1 Kedekedeo I ahpw ndaiong riei pwutak ko: Kitail pwuradahla Serusalem, oh kitail loaloapwoatieng kapwaiada Sapwellimen Kauno kosonned akan; pwe kilang Kauno manaman sang sampah pwon, a dahme e sohte pahn manaman sang Leipen oh nah aramas limehko, ei, de pil nah aramas nen ko?

2 Eri kitail kohdahla; kitail alasang Moses me kehlail; pwe ni mehlel e lokaiahiengete pihl en Sehd Weitahtao eri sehdo ahpw pwalpeseng wiahda riau palimeing oh palimaun, oh atail pahpa kahlap oko kotehla ni arail keid pohn ngalangal, oh pitsang mour en kaludu, oh sapwellimen Parao sounpei ko eri pwakihirailla oh duhla nan Sehd Weitahtao.

3 Kilang met kumwa ese me e mehlel; oh kumwa ese me tohnleng men mahseniong kumwa; eri dahme kumwa peikasaliki? Kitail kohdahla; Kauno pahn ketin doareikitailla, duwehte atail pahpa kahlap ako, oh kemehla Leipen, duwehte mehn Isip ko.

4 Ni ahnsou me I koasoaia mepwukat, ira wie lingeringerte, oh pil doulahte kaukaulim; ahpw ira pil idawehniedahla lao se lel likin kelen Serusalem.

5 Oh e nihpwongdi ni aht lella mwo; ngehi eri ndaiong irail me re pahn rukila maslikin kehlo. Oh mwurin arail rukilahr, ngehi, Nihpai, wailong nan kahnihmwo oh kohla ni ihmwen Leipeno.

6 Oh Ngehno kahluwa ie, ni ei sohte ese soahng koaros me I pahn anahne wia.

7 Ahpw I kohlahte, oh ni ei karenlahng ihmwen Leipeno I kilangada ohl emen, oh e pwupwidier nan pwehlo mwohi, pwehki e sakaukilahr wain.

8 Oh ni ahnsou me I lella reh I diarada me Leipen mwo.

9 Oh I kilangada nah kedilahso, ngehi eri usadahsang nan kidipeo; oh mangileo wiawihkihda kohl tohr, oh mwomwen wiawihdahn kedilahso uhdahn kaselel mehlel, oh I kilang me paliweren kedilahso wiawihkihda mete sdihl me keieu mwahu.

10 Kedekedeo Ngehno eri ketin idingohng ie I en kemehla Leipen; ahpw nan ei mohngiong nda: Saik pak ehu I kemehla aramas emen. Oh I pweiek sang oh sohte men kemehla.

11 Oh Ngehno pwurehng mahsanihong ie: Kilang Kauno me ketikihenguhk ohl menet. Iei, oh I pil ese me e song en kihsang ei mour; ei, oh e sohte men kapwaiada sapwellimen Kauno kosonned akan; oh e pil kihsangehr aht dipwisou ko.

12 Kedekedeo Ngehno pwurehng mahsanihong ie: Kemehla, pwe Kauno me ketikihonguhk ohl menet;

13 Kilang Kauno kin ketin kemehla me suwed kan pwe sapwellime koasoandi pwung kan en kak pweida. Emen aramas en kamakamala mwahusang wehi ehu eh pwupwidi oh kamwomwomwla nan arail soupwoson.

14 Oh met, ahnsou me ngehi, Nihpai, rongehr mahsen pwukat, I tamanda mahsen en Kauno me e ketin mahsanihong ie nan sapwtehno, ketihtihki: Ma kodoudokemwail kan pahn kapwaiada ei kosonned akan, irail pahn pweida nan sahpw en inouo.

15 Mehlel, oh I pil medewehla me irail sohte pahn kak kapwaiada sapwellimen Kauno kosonned akan nin duwen kosonned en Moses, ihte ma kosonnedo miehier rehrail.

16 Oh I pil ese me kosonned ko ntingdi pohn pileit pirahs ko.

17 Oh pil ehu, I ese me Kauno me ketikihong ie Leipen pwehki kahrepe wet—pwe I en kak alehdi poadoapoad kan nin duwen sapwellime kosonned akan.

18 Kahrehda I peikieng kepitien Ngehno, oh koledi pitenmoangen Leipeno, oh I ahpw lupungkihsang moangeo nah kedilahso.

19 Oh mwurin ei lupungkihsang moangeo nah kedilahso, I kihsang ahn Leipen likouo oh likawiada; iei, mehkoaros; oh ngehi likawiada ah tehtehn mahwino oh katengehdi ni lukopeie.

20 Oh mwurin ei wiahier met, I kohla wasahn nekid ahn Leipen dipwisou kesempwal akan. Oh ahnsou me I kohkohlahng wasahn nekid ahn Leipen dipwisou kesempwal ko, kilang, I kilangada nein Leipen soun papah me kin kol kih en wasahn nekineko. Oh ngehi eri ruwese ni ngilen Leipen, me en iangie kohla wasahn nekid dipwisou kesempwal oko.

21 Oh e wiahki me ngehi ah kauno, Leipen, pwe e kilang likou ko oh pil kedilahso me katengetendi ni lukopeie.

22 Oh e koaskoasoaiong ie me pid soumas en mehn Suhs akan, pwehki e ese me ah kauno, Leipen, kohla rehrail nisoutiko.

23 Oh I koasoaiong ih duwehte ngehi me Leipen.

24 Oh I pil ndaiong me I pahn wahla nting ko, me ntingdi pohn pileit prahs ko, rehn riei ohl laud kau, me mihmi likin kehlo.

25 Oh I pil ndaiong en idawehnie.

26 Oh e, medemedewe me I koasoakoasoaia ohl en nan mwomwohdiso, oh mehlel ngehi Leipen me I kemehlahro, eri e ahpw idawehnie.

27 Oh e koasoaiong ie pak tohto duwen soumas en mehn Suhs akan, ni ei kohkohlahng riei pwutak ko, me mihmi maslikin kehlo.

28 Kedekedeo ahnsou me Leimen kilangiehdao e inenen masepwehkada, oh pil Lemuel oh Sam. Oh irail tangasangie; pwe irail wiahki me ngehi Leipen, oh me e kemeiehlahr oh pil raparapahkinirail pwe en kemeirailla.

29 Kedekedeo I lukuwerirail, oh irail ahpw rongada ngileie; irail eri sohla tangasangie.

30 Kedekedeo ahnsou me nein Leipen laduo kilangada riei pwutak ko e ahpw masepwehkada, oh e kerenieng tangasangie oh pwurala nan kahnihmw en Serusalem.

31 Oh met ngehi, Nihpai, pwehki paliwareiet lapala, oh pil Kauno ketin kakehlailihie, ngehi eri parokedi nein Leipen laduo, oh koledi, pwe en dehr tang.

32 Kedekedeo I kawehwehiong, me ma e pahn rong ei koasoai kan, nin duwen Kauno eh ketin ieias, oh ei momour, iei ma e pahn rong ei koasoai kan, se sohte pahn kemehla.

33 Oh I ndahieng, ni ei kahukihla, me e sohte anahne periki mehkot; me e uhdahn pahn wia aramas saledek men duwehte kiht ma e pahn iang kiht kohdihla nan sapwtehno.

34 Oh ngehi pil ndahieng: Mehlel Kauno me mahsanihong kiht sen wia met; oh kitail sou pahn loaloapwoat ong kapwaiada sapwellimen Kauno kosonned kan? Eri, ma komw pahn iang kiht kohdihla nan sapwtehno rehn ei pahpao e pahn mie dewemw reht.

35 Kedekedeo Sohram koapworopworkihla koasoai kan me I koasoaia. Sohram iei eden laduo; oh e inoukihda me e pahn iang kohdihla nan sapwtehno rehn aht pahpao. Iei, oh e pil kahukihong kiht me e pahn mihmihla reht sang ahnsouwo kohkohla.

36 Met se inangih mehlel me en mihmihla reht pwehki kahrepe wet, me mehn Suhs akan en dehr ese duwen aht kohkohlahr nan sapwtehno, pwe irail dehr pwakih kiht oh kemeikitala.

37 Kedekedeo ahnsou me Sohram kahulahr ong kiht, se ahpw sohla pwunodiki ih.

38 Kedekedeo kiht eri wahda pileit prahs ko oh nein Leipen laduo, oh mweselahng nan sapwtehno, oh seiloaklahng ni imwen aht pahpao impwalo.