1 Kedekedeo tohnlengo ahpw mahsanihongie: Kilengla, oh kilang kadaudokemw kan, oh pil kadaudoken riomw ohl akan. Ngehi eri kilengla oh kilangada sahpw en inouo; oh ngehi kilangada aramas ngederie, iei, me tohto rasehng pihk en nan sehd.

2 Kedekedeo ngehi kilangada pwihn kei me pokonpene pwe irail en mahwin, ehu pwihn pelian ehu; oh I kilangada mahwin kei, oh rohng en mahwin kei, oh me tohto nei aramas me kamakamkihla kedlahs.

3 Kedekedeo ngehi kilangada dih tohto mehla, pwehki mahwin oh pingiping en nan sahpwo; oh I kilangada kahnihmw tohto, iei, me I sohte kak wadekeda.

4 Kedekedeo ngehi kilangada rotorot mosul ehu pohn sahpw en inouo; oh I kilangada lioal kei, oh I rongada nansapwe ar posopos, oh rerrer en sahpw, oh soangsoangen ngihl katairong kei; oh I kilangada pwehl oh takai kan me pwalpeseng; oh I kilangada nahna kan ar rengkidi; oh I kilangada wasa patapat akan en sampah ar ohla; oh I kilangada kahnihmw tohto ar kihrla; oh I kilangada me tohto ar mwasingkihla kisiniei; oh I kilangada kidalap ar pwupwidieng pohn pwehl, pwehki rerrer en sahpwo.

5 Kedekedeo mwurin ei kilangehr mepwukat, I kilangada edied en rotorot, me kohsang pohn sampah; oh kilang, I kilangada aramas ngeder ar sohte iang pwupwikihdi sapwellimen Kauno kalokolok laud oh kamasepwehk en Kauno.

6 Oh I kilangada nanleng eh ritpeseng, oh Sihmpwul en Koht ketiketkohdi sang nanleng; oh e ketdihdo oh kasalehiong irail pein ih.

7 Oh I pil kilangada oh kadehdehki me Ngehn Sarawio ketin tiada pohn aramas ehk riemen; oh irail pilipilda oh kasarawihla rehn Koht.

8 Oh tohnlengo mahsanihongie, ketihtihki: Kilang irail tohnpadahk ehk-riemen en Sihmpwulo, me pilipilda pwe irail en sewese kadaudokemw kan.

9 Oh e mahsanihongie: Ke tamataman wahnpoaron ehk-riemen en Sihmpwulo? Kilang iei irail me pahn kadeik keinek eisek-riaun en Israel ko; eri, tohnpadahk ehk-riemen en kadaudokemw kan pahn kadeik rehrail; pwe kumwail iei mehn en Israel.

10 Oh irail sounsawas ehk-riemen me ke kilangehro pahn kadeik kadaudokemw kan. Oh, kilang, re pahn mour pwung kohkohlahte; pwehki arail pwoson Sihmpwul en Koht arail likou kan pahn pwetepwetkihla sapwellime ntao.

11 Oh tohnlengo mahsanihongie: Kilang! Oh ngei eri kilengla, oh kilangada dihen aramas siluh me mehla ni ar mour pwung; oh arail likou kan pwetepwetala duwehte Sihmpwul en Kohto me pwetepwet. Oh tohnlengo mahsanihongie: Mepwukat pwetepwetkihla ntahn Sihmpwulo, pwehki arail pwoson ih.

12 Oh ngehi, Nihpai, pil kilangada kidelepen aramas en dih kapahieu me melahr ni mour pwung.

13 Kedekedeo I kilangada kidelepen aramas en sampah ar pokonpene.

14 Oh tohnlengo mahsanihongie: Kilang kadaudokemw kan, oh pil kadaudoken riomw pwutak ko.

15 Kedekedeo I kilengla oh kilangada kisehn kadaudokei kan ar pokonpene pwe re en uhwong kadaudoken riei pwutak ko; oh irail pokonpene pwe re en mahwin.

16 Oh tohnlengo mahsanihongie, ketihtihki: Kilang utuhn pihl samin me ahmw pahpao kilangadahro; iei, pihl me e koasoaiahiero; oh uwen loalih iei uwen loal en nan ehl.

17 Oh pwoaik kan en rotoroto iei kasongosong kan en tepilo, me kin karotongala mahs akan, oh kakeluwakiala mohngiong en aramas akan, oh kahluweirailahng nan ahl tehlap akan, pwe irail en mehla oh salongala.

18 Oh ihmw kalaimwun oh tehlap, me ahmw pahpao kilangadao, iei lamalam mwahl akan oh pohnmwahso en aramas akan. Oh wahu kalaimwun oh keper ieu ireirailpeseng; iei, duwehte mahsen en pwuhng en Koht Soutuko, oh Mesaiao me iei Sihmpwul en Koht, me Ngehn Sarawi kadehdehkiher, sangete ni tepin sampah oh lelodo ahnsouet, oh sang met kohla oh kohkohlahte.

19 Oh ni ahnsou me tohnlengo mahsaniher mahsen pwukat, I kilengla oh kilangada me kadaudoken riei pwutak ko pil uhwong kadaudokei ko, nin duwehn dahme tohnlengo mahsaniher; oh pwehki pohnmwahso en kadaudokei ko, oh kasongosong kan en tepilo, I kilangada me kadaudoken riei pwutak ko kalewehdier kadaudokei ko.

20 Kedekedeo I kilengla, oh kilangada kisehn kadaudoken riei pwutak ko arail kalowedier kadaudokei ko; oh tohto irail audehlahr pohn sahpwo.

21 Oh I kilangada arail kin pokonpene; oh I kilangada mahwin kei oh rohng en mahwin kei nanpwungarail; oh nan mahwin kan oh rohng en mahwin kan I kilangada dihen aramas tohto mehla.

22 Oh tohnglengo mahsanihongie: Kilang irail pwukat pahn pwupwidi nan arail sohpwoson.

23 Kedekedeo I kilangada, mwurin arail pwupwidier nan arail sohpwoson irail ahpw wiahla aramas rotorot, oh kanamanek, oh samin, direkihla pohnkahke oh soangsoangen wiewia suwed kan.