Gafatia Faaleagaga
I le avea ai ma soo faamaoni a Iesu Keriso, e mafai ona e maua musumusuga ma faaaliga faaletagata lava ia, e ogatusa ma Ana poloaiga, e faapitoa ia te oe.
A o ou tuua se tolauapiga a Tamaitai Talavou i lenei taumafanafana, sa tuuina mai e se tamaitai talavou lelei ia te a’u se tusi. I totonu, sa ia fesili mai ai, “E mafai faapefea ona ou iloa o loo taumafai le Atua e taʻu mai ia te a’u se mea?” Ou te fiafia i lana fesili. E faananau o tatou agaga mo se fesootaiga ma lo tatou aiga faalelagi. Tatou te fia lagona e manaomia ma aogā i tatou. Ae e i ai taimi tatou te tauivi ai e iloa le eseesega i le va o ō tatou lava manatu ma uunaiga mālū a le Agaga. Ua aoao mai Perofeta, anamua ma aso nei afai o se mea na te “valaaulia ma faatosina e fai se mea lelei, e sau mai ia Keriso.”
Na tuuina mai e Peresitene Russell M. Nelson se valaaulia faigofie ma mamana: “O’u uso e ma tuafafine, ou te aioi atu ia te outou ia faateleina lo outou gafatia faaleagaga e maua ai faaaliga. … Filifili e fai le galuega faaleagaga e manaomiaina e olioli ai i le meaalofa o le Agaga Paia ma faalogo soo atu ma le manino atili i le siufofoga o le Agaga.”
Ou te manao i lenei taeao e talanoa atu ia te outou mai lo’u loto e uiga i auala e fa e faateleina ai lou gafatia faaleagaga e maua ai faaaliga.
1. Ia Naunau ma le Loto e Fatuina se Taimi ma se Avanoa e Lagona ai le Siufofoga o le Atua
A o e faaaogaina lou faitalia e aveese ai se taimi i aso uma e faalatalata atu ai i le siufofoga o le Atua, aemaise lava i le Tusi a Mamona, i le aluga o taimi o le a manino atili Lona siufofoga ma e masani atili i ai.
I se eseesega, o mea faalavefau ma le pisapisaō ia e faatumulia ai le lalolagi ma o tatou aiga ma o tatou olaga e mafai ona atili faigata ai ona tatou lagona Lona siufofoga. O nei mea faalavefau e mafai ona tumau i ō tatou mafaufau ma loto lea tatou te le tuua lava se avanoa mo uunaiga malu a le Agaga Paia.
Na aoao mai le Perofeta o Iosefa Samita, o le tele o taimi e faaali mai e le Atua o Ia Lava “i tagata taitoatasi ma patino i le tagata lava ia, i lona potu; i le vao po o le faatoaga, ma e leai se pisa po o se vavaõ.”
E manao Satani e vavae ese i tatou mai le siufofoga a le Atua i le taofia o i tatou mai na nofoaga filemu. Afai e fetalai mai le Atua i se leo lemu, ma le itiiti, e tatau ia te oe ma a’u ona faalatalata atu ia lagona o Ia. Vaai faalemafaufau i le mea e ono tupu pe a tatou naunautai ia tumau pea le fesootaiga ma le lagi e pei ona tatou naunautai ia tumau pea le fesootaiga ma le Wi-Fi! Filifili se taimi ma se nofoaga, ma faalogologo mo le siufofoga o le Atua i aso uma. Ma ia tausia ma le sa’olele lenei taimi atofaina paia, aua e matuā tele lava mea e faalagolago i ai!
2. Faatino e aunoa ma le Faatuai
A e mauaina ni uunaiga ona e faatino lea ma le faamoemoe, e mafai ona faaaoga oe e le Alii. O le tele o lou faatino, o le tele foi lena o [lou] masani i le siufofoga o le Agaga. O le a faateleina lou iloa o le taitaiga a le Atua ma o loo “naunau [o Ia] … e faaali Lona mafaufau ma le finagalo.” Afai e te faatuai, e ono galo ia te oe le uunaiga pe misia le avanoa e fesoasoani ai i se tasi mo le Atua.
3. Ia Maua Lau Feau mai le Alii
O le tatalo e foliga mai e naunau le Tama Faalelagi e tali o la tatou aioiga ina ia taitai atu i se tasi e manaomia la tatou fesoasoani. Na aoao mai Peresitene Henry B. Eyring ia i tatou ia saili i faaaliga e ala i le ōle atu i le Atua po o ai e mafai ona tatou fesoasoani i ai mo Ia. “Afai e te faia fesili faapena, o le a oo mai le Agaga Paia ma o le a musuia oe i mea e mafai ona e faia mo isi tagata. A e alu ma fai na mea, ua e i ai i le feau a le Alii, ma a ae i ai i le feau a le Alii, ua e agavaa mo le meaalofa o le Agaga Paia.”
E mafai ona e tatalo ma ōle atu i le Alii mo se feau. A o e faia, e mafai ona Ia faaaogaina ou tomai masani e faataunuu ai Lana galuega maoae.
O lo’u tama matua, o Fritz Hjalmar Lundgren, na malaga mai Suetena ina ua 19 ona tausaga. Na ia taunuu i Amerika, na o ia, ma se atopau ma le ono tausaga o aoga aloaʻia. I le lē mafai ai ona tautala i se Igilisi, na ia malaga atu ai i Oregon ma faigaluega ai o se tipi laau ma mulimuli ane, auai i le Ekalesia faatasi ma lo’u tinamatua ma loʻu tina. E le’i pulefaamalumalu lava o ia i se uarota, ae i le avea ai o se faiaoga o aiga faamaoni, na ia toefaatoaagaina mai le silia ma le 50 aiga eseese i le Ekalesia. Na faapefea ona ia faia lena mea?
Ina ua mavae le maliu o tamamatua, sa ou lagaina se pusa o ana pepa ma tau ai i se tusi na tusia e se alii na toe foi mai i le lotu ona o le alofa o Tamamatua. O le tusi e faitauina faapea: “O le mealilo a Uso Fritz, ou te talitonu, e i ai lava o ia i se feau mo le Tama Faalelagi.”
O lena tusi sa aumai mai ia Tuagane Wayne Simonis. Sa asiasi tamamatua ia te ia ma faamasani i tagata taitoatasi o le aiga. Mulimuli ane, na ta’u atu e Tamamatua ia i latou e manaomia i latou ma na valaauliaina i latou e auai i le lotu. Ae i lena Aso Sa, na ala mai ai Tuagane Simonis ma se faafitauli—na te leʻi faamaeaina le taualuga o lona fale, ma na faamoemoe e timu lena vaiaso. Na tonu ia te ia e alu i le lotu, faatalofa ma Tamamatua, ona tuua lea ma toe foi atu i le fale e faamaea le taualuga. E mafai lava ona auai lona aiga i le sauniga faamanatuga e aunoa ma ia.
Sa lelei lava lana fuafuaga seia, oo i le taimi, a o i ai i luga o le taualuga, na ia faalogoina ai se tagata o a’e atu i le apefa’i. I ana upu: “Ina ua ou tepa a’e i luga, … o loo tu Uso Fritz i le pito i luga o le apefa’i. Sa ia ‘ata’ata mai ia te a’u. I le taimi muamua, sa ou maasiasi ma lagona e pei o se tamaʻi tamaitiiti ua maua ua faamisi le a’oga. Ona … ou lagona lea o le ita. [Ae na ona aveese lava e Uso Fritzt] o lona suti ma tautau i luga o le apefa’i. A o ia afe i luga lima o lona ofutino paepae, sa ia liliu mai ia te a’u ma faapea mai, ‘Uso Simonis, o i ai se isi samala? Masalo e taua tele lenei galuega semanu e te lē tuua lou aiga, ma afai e taua, ou te fia fesoasoani ia te oe.’ A o ou tilotilo atu i ona mata, sa na o le agalelei ma le alofa faaKeriso sa ou vaaia. Sa alu ese lo’u ita. … Sa ou tuu i lalo a’u meafaigaluega i lena Aso Sa ma mulimuli atu i la’u uo lelei i lalo o le apefa’i ma toe foi atu i le falesa.”
Sa maua e tamamatua lana feau mai le Alii, ma sa iloa e ia e tatau ona ia sailia mamoe ua leiloloa. E pei lava o alii e toafa o e na ave la latou uo ma’i supa i luga o le taualuga ona tuu ifo o ia i lalo e faamaloloina e Iesu Keriso, na faapena foi le feau a Tamamatua na avatu ai o ia i se tumutumu fale. E auina mai e le Alii faaaliga ia i latou e saili e fesoasoani atu i isi.
4. Talitonu ma Faalagolago
Talu ai nei, na ou faitau ai i tusitusiga paia e uiga i se isi faifeautalai maoae na mauaina lana feau mai le Alii. Sa aoao atu e Arona le tupu o sa Lamana, o lē sa mafaufau pe aisea na le sau ai foi Amona le uso o Arona e aoao o ia. “Ma sa fai atu Arona i le tupu: Faauta, ua valaauina o ia e le Agaga o le Alii i se isi ala.”
Sa fetalai mai le Agaga i lo’u loto: e tofu i tatou ma se misiona eseese e faatino, ma e i ai taimi e ono valaau ai i tatou e le Agaga i “se isi ala.” E tele auala e fausia ai le malo o le Atua o ni soo osifeagaiga, ma tausi feagaiga o Iesu Keriso. I le avea ai ma Ona soo faamaoni, e mafai ona e maua musumusuga ma faaaliga faaletagata lava ia, e ogatusa ma Ana poloaiga, e faapitoa ia te oe. Ua ia te oe ni misiona tulagaese ma ni matafaioi e faatino i le olaga ma o le a tuuina atu le taitaiga tulagaese e faataunuuina ai.
O Nifae, le uso o Iareto, e oo lava ia Mose sa i ai uma se vaega tele o vai e sopoia—ma sa eseese uma auala na faia ai. Na galue Nifae e “ta laau i gaosiga uiga eseese.” Na fausia e le uso o Iareto ni vaa na “malu lelei e pei o se ipu.” Ma sa “savali [Mose] i le iliti tai matutu i totonu o le sami.”
Na tofu maua e i latou taitoatasi faatonuga patino, na faapitoa mo i latou, ma sa faatuatuaina ma galulue i latou taitoatasi. E silafia e le Alii i latou o e usiusitai ma, i upu a Nifae, “o le a saunia e ia se ala mo [i tatou] ina ia mafai ai ona … faataunuuina o le mea ua ia poloaiina.” Ia matau na fai mai Nifae, “se ala”— e lē “o le ala.”
Pe o tatou misia pe o faamisi foi ni feau patino mai le Alii ona ua Ia saunia “se ala” e ese mai le mea na tatou faamoemoe i ai?
Sa taitai atu loʻu tamamatua i se nofoaga e le masani ai—i se suti, i luga o se tumutumu fale, i se Aso Sa. Faalagolago i le Atua e taitai oe, e tusa lava pe foliga mai e ese lena ala nai lo le mea na e faamoemoeina pe e ‘ese mai i isi.
E eseese ituaiga o tagata o le Au Paia o Aso e Gata Ai, ae “ua tutusa tagata uma i le Atua”—“uliuli pe pa’epa’e, pologa pe saoloto, o tane ma fafine,” nofofua ma faaipoipo, mauoa ma mativa, talavou ma matutua, tagata ua loa i le ekalesia ma tagata faatoa liliu mai. E tusa lava po o ai oe, po o a mea o loo e feagai ai, ua valaaulia oe i le la’o’ai a le Alii.
A o avea ai le sailia ma le faia o le finagalo o le Tama ma mamanu masani o lou olaga i aso uma, e moni lava o le a taitai atu oe ia sui ma salamo.
O le polokalama fou a le Ekalesia mo tamaiti ma le autalavou ua fausia i luga o le faavae o le aoaoina e saili ia faaaliga, iloaina o le mea e finagalo le Alii tatou te faia, ona galue lea i luga o lena faatonuga. O i tatou taitoatasi, po o le a le matua po o le tulaga, e mafai ona tauivi e saili, maua, ma faatino. A o e mulimuli i lenei mamanu e faavavau ua faavaeina mo ō tatou aso, o le a e latalata atili atu ia Iesu Keriso—Lona alofa, Lona malamalama, Lana taitaiga, Lona filemu, ma Lana faamalologa ma le mana gafatia. Ma o le a e faateleina lou gafatia faaleagaga e avea ai ma se meafaigaluega i Ona aao i aso uma i le faataunuuina o Lana galuega sili. I le suafa o Iesu Keriso, amene.