Iralaud 2
Lihai wahla ah peneinei nan sapwtehno limwahn Sehd Weitahta—Irail kohkohlahsang arail dipwisou kan—Lihai wiahda meirong ong Kauno oh padahkihong nah pwutak kan re en kapwaiada kosonned akan—Leiman oh Lemuel kaulimki arail pahpao—Nihpai peik oh kapakap ni pwoson; Kauno mahsenieng ih, oh e pilipildahr en kaunda rie pwutak kan. Ele Sounpar 600 Mwohn Krais.
1 Pwe kilang, kedekedeo Kauno mahsenieng ei pahpao nan ouraman ehu, oh mahsanih: Mehd pai kowe, Lihai, pwehki soahng kan me ke wiadahr; oh pwehki ahmw loaloapwoat oh ahmw kalohkiheng aramas akan soahng kan me I padahkihong uhk, kilang, irail songosong kemeiukala.
2 Kedekedeo Kauno mahsaniheng ei pahpao, nan ouramano, me e uhdahn pahn wahda ah peneinei oh kohkohla nan sapwtehno.
3 Kedekedeo ohlo ahpw peikieng mahsen en Kauno, ih eri kapwaiada dahme Kauno mahsaniheng en wia.
4 Kedekedeo e ahpw mweselahngehr nan sapwtehno. Oh e kohkohlahsang imweo, oh sapwe sahpw me e sohsohki, oh nah kohl, oh nah silper, oh ah dipwisou kesempwal akan, oh e sohte wahda mehkot, ihte ah peneinei, oh kenerail mwenge, oh imwarail impwal akan, oh kohkohla nan sapwtehno.
5 Oh e kohdihla limwahn oaroahr en Sehd Weitahtao; oh e seiseiloak ni irepen saptehno limwahn Sehd Weitahtao; oh ah peneinei iang seiseiloak nan sapwtehno, ei nohno, Saraia, oh riei pwutak laudko, Leimen, Lemuel, oh Sam.
6 Kedekedeo ni ahnsou me e seiloangkiher rahn siluh nan sapwtehno, e ahpw kauwada imwe impwalo nan wahu ehu ni keilen pillapo.
7 Kedekedeo e ahpw wiahda pehi sarawi ehu, oh wia meirong ehu ong Kauno, oh kaping kalahngan ong Kauno aht Koht.
8 Kedekedeo e ahpw kihengehr eden pillapo, Leimen, oh e kin pwilipwilla nan Sehd Weitahta; oh wahuo mihte limwahn irepen sahpwo karanihte ewen pillapo.
9 Oh ahnsou me ei pahpao kilangada me pillapo pwilipwilla nan Sehd Weitahtao, e patohwanohng Leimen, ketihtihki: O [I men] ke en kak duwehte pillap pwoatet, me kin pwilipwilwei ahnsou koaros nan utuhnpil en pwung koaros!
10 Oh e pil ndahieng Lemuel: O [I men] ke en kak duwehte wahu wet, me tengetengedi oh kehlail, oh tengediong kolokol sapwellimen Kauno kosonned akan!
11 E koasoia met pwehki Leimen oh Lemuel ara keptakai; pwe kilang soahng tohto me ira kaulimahki ara pahpao, pwehki e wia ohl en kaudiahl men, oh e kahluwairail sang nan Serusalem, sang nan sapwerail sahpw en sohso, oh neirail kohl, oh neirail silper, oh arail dipwisou kesempwal akan, pwe re en mehla nan sapwtehno. Oh ira koasoaia me e wia met pwehki madamadau likamw akan en ah mohngiongo.
12 Oh met Leimen oh Lemuel, me keieu laud, kaulima ara pahpao. Oh ira kaulima pwehki ira sohte ese duwen wiewia kan en Kohto me ketin kapikirahda.
13 Ira pil sohte kamehlele me Serusalem, kahnimw kehlailo, kak kamwomwomwla nin duwen mahsen en kokohp en soukohp oko. Oh ira duwehte mehn Suhs akan me mihmi Serusalem, me song kihsang mour en ei pahpao.
14 Kedekedeo ei pahpao ahpw panawihrahier nan wahu en Lemuel, sang ni manaman, pwehki eh direkihla Ngehno, lao paliwarara ko rerada mwowe. Oh ira pwuriamweikihla eh penouo, ihme kahrehda ira masak akipwungieng ih; kahrehda, ira wia dahme e ndahieng ira en wia.
15 Oh ei pahpao kin kousoan nan impwal ieu.
16 Kedekedeongehi, Nihpai, ime pwulopwul mehlel, ahpw paliwereiet me lapala, oh pil inangih mehlel esehla duwen merir en Koht akan, eri, ngehi peki rehn Kauno; oh kilang e ketin pwarohngie, oh ketikihdo popohl nan ei mohngiong kahrehda I kamehlele koasoai koaros me ei pahpao koasoaiahier; eri, I sohte kahngohdihong duwehte riei pwutak ko.
17 Oh I koasoaiong Sam, kehsehki soahng kan me Kauno ketin kasalehongie sang rehn sapwellime Ngehn Sarawio. Kedekedeo e ahpw kamehlelehla ei koasoai kan.
18 Ahpw, kilang, Leimen oh Lemuel sohte men rong ei koasoi kan; oh pwehki ei nsensuwedikihla uwen ara keptakai, I kapakapikinira ong Kauno.
19 Kedekedeo Kauno ahpw mahsendohngie, mahsanih: Mehd pai kowe, Nihpai, pwehki ahmw pwoson, pwehki ahmw nannantihong rapahkinie, ni mohngiong karakarahk.
20 Oh sang ni ahmwail pahn kapwaiada ei kosonned akan, kumwail pahn pweida, oh [I] pahn kaluwaikumwailahng nan sahpw en inouo; iei, sahpw ehu me I kaunopadahng kumwail; iei, sahpw ehu me wia sahpw pilipil nan pwungen sahpw koaros.
21 Oh ma riomw kan pahn kahngohdihenguhk, irail pahn lekideklahsang mwohn silangin Kauno.
22 Oh sang ni omw pahn kapwaiada ei kosonned akan, ke pahn wiahla kaun oh sounpadahk ong riomw pwutak kan.
23 Pwe kilang, ni rahno me re pahn kahngohdihongie, I pahn keriahkinirailla keriahkalok ehu, oh irail sohte pahn ahniki manaman en kaunda kadaudokemw kan ihte ma irail pil pahn kahngohdiongie.
24 Oh ma irail kahngohdihongie, irail pahn kaloke kadaudokemw kan, pwe en kamwakid irail en tamanda koasoandi kan.