Priesthood kag Personal nga Pangamuyo

Ni Presidente Henry B. Eyring

Unang Manuglaygay sa Unang Pangulohan

Ang Diyos makahatag sa aton sang gahum sang priesthood bisan sa ano man kita nga kahimtangan. Ini simpli nga nagakinahanglan nga kita mangayo sing mapainubuson.

Nagapasalamat ako sa pagsalig nga makahambal sa mga nagauyat sang priesthood sang Diyos sa bug-os nga kalibutan. Nabatyagan ko ang kabug-at sinang kahigayunan tungod nahibal-an ko ang amó nga pagsalig nga ginahatag sa inyo sang Ginuo. Sa inyo pagbaton sang priesthood, nakabaton kamo sang katarungan nga maghambal kag maghimo sa ngalan sang Diyos.

Ang inang katarungan magmangin isa ka kamatuoran lang samtang kamo nagabaton sang inspirasyon gikan sa Diyos. Dayon lamang kamo makahambal sa Iya ngalan. Kag dayon lamang kamo makahimo sa Iya ngalan. Ayhan kamo nakasalâ sa pagpanumdom, ”Ah, daw indi man ina masyado kabudlay. Makaangkon ako sang inspirasyon kon ako pangabayon nga maghatag sang isa ka pamulong ukon san-o man nga ako kinahanglan maghatag sang bugay sang priesthood.” Ukon ang isa ka lamharon nga diyakono ukon manunudlo masulhay nga nagaisip, ”Kon ako may edad na ukon tawgon nga magmisyon, dira ko mahibaloan kon ano ang ihambal sang Diyos ukon ano ang himuon sang Diyos.”

Apang panumduma ninyo ang adlaw nga dapat ninyo mahibal-an kon ano ang ihambal sang Diyos kag kon ano ang Iya himuon. Ina nag-abot na sa tanan sa aton—kon ano man ang inyo katungdanan sa priesthood. Nagdaku ako sa lugar sang misyon sa nakatundan nga bahin sang United States sang panahon sang World War II. Ang mga miyembro sang Simbahan nagapuyô nga malayo sa isa kag isa, kag may estrikto nga pangrasyon sang gasolina. Ako lamang ang diyakuno sa branch. Ang mga miyembro naghatag sang ila mga sobre nga may amot sa puasa sa presidente sang branch kon sila nagatambong sa miting sang puasa kag pagpamatuod sa amon puluy-an.

Sang ako 13 ka anyos, nagsaylo kami sa Utah kag nagpuyô sa daku nga ward. Nadumdoman ko ang una ko nga buluhaton nga nagakadto sa mga puluy-an kag magkolekta sang mga halad sa puasa. Gintan-aw ko ang ngalan sa isa sa mga sobre kag natalupangdan ko nga ang apelyido pareho sang isa sa mga Tatlo ka Mga Saksi sa Libro ni Mormon. Gani nagpanuktok ako sa puwerta nga may kaisog. Ang isa ka lalaki nagbukas sang puwerta, nagtulok sa akon, nagkurinot ang guya, kag nagsinggit sa akon nga maghalin. Nahulog ang akon buót nga naglakat.

Malapit na yadto sa 70 ka tuig, pero nadumdoman ko sa gihapon ang balatyagon sinang adlaw sa puwertahan nga nag-isip ako nga kontani dapat ako nagsiling ukon naghimo sang isa ka butang. Kontani nagpangamuyo ako nga may pagtuo sang ako naglakat sina nga adlaw, kag basi ako na-inspirado nga magtindog sing pila ka minutos sa yadtong puwertahan, magyuhom, kag magsiling sang subong sini: ”Maayo nga makilala ko ikaw. Salamat gid sa imo kag sa imo panimalay sa mga amot ninyo sang nagligad. Nakunyag ako nga makigkita sa imo sa masunod nga bulan.”

Ayhan sa akon paghimo sina, basi kon siya nadugangan pa gid nga na-akig—kag basi pa gid nga siya na-insulto. Apang nahibal-an ko kon ano kontani ang akon nabatyagan. Sa tigaylo nga ako nasubuan samtang naglakat, kontani nagbatyag ako sang malulô nga pagdayaw sa akon huna-huna kag balatyagon: ”Maayo gid.”

Tanan kita kinahanglan nga maghambal kag maghimo sa ngalan sang Diyos sa mga tion nga ang aton kaugalingon lang indi bastante nga walâ sing inspirasyon. Ang yadtong mga tion basi mag-abot nga walâ sing tiyempo nga makapreparar. Ina masami nga nagakatabo sa akon. Natabo ini madamo nga tuig ang nagligad sa isa ka ospital sang ang isa ka amay naghambal sa akon kag sa akon kaupod nga ang mga doktor nagsiling sa iya nga ang iya tatlo ka tuig nga babaying anak nga seryoso nga nasamaran mapatay sa sulod sang pila ka minutos. Samtang ginbutang ko ang akon mga kamot sa bahin sang iya ulo nga walâ sing mga bendahe, nangindapat ko nga nahibal-an, bilang isa ka alagad sang Diyos, kon ano ang Iya ipahambal ukon ipahimo sa akon.

Ang mga pulong nag-abot sa akon huna-huna kag sa akon mga bibig nga siya mabuhi. Ang doktor nga nagatindog malapit sa amon naglaghung nga daw nangil-ad kag ginsilingan ako nga maghalin. Naggwa ako sa ospital nga nagbatyag sang paghidaet kag paghigugma. Ang diutay nga batà nabuhi kag nakita ko siya nga nagalakat sa pasilyo sang miting sang sakramento sa katapusan nga adlaw sang ako pagbisita sa sina nga siyudad. Nadumdoman ko sa gihapon ang kalipay kag kaayawan. Ginbatyag ko ang akon ginsiling kag ginhimo sa pag-alagad sa Diyos para sa sinang diutay nga batà kag sa iya panimalay.

Ang kinatuhay sa balatyagon nga ginbatyag ko sa ospital kag ang kasubo nga akon ginbatyag samtang ako nagpalayo sa puwerta bilang isa ka diyakono nag-abot gikan sa akon natun-an tuhoy sa pag-ugyon sang pangamuyo sa gahum sang priesthood. Bilang isa ka diyakono, indi ko pa natungkad nga ang gahum nga maghambal kag maghimo sa ngalan sang Diyos nagakinahanglan sang bugna, kag para ini maangkon kon kinahanglanon nagatawag sang pagpangamuyo kag paghimo nga may pagtuo agud mabaton ang pag-upód sang Espiritu.

Sang gab-i bag-o ako nagkadto sa yadtong puwerta nga magkolekta sang mga halad sang puasa nagpangamuyo ako bag-o ako nagtulog. Apang sa sulod sang mga sinimana kag binulan bag-o ako tawgon sa telepono gikan sa ospital, nagsunod ako sang padayon nga pagpangamuyo kag nagtinguha sa pagsunod sang gintudlo ni Presidente Joseph F. Smith nga magtugot sa Diyos sa paghatag sa aton sang inspirasyon nga kinahanglan agud kita makabaton sang gahum sang priesthood: Simpli nga ginsiling niya ini:

”Indi kinahanglan nga kita magtuaw sa iya sa madamo nga mga pulong. Indi kinahanglan nga palapyuon naton siya sa malaba nga mga pangamuyo. Ang kinahanglanon gid naton, kag dapat himuon bilang mga Santos sa Ulihing mga Adlaw, para sa aton kaayuhan amó ang padayon nga pagpangamuyo sa iya, ang pagpamatuod nga aton siya ginapanumdom, kag handa kita sa pagdala sang iya ngalan sa aton kaugalingon, magtuman sang iya mga kasuguan, kag maghimo sang katarungan; kag kita luyag nga maangkon ang Iya Espiritu sa pagbulig sa aton¹

Kag dayon si Presidente Smith nga nagsiling sa aton kon ano ang aton dapat pangamuyuan, bilang iya mga alagad nga nagpanaad nga maghambal kag maghimo sa ngalan sang Diyos. Nagsiling siya: ”Ano balá ang inyo ginapangamuyuan? Magpangamuyo kamo nga ang Diyos magakilala sa inyo, nga siya makabati sang inyo mga pangamuyo, kag Siya magbugay sa inyo sang Iya Espiritu.”²

Indi ini nahanungod sa mga pulong nga gigamit, apang ini nagakinahanglan sang diutay nga pasensya. Ini amó ang pag-atubang sa inyo Amay sa Langit nga may tuyò nga siya personal nga makakilala sa inyo. Siya ang Diyos sa ibabaw sang tanan, ang Amay sang tanan, kag bisan pa Siya handa sa paghatag sang Iya lubos nga pagtamod sa isa sa Iya mga kaanakan. Ayhan amó ina kon ngaa ang Manluluwas naggamit sang mga pulong ”Amay namon sa langit, Ginapakabalaan namon ang imo ngalan.”³

Mahapos nga mabatyagan ang tudok nga balatyagon sang pagtahud, kon kamo nagaluhod ukon nagaduko, apang sarang mabatyagan nga kamo nagapalapit sa inyo Langitnon nga Amay sa mas indi pormal kag bisan pa mahipos nga pagpangamuyo, nga masami ninyo himuon sa inyo pag-alagad sa priesthood. May madamo nga gahud kag mga tawo sa inyo palibut sa kadam-an sang inyo paglakat kon adlaw. Ang Diyos nagapamati sang inyo mahipos nga mga pangamuyo, pero dapat ninyo mahibal-an ang paglikaw sang mga butang nga nagapalayo sang inyo hunahuna tungod kay ang mga tion nga inyo kinahanglan sa pagpangamuyo basi indi mag-abot sa malinong nga mga oras.

Si Presidente Smith nagtugyan nga kamo kinahanglan magpangamuyo nga ang Diyos makakilala sang inyo katungdanan sa pag-alagad. Siya bug-os gid nga nakahibalo sang inyo katungdanan. Siya nagtawag sa inyo, kag kon kamo magpangamuyo sa Iya nahanungod sa inyo pag-alagad, Siya magpahayag sang madamo pa para inyo ihibalo.⁴

Hatagan ko kamo sang halimbawa kon ano ayhan ang dapat himuon sang isa ka home teacher samtang siya nagapangamuyo. Ayhan inyo na nahibal-an nga kamo dapat:

”Bisitahon ninyo ang puluy-an sang tagsa ka miyembro, kag laygayan sila nga magpangamuyo sing matunog kag sa sekreto kag magtatap sang ila mga katungdanan sa panimalay. …

”... Atipanon ninyo ang mga katapo sang simbahan, kag mag-upód kag magpabakod sa ila;

”Kag pat-uron ninyo nga walâ sing kalalat-an sa simbahan, ukon kaakig sa isa kag isa, ukon pagbinutig, panglibak, ukon malaut nga paghinambalanay;

”Kag pat-uron ninyo nga ang mga miyembro sang simbahan masami nga naga-updanay, kag pat-uron ninyo nga ang tanan nga mga katapo nagatuman sang ila mga katungdanan.”⁵

Karon, bisan para sa isa ka batid nga home teacher kag ang iya manghod nga kaupod, ina masyado ka imposibli nga walâ sing bulig sang Balaan nga Espiritu. Dumdoma ninyo ang mga panimalay ukon mga indibidwal nga inyo dapat alagaran. Ang kinatawo nga pagpamat-od kag maayo nga mga tuyò indi mangin bastante.

Gani kamo magpangamuyo nga mahibal-an ninyo ang ila mga tagipusuon, nga inyo mahibal-an kon ano ang mga kakulangan sa mga kabuhi kag mga balatyagon sang mga tawo nga indi ninyo nakilala sing maayo kag indi nakunyag nga sila inyo makilala. Kinahanglan ninyo mahibal-an kon ano ang dapat ipahimo sa inyo sang Diyos kag sa pagbulig sa ila kag maghimo sang inyo tanan nga pinakamaayo nga ikasarang, nga nagabatyag sang paghigugma sang Diyos sa ila.

Kay tungod kamo may masyado gid ka importante kag mabudlay nga katungdanan sa priesthood nga gani si Presidente Smith nagtugyan nga kon kamo nagapangamuyo, padayon kamo nga magpakitluoy sa Diyos nga bugayan kamo sang Iya Espiritu. Kinahanglan ninyo ang Balaan nga Espiritu indi lamang sa isa ka tion, apang sa madamo nga tion nga ini ihatag sa inyo sang Diyos para inyo di-nagabiya nga kaupod. Tungod sini padayon kita nga nagapangamuyo sa aton pagserbisyo sa Iya mga anak.

Bangud indi kamo makapahitaas sang inyo ikasarang sa priesthood nga walâ sing pag-upód sang Espiritu, kamo mga personal nga target sang kaaway sang kalipayan. Kon siya makasulay sa inyo nga makasalâ, makapahuyang siya sang inyo gahum nga matuytuyan sang Esprititu kag gani magpahuyang sang inyo gahum sa priesthood. Gani bangud sini si Presidente Smith nagsiling nga kamo pirme magpangamuyo sa Diyos nga magpaandam kag magpanagapin sa inyo sa kalautan.⁶

Siya nagpaandam sa aton sa madamo nga mga paagi. Ang mga paandam bahin sang plano sang kaluwasan. Ang mga propeta, mga apostoles, mga presidente sang stake, mga bishop, kag mga misyonero tanan nga nagahatag sang tingog sang pagpaandam nga kita makapalagyo sa mga kalamidad paagi kay JesuCristo, paghinulsol, kag sa paghimo kag pagtuman sang balaan nga mga kasugtanan.

Bilang tagkapot sang priesthood, kamo mangin bahin nga tingog sang Ginuo sa pagpaandam. Apang kinahanglan nga kamo mismo magpamati sang paandam. Indi kamo espirituhanon nga mabuhi kon walâ kamo sang pagpangapin sang pag-upód sang Balaan nga Espiritu sa inyo kabuhi.

Dapat kamo magpangamuyo kag maghimo nga ini inyo maangkon. Sa amó lang sini nga giya kamo makakita sang dalan sa makitid kag masipot nga alagyan sa tunga sang mga alupuop sang kalalat-an. Ang balaan nga Espiritu amó ang inyo manugtuytoy samtang Siya nagapahayag sang kamautoran kon kamo nagatuon sang mga pulong sang mga propeta.

Ang pag-angkon sinang giya nagakinahanglan sang sobra pa sa walay pasapayan nga pagpamati ukon pagbasa. Kinahanglan kamo nga magpangamuyo kag magbutang sang mga pulong sang kamatuoran sa inyo tagipusuon. Magpangamuyo kamo nga ang Diyos magbugay sa inyo sang Iya Espiritu, nga Siya maghatag sa inyo sang tanan nga kamatuoran kag maggiya sa inyo sa matadlong nga dalan. Amó ina ang Iya pagpaandam kag paggiya sa inyo sa matadlong nga alagyan sa inyo kabuhi kag sa inyo pag-alagad sa priesthood.

Ang pangkabilogan nga konperensya nagahatag sa inyo sang kahigayunan nga magtugot sa Ginuo sa pagpabakod sang inyo gahum nga mag-alagad sa priesthood sang Diyos. Makahanda kamo sang inyo kaugalingon, nga ako nakaseguro ginhimo ninyo para sa sining konperensya, sa pagpangamuyo. Makapakig-ugyon kamo sang inyo pagtuo sa mga yadtong magapangamuyo. Sila magapangamuyo sa sining konperensya para sa madamo nga mga bugay sa madamo nga mga tawo.

Sila magapangamuyo nga ang Espiritu magtambong sa propeta bilang isa ka taghambal sang Ginuo. Sila magapangamuyo para sa mga Apostoles kag tanan nga mga alagad nga gintawag sang Diyos. Ina nagalakip sa inyo, halin sa pinakabag-ong gintawag nga diyakono tubtob sa batid nga high priest, kag sa iban pa, tigulang man kag batan-on, nga madali na lamang magpadulong sa kalibutan sang mga espiritu, nga sa diin sila makabati, ”Maayo gid, maayo kag matutom nga suluguon.”⁷

Inang pagtamyaw magaabot sa iban nga matingala sini. Sila ayhan indi gid nakauyat sang mataas nga posisyon sa ginharian sang Diyos sa kalibutan. Ayhan ang iban magbatyag nga sila may diutay lang nga padya sa ila mga kabudlay ukon nga ang pila ka mga kahigayunan nga mga-alagad walâ gid ginhatag sa ila. Ang iban ayhan magbatyag nga ang ila tiyempo sa pag-alagad ginpalip-ot sa sining kabuhi sang sa ila ginlauman.

Indi ang mga posisyon nga ginhatag ukon ang tiyempo sang pagserbisyo ang amó nga timbangon sang Ginuo. Nahibal-an naton ini gikan sa paanggid sang Ginuo nahanungod sa mga manug-obra sa iya talamnan sang ubas, nga ang suhol pareho lang bisan daw ano ka labà ukon diin sila nag-obra. Sila hatagan sang padya kon paano ang ila pag-alagad.⁸

Nakakilala ako sang isa ka tawo, isa ka pinalangga nga abyan, nga ang iya tion sa ulubasan natapos na sang alas 11:00 kagab-i. Siya ginbulong sa kanser sa madamo na nga tuig. Sa yadtong mga tinuig sang pagpabulong kag malalâ nga kasakit kag kabudlay, nagbaton siya sang panawag nga maghimo sang sinimana nga mga miting kag magtatap sa mga miyembro sang iya ward nga walâ na sing mga anak sa ila mga puluy-an; ang iban mga balo. Ang iya katungdanan amó ang magbulig sa ila nga makaangkon sang kalipay sa paghiliupod kag pagtuon sang ebanghelyo.

Sang iya mabaton ang masubo kag hingapusan nga talana nga malip-ot na lang ang iya tion sa kabuhi, ang iya bishop yadto sa isa ka biyahe sa negosyo kag walâ sa ila banwa. Sang duha ka adlaw ang nagligad, siya nagpadala sang sulat sa iya bishop paagi sa lider sang mga high priest. Ini ang iya ginsiling nahanungod sa iya hilimuon: ”Nahangpan ko nga ang bishop walâ diri, gani ako nagahimo sini. Nagaplano ako sang miting para sa aton grupo sa masunod nga Lunes. Ayhan duha ka miyembro ang mahimo nga magdala sa aton sa pagtan-aw sang Conference Center. Makapangabay kita sa iban nga mga miyembro nga magdrayb sa ila kag pila ka mga Scout nga magduso sang mga wheelchair. Suno sa lista sang mga manugbulig, basi may bastante kita nga mga tigulang na subong sa aton nga makahimo sina, pero maayo nga mahibal-an nga kita may iban nga manugbulig kon kinahanglan. Ini mangin maayo man nga gab-i sa panimalay sang mga manugbulig nga mag-agda man sang ila mga panimalay. Gani pahibaloa ako bag-o ko ibantala ining plano. ... Salamat.”

Kag pagkatapos nagtelepono siya sa bishop nga natingala gid. Walâ sing pagtumod sa iya mismo kahimtangan ukon sa iya maisog nga kabudlay, siya nagpamangkot, ”Bishop, ano ang mahimo ko sa imo?” Ang Balaan nga Espiritu lang ang nagtugot sa iya nga mabatyagan ang palas-anon sang bishop bisan nga ang iya mismo nagadugmo sa iya. Kag ang Espiritu lang ang nagpasarang sa iya nga magplano nga mag-alagad sa iya mga kauturan nga may kapat-uran katulad sa iya gingamit sa mga hilimuon sa Scouting sang siya bata-on pa.

Upód sang pangamuyo sang pagtuo, ang Diyos makahatag sa aton sang gahum sang priesthood bisan sa ano man kita nga kahimtangan. Ini simpli nga nagakinahanglan nga kita mangayo sing mapainubuson nga ang Espiritu magpakita sa aton kon ano ang ipahambal kag ipahimo sang Diyos, himuon ini, kag magpadayon nga magkabuhi sing takos sa sinang dulot.

Nagahatag ako sang akon pamatuod nga ang Diyos nga Amay nagakabuhi, nagapalangga sa aton, kag nagapamati sang aton tagsa ka pangamuyo. Ako nagapamatuod nga si Jesus amó ang nagakabuhi nga Cristo, nga ang Iya Pagpasag-uli makapaputli kag takos nga makahatag sa aton sang pag-upód sang Balaan nga Espiritu. Nagapamatuod ako nga sa aton pagtuo kag katutom, sa palaabuton nga adlaw kita makabati sang mga pulong nga magahatag sa aton sang kalipay: ”Maayo gid, maayo kag matutom nga suluguon,”⁹Nagapangamuyo ako nga kita magabaton sinang talagsahon nga bendisyon gikan sa Agalon nga aton gina-alagaran. Sa ngalan ni JesuCristo, amen.