1 Kedekedeo, tohnlengo mahsanihong ie, ketihtihki: Kilang! Oh ngehi kilengla oh kilangada wehi oh sahpw tohto.

2 Oh tohnglengo mahsanihong ie: Dahme ke kilangada? Oh I sapengki: I kilangada wehi oh sahpw tohto.

3 Oh e mahsanihongie: Wehi oh sahpw pwukat iei wehin mehn Liki kan.

4 Kedekedeo I kilangada wiawidahn mwomwohdiso kehlail ehu rehn mehn liki kan.

5 Oh tohnlengo mahsanihongie: Kilang wiawihdahn mwomwohdiso me keieu suwed sang mwomwohdiso koaros, me kemehla souleng kan en Koht, iei, oh kaloke irail oh salihraildi, oh katoutouwiekinirail mehn wesik mete, oh kaluduwihrailla.

6 Kedekedeo I kilangada mwomwohdiso ndand oh suwed wet; oh I kilangada tepil me tepin wiahdao.

7 Oh I pil kilangada kohl, oh silper, oh silik kan, oh likou weitahta kan, oh likou linen kaselel kan, oh soangoasoangen likou kesempwal koaros; oh I kilangada kidelepen lih en nenek.

8 Oh tohnlengo mahsanihongie, ketihtihki: Kilang kohl, oh silper, oh silik kan, oh likou weitahta kan, oh likou kaselel, oh likou kesempwal, oh lih en nenek kan, iei me mwomwohdiso ndand oh suwed wet kin mwahuki.

9 Oh pil pwehki sampah eh kin kepinga irail iei me irail kemehkihla souleng kan en Koht, oh kaluduwihrailla.

10 Kedekedeo, I kilengla oh kilangada sehd tohto; oh re irepeseng mehn liki kan oh kadaudoken riei pwutak ko.

11 Kedekedeo tohnlengo mahsanihongie: Kilang engieng en Koht kipedier kadaudoken riemw pwutak ko.

12 Oh I kilengla oh kilangada ohl emen nan pwungen Mehn Liki kan, me sehdo irepeseng ih oh kadaudoken riei pwutak ko; oh I kilangada Ngehn en Koht, me ketidihdo oh tiada pohn ohlo; oh e kotehla sehdo, kolahng rehn kadaudoken riei ko, me kin koukousoan nan sahpw en inouo.

13 Kedekedeo I kilangada Ngehn en Koht, me tiadahr pohn ekei Mehn Liki kan; oh irail eri saledeklahr oh seiloakla pohn sehd akan.

14 Kedekedeo I kilangada kidelepen Mehn Liki nan sahpw en inouo; oh I kilangada Koht eh ketin engiengda pahn kadaudoken riei pwutak ko; oh re kamweremwerpeseng rehn Mehn Liki kan oh kalokolok.

15 Oh I kilangada Ngehn en Kauno, me ieiang Mehn Liki kan, oh irail pweida oh alehdi sahpwo pwe en wia arail sohso; oh I kilangada me irail pwetepwet, oh kaselel mehlel oh masamwahu, duwehte nei aramas oko mwohn arail kamakamala.

16 Kedekedeo ngehi, Nihpai, kilangada me Mehn Liki ko me saledek sang arail selidi karakarahkala mwohn Kauno; oh manaman en Kauno ieiangirail.

17 Oh I kilangada inoandehn wehi laud en Mehn Liki ko arail pokonpene pohn sehdo, oh pil pohn sahpwo, pwe re en mahwiniong irail.

18 Oh I kilangada me manaman en Koht ieiang irail, oh pil Koht ketin engiengda pahn irail koaros me kohpene pwe re en mahweniong irail.

19 Oh ngehi, Nihpai, kilangada me Mehn Liki kan me saledeksangehr arail sensel, irail kasaledekla sang nan pehn wehi teikan sang ni manaman en Koht.

20 Kedekedeo, ngehi, Nihpai, kilangada me irail pweida nan sahpwo; oh I kilangada pwuhk ehu, oh irail kin weuwa pwuhko.

21 Oh tohnlengo mahsanihongie: Ke ese ia wehwehn pwuhko?

22 Oh I sapengki: I sehse.

23 Oh e mahsanih: Kilang e kohsang nan ewen mehn Suhs. Oh ngehi, Nihpai, kilanganda; oh e mahsanihongie: Pwuhk me ke kilangadahro iei pwuhk en mehn Suhs akan, me audaudkihda sapwellimen Kauno inou kan, me E ketin wiahiongehr peneinei en Israel; oh e pil audaudkihda kokohp tohto en soukohp sarawi ko; oh audepe kan me duwehte nting kan me ntingdi pohn pileit me pirahs ko, ihte me malaulau; ahpw, e audaudkihda sapwelllimen Kauno inou kan, me E ketin wiadahr ong peneinei en Israel kan; eri, re kesempwalohng Mehn Liki kan.

24 Oh tohnleng en Kauno ahpw mahsanihongie: Ke kilangehr pwuhk me kohsang rehn mehn Suhso; oh ni ahnsou me e kohsang rehn mehn Suhso e audaudkihda rongamwahu unsek en Kauno, me wahnpoaron ehk-riemeno kadehdehkiher; oh irail kadehdehki nin duwen dahme mehlelo me iei Sihmpwul en Koht.

25 Eri, e unsek ni eh kohwei sang rehn mehn Suhs akan ong rehn Mehn Liki kan, nin duwen me mehlel me iei sang rehn Koht.

26 Oh mwurin arail kohwei sang rehn wahnpoaron ehk-riemen en Sihmpwulo, sang mehn Suhs akan kolahng Mehn Liki kan, ke kilangehr wiawihdahn mwomwohdiso ndand oh suwedo, me keieu suwed sang mwomwohdiso koaros; pwe kilang, irail kihsang nan rongamwahu en Sihmpwulo soahng tohto me keieu kesempwal oh sansal; oh irail pil kihsang sapwellimen Kauno inou tohto.

27 Oh irail wia mepwukat pwehki irail me kasapwungehla koasoandi pwung kan en Kauno, pwe irail en kak karotongehla mesen aramas akan oh kekelwakiala mohngiongarail kan.

28 Eri, ke kilangehr me mwurin pwuhko eh kolahr nan pehn mwomwohdiso ndand oh suwedo, nting kesempwal oh sansal tohto kohsang nan pwuhko, me iei pwuhk en Sihmpwul en Koht.

29 Oh mwurin ire kesempwal oh sansal pwukat kohsangehr nan pwuhko eri kohieng wehi koaros en Mehn Liki kan; oh mwurin eh kolahng nan wehi koaros en Mehn Liki kan, iei, pil kotehla madau tohto wasa me ke kilangehr Mehn Liki kan ar saledekla ie, ke kilangehr—pwehki ire kesempwal oh sansal tohto me kohsangehr nan pwuhko, me mengei ong aramas en wehwehki, nin duwen padahk sansal kan me sang Sihmpwul en Koht—pwehki mepwukat eh kohsang nan sapwellimen Sihmpwulo rongamwahuo, aramas ngeder kin pwupwikihdi, mehlel, kahrehda Sehdan ahneki manaman kehlail pohrail.

30 Ahpw, ke kilang me Mehn Liki ko me saledeksangehr arail sensel, oh manaman en Koht ketin kapairailda sang wehi kan koaros, pohn sahpw me wia sahpw pilipilda nan pwungen sahpw kan koaros, sahpw me Kauno Koht ketin inoukihongehr ahmw pahpao me kadaudoke kan pahn sohsohki; eri, ke kilang me Kauno Koht sohte pahn mweidehng Mehn Liki kan en kamwomwala douluhl kadaudokemw kan, me iangala riomw kan.

31 Oh e pil sohte pahn mweidehng Mehn Liki kan en kamwomwala kadaudoken riomw kan.

32 Oh pil Kauno Koht sohte pahn mweidehng Mehn Liki kan re en mihmihte nan rotorot kohkohlahte, me ke kilang irail mihmi loale, pwehki ire kesempwal oh sansal kan en rongamwahu en Sihmpwulo me kohsangehr sang ni mwomwohdiso suwedo, me ke kilangehr eh wiawihdao.

33 Sihmpwul en Koht ahpw mahsanih: I pahn mahkohng Mehn Liki kan, ni ei pahn kalokehki kisehn kadaudoken peneinei en Israel kan kalokolok mwuledek.

34 Kedekedeo tohnleng en Kauno ahpw mahsanihongie, ketihtihki: Kilang, Sihmpwul en Kohto mahsanih, mwurin ei pwarekehr kisehn kadaudoken en Israel kan—oh kadaudok wet me I koasoiahier me wia kadaudoken ahmw pahpao—eri, mwurin ei pahn kadeikirailda, oh kalokeirail sang rehn Mehn Liki kan, oh mwurin Mehn Liki kan arail pahn dipekelekel, Kauno mahsanih, pwehki mwomwohdiso suwedo, me wia nohnohn lih en netiki paliwar, eh ekihla ire kesempwal oh sansal kan en rongamwahu en Sihmpwulo—I pahn mahkohng Mehn Liki kan ni rahno, lao I pahn wahdohng irail rongamwahuo, sang ni pein ei manaman, me pahn kesempwal oh sansal, Sihmpwulo me mahmahsen.

35 Sihmpwulo mahsanih, kilang: I pahn pwarohng kadaudokemw kan, oh irail pahn ntingihdi soahng tohto me I pahn padahkihong irail, me pahn sansal oh kesempwal; oh mwurin kadaudokemw kan arail pahn kamwomwomwla, oh pwupwidi nan arail sohpwoson, oh pil iangahki kadaudoken riomw ko, kilang, mepwukat pahn ekiekla, pwe en uhd kohdohng Mehn Liki kan, sang ni kisakis oh manaman en Sihmpwulo.

36 Oh ei rongamwahuo pahn ntingdi loale, oh ei paipalap oh ei komour, Sihmpwulo me mahmahsen.

37 Oh meid pai irail akan me pahn kin nantihong kaukauwada Saion ni rahno, pwe irail pahn alehdi kisakis oh manaman en Ngehn Sarawi; oh ma irail pahn dadaur lel ni imwi, irail pahn kesepwilda ni imwin rahno, oh pahn komourla nan wehi poatopoat en Sihmpwulo; oh mehmen me pahn kalohki popohl, iei, rohng kaperen, meid lingan pohn nahna me irail pahn miheo.

38 Kedekedeo I kilangada luhwen kadaudoken riei pwutak ko, oh pil Sapwellimen Sihmpwul en Koht pwuhko, me kohdo sang rehn men Suhs, oh kohdo sang rehn Mehn Liki kan oh kohieng luhwen kadaudoken riei pwutak ko.

39 Oh mwurin eh kodohng irail I kilangada pil ekei pwuhk, me kohdo sang ni manaman en Sihmpwulo, sang rehn Mehn Liki kan kodohng rehrail, pwe en padahkihong Mehn Liki kan oh luhwen kadaudoken riei pwutak ko, oh pil mehn Suhs akan me kamweremwerpeseng wasa koaros pohn sampah, me nting kan en soukohp akan oh wahnpoaron ehk-riemen en Sihmpwulo me mehlel.

40 Oh tohnlengo mahsanihongie, ketihtihki: Keimwiseklahn nting pwukat, me ke kilangehr rehn Mehn Liki kan, pahn kadehdehda mehlel en [nting] keieuo, me sang rehn wahnpoaron ehk-riemen en Sihmpwulo, oh pahn kasalehda soahng kan me sansal oh kesempwal me kohsang irail; oh pahn sansalada ong keinek koaros, lokaia koaros, oh aramas koaros, me Sihmpwul en Kohto iei ih Sapwellimen Sahm Soutuko, oh Soundoar en sampah; oh me aramas koaros anahne kohdo reh, ma soh, irail sohte kak komourla.

41 Oh irail pahn kohdo nin duwen mahsen me pahn koasoandi sang nan douwas en Sihmpwulo; oh mahsen en Sihmpwulo pahn sansalda nan nting en kadaudokemw kan, pil iangahki nan nting en wahnpoaron ehk-riemen en Sihmpwulo; eri ira koaros pahn kin utuhtpene; pwehki Koht metehmen mie oh Silepen Sihpw metehmen mie ong sampah pwon.

42 Oh ahnsou pahn kohdo me e pahn ketin pwarohng wehi kan koaros, ong mehn Suhs kan oh pil ong Mehn Liki kan; oh mwurin eh pahn ketin pwarohng mehn Suhs akan oh pil mehn likih kan, e pahn uhd pwarohng Mehn Liki kan oh pil mehn Suhs akan, oh me mi mwuhr pahn uhd mihla mwowe, oh me mi mwowe pahn uhd mihla mwuhr.