1 Kedekedeo ngehi, Nihpai, eri kanekelahr ei koasoai ong riei pwutak ko, kilang ira ndaiong ie: Ke ndahng kiht soahng kei me inenen apwal ong kiht en rong.

2 Kedekedeo I ndaiong ira me I ese me I koasoaia soahng apwal akan ong me suwed akan, nin duwen padahk mehlel; oh me pwung kan I ale iraildahr, oh kadehdehki me irail uhdahn pahn pwekipwekda ni keimwseklahn rahno; eri, me sapwung kan pahn apwaliki me mehlelo, karehiong arail lingeringerda kowahlap.

3 Oh met riei ohl oko, ma kumwa pwung oh inangih rong me mehlelo, oh idawehn, pwe kumwa en kak weid ni pwung mwohn Koht, a kumwa sohte pahn kaulimkihla me mehlelo, oh nda: Ke koasoaiahieng kiht soahng apwal ekei.

4 Kedekedeo ngehi, Nihpai, eri kangoange riei ohl oko, sang ni ngoang koaros, pwe [ira] en kak kapwaiada kosonned en Kauno.

5 Kedekedeo ira eri karakarahkala mwohn Kauno; kahrehda I perenkihda oh ahneki koapworopwor laud ong ira, me ira pahn weid nan ahl en mour pwung.

6 Met, mepwukat koaros wiwiawi nan ahnsou me ei pahpao kin koukousoan nan impwal nan wahu me e kahdanki Lemuel.

7 Kedekedeo ngehi, Nihpai, eri pwoudikihda emen nein Ismael serepein ko; oh pil, riei pwutak ko pwoudikihda nein Ismael serepein teiko; oh Soram pil pwoudkihda nein Ismael serepein me keieu laudo.

8 Oh met ei pahpao kapwaiadahr sapwellimen Kauno kosonned akan me kohiengehr. Oh pil, ngehi, Nihpai, kapaidahr mehlel sang rehn Kauno.

9 Kedekedeo Kauno eri mahseniong ei pahpao nihpwongo, oh kehkehlingkiheng me lakapw e pahn seiloaklahng nan sapwtehno.

10 Kedekedeo ni ahnsou me ei pahpao pwourda ni mensengo, oh kohla ni wenihmw en impwalo, e pwuriamweikihla eh kilangada nan pwehlo mpwei pwonopwon ehu me wiawihkihda doadoahk lingan; oh e wiawihkihda pirahs. Oh nan mpweio mie kisin arep mete riau; oh ehu kin idilahng wasa se pahn keidla ie nan sapwtehno.

11 Kedekedeo kiht eri kihpene soahng kan koaros me se anahne wa kohla nan sapwtehno, oh mwenge oh dipwsou koaros me luhwehdi me Kauno ketikihong kiht; oh se wahda soangsoangen weren tuhke koaros me se kak wa kohla nan sapwtehno.

12 Kedekedeo se ahpw wahda imwat impwal oko oh mweselahng nan sapwtehno, palio pillap en Leimen.

13 Kedekedeo se seiseiloangkiher erein rahn pahieu, kohkohlahng pali eir de pali eir en pali mese, oh se ahpw pwurehng kauwada imwat impwal akan; oh se kiheng eden wasao Saser.

14 Kedekedeo se ahpw ale nait kesik ketieu ko oh arep ko, oh kohla nan sapwtehno pwe sen kasikihdi kenen aht peneinei kan mwenge; oh mwurin aht kasikihdier kenen aht peneinei kan mwenge, se pwurala rehn aht peneinei ko nan sapwtehno, wasa me adaniki Saser. Oh se ahpw douluhla nan sapwtehno, weweidlahte nan ahl me se keid loaleo, kekeidte wasa me keieu pwelmwahu nan sapwtehno, me iei wasa kan me mihte limwahn Sehd Weitahtao.

15 Kedekedeo se ahpw seiseiloangkiher erein rahn kei, kasikasikiekihdi kanat mwenge nait kesik ketieu kan oh arep kan oh nait pahi kan oh takai kan nan aht seiseiloako.

16 Oh se ahpw kin ideidawehn kaweid kan en mpweio, me kin kahluwaikit wasa kan me keieu pwelmwahu nan sapwtehno.

17 Oh mwurin aht seiloangkiher erein rahn tohto, se ahpw kauwada imwat impwal akan nan erein ahnsou kis, pwe sen kak pwurehng koammoal oh alehdi kenen aht peneinei kan mwenge.

18 Kedekedeo ngehi, Nihpai, ahpw kohlahn kasikiedi kanat sali, ahpw, I kawehla nei kesik ketieuo, me wiawihkihda mete; oh mwurin ei kawehla nei kesik ketieuo, kilang, riei pwutak ko lingeringerda pahi pwehki nei kesik ketieuo eh ohla, eri se sohte koledi kanat sali.

19 Kedekedeo kiht eri pwurala rehn aht peneinei kan oh sohte wa sali, oh irail pwangada, pwehki arail seiseiloak, re alehkihdi apwal uwen arail duhpekla.

20 Kedekedeo Leimen oh Lemuel oh nein Ismael pwutak ko eri tepda kaulim kouahlap, pwehki arail lokolok kan oh kahpwal akan nan sapwtehno; oh ei pahpao pil tepida kaulime Kauno ah Koht; mehlel, oh irail koaruhsie inenen nsensuwedla, lao irail koaruhsie ahpw kaulime Kauno.

21 Kedekedeo ngehi, Nihpai, eri iangehr riei ko lokolongkiher kahpwalo pwehki nei kesik ketieuo eh ohlao, oh sahl en neirail kesik ketieu ko pil mweipeseng, e ahpw tepda apwal kowahlap, mehlel, kahredahr aht sohla kak alehdi kanat sali.

22 Kedekedeo ngehi, Nihpai, ahpw koasoaieng riei ohl oko, pwehki mohngiongarail ko pwurehng keptakaila, lao irail kaukaulime Kauno arail Koht.

23 Kedekedeo ngehi, Nihpai, ahpw wiahkihda kesik ketieu ehu tuhke pwoat, oh oapwoat arep sang ni tuhke inen pwoat; eri, I wahda nei kesik ketieuo oh arepo, iangahki ehu pahi oh takai kei. Oh ngehi kalelapak rehn ei pahpao: Ia wasa me I pahn kohla ie pwe I en kaskihdi kanatail sali?

24 Kedekedeo e ahpw peki rehn Kauno, pwe irail karakarahkalahr pwehki ei koasoai ong irail; pwe I padahkieng irail soahng tohto sang ni kehl en palingeni.

25 Kedekedeo kepitien Kauno ahpw peidohng ei pahpao, oh e lokolok ki mehlel eh kaulime Kauno, ih eri pahtoukihla.

26 Kedekedeo Kauno eri mahsanihong ih: Kilang pohn mpweien, oh tehk soahng kan me ntingdier powe.

27 Kedekedeo ahnsou me ei pahpao kilangada soahng kan me ntingdi nan mpweio, ih oh pil riei ohl oko oh nein Ismael pwutak ko oh arail pwoud ko masepwehkada oh rerrer kowahlap.

28 Kedekedeo ngehi, Nihpai, kilangada kisin arep mete ko nan mpweio ar kin doadoahk ma se pahn kin pwoson oh loaloapwoat oh peikiong.

29 Oh pil mie nting kapw ntingdi powe, me mengein aramas en wadek, me kawehwehiong kiht duwen sapwellimen Kauno koasoandi kan; oh e ntingdi oh kin weliweliali, ma se pahn kin pwoson oh loaloapwoatieng kaweido. Oh se kilang me sang ni wiewia tikitik kan Kauno kin ketin wiahkihda [doadoahk] kapwuriamwei kan.

30 Kedekedeo ngehi, Nihpai, eri idawehn kaweid kan me kohsang nan mpweio oh kohdahla pohn nahnao.

31 Kedekedeo ngehi eri kaskihdi mahn lawalo kan, ngehi eri alehdi kenen aht peneinei kan sali.

32 Kedekedeo I ahpw pwuralahng ni imwat mpwal oko, wahla mahn akan me I kaskihdi; oh ni ahnsou me re kilangada me I koledier kanat sali, irail inenen perenda kowahlap! Kedekedeo irail karakarahkala mwohn Kauno oh wia arail kaping kalahngan ong ih.

33 Kedekedeo kiht eri pwurehng wenla nan aht seiloako, kekeid nan ahlohte me se keid ie nin tapio; oh mwurin aht seiloangkiher erein rahn tohto se ahpw pwurehng kauwada imwat impwal akan, pwe sen kak koammoal erein ahnsou ieu.

34 Kedekedeo Ismael eri mehla, oh seridi nan sahpw ehu me adaniki Neiom.

35 Kedekedeo nein Ismael serepein ko ahpw mwahiei ki kowalap arail pahpao eh melahr, oh arail kahpwal akan nan sapwtehno; oh irail kaulim ki ei pahpao eh wairailsang nan sahpw en Serusalem oh ndinda: Aht pahpao mehlahr; ei, oh kitail wie kohkohseliher nan sapwtehnet, oh kitail lokolongkiher kahpwal laud, duhpek, men nimpil, oh pwangadahr; oh mwurin lokokok pwukat kitail uhdahn pahn mehkihla duhpek nan sapwtehnet.

36 Oh met irail kaulime ei pahpao, oh pil ngehi; oh irail men pwurehng pwuralahng Serusalem.

37 Oh Leimen eri ndaiong Lemuel oh pil nein Ismael pwutak ko: Ser, kitail kemehla atail pahpao, oh pil rietail Nihpai, me wiahkilahr me ih me pahn wia atail kaun oh atail sounpadahk, kitail me wia rie pwutak laud akan.

38 Met, e nda me Kauno mahseniong ih, oh tohnleng kan pil sewese ih. Ahpw kilang, kitail ese me e kin pitipitih kitail; oh e ndaiong kitail mepwukat, oh e kin wiewia doadoahk likamw, pwe en kak pitiekinkitaildi, pwe mwein e medemedewe, me e pahn kahluwaikitailahng wasa kei nan sapwtehn me kitail sehse; oh mwurin eh pahn kahluwakitaila, e medewedahr me e pahn wiahla atail nahnmwarki oh kaunkitailda, pwe en kak wiahiong kitail nsene oh dahme e men wia. Oh iei mwohmw wet me riei pwutak Leimen kin koasoaia me kahrehieng arail lingeringerda.

39 Kedekedeo Kauno eri ketin ieiang kiht, iei, kepitien Kauno ahpw peido oh mahsanihong irail mahsen tohto, oh angiangih irail kouwalahp; oh mwurin arail rongehr ngilen engieng sang ni kepitien Kauno, irail ahpw meleileidi, oh koluhkihla diperail kan, kahrehda Kauno pwurehng ketin kapaiahkinkitada kanat mwenge, pwe sen dehr mehla.