Kesempwal sang wen me kitail ese Ese
Kitail kak wiahkihla kisin mwenge iou mwenginingin en Ngehn Sarawio, me kin kaskasalehiong kitail mehlel wen kesempwal en palingehnitail.
Ni ansou me I pwarek wein Sierra Leone nan West Africa, I iang towehda mihting ehu me mih pahn kaweid en soun kaweid men sang stake Praimeri. Mariama kaweid mihtingo ni limpoak, soanamwahu, oh e mengei ke en kak medewe me e wereilahr nan mwomwohdisoht. Ahpw, Mariama ahpwtehn pepdaisla.
Rie serepein tikitiko iangala Mwomwohdiso oh lukehiong Mariama en iang ih kohla sarawi. Padahko inenen siarada loalen Mariama. Padahko pid kosonned en mwakelekel. E peki misnerih kan en kin padahk ong oh sohte pwand e ahpw alehdi ah kadedeh en Soukohp Joseph Smith. E pepdaisla nan 2014, Oh nah serepeino pepdais sounpwong nekiero. Medewe, padahk te riau me karehda Mariama ah wekila iei padahk en kosonned en mwakelekel oh Soukohp Joseph Smith, ire mehlel riau me sampah kin wiahki mehkot likamw de sohte katepe. Ahpw Mariama kadehde me e duwehte kisin mahn kis me pereniki nan marain. E kosoia, “Ansou me I diarada rongamwahu wet, I diarada pein ngehi.” E diarada me padahk kan en Kauno me kamwahuiala. Ngehn Sarawi kasalehiong me e wia sapwellimen Koht serepein kesempwal.
Met kitail pahn kilang kilel en pirien en Singh sang India. Renu me mih pali koahiek, me tepin iangala Mwomwohdiso nan pwungen irail pirien limeno, ehukihda madamadau pwukat:
“Mwohn ahi tepda raparapahki duwen Mwomwohdiso wet, I sohte ahniki pepehm me I wia aramas kesempwal. I wiahte emen aramas nan pwungen aramas akan, oh tohn ahi kousoano oh tiahk sohte padahkiongie mehlel me I wia serepein kesempwal emen. Ansou me I esehla rongamwahu wet oh esehla me I wia sapwellimen Sahm Nanleng serepein men, e wekidiehla. I mwadangete pehmada me I kesempwal—me Koht ketin kapikiehda oh pali ngeni oh ahi mour ki mehkot kesempwal oh mie kahrepe.
“Mwohn ahi esehla rongamwahu wet, ansou koaros I kin song en kasalehiong mehteikan me I wia aramas kesempwal men. Ahpw mwurin ahi esedahr me mehlelo, me I wia sapwellimen Koht serepein, I sohte anahne kasalehda mehkot, I esehier me I kesempwal. … Kedeh medewe me sohte katepomw.”
Presiden Thomas S. Monson masanih ni sansal mahsen pwukat: “Wiwia mwahu en pali ngehn kin kalaudehla atail duwehla Koht.”1
I pil ahpwtehn kapaida sang ni ahi tuhong pil emen serepein pwulopwul me pil wewehki padahk mehlel wet. Ede Taiana. I tuhong ni imwen wini en seri en praimerih kan nan Salt Lake. Taiana pwihn ke eisek ehu nan high school ansou me dierekda me e soumwahu en kanser. E sosoumwahuki soumwahu laud wet erein sounpwong 18[eisek waluh] mwohn ah mehla wihk kei samwalahro. Taiana direkihla marain oh limpoak. E esehier me ah soumwahu sohte kak mwahula ahpw e sohte wekidala mwomwe “soahng koaros mwahu.” Ansou me mehteikan kin idek, “dahme karehda kowe, eh Taiana?” Ah pasapeng kin, “Pwe dahme kaidehn ngehi ki?” Taiana esehier ihs ah sounkomour me e udahn kin poakohng. Mwurin aht pas reh, I esedahr me Taiana ese ihs ih. Sang ni ah esehier me e wia sapwellimen Koht serepein e ketkihong meleilei oh kehl en sohpai ah kahpwal ni pali mwahu.
Mariama, Renu, oh Taiana padahkihong kitail me Ngehn Sarawi pahn kasalehiong kitail uwen atail kesempwal. Ese mehlel me ke wia Sapwalimen Koht serepein pahn wia mehn kaweid mwahu ehu nan ahmw mour oh pahn kaweid uhk nan ahmw pwukoah nan rahn akan. Presiden Spencer W. Kimball kawehwehda mepwukat ni mahsen kesempwal pwukat:
“Koht iei Samawmail, E ketin poakong kumwail. Ih oh inamwail me ketket nanleng kesempwal kin kumwail laudsang wen me kumwail ese. … … Kumwail weksang mehteikan, amwail koahiek oh marain kohsang nanleng ihme karehda amwail kak iang sohsohki mour soutuk.
“Kumwail dehr ahniki peikasal me kumwail wia aramas kesempwal kei. Koasoandi en rongamwahu unseko kihong emen emen kumwail en kak lel dahme kumwail koadkoadoahkih, me iei kaunopada ong mour soutuk oh koapwoaroapwoarki Koht Sahm, Koht Nah, oh Koht Ngehn Sarawi.”2
Mweidehngie pwe ien kawewehda wekpeseng en lepin mahsen pwukat: worthohworthiness. . Ira sohte duwepenehte. Spiritual worthwewehki kitail en kesempwalki pein kitail duwehte Samatail Nanleng Ah kesempwal kin kitail, sohte duwehte samapah ah kesmpwalkin kitail. Kitail kesempwalte mwohn atail kohdo sampah. “Sapwellimen Koht limpoak sohte pahn uhdi oh e pahn kokolahte mwowe.” 3
Ah mehteio, worthiness kin alahldi sang ni peik. Ma kitail wiahda dihp, kitail kin sohla warohng, ahpw kaidehn kitail sohla kak wia mehkot! Kitail pahn kin kokoluhla oh nanantihong pwe en duwehla Sises ni atail pahn unsekla. Duwehte dahme Presiden Brigham Young padahngkier: “Kaidehn ihte met, dahme laud me wiwiawi ong aramas nan sampa … iei men duwehte mehteikan.” 4 Sohte lipilipil dah, kitail wia aramas kesempwal kei mwohn silangin Samatail Nanleng.
Ma sohte padahk mehlel wet, meh depe rehtail me pahn nsensuwed ansou koaros, ki madamadau suwed me kitail kin pein medewehki pein kitail? I wia. E mengei en wiahda sapwung wet. Sehdan me wia pahpahn likamw koaros, ahpw mehlel ansou me kitail sohte kin wewehki atail sohso sarawi oh kahrepe. Medemedewe me kitail kisin aramas kei e sohte pahn kak sewesei kitail. Soangen madamadau pwukat pahn karehiong atail sohte kak pweida. Kitail kalapw rong padahk pwukat, “Sohte emen kak wiahiong uhk ken aktikitikla ihte ma ke mweidehng irail.” 5 Kitail kak udihsang karasa atail soakoahiek kan ohng en mehteikan koahiek kan. “Karasepene kin kihsang atail peren.”6
Me weksang met, Kauno mahsanihong kitail ni mehlel me ansou me atail madamadau kan mwakelekel, E pahn ketin kapaikin kitailda koapwoaroapwoar, mehlel koapwoaroapwoar en esehla udahn ihs kitail. Sohte pak ehu mie ansou en soikala Sapwellime mahsen: E masanih, Ma kitail mweidehng atail madamadau kan en wie mwakmwakelekel.” Eri atail koapwoaroapwoar pahn lalaudla lao kitail uh mwohn Koht; … oh … Ngehn Sarawio pahn wia kempoakepahtail rahn koaros.”7
Kauno ketin kasalehiong padahk mehlel pwoatet Soukohp Joseph Smith: “Mehmen me alehsang Koht, e pil pahn kapwurelahng Koht; oh en perenda pwe e warohng en ale soahng koaros me Koht pahn ketkiong.” 8 Ansou kitail pehmada Ngehno me duwehte dahme ire wet kawehwehda, kitail kin esehda me pepehm wet sang rehn Samatail Nanleng. Kitail wauneki Ih oh kapinga Ih pwehki ah ketin kapai kitailda. Kitail perenda pwe kitail warohng en iang pilipilda.
Medewe me ke wadwadek pwuhk sarawi ehu nimensengo Ngehno ahpw mwenginingin kihong uhk me dahme ke wadwadeko mehlel. Ke kak pohnese Ngehno oh perenda pwe ke pehmada Sapwellime limpoak oh ke warohng en alahlda?
Nohno kan kumwail kak iang kelepwidi limwahn noumwail seri sounpar pahieu kan ansou me irail kin kapakap en meir. Pepehm ehu pahn kodohng uhk ansou me ke pahn rongorong. Ahmw pepehm pahn mwahu oh meleilei. Pepehmo pahn mwotomwot, ahpw ke kak esehda, ni ansouo, me ke warohng en alahlda. Kitail kak sohte kalapw alehdi mwekid laud nan palingenitail nan atail mour; ahpw kitail kak perepereniki kansenamwahu en mwenginingin en Ngehn Sarawio, kamkamelelehiong palingenitail kan me kitail warohng.
Kauno ketin kawewehda me wen atail kesempwal ihme karehda Sapwellime tomw laplalap en tohnmeteio ni Ah masanih:
“Tamataman me palingehn me keieu kesempwal mwohn sihlangin Koht;
“Kilang, Kauno ahmw Soundoar, lokolok oh pwoula ni palinwar; E ahneki lokolok oh weirek ki aramas koaros, pwe aramas akan en kak koluhla oh pwuralahng reh.”9
Riei lihoko, pwehki dahme e ketin wiaiong kitailehr, “kitail tengetengediong ih sang ni sapwellime limpoako.”10 E ketin masanih, “Semeio ketin kadariehdo pwe ien langada ni lopwuo; oh mwurin ahi pahn langada ni lopwuo, I pahn wahdo aramas koaros rehi.” 11
Nahnmwarki Benjamin pil kawewehda mwowmen tengetengdiong rehn Sounkomouro. “Oh kilang, e udahn pahn ale kasongsong, medek en palinwar, men mwenge,men nimpil, oh pwangada laudsang wen me aramas emen kak ale, lel mehla; kilang, nta keredihsang pwoaren kili koaros, e sapwellimaniki weirek laud,pwehki me suwed kan oh Lokolok en sapwellime aramas akan.” 12 Lokoloko oh wahn lokoloko audekidahr atail mohngiong kan limpoak oh kalahngan. Elder Paul E. Koelliker padahngki, “Ni atail pahn kihsang mwekid suwed kan en sampah oh doadoahngki atail saledek en pilipil oh rapahki Ih, kitail onopadahngehr mour soutuk me pahn kahlwaikitail lahng Reh.” 13Ma limpoak me kitail kin pehmada ong Sounkomouro oh dahme e ketin wiaiong kitail laudsang kehlail en atail luwet akan, peikasal kan, de wiwia suwed kan me kitail ahnlahr, eri E pahn ketin sewesei kitail en powehdi soahng koaros me pahn karehda kahpwal nan atail mour. E ketin doarei kitaila.
Mweidehngie ien kapwurehiong: ma wiwia suwed en sampah pahn kehlail sang pwoson oh koapwoaroapwoarki Sounkomouro, eri wiwia suwed en sampah pahn kin kohdo ansou koaros. Ma ansou koaros kitail pilada oh medemedewehte dahme sapwung oh peikasalki me kitail wia aramas kesempwal ekei, ma kitail sohte pahn ehu ong Sounkomouro, e pahn apwal en pehmada kaweid en Ngehn Sarawio.
Riei lih oko, kitail dehr peikasalki ihs kitail! E kin kalapw mengei en audehkihla pali ngenitail me suwedo sang kakehlailiada pali ngenitail en tamataman oh kolokol me kitail duwehte Ih, kitail sohte kak pwainda atail nsenamwahu ni imwin rahn pwukat. I peki, kitail pirien wet, en pwoson Krais; … … peki Krais en ketin pwok kitailda, oh kalahngan en sapwellime lokolok oh pwoulahu, … … oh sapwellime mahk oh kanengamah, oh koapwoaroapwoar en sapwellime lingan oh mour soutuk, en tengedi nan atail [madmadau kan] kokolahte.” 14 Ni ansou me Kauno kin pwokitailda, kitail kin kak kilangada mwahu ihs kitail oh kitail pil kin karaniala Ih sang wen me kitail kin medewe. Ni mwar sarawi en Sises Krais, amen.