Dohpeseng, ahpw wia ehute
Nan Mwomwohdiso, mendahte atail wekpeseng kan, Kauno kasik kitail en ehupene!
Nan Suhn 1994 [kid duwopwiki duweisek pahiu], I wie karwaruhla nihmwo sang doadoahk pwehn kilang nait pwihnen siai en soccer ohng aht wehi nan kasdo ohng Sampah Pwon. Ni ei kohkohla, I kilengla kilang ohl soumwahu men ni wasahn aluwo mih nan ah wheelchair o tangatang kohla kapwatkihda plaik en Brazil. I esehte me e pil kolahn kilang mwadongo!
Ansou me se pesereido, sin ansou kis, I pehm me I wehwe laud ohng ohl menet. Se sohte kohkohla wasahtehkis, sehse emenemen, se inenen wekpeseng, ahpw dahme se kesempwalki ohng soccer oh limpoak ohng aht wasa wiahiengkit sen pehm me kiht wia ehu nan ansouo! Leledohr rahnwet, e wereilahr, ahpw I kangkakete kilang nan mese oh pehm wehwepenehn nan pwungato. Eri, kiht me kana nan siaio oh pil iangahki Sampah Pwong nan pahro!
Nan Mwomwohdiso, mendahte atail wekpeseng, Kauno kupwurki kitail en ehupene! E mahsani nan Doctrine and Covenants, “Ehupene; oh ma kumwail sohte ehupene kaidehn kumwail nei aramas.”1
Ni atail pedelong nan imwen sarawi de tehnpas sarawi pwehn kaudekpene, kitail anahne manokehla atail wekpeseng kan, me iangahki wasa kitail kohsangie, mwar laud de tikitik, lamalam me pid government, sukuhl laud oh doadoahk mwahu kan, ahpw medewehte atail ehupene oh mens pwurala nanleng. Kitial kin koul pene, doandoaropwe inou ehute nan ansoun kamadipw sarawi, kitail koaros inda ni ngihl laud “ahmen” mwurin padahk kan, kaskuhl kan, oh kapakap kan—met wehwehki me kitail koaros pwungkihda dahme sansalehr.
Soahng pwukatk kin sewese kalaudehla ehupenehn nan pwungen tohn sarawio.
Ahpw dahme kin kakehlaka de kawehla atail ehupene iei atail mwokid, ansou me kitail kin katohrohr sang tohn Mwomwohdiso kan. Kitail koaros wehwehki,me udahn e pahn lel ansou iou me kitail pahn kosoia emenemen.
Ma kitail pahn koasoai mwahu de lipahnede emenemen, e pahn kahrehda “mohngiongitail kan en ehuene ni minimin,”2 ni duwen dahme Alma padahngki ni Pilen Mormon o, de e pahn kawehla limpoak, likilik, oh kadek me anahne mih nan pwungatail.
Ekei koasoai tikitik kak ekisekis kawehla minimin, me rasehng “Ehng, e wia pisop mwahu men; ahpw kohme sohte kilang ah mwekid ni ah pwulopwulo!”
Me mwahusang me ke kak inda iei “Pisopo udahn mwahu, oh e koahiekla oh marain sang mahso.”
Paktohto kitail kin medehieng pein kitail mwomwen aramas ni atail kin inda me rasehng “Atail kaun en Pwihn en Liho salongahr; e keptakai!” Me mwahu sang, kitail kak inda, “Kaun en Pwihn en Liho sohte nohn men ale kaweid sang emen rahnpwukat; mwein mie mehkot me e toutouki. Kitail sewese oh utungada!”
Riei kan, sohte atail pwung en kosoia emen aramas, mehlel sang nan pwungen atail Mwomwohdiso, nin duwen arail wia aramas sakanakan kei! Ahpw, atail koasoai kan me pid mehteikan anahn kasalehda atail kamehlel Sises Krais oh Sapwellime Tomw oh pwehki Ih oh sang Reh, ansou koaros kitail kak mwamwahula!
Ekei kin tepda kawe oh katohrohr sang kaun oh towe kan en Mwomwohdiso sang sin mehkot tikitik.
Met me wiawiheng ohl emen adaniki Simonds Ryder, me iangala Mwomwohdiso nan 1831. Mwurin ah wadekada kaudiahl ehu me pid ih, e pwuriamweiki sapwungalahn spehlin edehu Rider re kiheng mesen nting i ahpw udahno e pahn y. Soangen mwohmw tikitik duwe met kahrehieng ah peikasalki soukohpo lao ih tepda uhwengada Joseph oh pwupwila sang nan Mwomwohdisoht3
E pil kakete wiawi me kitail pahn lelehn ansou iou ekei pahn kapwung atail wia kaun en mwomwohdiso kan, me pahn song wen atail kak ehuieng irail.
I sounparte 11, ahpw I tamatamante sounpar 44 samwalahro, nimwen sarawi me ahi peneinei kin kaudekiehu anahne pilehu kokouda. Mwohn aht tep doadoahk, mie mihting en kaun kan en wasahu kohpene pwehn kosoia mwomwen towehkan arail pahn sawas. Ahi pahpahu, wia kaunen wasahu sounpar tohtokei mwohwehsang, e kasalehda ah pepehm kehlail me re konehng pwainehng soun wia ihmw en wia ihmwo kaidehn me soakoahiek.
Irail sohte sapwungkihte ah pepehmo, ahpw se rong me e udahn sarohdi douluhl mwohn koaros nan mihtingo. Ohl menet udahn kehlail nan Mwomwohdisoht oh pil wia sounpei en Mahwin Keriau en Sampah sang Europe, e ahnla peiki ah lamalam! Medewe ia pahn mwomwe mwurin kemwekid wet. E pahn nantihengete kihda ah palio oh doulahte uhweng dahme koasoangdiero?
Se kilangehr peneinei kan nan aht ward arail luwetalahr nan rongamwahu wet oh solahr iang sarawi pwehki arail sohte kak ehuieng kaun kan. Se pil kilangehr kempoakepaht tohto sang nan Primary me sohte nohn loaloapwoat nan pwihn pwulopwul pwehki arail pahpa nohno kin kalapw kadeik irail akan me mih nan Mwomwohdisoht.
Ahpw ahi pahpahu pilada en ehuiengte irail Soulengko oh ekei pak, ansou me tohn aht ward o kin kohpene pwehn iang kawada ihmwo, e “luke” aht peneinei en iangih kohla nimwen sarawio, pwe sen kak kilang dahme se kak sawaski.
Udahn I Mwehl. I mentehno idek reh, “Ipa, Ia mwomwen atail kak sewese kauwada ihmwo ma ke pahn sapwungki tohn mwomwohdiso en wia?” Ahpw mwomwen mesehu karehiong ahi sohte kak idek. I men en kak mwahu rahn me e pahn pwurehng kasarawio. Eri I sohte idek I nennenlahte ngehi kohla iang sawas!
Pahpa sohte iang kilangidi ihmw sarawi kapwo, e mehla mwohn ihmwo ah pahn neko ahpw aht nohnohu, uhd Kaunda aht peneinei doudoulahte wia aht pwais lau e nekila, oh e kahrehda aht kak miniminieng ahi pahpao, iangahki tohn Mwomwohdisoh, aht kaun kan, ahpw me keieu kesempwal, iei ohng Kaun!
Sangete mwohng dahme e lelehng nan Kedsemenio, ansou me Sises wie kapakapki Sapwellime Wahnpoaron ko oh Souleng koaros ohng Sahmo, E mahsani, “Pwe irail en wiahla ehu, nin duwen, Sahmo ohngie, oh Ngehi ohng kumwail.” 4
Riei ohl oh lih akan, I kadehde me ni atail kin pilada en ehuieng towe oh kaun kan en Mwomwohdiso wet—ansou me kitail kin kapokonpene ahpw mehlel ansou me kitail sohte mih pene—kitail pil pahn pehm minimimpene laud rehn Samatail Nanleng oh Sounkomour. Ni mwaren Sises Krais, amen.