Kitail Likih Ih? Kahpwal Wia Kamwahupatail
Mendahte kahpwal pwukat, apwal kak mwahu ong irail akan me pahn wenla mwowe ni pwoson oh likih Kauno oh sapwelime pilahn.
Mwohn ei pahn doula, nin duwen weliepen kitail koaros me iang epweliki kisinieng oh rerer en sahpw laud kan, I men wia ahi kaping lap ohng irail akan me pwilikihdi arail ansou pwehn sewesei kiht oh kihiong kiht koapwoaroapwoar.
Nan Oakotohpe 2006[riekid weneu], I wia tepin ahi padahk nan kapokon lap. I kehn e wia iren kaweid kesempwal ehu ohng tohn Mwomwohdisoht nan sampah pwon me pil iangahki iren kaweid me nda: “Kauno likih kitail!”
E udahn likih kitail nan soangen ahl tohto. E ketkihong kitailehr rongamwahu en Sises Krais, oh nan imwin rahn pwukat, unsek en rongamwahuo. E ketkihong kitail Sapwelime manaman oh mweimwei en prihsduhd pwe kitail en doadoahngki ni pwung. Sang ni manaman wet, kitail kak kapaiada, papah, wia tiahk sarawi kan, oh wiahda inou sarawi kan. E likih kitail oh kapwurehdo Sapwelime mwomwohdiso, iangahki Tehnpas sarawi. E ketkihong Sapwelime ladu kan manaman en katengepene—en katengepene pohn samapah oh pil nanleng! E pil likih kitail en wia papah kei sampah, sounpadahk, oh me pahn apwalih Sapwelime seri kan.
Wen ansou me i wiewiahki emen Kaun Lapalap en mwomwohdisoh wet nan wasa tohto en sampah, I kin padahki ni mehlel E ketin likih kitail.
Kalelapak me I men idek nan kapokon wet iei “Kitail likih Ih?
Kitail Likih Ih?
Presiden Thomas S. Monson kin kalap katamankin kitail en kin “Likih Kauno ni mohngiongomw unsek; Dehr koapwoaroapwoarki mehkan me ke pein lemeleme me ke ese.
“Tamanda Kauno ni ahmw wiewia kan koaros, oh e pahn ketin kasalehiong uhk ahl me pwung.
“Dehr mweidohng pein kowe en medemedewe me ke loalokongsang me ke udahn ese. (Proverbs 3:5–7).
Kitail likih me Sapwelime kosonned kan wia kamwahupatail? Sapwelime ladu kan, mendahte arail sohte unsek, en kaweid kitail mwahu? Oh me Ah inou kan mehlel? Kitail likih me Sahm Nanleng oh Sises Krais ese ihs kitail oh men sewese kitail? Ansou me kitail kin lelohng nan eilepen apwal, kahpwal, mwekid apwal kan, ansou apwal, kitail kin likihte Ih?
Erein ei mour, I esehla ekei soahng kaselel ansou me keieu apwal akan—me duwehte ansou me i pwulopwulo, nan misin, tapiada doadoahk kapw, nanantiheng en kapwaiada ahi pwukoah, apwahpwalih peneinei laud ehu, de apwaliki en uhda tohr. E udahn sansal me ansou apwal akan wia kamwahupatail!
Ansou Apwal Wia Kamwahupatail
Ansou apwal kan kin kakehlailih kitailla, kihong kitail en aktikitik, oh kihong kitail en kasalehda ihs kitail. Irail Pioneer ko esehla ihs Koht sang arail kahpwal kan. Dahme kahrehda e lelki iralaud riau pwe Nephi oh riehko en alehdi brass plate ko oh ire tikitikte siluh en kamaterekehda en Ishmael peneinei pwe ren iang irailla nan sapwtehno? (Tehk 1 Nephi 3–4; 7:3–5). E mwomwen me Kauno men sewese kakehlailih Nephi sang ni apwal en alehdi plait ko.
Soahng apwal kan nan atail mour sohte anahne wia mehkot kopwuriamwei. Ehu tepin inou me kitail wiahng Koht iei en momouriki kosonned en tohnmetei. Wehwehn tohnmetei iei en pwilikihdi mehkot me kitail kin pwungki. Kitail pahn kin esehla me e sohte wia mehkot apwal ehu karasahnieng wen laud en kapai me kitail kin alehdihsang. Joseph Smith kosoia, “pelien lamalam ehu me sohte kin anahne tohnmeteikihla mehkoaros sohte pahn ahneki manaman en kakairada pwoson me anahnepe nan mour wet oh mour soutuk.” 1
Koht Sahm oh Nah oh Ngehn sarawio wehwehki oh powedier ansou apwal tohto. Koht Sahm tohnmeteikilahr Sapwelime Ieroso pwehn lokolok ki Tomwo, oh pil mehla pohn lohpwuo. Sises Krais pein pilada pwehn lokolok ki medek en Tomwo oh kanengamah pwehn sewese kitail en kohdo Reh. Pwuhk sarawi kan mahsenih me Sises Krais esehla “peik sang ni soahng kan me E lokolok ki”(Hebrews 5:8). Ngehno Sarawio kin ahneki ansou apwal en kehsehki, pakairiki, oh kaweid kitail, ahpw ekei pak kitail kin pohnsehse, sohte wehwehki mwahu, de kitail kin manokehla.
Kisehn Pilahno
Kahpwal kan wia kisehn pilahn en rongamwahuo. Ehu kahrepen mour wet iei pwe kitail en kekeirdaAbraham 3:25). Me malaulau me ahneki lokolok laudsang aramas en Alma kan. Irail kin tangasang Nahnmwarki Noah pwehn wiahla ladu kei ohng mehn Lamanite kan! Sang ni kahpwal pwukat, Kauno kin kasalehiong irail me E kin panawih oh song kanengamah oh pwoson en Sapwelime aramas akan ” (Mosiah 23:21).
Nan erein rahn apwal kan nan kalapwuhs en Liberty, Kauno padahkihong Joseph Smith en “nantihong powehdi” (D&C 121:8) oh ma e pahn kapwaiada, “soahng pwukat koaros pahn kihwei kamarain, oh e pahn mwahueng uhk” (D&C 122:7).
Presiden Thomas S. Monson pekihier, “kitail en menlau pilada me pwung menda mah apwal ahpw kaidehn dahme mengei oh sapwung”2. Me pid atail tehnpas sarawi kan, e kosoia me “sohte tohnmetei ehu me nohn laudla, sohte pweipwei ehu me toutou, sohte kahpwal me apwal, pwe kitail en kak alehdi kapai en [tehnpas sarawi].”3
Nan sampah wet, apwal wia kisehn mour. E kin apwal ong kisin malek kis en kapwalangpeseng kilin kutohr meh mih loale. Ahpw ma emen pahn song en sewese pwehn mengei ieng, kisin maleko pahn sohte ahneki kehl me e anahne pwehn kak mourla. Met duwehte, ansou me lipahrourou men kin song en pwedieisang nan kidiparail kan e kin kakehlailih irailda ong mour me re pahn mourki.
Sang ni karasaras pwukat, kitail kak kilang me apwal kin lelohng koaros! Kitail koaros kin lel kahpwal. Dahme kin wekidala iei mwomwen atail kin powehdi apwal kan.
Mie ehu ansou me aramas en nan Pwuhk en Mormon ahneki lokolok “kamwomwla” oh “kahpwal tohto.” (Helaman 3:34). Dahme irail wia? Irail kalap kaisihsol oh kapakap, oh wenlahte mwowe ni kehlail oh aktikitikla, oh tengedi oh tengeteng nan arail pwoson Krais, oh irail ahpw ahnekihdi peren oh insenamwahu (Helaman 3:35) Pilehu soangen irairohte wiawi mwurin mahwen tohtoh kei. Pwehki wen ansou werei me mahwen wihwiawi nan pwungen mehn Nephite oh Lamanite kan tohto me mohngiong kekelwak la, … Ah tohto me pilmwuterekda pwehki arail kahpwal kan, lau irail aktikitikla mwohn sihlang en Koht. (Alma 62:41).
Kitail me kin pilada mwomwetail ansou apwal.
Kanaiehng dahme Mengei
Mwohn ahi wiahla emen kaun en mwomwohdiso I wia soun apwalih mwohni nan Houston, Texas. Pali laud en ahi doadoahk I kin iangih ohl ekei me kepwehpwehki milien kei me mie pein arail pesnes. Pali laud en irail wiadahr arail pesnes pweida kei sang ni doadoahk laud. I kin insensuwedki ma I kin rong sang ekei irail ahr nda me re men wiahda pwehn mengeiong neirail seri kan. Re sohte men neirail seri kan en iang ahneki lokolok me irail ahnekihier. I pahn nda, me irail kauhdihsang neirail serikan mehkoto me kahredahr arail pweida.
Ah pilehu, se ese ehu peneinei me wia ehu soangen mwekid. Pahpahu oh nohnohu idawehn kaweid en J. C Penny me ah pahpahu ndahng ansou me e sounpar eisek waleu me e pahn pein koadoahkih nah mwohni. Ira koasoanehdi ehu soangen wiepe: Ansou me emen neira seri pahn kesepwil sang High School, irail pahn pein koadoahki neirail mwohni—ohng sukuhl en mwuri kan me iei (college, grad school, etc.) oh pein apwalih neirail mwohni (mehlel en uhtohrada) (tehk D&C 83:4). E pweida, pwehki serihko doadoahngki ni pwung. Irail koaros kesepwil sang College, oh ekei irail kesepwilsang skuhl—pein irail. E sohte mengei, ahpw irail kapwaiada. Irail kapwaiada sang ni arail doadoahk laud oh pwoson.
Pwoson en Likih Ih
Peidek me nda “Kitail Likih Ih?” pahn ngoramwahu mah nda, “Mie atail pwoson en likih Ih?”
Mie atail pwoson en likih Sapwelime inou kan me pid meiroang me persent 90[duweisek] en atail pai iangahki Sapwelimen Koht sawas mwahusang atail pahn koledi persent 100[epwiki] pwon ohng pein kitail?
Mie atail pwoson en likih me E pahn pwarek kitail nan atail kahpwal kan (tehk Mosiah 24:14), Me E pahn kapwung irail akan me kin kapwung kitail (tehk Isaiah 49:25; 2 Nephi 6:17), oh E pahn kasarawihla atail kahpwal kan pwe kitail en kekeirda? (tehk 2 Nephi 2:2).
Kitail kak doadoahngki pwoson me anahnepe pwehn kak kolokol Sapwelime kosonned kan pwe En kak kapaikitailda ni pali war oh pali ngehn? Oh kitail kak loaloapwoat lau lel imwio pwe En aleikitailda nan Sapwelime wehi? (tehk Mosiah 2:41).
Riei ohl oh lih oko, kitail kak ahneki pwoson en likih Ih! E kupwuriki me keieu mwahu ohng kitail (tehk Moses 1:39). E pahn sapeng atail kapakap kan (tehk D&C 112:10). E pahn kolokol Sapwelime inou kan (tehk D&C 1:38). E ahneki manaman en kolokol inou pwukat (tehk Alma 37:16). E ese soahng koaros! ahpw me keieu kesempwal, E ese dahme keieu mwahu (tehk Isaiah 55:8–9).
Sampah Keper
Sampah rahn pwukat udahn apwal—Mie mwersuwed, sakanakan nan wasa koaros en sampah, mihiehier mwekid keper nan wasa me kin mwahu kan, dipwisou sakanakan, sohte doadoahk, soumwahu, ohlahn sahpw akan, mahwen, weliepe sakanakan, oh soahng tohto. Dahme kitail anahne wia? Kitail pahn tang de pei? Mehnia me pwung? Sohte lipilipil rehra kakete keper.E keperieng George Washington oh nah sounpei kan en pei ahpw e pil apwal ohng irail Pioneer kan en tangasang Nauvoo. E keper ohng Nelson Mandela en lokolok pwe ren saledekla. E sansalehr me ihte me suwed akan pahn pweikihda iei ma aramas mwahu kan sohte wia mehkot.4
Dehr Masopwehk!
Nan soahng koaros me kitail kin wia, kitail sohte anahne pilada, de wia, sang ni masak. Ni mehlelo, “Koht sohte ketkihong kitail ngehn en masak” (2 Timothy 1:7). (Ke ese me lepin mahsen “kedeh masopwehk” sansal nan pwuhk sarawi kan!) Kauno padahngkihongiehier me peikasal oh masopwehk wia dipwisoun doadoahk en tepelo. Sapwelimen Kauno kaweid ong ansou apwal kan iei en wenla mwowe ni pwoson.
Dahkot Apwal?
Mwein emen emente kitail ahneki ehu soangen madamadau me pid apwal. Ekei kin apwaliki pwain meirong ansou me mwohni sohte itar. Kaun akan kin ekei pak apwaliki en awih me semwehmweh kan en pwain meiroang. E kak pil apwal ong ekei kitail en doula oh pwopwouda de ahneki peneinei. Ekei kin awpaliki en “wia dahne Kauno ketikihong irail (Alma 29:3). E kak apwal ohng kitail en kapwaiada atail pwukoah (tehk Alma 29:6). Peneu en mwomwohdisoht ekei pak mwomwen apwal, ahpw ohng ekei e kin wia tepidahn koluhla mehlel.
Mendahte kahpwal pwukat, apwal kak mwahu ong irail akan me pahn wenla mwowe ni pwoson oh likih Kauno oh sapwelime pilahn.
Ahi Kadehdeh
Riei ohl oh lih oko, I kedehdehki me irail kaun pwukat me mwohd mwuri malipilip dahr sang Koht. Irail kin inengieng papah Kauno ni pwung oh sewesei kitail en kihong rongamwahuo nan atail mohngiong kan. I poakpoake oh pil utung irail.
I poakpoake atail sounkomour Sises Krais. I kapingki pwehki Ah poakohng Seme oh kitail me kahrehda ah kak wiahla atail Sounkomour oh Soundoar, oh pwehki met E ahneki lokolok me kahrehiong Ih “en luetala pwehki medek, oh nta kersang nan pwoaren kili koaros, oh E pil lokolok ni paliwar oh pali ngehn” (D&C 19:18). Ansou me e lelohng nan lokolok wet me koasoandier, e kosoia Ipa, “Kaidehn pein nsenei, ahpw kupwuromwi, en pweida” (Luke 22:42). I kepinga mahsen en tohnleng kan: “E seuwer ket met: E kaiasadahr” (Matthew 28:6).
Sapwelime karasaras iei “ihte ahl, mehlel, oh mour” (John 14:6). Ma kitail pahn idawehn karasaras wet kitail pahn kak diar “meleilei nan sampah wet, oh mour soutuk me pahn kohdo” (D&C 59:23).Ni ei kin idawehn oh momourki Sapwelime karasaras kan I eselahr me ehu ehu Sapwelime inou kan udahn(2 Peter 1:4) mehlel.
Dahme I keieu men wia iei en kesihnen rehn Mormon nin duwehn tohnpadahk mehlel men en Sises Krais (see 3 Nephi 5:13) oh en ehu rahn rong sang kilin Ewen Sises, “Keieu mwahu, papah lelepek oh mehlel men kowe” (Matthew 25:21). Ni mwaren Sises Krais, amen.