1 Oh met ngehi, Nihpai, pahn doula oh ntingihdi pohn pileit pwukat ei wiewia kan, oh ei mwei en kaun oh doadoahk en kalohk; eri, pwe I en kak doula nan ei nting, I anahne ntingihdi soahng kan me pid duwen ei pahpao, oh pil riei ohl kan.

2 Pwe kilang, e wiawiher me mwurin ei pahpao kanekelahr ah koasoaiahda audepen ah ouramano, oh pil [kanekelahr ah] kangoangehki irail en lalloapwoat, e patowan ong irail duwen mehn Suhs akan—

3 Me mwurin arail pahn kamwomwala, iei kahnimw lap en Serusalemo, oh tohto irail pahn sellahng nan Papilon, nin duwen sapwellimen Kauno ahnsou, irail pahn pwurehng kopwuropwurodo, iei, irail pahn kopwurupwurdohsang wasa irail sella ie; oh mwurin arail pahn kopwurupwurdo sang arail selidi irail pahn pwurehng sapwanikihla sahpwerail sahpw en sohsohu.

4 Iei, sounpar wenepwiki mwurin ei pahpao mweselsang Serusalem, Soukohp men me Kauno Koht pahn apwaliada rehn mehn Suhs akan—iei Mesaiao, de pil ehu ahd, Sounkomour en sampah.

5 Oh e pil koasoaia duwen soukohp akan, duwen tohtohn irail me kadehdehkier mepwukat, duwen Mesaiao, me e patohwanehr, de Soundoar en sampah.

6 Eri, aramas koaros me mih nan mour wet salongalahr oh pwupwidier, oh ihte me irail pahn komourkihla ma irail idawehn Soundoaro.

7 Oh e koasoaia duwen soukohp men me pahn kohdo mwohn Mesaiao, pwe en kaunopada mwohn Kauno—

8 Ei, e pahn kohwei oh kalohk ki nan sapwtehn: Kumwail kaunopada ahl en Kauno, oh kainenehla ahl akan wasa me e pahn keid ie; pwe mie ohl emen me pahn ketido mwuri, me lapalapasang ie mehlel; me pirapir en sapwellime suht I sohte warohng en sapwadada. Oh ei pahpao koasoakoasoaia laud duwen met.

9 Oh ei pahpao patohwan me e pahn pepdaisla nan Pedapara, palio Sordan; oh e pil patohwan me e pahn pepdaiski pihl; iei e pahn pepdaisihkihla Mesaiao pihl.

10 Oh mwurin eh pahn pepdaisihkihla Mesaiao pihl, e pahn kilangada oh kadehdeh me e pepdaisihla Sihmpwul en Koht, me pahn ketkihsang dihp en sampah.

11 Kedekedeo mwurin ei pahpao eh patohwanehr koasoi pwukat e ahpw patohwanohng riei pwutak ko duwen rongamwahu me pahn kalohkehng rehn mehn Suhs akan, oh pil duwen mehn Suhs akan arail pahn pwupwikihdi arail soupwoson. Oh mwurin arail pahn kemehla Mesaiao, me pahn ketido, oh mwurin eh pahn ketin kamakamala e pahn iasadahsang mehla, oh ketin pwarohng Mehn Liki kan sang Ngehn Sarawi.

12 Iei, ei pahpao pil koasoia duwen Mehn Liki kan, oh pil duwen peneinei en Israel, me irail pahn rasohng tuhkehn olihp pwoat, me rah kan pahn tipwasang oh pahn kamweremwerpeseng wasa koaros ni sampah.

13 Eri, e mahsanih me e pahn konehng kitail en ehupene kohla nan sahpw en inouo, pwe en kapwaiada sapwellimen Kauno mahsen, me kitail pahn kamweremwerpeseng wasa koaros pohn sampah.

14 Oh mwurin peneinei en Israel ar pahn kamweremwerpeseng irail pahn pwurehng kopwurupwurpene; de, ni oarelap, mwurin Mehn Liki kan arail pahn alehdi rongamwahuo ni unsek, uhdaken rahn tuhkehn olihpo, de luhwen peneinei en Israel kan, pahn pwurehng poadehng tuhkehu, de wewehkihda udahn Mesaiao, arail Kaun oh arail Soundoar.

15 Oh ih mwomwen koasoai kan me ei pahpao kohpada oh patohwanohng riei pwutak ko, oh pil soahng tohto me I sohte ntingihdi nan pwuhk wet; pwe I ntingihdi tohto irail me kesempwal ongie nan nei pwuhk teio.

16 Oh me pwukat koaros, me I koasoaiadahr, wiawiher ahnsou me ei pahpao mihmi nan impwal, nan wahu en Lemuel.

17 Kedekedeo, ngehi, Nihpai, rongehr ahn ei pahpao koasoai kan koaros, duwen dahme e kilangada nan kaudiahl, oh pil soahng kan me e pil koasoaia sang ni manaman en Ngehn Sarawi, manaman me e alehdi sang ni eh pwoson Sapwellimen Kohto—oh Sapwellimen Kohto iei Masaiao me pahn ketdo—Ngehi, Nihpai, inangih I en pil kak iang kilang, oh rong, oh ese mepwukat, sang ni manaman en Ngehn Sarawi, me iei kisakis en Koht ong koaros me loalloapwoatehng rapahki ih, duwehte mahso pil duwehte ahnsou me e pahn kapwarahieng pein ih ong aramas akan.

18 Pwe e ketin duduwehte aio, rahnwet, oh kohkohlahte; oh ahlo kaunopdahngehr aramas koaros sangete ni tepin sampah eh koasoansoandi, ma irail pahn koluhla oh kohdo reh.

19 Pwe mehmen me pahn loalloapwoatieng rapahki pahn diar; oh me rir kan en Koht pahn kasansalieng irail, sang ni manaman en Ngehn Sarawi, duwehte rahn pwukat e pahn pil duwehte mahso, oh duwehte mahso e pahn pil duwehte ahnsou kohkohdo kan; eri, sapwellimen Kauno koasondi de ahl kin duduhwehte kokohlahte.

20 Eri tamataman, maing ohl, pwe ahmw wiewia koaros pahn sansalada nan ahnsou en kopwungo.

21 Eri, ma kumwail kin wiewia suwed nan rahn en amwail kaunopadahu, kumwail pahn dierekda samin mwohn mwoalen-kopwung en Koht; oh sohte mehkot samin kak mihmi rehn Koht; eri, kumwail pahn lekidekla kohkohlahte.

22 Oh Ngehn Sarawi me ketkihongie mweimmwei en koasoaia mepwukat, oh sohte kahmahmki.