Eb’ laj k’ehol eetal, eb’ li molam re li Tijonelil re Aaron, ut eb’ li tzoleb’aal reheb’ li Saaj Ixq
Li rajom li jalaak li naqaye resil anajwan a’an xtenq’ankileb’ li saaj winq ut saaj ixq chixnimob’resinkil li santil chaab’ilal wan reheb’.
Ex raarookil was wiitz’in, jwal sa li wank chi ch’utch’u wi’chik eerik’in sa’ li jolomil ch’utub’aj-ib’. Chiru li xamaan a’in, xyeeman resil reheb’ li komon sa’ li Iglees junjunqeb’ li jaalak chirix ani naru taawanq jo’ aj k’ehol reetaleb’ li k’ojob’anb’il k’anjel re li kub’iha’ ut li tz’ape’k sa’ junajil. Nawaj xka’jultikankileb’li oxib’ li na’leb’ a’in.
-
Li kub’iha b’aanunb’il chi uuchilej choq’ re junaq li kamenaq naru taak’ehe’q reetal xb’aan yalaq ani wan xch’ina hu re ok sa’ li santil ochoch, us ta a’an jun recomendación de uso limitado.
-
Yalaq ani komon li tiqib’anb’il li wan lix ch’ina hu re ok sa’ li santil ochoch naru taawanaq jo’ aj k’ehol reetal li k’ojob’anb’il k’anjel re li tz’ape’k sa’ junajil, choq’ reheb’ li yo’yo jo ajwi’ li kamenaq.
-
Yalaq ani komon li kub’enaq xha’ sa’ li Iglees naru taawanq jo’ aj k’ehol reetal li kub’iha’ choq’ re li ani yo’yo. Li jalaak a’in wan xwankil sa’ chixjunileb’ li kub’iha’ neke’b’aanuman chirix li santil ochoch.
Eb’ li jalaak a’in ink’a’ neke’xjal li tzol’leb’ chirixeb’ li k’ojob’anb’il k’anjel. Eb’ li tzol’leb’ ut eb’ li sumwank li wankeb’ rilom rik’in a’in moko neke’jala ta. Toj tz’aqal xwankilaleb’ sa’ chixjunileb’ li k’ojob’anb’il k’anjel. Eb’ li jalaak a’in te’xchaab’ilob’resi xtz’aqonikeb’ li junkab’al sa’eb’ li k’ojob’anb’il k’anjel a’in.
Nawaj ajwi’ aatinak eerik’in sa’ li hoonal a’in chirixeb’ li jalaak choq’ reheb’ li qasaaj ut laj jolominel reheb’.
Maare nanaq sa’ eech’ool naq xink’e xb’oqb’aleb’ li saaj re Lix Iglees li Jesukristo reheb’ laj Santil Paab’anel sa’ Roso’jikeb’ li Kutan chiroksinkileb’ rib’ sa’ lix teep aj saaj re li Qaawa’ re tz’aqonk sa’ li k’anjel q’axal nim sa’ li ruchich’och’ anajwan—lix ch’utub’ankil Israel. Xink’e xb’oqb’aleb’ li qasaaj xb’aan naq ninqeb’ xseeb’al sa’ xye’b’al li ruq’eb’ reheb’ li ras riitz’in ut xwotzb’al li k’a’ru neke’xpaab’ chi chaab’il. Li k’anjel re ch’utub’ank aajel ru sa’ xtenq’ankil chixkawresinkil li ruchich’och’ ut li tenamit choq’ re li xkab’ xk’ulunik li Qaawa’.
Sa’ li junjunq teep, lix teep aj saaj re li Qaawa’ jolominb’il xb’aan jun li obiisp, jun xmoos li Dios. Li xb’eenil ut xnimal ru k’anjel teneb’anb’il sa’ xb’een, a’an rilb’aleb’ li saaj winq ut li saaj ixq sa’ lix teep. Li obiisp ut eb’ lix tenq’ aj k’ehol na’leb’ neke’xb’eresi li k’anjel wan reheb’ lix molam li Tijonelil re Aaron ut eb’ lix tzoleb’aal li Saaj Ixq sa’ li teep.
Li rajom li jalaak li naqaye resil anajwan a’an xtenq’ankileb’ li saaj winq ut saaj ixq chixnimob’resinkil li santil chaab’ilal wan reheb’. Naqaj ajwi’ xkawob’resinkileb’ li molam re li Tijonelil re Aaron ut eb’ li tzoleb’aal reheb’ li Saaj Ixq ut xk’eeb’al xtenq’ li obiisp ut xkomoneb’ aj jolomoinel naq neke’k’anjelak chiruheb’ li saaj.
Li Elder Quentin L. Cook taa’aatinaq anajwan chirix li jalaak choq’ reheb’ li saaj winq. Ut hoon ewu, sa’ li jolomil ch’utam reheb’ li ixq, li Hermana Bonnie H. Cordon, Awa’b’ej reheb’ li Saaj Ixq, taa’aatinaq chirix li jalaak choq’ reheb’ li saaj ixq.
Junajeb’ li Xb’eenil Awa’b’ejil ut lix Molameb’ li Kab’laju chi Apostol sa’ xk’ulub’ankileb’ li k’anjel a’in re xkawob’resinkileb’ li qasaaj. K’a’jo’ naq naqaraheb’ ut nokotijok chirixeb’! A’aneb’ “xyo’onihom laj Israel, eb’ aj pleet choq’ re Sion.” Tz’aqal k’ojk’o qach’ool rik’ineb’ li qasaaj ut naqab’antioxiheb’ a’an. Sa’ lix loq’laj k’ab’a’ li Jesukristo, amen.