1 Oh mepwukat koaruhsie ei pahpao kilangehr, oh rongehr, oh koasoaiahier, ahnsou me e kin mihmi nan impwalo, nan wahu en Lemuel, oh pil soahng tohto kei, me sohte kak ntingdi pohn pileit pwukat.

2 Oh met, nin duwen ei koasoaiahier me pid pileit pwukat, kilang kaidehn pileit pwukat me I pahn ntingihdi poadoapoad unsek en nei aramas akan; pwe pileit kan me I pahn ntingihdi unsek duwen nei aramas akan, I kiheng adarail Nihpai; eri, re adaniki pileit en Nihpai, sang ni pein edei; oh pileit pwukat pil pahn adaniki pileit en Nihpai.

3 Ahpw, I alehdier kosonned en Kauno me I uhdahn pahn wiahda pileit pwukat, ong kahrepe kesempwal me e uhdahn pahn mie ehu nting me pid duwen doadoahk sarawi ong nei aramas akan.

4 Pohn pileit teiko uhdahn pahn ntingidi duwen mwehin nanmwarkih kan, oh mahwin kan oh pingiping en nei aramas akan; eri pileit pwukat me ongete pali laud en doadoahk sarawi kan; oh pileit teikan ongete duwen pali laud en mwehin nanmwarki kan oh mahwin kan oh pingiping kan nanpwungen nei aramas akan.

5 Eri, Kauno ketin kehkehlingkihongie I en wiahda pileit pwukat ong kahrepe kesempwal ehu reh, me kahrepe I sohte wehwehki.

6 Ahpw Kauno ketin mwahngih soahng koaros sangete ni tepin kawa; eri, e ketin kaunopada wiepen kaunsakala sapwellime doadoahk koaros rehn aramas akan; pwe kilang, e sapwellimaniki manaman koaros en kapwaiala sapwellime mahsen koaruhsie. Oh iei met me mehlel. Ahmen.