Huo, Masarangan Naton kag Kita Magadaug!

Ni Elder Ulisses Soares

Sang Pangulohan sang Kapitoan

Dapat nga maghawid pa gid kita sang mas mahugot sa aton pagpamutuod sang ebanghelyo ni JesuCristo. Dayon magadaug kita sa tag-adlaw nga pag-inaway batok sa malaut.

Palangga nga mga kauturan, ginpakubos ako sining pribilihiyo nga akon naangkon agud magpamulong sa inyo, mga nagaangkon sang priesthood sang Diyos sa bug-os nga Simbahan karon nga adlaw.

Si Presidente Thomas S. Thomas sang kaisa nagsiling:

“Ang kalibutan sarang kon kaisa nga mangin makahaladlok nga lugar kon diin magpuyo. Ang moral nga talaksan sang katilingban daw sa nagalain sa madasig nga pagdalagan. Wala—bisan bata ukon tigulang ukon sa tunga—ang di-nasakop halin sa paglantaw sadtong mga bagay nga may ikasarang sa pagguyod sa aton paidalom kag maglaglag sa aton.

“… Apang indi kita dapat madulaan sang paglaum. ... Kita nagaaway batok sa sala. ... Ini isa ka away nga masarangan naton kag madaug. Ang Amay naton sa Langit nagahatag sa aton sang mga gamit nga aton kinahanglan agud mahimo ini.¹

Tanan kita, batan-on kag tigulang, nagaatubang sa tagsa ka adlaw sa away nga ginhambal ni Presidente Monson. Ang kaaway kag ang iya mga anghel nagatinguha sa paglingaw sa aton. Ang tuyò nila amó ang magsugyot sa aton nga magsipak halin sa mga kasugtanan nga aton ginhimo upod sa Ginuo, nagabulag sa aton panan-aw sang aton palanublion sa katubtuban. Nabal-an nila sang maayo ang plano sang Langitnon nga Amay para sa Iya mga anak, bangud didto sila sa dakong Konseho sa Langit sang ini ginpabutyag sa tanan. Nagatinguha sila sa pagpamintaha sa aton mga kahuyangan kag kakulangan, nagatiplang sa aton paagi sa “alupuop sang kadulom ..., nga nagabulag sa mga mata kag nagapatig-a sa mga tagipusuon sang kaanakan sang katawhan, kag nagatuytoy sa ila palayo padulong sa malapad nga mga dalanon, nga sila malaglag kag madula.”²

Wala sapayan sa pagsupak nga ginaatubang naton, subong sa gintudlo ni Presidente Monson, ini isa ka away nga masarangan naton kag madaug. Ang Ginuo nagasalig sa aton kapasidad kag determinasyon sa pagbuhat sini.

Ang mga kasulatan may di-maisip nga mga halimbawa sadtong nangin madinalag-on sa ila mga pag-inaway bisan sa tunga sang tuman ka makatalagam nga mga sitwasyon. Isa sa sining mga halimbawa amo si Captain Moroni sa Libro ni Mormon. Ining halangdon nga pamatan-on may kaisog sa pagpangapin sang kamatuoran sa panahon nga may madamo sang pagkinagamo kag pag-ilinaway nga nagbutang sa ital-ital nga kahimtangan sa kaluwasan mismo sang bug-os nga nasyon sang katawhan ni Nephi. Bisan nga siya maalam sa pagtuman sa iya mga responsibilidad, si Moroni nagpabilin nga mapainubuson. Ini kag ang iban pa nga mga kinaiya naghimo sa iya nga isa ka pinasahing instrumento sa mga kamot sang Diyos sina nga panahon. Ang propetang si Alma nagpahayag nga kon ang tanan nga katawhan kasubong ni Moroni, “ang mga kagamhanan mismo sang impiyerno magauyog kuntani sa walay katubtuban; [kag] ang yawa indi gid makaangkon sang gahum nga nagapangibabaw sa mga tagipusuon sang kaanakan sang katawhan.”³ Ang tanan nga mga kinaiya ni Moroni naghalin sa dakung pagtuo niya sa Diyos kag sa Ginuong JesuCristo⁴ kag sa iya malig-on nga determinasyon nga magsunod sa tingog sang Diyos kag sang mga propeta Niya.⁵

Sa pagpaanggid, kita tanan nagakinahanglan nga magbag-o sang aton mga kaugalingon kasubong isa ka modernong Kapitan Moroni agud magdaug sa away batok sa malaut. Nakilal-an ko ang isa ka labing masaligan nga batan-on nga diyakono nga nagbag-o sang iya kaugalingon nga mangin modernong Kapitan Moroni. Tungod siya nagtinguha sa pagsunod sa laygay sang iya mga ginikanan kag mga pinuno sa Simbahan, ang iya pagtuo kag determinasyon gintilawan sa tagsa ka adlaw, bisan pa sa iya batan-on nga edad. Ginsugid niya sa akon nga isa ka adlaw nakibot siya sa isa ka mabudlay kag di-masulhay nga sitwasyon—ang mga abyan niya naglantaw sa mga litrato sang pornograpiya sa ila mga cell phone. Sa sinang eksakto nga tion, ining batan-on nga lalaki nagpamat-ud kon ano ang pinakalabing importante—ang iya pagpang-amigo ukon ang iya pagkamatarong. Sa pila ka mga segundo nga nagsunod, napun-an siya sang kaisog kag nagsiling sa iya mga abyan nga ang ginahimo nila indi husto. Dugang pa, ginhambalan niya sila nga dapat untatan nila ang ila ginahimo ukon sila mangin ulipon sini. Ang kalabanan sa iya mga kaeskwela nagyaguta sa iya laygay, nagsiling nga ini isa ka bahin sang kabuhi kag wala sang kasaypanan ini. Bisan paano, may yara sang isa sa tunga nila nga nagpamati sa laygay sinang batan-on nga lalaki kag nagpamat-ud nga mag-untat sang iya ginahimo.

Ang halimbawa sining diyakono may maayong impluhensya sa pinakakubos sa isa niya nga kaeskwela. Wala sing pangduhaduha, siya kag ang abyan niya nag-atubang sa pagpanghikay kag pagpamigos bangud sinang desisyon. Sa pihak nga bahin, sila nagsunod sa laygay ni Alma sa iya katawhan sang siya nagsiling, “Maggwa kamo halin sa mga malaut, kag mangin lain kamo, kag indi magtandog sang ila di-matinlo nga mga butang.”⁶

Ang pampleta For the Strength of Youth nagalakip sang masunod nga laygay halin sa Unang Pangulohan para sa batan-on sang Simbahan: “Responsable kamo sa mga pagpili nga inyo ginahimo. Ang Diyos nagadumdom sa inyo kag magabulig sa inyo sa paghimo sang maayo nga mga pagpili, bisan pa kon ang inyo panimalay kag mga abyan maggamit sa ila pagpili sa mga paagi nga indi husto. Mag-angkon sang moral nga kaisog agud magtindog sang malig-on sa pagsunod sa kabubut-on sang Diyos, bisan nga kamo magatindog nga nagaisahanon. Samtang ginabuhat ninyo ini, kamo nagapakita sang isa ka halimbawa nga sundon sang iban.”⁷

Ang away sang maayo batok sa malain magapadayon sa bug-os naton nga kabuhi bangud ang tuyò sang kaaway amó ang maghimo sa tanan nga katawhan nga mangin miserable subong niya. Si Satanas kag ang mga anghel niya magatinguha sa pagtakbong sa aton mga panghunahuna kag magpamilit sa pagdumala paagi sa pagsulay sa aton nga makasala. Kon masarangan nila, sila magapagarok sang tanan nga maayo. Walay sapayan, ini kinahanglan naton nga mahangpan nga sila may gahum lamang nga magpangibabaw sa aton kon ini igatugot naton.

Ang mga kasulatan nagalakip man sang pila ka mga halimbawa sadtong naghatag sang pahanugot sa kaaway kag nagtapos nga mangin nagsalangisag kag nalaglag pa gani subong kanday Nehor, Korihor, kag Sherem. Kinahanglan naton nga mangin alerto sa sining katalagman. Indi naton pagtugotan ang aton mga kaugalingon nga maligban sang kinaandan nga mga mensahe nga mahapos ginbaton sang kalibutan kag nga nagasupak sang doktrina kag matuod nga mga prinsipyo sang ebanghelyo ni JesuCristo. Madamo sa sining mga kalibutanhon nga mga mensahe nagarepresentar sang wala sa mas labaw sang sa pagtinguha sang aton katilingban nga magbaton sang sala. Kinahanglan naton nga dumdomon ina, sa katapusan, ang tanan magatindog sa atubang ni Cristo agud mahukman parte sa aton mga binuhatan, kon ang mga ini maayo ukon ang mga ini malaut.⁸ Samtang ginaatubang naton ining kalibutanhon nga mga mensahe, daku nga kaisog kag isa ka pat-ud nga ihibalo parte sa plano sang Langitnon nga Amay ang ginakinahanglan agud magpili sang husto.

Kita tanan makabaton sang kusog agud magpili sang husto kon kita nagapangita sa Ginuo kag nagabutang sang aton pagsalig kag pagtuo sa Iya. Apang, subong sa ginatudlo sang balaan nga mga kasulatan, kinahanglan naton nga mag-angkon sang “isa ka sinsero nga tagipusuon” kag matuod-tuod nga tinutuyò.” Dayon ang Ginuo, sa Iya di-matumbasan nga kalooy, “ipakita niya ang kamatuoran sa [aton], paagi sa gahum sang Balaan nga Espiritu. Kag paagi sa gahum sang Balaan nga Espiritu mahimo ninyo mahibal-an ang kamatuoran sang tanan nga mga butang.” ⁹

Ining ihibalo nga naangkon paagi sa Balaan nga Espiritu wala sang iban kondi ang aton pagpamatuod, nga nagaduso sang aton pagtuo kag determinasyon agud magsunod sa mga tudlo sang ginpanumbalik nga ebanghelyo sa sining ulihing mga adlaw, walay sapayan sa kinaandan nga mga mensahe nga aton mabatian sa kalibutan. Ang aton pagpamatuod dapat mangin taming naton agud pangapinan kita batok sa nagadabdab nga mga baslay sang kaaway sa iya mga pagtinguha sa pagsalakay sa aton.¹⁰ Ini magagiya sa aton nga may kaluwasan sa kadulom kag pagsalangisag nga yara sa kalibutan karon nga adlaw.¹¹

Natun-an ko ining prinsipyo sang ako nag-alagad bilang isa ka batan-on nga misyonero. Ang kaupod ko kag ako nag-alagad sa isa ka diutay kag malayo nga branch sang Simbahan. Gintinguhaan namon nga maistorya ang tanan nga tawo sa siyudad. Ginbaton nila kami sang maayo, apang luyag nila ang magdebate sa kasulatan kag nagpangayo sa amon sang mabakod nga ebidensya parte sa pagkamatuod sang amon ginatudlo.

Madumdoman ko nga sa kada tion nga kami nagtinguha nga pamatud-an ang ano man sa katawhan, ang Espiritu sang Diyos naghalin sa amon kag nabatyagan namon nga kami lunsay nga nadula kag naligban. Nabatyagan namon nga kami dapat nga mas mabakod nga maglinya sang amon mga pagpamatuod upod sa mga kamatuoran sang ebanghelyo nga amon ginatudlo. Sugod sina nga tion, nadumdoman ko nga kon kami magpamatuod sa bug-os namon nga mga tagipusuon, isa ka mahipos kag nagapamat-od nga gahum nga naghalin sa Balaan nga Espiritu ang nagpunô sa kwarto, kag wala sang lugar para sa pagsalangisag ukon diskusyon. Natun-an ko nga walâ sang malaut nga mga pwersa nga nagatuhaw nga sarang magpasalangisag, maglimbong, ukon maglutos sa gahum sang isa ka sinsero nga pagpamatuod sang isa ka matuod nga disipulo ni JesuCristo.

Subong sa gintudlo mismo sang Manluluwas, ang kaaway luyag nga ayagon kita nga kasubong sang trigo, agud madulaan kita sang abilidad sa pag-impluhensya sang kalibutan para sa kaayuhan.¹²

Palangga kong mga kauturan, bangud sa madamo nga pagsalangisag kag mga pagduda nga naglapta sa bug-os nga kalibutan karon nga adlaw, dapat nga maghawid pa gid kita sang mas mahugot sa aton pagpamutuod sang ebanghelyo ni JesuCristo. Dayon ang aton abilidad sa pagpangapin sa kamatuoran kag hustisya daku nga magdugang. Magadaug kita sa matag-adlaw nga mga away batok sa malaut, kag, sa luyo nga kita mapukan sa mga patag-awayan sang kabuhi, mabuyok naton ang iban sa mga talaksan sang Manunudlo.

Ginadapit ko ang tanan nga makasapo sang kaluwasan sa mga tudlo sang mga kasulatan. Si Kapitan Moroni nagpalinya sang iya pagtuo sa Diyos kag sang iya pagpamatuod sa kamatuoran sa ihibalo kag kaalam sang mga kasulatan. Sa sini nga paagi, siya nagsalig nga mabaton niya ang mga bugay sang Ginuo kag maangkon ang madamo nga kadalag-an, nga sa matuod amó ang natabo.

Gina-agda ko ang tanan nga makasapo sang kaluwasan sa maalamon nga mga pulong sang aton mga propeta karon. Si Presidente Thomas S. Monson nagsiling: “Kita nga naordinan sa priesthood sang Diyos makahimo sang pagkatuhay. Kon ginapabilin naton ang aton kinaugalingon nga pagkaputli kag nagapadungog sa aton priesthood, kita mangin matarong nga mga halimbawa para sundon sang iban ... [kag kita] magbulig sa pagpasanaaw sa nagadugang nga madulom nga kalibutan.”¹³

Gina-agda ko ang tanan nga magsalig sa grasya kag sa gahum sang Pagpasag-uli ni JesuCristo. Paagi sa Iya nagapasag-uli nga sakripisyo, sarang naton maangkon ang kaisog nga magadaug sa tanan nga mga inaway sa aton panahon, bisan sa tunga sang aton mga kabudlay, mga panghangkat, kag mga pagsulay. Magsalig kita sa Iya pagpalangga kag gahum sa pagluwas sa aton. Si Cristo mismo ang nagsiling:

“Ako ang banas, ang kamatuoran, kag ang kabuhi: walâ sang tawo nga nagakari sa Amay, kundi paagi sa akon.” ¹⁴

“Ako ang kapawa sang kalibutan: siya nga nagasunod sa akon indi magalakat sa kadulom, kundi magalakat sa kapawa sang kabuhi.”¹⁵

“Ining mga butang ginhambal ko sa inyo, nga sa akon kamo makaangkon sang paghidaet. Sa kalibutan kamo makaangkon sang kalisdanan: apang mag mangin masinadyahon kamo; Nalutos ko ang kalibutan.”¹⁶

Ako nagapamatuod sa sining mga kamatuoran sa sagradong ngalan ni JesuCristo, amen.