Iralaud 7
Nein Lihai pwutak ko pwurala Serusalem oh luke Ismael oh ah peneinei en iangirailda nan arail seiloako—Leimen oh ekei irail uhongada—Nihpai kangoange rie ohl oko en pwoson Kauno—Irail saliekihdi sahl oh lemehda re en kemehla—E saledekla sang ni manaman en pwoson—Rie ko pekmahk—Lihai oh ienge ko wiahda meirong oh meirong isihs. Ele Sounpar 600–592 Mwohn Krais.
1 Oh met I men kumwail en ese, me mwurin ei pahpao, Lihai, eh kaimwsakalahr ah kokohp me pid duwen kadaudoke kan, kedekedeo Kauno ahpw pwurehng mahseniong, ketihtihki me e sohte konehng Lihai en kelehpw wahla ah peneinei nan sapwtehno; ahpw nah pwutak kan anahne wahda ekei serepein re en wia arail pwoud, pwe irail en kak apwaliada sapwellimen Kauno aramas nan sahpw en inouo.
2 Kedekedeo Kauno eri mahsani me ngehi, Nihpai, oh riei pwutak ko, anahne pwurehng pwuradahla nan sahpw en Serusalem, oh wahdihdo Ismael oh ah peneinei nan sapwtehno.
3 Kedekedeo ngehi, Nihpai, iangahki riei pwutak ko ahpw pwurehng kohla nan sapwtehno pwe sen pwuradahla Serusalem.
4 Kedekedeo se ahpw lelladahlahr ni imwen Ismaelo, oh se ahpw masamasala mwohn Ismael, kahrehda aht kak koasoaikiheng mahsen en Kauno.
5 Kedekedeo Kauno ahpw ketin kamalailaiedi mohngiong en Ismael, oh pil tohn imweo, kahrehda arail iangkitada nan aht seiloak oh pwuredihla nan sapwtehno ong ni imwen aht pahpao impwalo.
6 Kedekedeoahnsou me se wie seiseiloak nan sapwtehno, kilang Leimen oh Lemuel, oh riemen nein Ismael serepein ko, oh riemen nein Ismael pwutak ko oh arail peneinei ko, peliankitada; mehlel, uhwong ngehi, Nihpai, oh Sam, oh arail pahpao, Ismael, oh ah pwoud, oh nah serepein silimen teiko.
7 Kedekedeo irail peliankitada pwehki arail inangih pwurala nan sahpw en Serusalem.
8 Oh met ngehi, Nihpai, nsensuwedkihla pwehki keptakain mohngiongarail kan, ngehi eri koasoai ong irail, ei, mehlel ong Leimen oh Lemuel: Kilang kumwa riei pwutak laud, oh ia mwomwen mohngiongimwa kan eh nohn keptakai, oh amwa lamalam akan nohn masukun, me kahrehda kumwa anahnehki, riamwa pwutak me tikitik, en kaweid kumwa, mehlel, oh wia ehu mehn kahlamangi ong kumwa?
9 Ia mwomwen amwa sohte kak peikiong sapwellimen Kauno mahsen?
10 Ia duwen amwa kak manokehla me kumwa kilangehr emen tohnleng en Kauno?
11 Mehlel, oh ia duwen amwa kak monokehla soahng kopwuriamwei kan me Kauno ketin wiahiong kitailehr, ni eh ketin kapitkitail sang nan pehn Leipen, oh pil me kitail uhdahn anahne alehdi poadoapoado?
12 Mehlel, oh ia duwen amwa kak monokehla me Kauno kak ketin wia soahng koaros me e kupwurki, ong aramas akan, ma iei irail kin kasalehda arail pwoson Ih? Eri, kitail loaloapwoat ong Ih.
13 Oh ma kitail kin loaloapwoat ong Ih, kitail pahn alehdi sahpw en inouo; oh kumwa pahn ese me nan ahnsou me kohkohdo mahsen en Kauno pahn pweida me pid kamwomwomwlahn Serusalem; pwe mehkoaros me Kauno mahsaniher me pid kamwomwomwlahn Serusalem uhdahn pahn pweida.
14 Pwe kilang, Ngehn en Kauno kereniengehr sola ieiang irail; pwe kilang, irail soikalahr soukohp akan, oh irail kesehlongehr Seremaia nan imweteng. Oh irail song kemehla ei pahpao, kahrehda arail koakoahk sang nan sahpwo.
15 Met kilang, I ndaiong kumwa me ma kumwa pahn pwurala Serusalem kumwa pahn iang irail mehla. Oh met, ma iei me kumwa pilada, kumwa kohla nan sahpwo, oh tamataman dahme I ndaiong kumwa, me ma kumwa pahn kohla kumwa pil pahn mehla; pwe ih met me Ngehn en Kauno ketin kangoangehkinie I en koasoaia.
16 Kedekedeo ni ahnsou me ngehi, Nihpai, koasoaiahier koasoai pwukat ong riei pwutak ko, ira lingeringerda pahi. Kedekedeo ira ahpw koliehdi, pwe kilang, ira inenen mwehl, oh ira salihkiniehdi sahl kei, pwe ira men kemeiehla, pwe ira pahn keseiehla nan sapwtehno pwe mahn lawalo kan en kangiehla.
17 Ahpw kedekedeo ngehi eri kapakap ong Kauno, patohwanohng: Maing Kaun, nin duwen ei pwoson komwi, komw ketin doareiehsang nan pehn riei pwutak ko; ei, ketikihdo kehl pwe I en kak mweidpeseng sahl pwukat me salihiepenehr.
18 Kedekedeo ahnsou me I koasoaiahier koasoai pwukat, kilang, sahl oko sapwedekda oh kohsang ni pehi oh nehi kan, oh I ahpw kesihnenda mwohn riei pwutak ko, oh ngehi pwurehng koasoaieng ira.
19 Kedekedeo irail pwurehng lingeringerda pahi, oh song koliehdi; ahpw kilang, emen nein Ismael serepein kau, ei, oh pil ah nohno, oh emen nein Ismael pwutak ko, peki mahk rehn riei pwutak ko, lao irail kameleileidi ara mohngiong ko; oh ira eri sohla men kemeiehla.
20 Kedekedeo ira eri pahtoula, pwehki ara wiadahr mesuwed, lao ira poaridi mwohi, oh peki rehi I en mahkohng ira pwehki sapwung me ira wiahiengie.
21 Kedekedeo ngehi eri mahngkihengira soahng koaros me ira wiahier, oh ngehi eri kangoangehkinira en kapakap ong Kauno ara Koht pwe en ketin mahkohng ira. Kedekedeo ira eri wia. Oh mwurin ara kapakapohngehr Kauno se ahpw pwurehng douluhla nan aht seiloaklahng ni imwen aht pahpao impwalo.
22 Kedekedeo se ahpw leledihdo ni ihmwen aht pahpao impwalo. Oh mwurin ngehi oh riei pwutak ko oh tohn imwen Ismael koaros kohdihdohier ni imwen ei pahpa impwalo, irail kapingkihong Kauno arail Koht; oh wiahda meirong oh meirong isihs ong Ih.