Matuod Gid nga Maayo kag Walâ sing Limbong

Ni Elder Michael T. Ringwood

Sang Kapitoan

Ang maayo nga balita sang ebanghelyo ni JesuCristo amó nga ang mga hangad sang aton mga tagipusuon mabaylohan kag ang aton mga katuyuan ma-edukar kag mapaayo.

Nga may paghinulsol, may tion sa akon kabuhi nga sa diin ako gintulod sang mga titulo kag awtoridad. Matuod gid nga ini nag-umpisa sing inosente. Samtang ako nagahanda nga magmisyon, ang akon magulang nga lalaki gintawag nga lider sang sona sa iya misyon. Nakabati ako sang mga maayo nga mga butang nga ginsiling tuhoy sa iya nga daw indi ko gid malikawan nga ang yadtong mga butang mangin akon man. Naghandom ako kag basi nagpangamuyo pa gani nga hatagan sang amó man nga posisyon.

Nga may pagpasalamat, sang ako yara sa misyon, nakatuon ako sang gamhanan nga panudlo. Sang nagligad nga konperensya, ginpahanumdom ako sinang leksyon.

Sang Oktubre, si Presidente President Dieter F. Uchtdorf nagsiling: ”Sa sulod sang akon kinabuhi, ako may mga kahigayunan nga makakilala sang mga pinakamakinaadmanon kag pinakamaalam nga mga lalaki kag mga babaye nga mahatag sining kalibutan. Sang ako lamharon pa, ako naimpluhensya sang yadtong mga edukado, mga sampaton, mga madinalag-on, kag mga ginapadunggan sang kalibutan. Pero sa sulod sang mga panahon, ako nakatalupangod nga mas labi pa ako nga naimpluhensya sang yadtong mga halangdon kag mga bulahan nga mga kalag nga matuod gid nga mga maayo kag walâ sing limbong.”.”¹

Ang akon baganihan sa Libro ni Mormon isa ka himpit nga ehemplo sang matahom kag bulahan nga kalag nga matuod gid nga maayo kag walâ sing limbong. Si Shiblon isa sa mga lalaking anak ni Alma nga Lamharon. Kita mas pamilyar sa iya mga lalaking utod nga si Helaman, nga nagpanubli sang posisyon sang iya amay bilang isa ka rehistrador sang mga kasulatan kag propeta sang Diyos, kag si Corianton, nga bantog sa kalainan bilang isa ka misyonero kag nagkinahanglan sang laygay halin sa iya amay. Sa kay Helaman, si Alma nagsulat sang 77 ka bersikulo (tan-awa ang Alma 36–37). Sa kay Corianton, si Alma nagdedikar sang 91 ka mga bersikulo (tan-awa ang Alma 39–42). Sa kay Shiblon, ang iya natung-an nga lalaking anak, si Alma nagsulat sang diutay lang sa 15 ka mga bersikulo (tan-awa ang Alma 38). Pero ang iya mga pulong sa sinang 15 ka mga bersikulo masyado gid ka gamhanan kag nagatudlo sing daku.

”Kag karon, anak ko, nagasalig ako nga makaangkon ako sang daku nga kalipay sa imo, tungod sang imo kalig-on kag katutom sa Dios; kay sanglit nagsugod ka sa imo pagkalamharon sa pagtulok sa Ginuo nga imo Dios, sa amo man nagalaum ako nga magapadayon ka sa pagtuman sang iya mga kasuguan; kay bulahan siya nga nagapadayon tubtob sa katapusan.

”Ginasiling ko sa imo, anak ko, nga nakaangkon na ako sang saku nga kalipay sa imo, tungod sang imo katutom kag sang imo kaukod, kag sang imo pagkamainumuron kag sa imo pagkamainantuson sa tunga sang katawhan” (Alma 38:2–3).

Dugang pa sa pagpakighambal kay Shiblon, si Alma nagpakighambal man kay Corianton tungod sa iya. Si Alma nagsiling: ”Walâ mo balá mapanilagi ang kalig-on sang imo utod, ang iya katutom, kag ang iya kaukod sa pagtuman sang mga kasuguan sang Dios? Yari karon, wala balá siya maghatag sang isa ka maayong halimbawa sa imo?” (Alma 39:1).²

Daw makit-an nga si Shiblon isa ka anak nga gusto magpahamuot sa iya amay kag naghimo sang maayo para sa kaayuhan sang sa para sa pagdayaw, sa posisyon, gahum, pagpadungog, ukon para sa awtoridad. Si Helaman daw nakahibalo gid sini kag nagtahud sa sining ihibalo tuhoy sa iya utod, gani ginhatag niya kay Shiblon ang katungdanan sa mga kasulatan nga sagrado nga naggikan sa iya amay. Sa kapat-uran, si Helaman nagsalig sa kay Shiblon tungod kay ”sia isa ka matarong nga tawo, kag naglakat sia sing tadlong sa atubang sang Dios; kag nagbantay sia sa paghimo sang maayo sing dalayon, sa pagtuman sang kasuguan sang Ginuo nga iya Dios” (Alma 63:2). Tulad sang matuod nga kinaugali ni Shiblon, wala sing madamo nga ginsulat nahanungod sa iya halin sa tion nga naangkon niya ang sagrado nga mga kasulatan tubtob nga ginhatag niya ini kay Helaman nga anak ni Helaman (tan-awa ang Alma 63:11).

Si Shiblon matuod gid nga maayo kag walâ sing limbong. Siya isa ka tawo nga nagsakripisyo sang iya tiyempo, mga talento, kag mga kabudlay sa pagbulig kag magtib-ong sa iban tungod sang iya pagpalangga sa Diyos kag sa iya isigkatawo (tan-awa ang Alma 48:17–19; 49:30). Himpit nga ginalarawan siya sa mga pulong ni Presidente Spencer W. Kimball: ”Ang dungganon nga mga babaye kag mga lalaki pirme lang mas nagakalangkag nga mag-alagad sang sa mag-alagad para nga sila may gahum.”³

Sa kalibutan nga sa diin ang pagdayaw, ang posisyon, ang gahum, ang pagpadungog, kag ang awtoridad ginahangad sa tanan nga butang, ako nagapangibulahan sa yadtong halangdon kag bulahan nga mga kalag nga matuod gid nga maayo kag walâ sang limbong, sila nga ginaduso sang paghigugma sa Diyos, kag sa ila mga isigkatawo, yadtong maayo gid nga mga babaye kag mga lalaki nga ”mas nagakalangkag nga mag-alagad sang sa mag-alagad agud nga sila may gahum.”

Sa sining panahon may yara dira nga nagapapati sa nga ang aton pagpangita sang kaugyunan matuman lang paagi sa pag-angkon sang posisyon kag gahum. Pero, sa pagpasalamat, may mga kadam-an nga indi naimpluhensya sining kaisipan. Sila nagaugyon sa paghandom nga mangin matuod gid kag walâ sing limbong. Nakilala ko sila sa tanan nga bahin sang kabuhi kag sa madamo nga mga kinabatasan sang pagtuo. Kag madamo gid sila nga akon nakilala sa mga matuod nga nakonberte nga mga sumulunod ni Cristo.⁴

Nagapadungog ako sa yadtong mga nagaalagad sa tagsa ka simana sing di-makinaugalingon sa mga ward kag mga branch sa bug-os nga kalibutan nga lapaw pa kag sa gwa sang ila mga katungdanan. Pero ang mga panawag sa pag-alagad nagabot kag nagataliwan. Ang labi pa nga makatalandog sa akon amó nga ang madamo padayon nga nagaalagad kag magtib-ong sa iban bisan pa nga walâ sila sing pormal nga panawag sa pag-alagad. Ang isa ka utod nga lalaki nagakadto sing maaga pa sa paghamtang sang mga siya kag nagapabilin pagkatapos sa pagkaayo sang sulod sang kapilya. Ang isa ka utod nga babaye nagatuyò nga maglingkod sa tupad sang bulag nga sister sa iya ward agud nga indi lang nga ma-abiabi niya ining sister kundi man nga makakanta siya sang matunog agud nga mabatian sining bulag nga sister kag siya makabati kag magsunod sa pagkanta.

Basi ang akon una nga tinun-an tuhoy sa mga maayo gid nga mga Santos nga walâ sing limbong akon natun-an sang ako lamharon pa nga misyonero. Nagsaylo ako sa areya kaupod ang elder nga indi ko nakilala. Nakabati ako sa iban nga mga misyonero nga siya indi ginhatagan sang bisan isa ka pamuno nga tulumanon kag kon paano siya nabudlayan gid sa linggwahe nga Korean bisan pa nga madugay na siya sa sina nga pungsod. Apang sang makilala ko sing madugay ining elder, nadiskubriham ko nga siya isa ka pinakamasinulundon kag pinakamatutom sa tanan nga mga misyonero nga akon nakilala. Nagtuon siya sa tion sang pagtuon; nagtrabaho siya kon oras na sang pagtrabaho. Naghalin siya sa apartment sa gintalana nga tiyempo kag nagpauli sa takda nga oras. Siya maukod nga nagatuon sang Korean bisan pa masyado ini kabudlay para sa iya.

Sang matalupangdan ko nga ang mga komentaryo nga akon nabatian indi matuod, ako nagbatyag nga ining misyonero indi tama nga ginhukman nga di-madinalag-on. Gusto ko pahibal-on ang bilog nga misyon sang akon natukiban tuhoy sa sining elder. Nagpakighambal ako sa presidente sang misyon sang akon luyag nga tadlungon ining salâ nga paghangop. Ang iya sabat amó ini, ”Ang Langitnon nga Amay nakakilala sining lamharon nga tawo nga isa ka madinalag-on nga misyonero, kag ako man nakahibalo sini. ”Nagdugang pa siya, ”Kag karon ikaw nakahibalo man, gani, sin-o pa ang may bale dira?” Ining maalam nga presidente sang misyon nagtudlo sa akon kon ano ang importante sa pag-alagad, kag indi yadto pagdayaw, gahum, padungog, ukon awtoridad. Ini isa ka daku nga pagtulun-an sa isa ka misyonero nga nagbug-os sang iya isip sa mga titulo.

Lakip sining leksyon sa isip, nagsugod ako sa pagdumdom sa akon nagligad nga kabuhi kag nakita ko kon paano masami ako nga naimpluhensya sang mga lalaki kag mga babaye nga sadto nga tion walâ sing mga mataas nga titulo ukon posisyon. Isa sa yadtong mga katulad-ni-Shiblon nga mga kalag amó ang akon manunudlo sa seminaryo sang akon tuig sa dyunyor hayskul. Ining maayo nga tawo nagtudlo sang seminaryo sang duha ukon tatlo lang ka tuig, apang nabuksan niya ang akon tagipusuon sa paagi nga nagbulig sa pagpadaku sang akon pagpamatuod. Ayhan indi siya kinilala sing masyado sa eskuwelahan, pero pirme siya preparado kag ang iya impluhensya sa akon gamhanan kag walay katapusan. Isa sa mga pila ka beses nga nakita ko siya 40 ka anyos ang nagligad halin sang siya nagtudlo sa akon amó ang iya pagtambong sa lubong sang akon amay. Sa kamatuoran, yadto isa ka buhat nga indi ginduso sang titulo ukon gahum.

Ginapadunggan ko ang dedikado nga manunudlo kag madamo pa nga kasubong nila nag matuod gid nga maayo kag walâ sing limbong. Ginapadunggan ko ang manunudlo sang Sunday School nga indi lang nagatudlo kon Domingo kundi nagatudlo kag naga-impluhensya sa amô mismo nga mga estudyante sa pag-agda sa ila nga magpamahaw kaupod sa iya panimalay. Ginapadunggan ko ang mga lider sang mga batan-on nga nagatambong sang panghampang kag pangkultura nga mga buluhaton sang bataon nga mga lalaki kag mga babaye sa ila mga ward. Ginapadunggan ko ang tawo nga nagasulat sang mensahe sang pagpakaisog sa mga kasilingan kag isa ka babaye nga indi lang nagahulog sang iya mga Christmas card sa koreyo, kundi nagadul-ong sang mga ini sa mga panimalay kag mga abyan nga nagakinahanglan sang pagbisita. Ginapadunggan ko ang brother nga masami nagdrayb sa iya kaingod sang ang yadto may Alzheimer—naghatag sang ginakinahanglan nga kaumpawan sa iya kag sa iya asawa.

Ining mga butang indi ginahimo para dayawon ukon padunggan. Ining mga lalaki kag mga babaye indi ginduso sang posibilidad nga makabaton sang mga titulo ukon awtoridad. Sila mga sumulunod ni Cristo, nga nagapanglakaton sa padayon nga paghimo sang maayo, kag katulad ni Shiblon, nagatinguha sila nga mahamut-an sang ila Langitnon nga Amay.

Nagakasubo ako nga makabati nahanungod sa iban nga nag-untat sa pag-alagad ukon indi na nagatambong sa simbahan kay sila ginbuy-an sa ila mga katungdanan ukon nakabatyag nga sila di-natalupangdan nga mahatagan sang posisyon ukon titulo. Nagahandom ako nga sa pila ka adlaw sila makatuon sang subong nga leksyon nga akon natun-an bilang isa ka lamharon nga misyonero—nga ang pag-alagad nga may pinakamataas nga bili amô ang ginakilala lang sang Diyos. Sa aton paghangad sang ako kag akon, ayhan nalipatan naton ang Ikaw kag Imo?

Ang iban basi magsiling. ”Pero malayo gid ako nga mangin katulad sinang ginalarawan mo.” Ang maayo nga balita sang ebanghelyo ni JesuCristo amó nga ang mga hangad sang aton mga tagipusuon mabaylohan kag ang aton mga katutyuan ma-edukar kag mapaayo. Matapos mabunyagan sa matuod nga panong sang Diyos, makasugod kita nga mangin bag-o nga mga tinuga (tan-awa ang 2 Corinthians 5:17; Mosiah 27:26). Sa kada tion nga magbag-o kita sang kasugtanan sa pagbunyag paagi sa pag-ambit sang sakramento, kita isa ka tikang nga nagapalapit sa aton pinakahingapusan nga katuyuan.⁵Samtang kita nagapadayon sa sinang kasugtanan, makabaton kita sang kabakod nga magpangasubo upod sa nagapangasubo kag magpaumpaw sa yadtong mga nagakinahanglan sang kaumpawan (tan-awa ang Mosiah 18:9). Sa sinang kasugtanan makaangkon kita sang grasya nga makaalagad sa Diyos kag makatuman sang Iya mga kasuguan, lakip ang paghigugma sa Diyos sang aton lubos nga tagipusuon kag pagpalangga sa aton isigkatawo pareho sang pagpalangga naton sa aton mga kaugalingon.⁶ Sa sinang kasugtanan, ang Diyos kag si Cristo nagabulig sa aton agud kita man makabulig sa yadtong mga nagakinahanglan sang aton pagbulig (tan-awa ang Mosiah 4:16; tan-awa man ang bersikulo 11–15).

Ang tanan nga luyag ko gid himuon sa sining kabuhi amó ang pagpahamuot sa akon mga amay—ang dutan-on kag ang langitnon man—kag mangin katulad ni Shiblon.⁷

Nagapasalamat ako sa akon Langitnon nga Amay sa mga kalag nga katulad ni Shiblon nga sa diin ang ila mga ehemplo nagahatag sa akon—kag sa tanan sa aton—sang paglaum. Sa ila mga kabuhi, makita naton ang panaksi sang isa ka mahigugmaon nga Amay sa Langit kag mapinalanggaon kag maluluy-on nga Manluluwas. Nagadugang ako sang pagpamatuod sa ila mga panaksi lakip ang panaad sa pagtinguha nga mangin katulad nila, sa ngalan ni JesuCristo, amen.