1 Oh met e wiawiher me mwurin ngehi, Nihpai, ei wadekehr mepwukat me ntingdier pohn pileit pirahs ko, riei ohl oko ahpw kohdo rehi oh kalelapak rehi: Ia wehwehn mepwukat me ke wadekehr? Kilang, re pahn kak wehwehki duwen soahng kan me pid palingehn, me pahn wiawi nin duwen palingehn oh kaidehn ni paliwar?

2 Oh ngehi, Nihpai, ndahieng ira: Kilang ire pwukat kasansalohngehr soukohpo sang kepitien Ngehno; pwe sang rehn Ngehno me soahng koaros me kin kodohng aramas kin kasansalohng soukohp kan.

3 Eri, soahng kan me I wadekehr pid duwen koaros mour en sampah oh mour en palingehn; pwe e sansal me ahnsou keren peneinei en Israel kan pahn mwarahkpeseng wasa koaros ni sampah oh nan wehi kan koaros.

4 Oh kilang, mie aramas tohto me mehn Serusalem ko sehselahr. Ei, pali laud en kadaudok en Israel ko pakahrlahr; oh irail mwarahkpesengehr pohn sahpw deke kan; oh kitail sohte ese wasa me re mihmi ie, ihte me kitail ese me irail pakahrlahr.

5 Oh pwehki arail pakahrlahr, mepwukat kokohpdahr pid duwen irail, oh pil duwen irail koaros me pahn kohdo mwuhr pahn kamweremwerpeseng oh salongala, pwehki Me Sarawi en Israelo; pwe mohngiongirail kan pahn keptakaila oh uhongada ih; eri, irail pahn kamweremwerpeseng nan wehi kan oh aramas koaruhsie pahn kailongkinirail.

6 Ahpw, mwurin Mehn Liki kan arail pahn apwalih irail, oh Kauno ketin kapahlahr limeo pohn Mehn Liki kan oh wiahda sapwellime koasoandio, oh irail wahda [nein mehn Israel] seri kan, oh irail pwekadahr oh wa [nein mehn Israel] serepein kan pohn pwopwerail kan, kilang mepwukat wia mehkot me pid sampah. Ih duwen inou sarawi kan me Kauno ketin wiahiongehr atail pahpa kahlap oko; oh e wehwehki kitail nan rahn kohkohdo kan, oh pil riatail koaros me wia kisehn peneinei en Israel.

7 Oh e wehwehki me ahnsouo pahn leledo me mwurin peneinei en Israel kan koaros arail pahn kamweremwerpesengehr oh salongalahr, Kauno Koht pahn ketin wiahda wehi kehlail ehu rehn Mehn Liki kan, iei, e pahn wiawihda pohn sahpwet; oh irail pahn kamwarakpeseng kadaudoketail kan.

8 Oh mwurin kadaudoketail kan arail pahn kamweremwerpesengehr, Kauno Koht pahn ketin usehlahte oh wia doadoahk kapwuriamwei rehn Mehn Liki kan, me pahn kesempwalong kadaudoketail kan; eri, met rasehng Mehn Liki kan arail apwahpwali irail oh weuwairail nan pehrail oh pohn pwopwerail kan.

9 Oh met pil pahn kesempwal ong Mehn Liki kan; oh kaidehn Mehn Liki kan te ahpw ong peneinei en Israel kan koaros, me pahn kasalehda inou kan me Sahm nanleng ketin wiahiengehr Eipraam, me mahsanih: I pahn kapaiahkihda aramas en sampah koaros kadaudokemw.

10 Oh riei ko, I men kumwa en ese me keinek kan koaros en sampah sohte kak kapaida lao [Kauno] pahn ketin kasalehieng wehi kan wiepen nin limeo.

11 Eri, Kauno Koht uhdahn pahn ketin kasalehiong wehi koaros wiepen nin lime kan, ni eh pahn ketikihengpeneinei en Israel kan sapwellime inou kan oh rongamwahuo.

12 Eri, e pahn kapitirailla sang selidi, oh irail pahn pwurehng pwurpene nan sahpw en sohso; oh irail pahn kohsang nan kepikirot oh rotorot; oh irail pahn ese me Kauno iei arail Sounkomour oh arail Soundoar, Koht manaman en Israelo.

13 Oh ntahn mwomwohdiso ndand oh suwedo, me iei lih suwed en sampah pwono, pahn uhwongada pein irail; pwe irail pahn mahwinpene nanpwungarail, oh pein neirail kedilahs kan pahn kemeirailla, oh irail pahn sakaukihla pein ntarail.

14 Oh wehi koaros me pahn mahwinieng kumwail, peneinei en Israel, pahn moromorada nanpwungarail, oh irail pahn pwupwidiong nan pwoahr me irail weiradao pwe re en lidipieki sapwellimen Kauno aramas akan. Oh irail koaruhsie me pahn peieng Saion pahn kamwomwala, oh lih suwed lapo, me kapirakialahr sapwellimen Kauno koasoandi pwung kan, me iei, mwomwohdiso ndand oh suwedo, pahn rengkpeseng oh lapalahn pwupwidi pahn wiawi.

15 Pwe kilang, soukohpo mahsanih, ahnsou pahn lelledo mwadang me Sehdan pahn sohte ahneki manaman nan mohngiong en aramas akan; pwe rahno pahn lelledo me koaros me pohnmwahso oh irail akan me kin wiewia suwed pahn duwehla tuhke me sohte wah; oh rahno pahn lelledo me irail pahn isihsla.

16 Pwe ahnsouo pahn mwadang leledo me sapwellimen Koht engieng unsek pahn mwerediong pohn aramas koaros; pwe e sohte pahn ketin mweidehng me suwed akan en kamwomwala me pwung kan.

17 Eri, e pahn ketin doarehkihla me pwung kan sapwellime manaman, ma iei mie anahnepen sapwellime engieng unsek pahn wiawi, oh me pwung kan pahn poadoandoarla, arail imwintihtih kan pahn kamwomwkihla kisiniei. Eri, me pwung kan en dehr masak; pwe iei me soukoupo mahsanih, irail pahn komourla, ma iei irail pahn komourkihla kisiniei e pahn wiawi.

18 Kilang, riei ohl oko, I ndaiong kumwa, me mepwukat pahn mwadang wiawi mwurin ahnsou kis; iei, kamaramas pahn wiawi, oh kisiniei, oh ediniei moron pahn mie; oh e pahn kipehdi sampah; oh e pahn sansal ong aramas ma re pahn kakeptakaiala ar mohngiong kan ong Me Sarawi en Israelo.

19 Pwe kilang, me pwung kan sohte pahn kamwomwomwla; pwe ahnsouo pahn leledo me irail me kin peieng Saion pahn kalipilipala.

20 Oh Kauno pahn ketin kaunopadahng sapwellime aramas akan ahlo, pwe mahsen en Moseso en kak pweida, me ketihtihki: Kauno amwail Koht pahn ketikihong kumwail soukohp men, me duweiehte; kumwail pahn rong soahng koaros me e pahn padahkihong kumwail. Oh e pahn wiawi ma mehmensohte pahn rong soukohp menet pahn kalipilipasang nan pwungen aramas akan.

21 Oh met ngehi, Nihpai, kalohkihong kumwail, me soukohp menet me Moses mahsaniher iei ih me Sarawi en Israelo; eri, e pahn ketin wia kopwung ni kadeik pwung.

22 Oh me pwung kan sohte anahne masak, pwe irail me sohte pahn namenekla. Ahpw wehin sehdano, me pahn wiawihda nan pwungen aramas akan, iei wehio me kokouda ong irail me mih nan pali uduk—

23 Pwe ahnsou pahn mwadang leledo me mwomwohdiso koaros me wiawihda pwe re en kepwepwehla, oh koaros me wiawihda pwe re en ahneki manaman pohn aramas, oh irail akan me wiawihda pwe re en ndandla mwohn sampah, oh irail me kin rapahkihte ineng en paliwararail oh dipwisou en sampah, oh kin wiewia soangoasoangen wiewia suwed kan; iei, ni mehlel, irail koaros me iang wehin tepilo me uhdahn pahnmasapwekada, oh saloh, oh rerrer; irail me pahn lekidekdi nan pwelpar; iei irail me pahn isihsla duwehla dihpw meng; oh met iei duwen mahsen en soukohpo.

24 Oh ahnsou pahn mwadang leledo me aramas pwung kan pahn kahluhla sang nan kehl duwehte koupwul kan, oh me Sarawi en Israelo pahn ketin kaunda sang ni mweimwei en kaun, oh kehl, oh manman, oh lingan mehlel.

25 Oh e pahn ketin kapokonepene sapwellime seri kan sang ni keimw pahieu en sampah; oh e pahn ketin wadekedi sapwellime sihpw kan, oh irail pahn ese ih; oh e pahn mie ehute pelen sihpw oh emente silepe; oh e pahn ketin kamwenge sapwellime sihp kan, oh irail pahn kin diar kenerail mwenge reh.

26 Oh pwehki wiewia mwahu en sapwellime aramas akan, Sehdan pahn sohla ahneki manaman; eri, e sohte pahn lapwada erein sounpar kei; pwe e sohte pahn ahneki manaman en kaunda mohngiong en aramas akan, pwe irail pahn momourki mour pwung, oh me Sarawi en Israelo pahn ketin kakaun irail.

27 Oh met kilang, ngehi, Nihpai, ndaiong kumwail me mepwukat koaruhsie pahn wiawi nin duwen paliuduk.

28 Ahpw, kilang, wehi koaros, keinek koaros, lokaia koaros, oh aramas koaros pahn padoandoarla rehn me Sarawi en Israelo ma irail pahn koluhla.

29 Oh met ngehi, Nihpai, kairalahr ei koasoi; pwe I sohte pahn doula koasoakoasoia duwen mepwukat.

30 Eri, riei ko, I men kumwa en kamehlele me soahng koaros me ntingdier pohn pileit prahs ko mehlel; oh re kadehdehki me aramas anahne peikieng sapwellimen Koht kosonned akan.

31 Eri, kumwail dehr medewe me ngehi oh ei pahpao kelehpw me kadehdehki mepwukat, oh pil padahkihong kumwa. Eri, ma kumwa pahn peikieng kosonned akan, oh dadaurete lel imwi, kumwa pahn komourla ni imwin rahn akan. Oh met mehlel. Amen.