Te ’oa’oa ’e te oraora pae vārua

Nā te peresideni Russell M. Nelson

Peresideni nō te pupu nō te Tino ’Ahuru Ma Piti ’āpōsetolo

Tei ni’a te fa’atumura’a o tō tātou orara’a ia Iesu Mesia ’e i tāna ’evanelia, ’ei reira te ’oa’oa e tae mai ai noa atu te mea e tupu ra—’aore rā ’aita e tupu ra—i roto i tō tātou orara’a.

E au mau taea’e, e au mau tuahine, i teie mahana e parau atu vau nō te hō’ē parau tumu e tāviri ho’i nō te oraora i te pae vārua. E parau tumu te riro mai ’ei mea faufa’a rahi ’a rahi noa ato’a ai te mau ’ati ’e te mau ’ohipa ma’au ’ati a’e ia tātou.

’O teie te mau mahana hope’a, nō reira, ’eiaha hō’ē o tātou e hitimahuta atu ’ia ’ite tātou i te mau tohura’a tē tupu ra. E hui peropheta mai ia Isaia, Paulo, Nephi ’e Moromona tei ’ite ātea e tae mai terā tau ’ati rahi,¹ ’oia ho’i i tō tātou nei anotau e ’ārepurepu te ao tā’ātoa,² e riro te ta’ata nei « ’ei mi’imi’i… e aroha ’ore… ’e te hina’aro i te mau mea e navenave ai ra ’aore hina’aro i te Atua »,³ ’e e riro ho’i e rave rahi ’ei tāvini nā Sātane ’o te fa’ati’a i tāna ’ohipa.⁴ ’Oia mau, tē tō nei tātou i « te mau tāvana o teie nei ao pōiri, ’e te mau vārua ’ī’ino i te reva nei ».⁵

’A pa’uma noa ai te mau tama’i i rotopū i te mau fenua, ’a taparahi mehameha noa ai nā feiā ha’amehameha i tei hara ’ore, ’e ’a rahi noa ai te petara’a i roto i te mau mea ato’a, i roto i te tapiha’ara’a ’e tae roa atu i te fa’aterera’a hau, e aha te nehenehe e tauturu ia tātou ? E aha te nehenehe e tauturu ia tātou tāta’itahi i roto i tā tātou iho mau tāfifira’a ’e te mau tāmatara’a ’eta’eta i te orara’a nei, i teie mau mahana hope’a nei ?

’Ua ha’api’i mai te peropheta Lehi i te hō’ē parau tumu nō te oraora i te pae vārua. Nā mua roa e hi’o ana’e i tōna orara’a : ’Ua hāmani-’ino-hia ’oia nō te porora’a ’oia i te parau mau i Ierusalema, ’e ’ua fa’auehia ’oia e te Fatu e fa’aru’e i tāna faufa’a ’e e horo ’e tōna ’utuāfare i roto i te medebara. ’Ua ora ’oia i raro a’e i te fare ’ie ’e ’ua oraora i te mā’a e ’itehia i ni’a i te tere i terā tāpaera’a ’ite-’ore-hia, ’e ’ua hi’o ’oia e piti tamāroa tāna, ’o Lamana ’e Lemuela, i te ’orure-hau-ra’a i te mau ha’api’ira’a a te Fatu ’e i te tūpa’ira’a i tō rāua nā taea’e ’o Nephi ’e Samu.

Pāpū maita’i ē, ’ua ta’a ia Lehi te pāto’ira’a, te ahoaho, te ’ā’au ’oto, te māuiui, te ta’a ’ore ’e te ’oto. Noa atu rā, ’ua fa’ahiti itoito ’oia ma te pāpū roa i teie parau tumu mai tei heheuhia mai e te Fatu : « Tē vai nei te mau ta’ata ’ia noa’a tō rātou ’oa’oa ».⁶ ’A hi’o na pa’i ! ’Ua rau te mau parau nō te fa’ata’a i te huru ’e te fā o tō tātou orara’a i te tāhuti nei, ’e ’ua mā’iti rā ’oia i te parau ’oa’oa !

’Ua ’ī roa te orara’a i te mau huru tī’oira’a ’e te mau puromu ’ōpanihia, te mau fifi ’e te mau tāmatara’a. Pāpū roa paha e taime ’ua fātata te pe’ape’a, te māuiui rahi ’e te taiā i te ha’amou ia tātou tāta’itahi. ’E tei ’ō nei rā tātou nō te ’oa’oa ?

’Ē ! E e mea pāpū te pāhonora’a ! E nāhea rā ho’i te reira ? ’E e aha te ti’a ’ia rave nō te tītau i te ’oa’oa tā te Metua i te Ao ra i fa’aherehere nō tātou ?

’Ua hōro’a mai Eliza R. Snow, te piti o te peresideni rahi nō te Sōtaiete Tauturu, i teie pāhonora’a fa’ahiahia. Nō te fa’auera’a mana hā’iri’iri e ha’amou i te mau mōmoni i Missouri, i te ha’amatara’a o te tau to’eto’e ’e te rohirohi roa nō 1838,⁷ ’ua horo ’ē ’oia ’e te tahi Feiā Mo’a i rāpae i terā tuha’a fenua. I te hō’ē pō, ’ua fa’aea te ’utuāfare o Eliza i roto i te hō’ē fare rā’au nā te mau tītīhoria feiā mo’a. ’Ua tātātarahia te rahira’a o te pate o te mau papa’i rā’au nō te auahi e rātou tei nā mua mai, nō reira e mau ārea nā rotoroto i te papa’i rā’au e ō roa mai te mimi ’ia ne’e nā roto. E mea putaputa te to’eto’e, ’e ’ua pa’ari roa tā rātou mā’a.

I taua pō ra, e 80 ta’ata tei ha’aputuputu i roto i terā fare rā’au, e 6 mētera tuea noa. Te rahira’a ’ua pārahi noa ’aore rā ’ua ti’a noa ē ao noa atu ’ia māhanahana rātou. I rāpae, ’ua ha’aputuputu te hō’ē pupu tāne i pīha’i iho i te hō’ē auahi ura, ’e ’ua hīmenemene i te mau hīmene ’e ’ua tunu pa’a i te tahi ’ūmara tei pa’ari roa i te to’eto’e. ’Ua pāpa’i Eliza : « ’Aita hō’ē a’e amuamura’a—e mea poupou te tā’āto’ara’a, ’e ’āhani e ta’ata ’ē i nā reira mai, e mana’o ’oia ē, e mau rātere ’ana’anatae teie e ’ere i te pupu ti’avaruhia e te tāvana ».

E mana’o ’ana’anatae tei ’itehia i roto i terā fa’ati’ara’a a Eliza nō taua ahiahi rohirohi ra ’e te puta to’eto’e. Tē parau ra ’oia : « ’Ua riro te reira ’ei ’āru’i poupou. ’Aita atu e ta’ata maori rā te feiā mo’a ’o te nehenehe e ’oa’oa noa atu te mea e fa’aruruhia nei ».⁸

Te reira mau ! E nehenehe te feiā mo’a e ’oa’oa noa atu te mea e fa’aruruhia nei. E nehenehe te ’oa’oa e tae mai noa atu e mahana au ’ore noa atu, e hepetoma au ’ore, e matahiti au ’ore !

E au mau taea’e, e au mau tuahine, te ’oa’oa e tae mai, ’aore re’a nō te mea e fa’aruruhia nei, pauroa rā nō te mea i ni’a iho e fa’atumuhia ai tō tātou orara’a.

Tei ni’a te fa’atumura’a o tō tātou orara’a i te fa’anahora’a nō te fa’aorara’a a te Atua, tā te peresideni Thomas S. Monson i haapii noa a’enei ia tātou, ’e ia Iesu Mesia ’e i tāna ’evanelia, ’ei reira te ’oa’oa e tae mai ai noa atu te mea e tupu ra—’aore rā ’aita e tupu ra—i roto i tō tātou orara’a. Nō ’ō mai iāna ’e nōna te ’oa’oa e tae mai ai. ’O ’oia te tumu o te ’oa’oa ato’a. E putapū tātou i te reira i te tau Noela ’a hīmene ai « ’Ua tae mai te Mesia ».⁹ E nehenehe ato’a e putapū i te reira i te roara’a o te matahiti. Nō te Feiā Mo’a i te mau Mahana Hope’a Nei, te ’oa’oa, ’o Iesu Mesia ïa !

Terā te tumu e fa’aru’e ai tō tātou mau misiōnare i tō rātou fare nō te poro i tāna ’evanelia. E ’ere tā rātou fā te fa’arahira’a i te nūmera o te mau melo o te ’Ēkālesia. ’Aita, tē ha’api’i nei tō tātou mau misiōnare ’e te bāpetizo nei ho’i¹⁰ nō te fa’atae i te ’oa’oa i te ta’ata ’ati a’e i te ao !¹¹

’A pūpū ai te Fa’aora i te hau « ’o tei hau ’ē atu i te ’ite ta’ata nei »,¹² ’ua pūpū ato’a ’oia i te pūaira’a, te hōhonura’a ’e te ’ā’anora’a ’oa’oa e’ita te ferurira’a ta’ata ’e te tāhuti e hāro’aro’a. ’Ei hi’ora’a, ’ia hi’ohia, e’ita e nehenehe e ’oa’oa ’ia ro’ohia tā ’oe tamari’i i te ma’i e’ita e ora ’aore rā ’ia ’ere ’oe i te ’ohipa ’aore rā ’ia ha’avare tō ’oe hoa fa’aipoipo ia ’oe. ’O te reira mau rā te ’oa’oa tā te Fa’aora e pūpū nei. E mea tāmau tāna ’oa’oa, ma te ha’apāpūra’a ē, « e vai poto noa mai tō ’oe… mau ’ati »¹³ ’e e ha’amo’ahia te reira nō tō tātou maita’i.¹⁴

Nahea ïa tātou i te tītau i terā ’oa’oa ? E nehenehe e ha’amata i « te hi’o mata atu ia Iesu, i te tumu ’e te fa’aoti i tō tātou fa’aro’o »¹⁵, « i tō mau mana’o ato’a ».¹⁶ E nehenehe tā tātou e ha’amaita’i iāna i roto i tā tātou mau pure ’e nā roto i te ha’apa’ora’a i te mau fafaura’a tā tātou i rave iāna ’e tō tātou Metua i te Ao ra. ’A pāpū noa ai tō tātou Fa’aora ia tātou nei ’e ’a tāparu noa ai tātou ’ia hōro’ahia mai tāna ’oa’oa, e rahi mai tō tātou ’oa’oa.

E mana rahi tō te ’oa’oa, ’e e fa’atae te fa’atumura’a i ni’a i te ’oa’oa i te mana o te Atua i roto i tō tātou orara’a. I roto i te mau mea ato’a, ’o Iesu Mesia te hi’ora’a maita’i hope, « ’o tei fa’a’oroma’i i te satauro… i te [’oa’oa] i tu’uhia mai i mua i tāna aro ».¹⁷ ’A feruri na ! Nō te fa’a’oroma’i i te ’ohipa ri’ari’a roa a’e tei tupu a’enei i ni’a i te fenua nei, ’ua rōtahi tō tātou Fa’aora i ni’a i te ’oa’oa !

’E e aha ho’i terā ’oa’oa i tu’uhia i mua i tāna aro ? Pāpū ē, tei roto te ’oa’oa nō te tāmāra’a, te fa’aorara’a i te māuiui ’e te ha’apūaira’a ia tātou ; te ’oa’oa nō te ’aufaura’a i te mau hara o te ta’ata ato’a e tātarahapa ; te ’oa’oa nō te roa’ara’a nō ’outou ’e nō’u, te ho’ira’a i te fare—ma te mā ’e te ti’amā—nō te ’ora ’e tō tātou nau metua i te ra’i ’e te ’utuāfare.

Mai te peu e rōtahi tātou i ni’a i te ’oa’oa e tae mai ia tātou, ’e i tei herehia, e aha te mau mea e nehenehe tā tātou e fa’a’oroma’i, i teienei rā e mea teimaha ’e te māuiui ’e te mata’u ’e te tano ’ore ’e te rāve’a ’ore paha ?

’Ua rōtahi te hō’ē metua tāne ataata i te pae vārua i ni’a i te ’oa’oa nō te māra’a ’e te ’āfarora’a ’e te Fatu—te ’oa’oa nō te matarara’a te mana’o hapa ’e te ha’amā—’e te ’oa’oa nō te mana’o hau. Maoti te reira, ’ua noa’a mai iāna te itoito e fa’a’ite pauroa i tāna vahine ’e i te ’episekōpo nō ni’a i tōna fifi i te hōho’a faufau ’e te tai’atara’a tei faahope’a. I teienei, tē rave ra ’oia i te mau parau a’o ato’a e hōro’a tōna ’episekōpo ’ia rave ’oia ’e tē tūtava nei ho’i ma tōna ’ā’au ato’a ’ia noa’a fa’ahou mai te ti’aturira’a o tāna vahine iti.

’Ua rōtahi te hō’ē tamāhine ’āpī i ni’a i te ’oa’oa nō te vai-mā-noa-ra’a i te pae ’āpeni nō te tauturu iāna i te fa’a’oroma’i i te fa’ao’ō’ora’a a te mau hoa, ’a fa’aru’e ai ’oia i te hō’ē ’ohipa tuiro’o ’e te fa’ahia’amu, ’e te ataata rā i te pae vārua.

E tāne e fa’a’ino noa i tāna vahine ’e ’o te riri ’ū’ana i ni’a i tāna mau tamari’i tei rōtahi i ni’a i te ’oa’oa nō te vai-ti’amā-ra’a nō te Vārua Maita’i ’ei hoa tāmau nōna. Maoti teie rōtahira’a ’oia i ha’apae ai i te ta’ata tino nei,¹⁸ tāna i māhōhā pinepine na, ’e ’ua rave i te mau tauira’a i hina’arohia.

Nō parau noa a’enei te tahi hoa ’ohipa iā’u nō ni’a i tāna mau tāmataraa teimaha piti ’ahuru matahiti te maoro. ’Ua parau ’oia, « ’Ua haapii au i te māuiui ma te ’oa’oa. ’Ua horomi’ihia tō’u māuiui i roto i te ’oa’oa i te Mesia ra ».¹⁹

E aha tā tātou e nehenehe e fa’a’oroma’i ’a rōtahi ai tātou i ni’a i te ’oa’oa « i tu’uhia i mua » ia tātou ?²⁰ E aha te tātarahapara’a e roa’a i reira ? E aha te paruparu e riro mai ’ei pūai ?²¹ E aha te fa’autu’ara’a e riro mai ’ei ha’amaita’ira’a ?²² E aha te mau pe’ape’a ’e te mau ’ati ato’a e riro mai ’ei maita’i nō tātou ?²³ ’E e aha te tāvinira’a fifi nō te Fatu e noa’a ia tātou ’ia rave ?²⁴

’A rōtahi itoito ai tātou i ni’a i te Fa’aora ’e ’a pe’e tātou i tōna hi’ora’a ’ia fa’atumu i ni’a i te ’oa’oa, e ti’a ato’a ia tātou ’ia ’ape i te mau mea e tāpe’a i tō tātou ’oa’oa. Ha’amana’o ia Korihora, te Aneti-Mesia ? ’Ua tūtuha haere Korihora i te mau mea hape nō ni’a i te Fa’aora, ’ua haere i terā vāhi ’e terā vāhi ē i mua atura i te hō’ē tahu’a rahi tei ani iāna : « E aha te mea ’oe i hāhaere noa ai i te ha’api’ora’a i te mau ’ē’a o te Fatu ? E aha atu ho’i ’oe i ha’api’i ai i teie nei feiā ē, ’aita e Mesia tē tae mai, e fa’a’orehia ai tō rātou ’oa’oa ? »²⁵

Pauroa te mau mea e pāto’i i te Mesia ’e tāna ha’api’ira’a tumu, e tāpe’a ïa i tō tātou ’oa’oa. ’O te mau ’ite hōhonu ato’a ïa o te ta’ata nei, tei parare roa nā ni’a i te ’itenati ’e te mau blog, ’o tē rave roa nei ho’i mai ia Korihora te huru.²⁶

Mai te peu e fāriu tātou i ni’a i te ao ma te pe’e i tāna mau rāve’a nō te ’oa’oa,²⁷ e’ita roa atu tātou e ’ite i te ’oa’oa. E ti’a paha i te ta’ata parau ti’a ’ore i te ’ite e nūmera mana’o pūai i te ’ā’au ’e te au rahi, ’aita rā te ’oa’oa !²⁸ E tao’a hōro’a te ’oa’oa nō tei ha’apa’o maita’i.²⁹ E tao’a hōro’a e tae mai nā roto i te tāmatara’a, ma te hina’aro pāpū, ’ia ora i te orara’a parau ti’a, mai tei ha’api’ihia mai e Iesu Mesia.³⁰

’Ua ha’api’i mai ’oia nāhea e roa’a ai te ’oa’oa. ’Ia mā’iti tātou i te Metua i te Ao ra ’ei Atua nō tātou³¹ ’e ’ua nehenehe tā tātou e putapū i te tāra’ehara a te Fa’aora i roto i tō tātou orara’a, e ’ī ïa tātou i te ’oa’oa.³² I te mau taime ato’a e aupuru tātou i tō tātou hoa fa’aipoipo ’e e arata’i i tā tātou mau tamari’i, i te mau taime ato’a e fa’a’ore tātou i te hapa a vetahi ’ē ’aore rā e ani i te fa’a’orera’a hara, e nehenehe tātou e putapū i te ’oa’oa.

I te mau mahana ato’a e mā’iti tātou e ora i te mau ture tiretiera, i te mau mahana ato’a e ha’apa’o tātou i tā tātou mau fafaura’a ’e e tauturu ia vetahi ’ē ’ia nā reira, e ’oa’oa ïa tātou.

Fa’aro’o maita’i na i teie mau parau a te Salamo : « ’Ua tu’u vau ia Iehova ’ei mua iā’u ; tei ta’u rima ’atau ’oia, e ’ore au e ’āueue… E riro… te ’īra’a o te ’oa’oa i mua i [tōna] aro ».³³ ’Ia ō teie parau tumu i roto i tō tātou ’ā’au, e riro te mahana tāta’itahi ’e te mau mahana ato’a ’ei mahana ’oa’oa ’e te poupou.³⁴ Tē fa’a’ite pāpū nei au i te reira nā roto i te i’oa mo’a o Iesu Mesia, ’āmene.