

Dirrek el bo dodengei el kmo a ngii di el secher malechub a meringel ringel, eng di dirk betook a ngarngii er a klengar el sebeched lolsingch e mereng a saul el kirel. Kid a kuk ngarbab er a ringel el dengarngii! A Stephanie Clark Nielsen me a telungalek er ngii a mla mo kmeed el okedei el rak el ki mkausechelei. Sera August 16, 2008, e a Stephanie me a bechil, er a Christian, a mlara skoki e aksident el di mildul a bedengel el di mlo chelilt el kekul ochil a medangch er a lemei a rechedal a telungalek el me omes er tir. Ng dimlak a techall el Stephanie a sebechel mo chad. Uriul er a edei el buil el dengarch el diak lodengelii a rengul, eng mocha mekisang lomes er ngii. Tiaikid,e ng kmal tilobed a delbengel er a lesa el uasiei. A reteua el ngelekel el ngariou a rekrir er a euid, e a Stephanie a dimlak el soal a lesa el uaisei. Ng ulemelchesiu el bai ungil a lemad. “A kulemdasu el kmo ng mo beot,” a Stephanie mle tal lolekoi er ngak er a chelsel obis, “a di lobes er ngak e bai kurael.”

Eng di diak a ulebengelel klungiolel, me a nglunguchel a bechil, telungalek, resechelei, teua el klebokel el ngelekel, me a ongeim el mlechell el mora telungalek er a Nielsen er a teruich me a eai el buil er a memong, e a Stephanie a mlo meisiich e mlo ta er tirkel merael chisel el “mesisiich el chedil” er a beluu, el ulechais er a eua el million el chad el mo oltirakl er a “chedaol moktek” er a klengar el chedil er a bek el sils el ngii a mla nguu er tial klebokel el beluulechad.

Ngii di el ringel, e rodam me a rodos—er a uldasu malechub a bedenged e lak molasm—el soam el meterob a klengar kau! Moumera er a Dios. Bo murrekodel er a beltikelreng er Ngii. Bo modengei el kmo a tara klebesei e tial klengar a mo nguemed. Kede locha omelchesiu el uaia “telemall el bilas,” el uaia tekingel a Psalmist, el kmo ¹⁰ ng kired el mo melbedebek, el kmo a bilas a ngara chimal olab a chedaol. A telemall el uldasu a sebechel mo ungil el di uaia chelam el iiuis me a chelam el reng el sebechel mo ungil. Me a Dios sel loureor el omekungil, e kid a sebeched lolngeseu lokiu a chubechub, diak dorriter, e bekokeuii.

A kuuchais el kirel a chedaol Lokiis er a Kodall, el diak a smodii el sengk er a Tngakireng er a Rubak el Jesus Kristo! Me a kubengkel a Apostol Paulus, e a kuuchais el kmo sel dilubech el telemall a ta er a klebesei eng mo diak el telemall me sel dilubech el chelitechut a mo mekiis el mesisiich. ¹¹ A kuuchais er a sioning er ngak er sel sils el tirkel betik er a rengud el mlarngii a chelitecheterir er a beluulechad a mo dechor er medad el chetengakl e klebokel, el mechas a rengud er tir loba cherrungel el bedengir me a uldesuir. Ng kol meral mo klebokel el taem! Ng diak kudengei el kmo kede mo ngara deureng el kired el kmo kede mla sioning er tiaikid el taem malechub e kede ngara deureng el kirir el kmo te mla mo cherrungegl “el mocha mimokl.” ¹² Mol muut er sel sikang el Kristo ulechotii a chubechub a bleketakl el mei er kid el rokui, mei e bo de kiei el ngara klaumerang, el urrekodel er a urunguled, e dochotii a “chubechub el mora ta me a tang,” ¹³ a nglunguchek, el ngara ngklel a Jesus Kristo, amen.