2010–2019
Ex raarookil rab’inb’ej
Jolomil ch’utub’aj-ib’ re octubre 2019
2:3

Ex raarookil rab’inb’ej

Xb’aan li xBonnie H. Cordon

Jolomil Awa’b’ej reheb’ li Saaj Ixq

Lix yaalalil chixjunil li naqab’aanu sa’ li ch’uut reheb’ li Saaj Ixq a’an li qajom naq teetaw eepaab’aal chirix li Qaawa’ Jesukristo.

Ex inraarookil komon ixq, k’a’jo’ xsahil wank eerik’in! Yooko chirilb’al xk’ihal li k’utb’esinb’il na’leb’ li naxnujob’resi li qaam ut naxk’e xsahil qach’ool.

Re xtikib’ankil, nawaj teenaweb’ ru junjunqeb’ li wamiiw; a’aneb’ saaj ixq jalan jalanq xseeb’aleb’, xna’leb’eb’, ut xwanjikeb’ xjuneseb’ ut sa’ xjunkab’aleb’. Li junjunqeb’ re a’an, jo’ chejunilex laa’ex, neke’xtoch’ li waam.

xBella

Xb’een, nawomaq ru xBella. A’an xaqxo chi kaw xb’aan naq a’an li junaj chi saaj ixq sa’ lix uq’ej aran Islandia.

xJosephine

Nawomaq ru xJosefina, aj Africa, li kixteneb’ wi’chik sa’ xb’een xtzolb’al lix Hu laj Mormon rajlal kutan. Yoo chixtawb’al li wankilal ut eb’ li osob’tesihom neke’chal xb’aan xb’aanunkil a’an.

xAshtyn

Ut sa’ xraqik, nawomaq ru li wamiiw xAshtyn, jun saaj ixq k’a’jo’ xchaab’ilal li kikam chirix xyalb’al xq’e chiru waqib’ chihab’ rik’in li cancer. Lix kawil nawom xch’ool chirix lix tojb’al rix li maak kixb’aanu li Jesukristo toj na’eek’an sa’ li waam.

Chejunilex laa’ex saaj ixq k’a’jo’ eechaab’ilal. Maak’a’ junaq chik jo’ laa’ex, chejunjunqal wankeb’ lee maatan ut eb’ lee numsihom, us ta maare juntaq’eeteb’ sa’ x’aajelileb’ ru ut xjunelikileb’.

Laa’ex tz’aqal musiq’ejil xrab’in li Choxahil Na’b’ej Yuwa’b’ej, ut maak’a’ naru na’isin eere chiru lix rahomeb’ chi moko chiru lix rahom lee Kolonel. Naq nekenach’ob’resi eerib’ rik’in a’an, us ta jwal kok’ li yokb’ nekek’e chi uub’ej, teek’e reetal li tuqtuukilal nakana sa’ lee ch’ool jo’ xtiikil tzolom li qaKolonel Jesukristo.

Li Awa’b’ej Russell M. Nelson, li qaraarookil profeet, xpatz’ we naq tinwotz junjunq reheb’ li musiq’anb’il jalok li texxtenq’a “chixnimob’resinkil li santil chaab’ilal wan eere chejunqalex” ut re xnimob’resinkil li tiikilal naru teek’e chi uxmank. Sa’ li q’ojyin a’in tin’aatinaq chirix kaahib’ li na’leb’ li te’jalaaq.

Li ch’ol aatin choq’ reheb’ li Saaj Ixq

Xb’een, lix yaalalil chixjunil li naqab’aanu sa’ li ch’uut reheb’ li Saaj Ixq a’an li qajom naq teetaw eepaab’aal chirix li Qaawa’ Jesukristo li ink’a’ naru reek’asinkil ut re naq teetaw tz’aqal eenawom chirix lee choxahilal jo’ xrab’in li Dios.

Sa’ li q’ojyin a’in, nawaj xyaab’asinkil li ak’ ch’ol aatin choq’ reheb’ li Saaj Ixq. Nintz’aama naq teereek’a li Santil Musiq’ej chixch’olob’ankil xyaalal li yaal wankeb’ sa’ li aatin a’in naq yooqin chixyaab’asinkil:

Laa’in jun raarookil xrab’in li choxahil na’b’ej yuwa’b’ej, ut wan inchoxahilal ut lin junelikil eechanihom.

Jo’ xtzolom li Jesukristo, ninyal inq’e chi wulak jo’ a’an. Ninsik’ ut nink’anjela li k’utb’esinb’il na’leb’ nak’eeman we ut nink’anjelak chiruheb’ li was wiitz’in sa’ lix santil k’ab’a’ a’an.

Tinxaqliiq joʼ aj yehol nawom chirix li Dios saʼ chixjunil hoonal, ut saʼ chixjunil li kʼaʼaq re ru, ut saʼ chixjunil li naʼajej.

Naq yooqin chixyalb’al inq’e re naq k’ulub’ejaqin choq’ re li taqenaqil loq’al, nink’e xloq’al li maatan re li jalb’a-k’a’uxlej ut ninyal chaab’ilo’k rajal kutan. Rik’in paab’aal, tinkawob’resi li wochoch ut lin junkab’al, tinb’aanuheb’ ut tinpaab’eb’ li loq’laj sumwank, ut tink’uleb’ li k’ojob’anb’il k’anjel ut eb’ li rosob’tesihom li santil ochoch.

K’ehomaq reetal naq xjalman li aatin “laa’o” rik’in “laa’in.” Eb’ li yaal a’in neke’k’anjelak choq’ eere sa’ junjunqal. Laa’at jun raarookil xrab’in li Choxahil Na’b’ej Yuwa’b’ej. Laa’at jun tzolom sa’ sumwank rik’in li qaKolonel Jesukristo. Nakatinb’oq chixtzolb’al ut chi k’oxlak chirixeb’ li aatin a’in. Ninnaw naq wi taab’aanu, taak’ul jun xnawom aach’ool chirix lix yaalalil. Xtawb’aleb’ ru li yaal a’an tixjal laa na’leb’ chirix chan ru xnumsinkileb’ li ch’a’ajkilal. Xnawb’al anihat laa’at ut k’a’ut naq wankat arin tatxtenq’a chixjayalinkil laa wajom rik’in li rajom li Kolonel.

Taawanq aatuqtuukilal ut aab’eresinkil naq yooqat chixtaaqenkil li Jesukristo.

Eb’ li tzoleb’aal reheb’ li Saaj Ixq

Li xkab’ na’leb’ b’ar wi’ taawanq jalok wan rilom rik’ineb’ li tzoleb’aal reheb’ li Saaj Ixq. Li Elder Neal A. Maxwell kixye: “Chi kok’ aj xsa’, li k’a’ru tz’aqal neke’raj ru li kristiaan a’an xkolb’aleb’ rib’ chiruheb’ li kaq-sut-iq’ re li yu’am sa’ li santil muheb’aal re komonil.” Eb’ li qatzoleb’aal tento naq a’anaqeb’ santil muheb’aal li te’koloq chiruheb’ li kaq-sut-iq’, kawil na’ajej re rahok ut re wank sa’ komonil. Re xk’ojob’ankil xnimal junajil, xkawob’resinkileb’ li amiiwil, ut xnimob’resinkil li eek’ahom re wank sa’ komonil sa’ xyanqeb’ li Saaj Ixq, yooko chixb’aanunkileb’ junjunq jalok sa’ xtusulal ruheb’ li tzoleb’aal.

Chiru numenaq jun cient chihab’, eb’ li saaj ixq neke’xjach rib’ sa’ oxib’ tzoleb’aal. Chalen anajwan, neke’qab’oq laj jolominel reheb’ li Saaj Ixq ut eb’ li obiisp chixk’oxlankil rik’in tijok li k’a’ru aajel ru choq’ re li junjunq chi saaj ixq ut xk’uub’ankileb’ ru a’ yaal chan ru wan li teep. A’ineb’ reetalil chan ru naru neke’b’aanuman.

  • Wi moko k’iheb’ ta li saaj ixq, naru neke’ch’utla li sa’ jun ajwi’ li tzoleb’aal reheb’ li Saaj Ixq.

  • Maare k’iheb’ li saaj ixq aj kab’laju chihab’ ut b’ab’ayeb’ ajwi’ li saaj ixq ak ninqeb’ chik. Naru nekesik’ ru xk’uub’ankil wiib’ li tzoleb’aal: Saaj Ixq aj kab’laju chihab’ ut Saaj Ixq aj oxlaju toj waqxaqlaju chihab’.

  • Malaj ut, wi nim lee teep rik’in roxk’aal chi saaj ixq neke’wulak, naru nekek’uub’eb’ waqib’ li tzoleb’aal, junjunq a’ yaal xchihab’eb’, k’uub’anb’ileb’ chi chihab’.

A’ yaal chan ru k’uub’anb’ileb’ lee tzoleb’aal, laa’ex, ex saaj ixq, tz’aqal aajel eeru re xwaklesinkil li junajil. Chexwanq jo’ saqen choq’ reheb’ li wankeb’ chesutam. Chexwanq laa’ex jo’ aj k’ehol re li rahok ut li chaab’ilal li nekeroyb’eni xk’ulb’al rik’ineb’ jalan chik kristiaan. Rik’in junaq eetij sa’ lee raam, ye’omaq lee ruq’ reheb’ lee ras eeriitz’in ut wanqex jo’ xmetz’ew li k’a’ru us. Naq teeb’aanu, lee yu’am nujenaqaq rik’in chaab’ilal. K’a’jo’ xchaab’ilal li teereek’a choq’ reheb’ lee ras eeriitz’in ut teetikib’ ajwi’ rilb’al li chaab’ilal rik’ineb’ a’an.

Xk’ab’a’eb’ li tzoleb’aal reheb’ li Saaj Ixq

Rox, sa’ xk’ab’a’ li jalok sa’eb’ li tzoleb’aal, chixjunileb’ li tzoleb’aal te’k’ab’a’imanq chi junaj ru jo’ “Eb’ li Saaj Ixq.” Te’isimanq li k’a’b’a’ej “Abejita,” “Damita,” ut “Laurel.”

Xkawob’resinkileb’ li awa’b’ejil reheb’ li tzoleb’aal

Sa’ roso’jik, nawaj ajwi’ aatinak chirix lix aajelil ruheb’ li awa’b’ejil reheb’ li tzoleb’aal. Maak’a’ naxye chan ru k’uub’anb’ileb’ ru li tzoleb’aal reheb’ li Saaj Ixq, tento taawanq jun awa’b’ejil choq’ re li junjunq chi tzoleb’aal! K’ojob’anb’il chaq sa’ choxa naq eb’ li saaj ixq b’oqb’ileb’ chi jolomink sa’ xsaajilaleb’.

Nakawob’resiman ut nach’olob’aman chi saqen wi’ chi ru lix k’anjel ut li rajomeb’ li awa’b’ejil re li tzoleb’aal. Li k’anjel re kolb’a-ib’ a’an jun reheb’ li aajel ruhil teneb’ank a’in, a’ tz’aqal sa’eb’ li k’anjel re rilb’aleb’ li komon, li k’anjel re xjultikankil li evangelio, lix q’ajsinkileb’ chaq li komon, ut li k’anjel re li santil ochoch ut li resilal li junkab’al. Hehe’, a’in chan ru naqach’utub’ Israel—jun xchaq’al ru k’anjel choq’ reheb’ chixjunil li saaj ixq jo’ komon sa’ lix teep aj saaj re li Qaawa’.

Jo’ nekenaw, sa’ chixjunil xjar tasalil li Iglees, li Qaawa’ naxb’oqeb’ li awa’b’ejil re xjolominkil lix tenamit. Ex saaj ixq, li wank jo’ komon sa’ jun awa’b’ejil re tzoleb’aal maare a’anaq xb’een sut eetz’aqonik sa’ li musiq’anb’il tusulal a’an re jolomink. Ex ninqi komon aj jolominel, b’aanuhomaq naq lix b’oqb’aleb’ li awa’b’ejil reheb’ li tzoleb’aal nimaq xwankil ut chirix a’an jolominqex sa’ komonil rik’ineb’ a’an, rik’in xtenq’ankileb’ ut xk’amb’aleb’ xb’e re naq chaab’il te’xb’aanu. Maak’a’ na’ajman re xnimal xnawomeb’ li awa’b’ejil reheb’ li tzoleb’aal chirix jolomink, tikib’omaq toj b’ar wankeb’ ut tenq’ahomaqeb’ chixtawb’al lix seeb’aleb’ ut xkawileb’ xch’ool li taa’osob’tesinq reheb’ jo’ aj jolominel. Wanqex chi nach’ rik’ineb’, a’b’an meeb’aanu lix k’anjeleb’. Li Musiq’ej texxb’eresi laa’ex naq nekeb’eresiheb’ a’an.

xChloe

Re xk’utb’esinkil lix aajel ruhil k’anjeleb’ li na’b’ej yuwa’b’ej ut eb’ laj jolominel jo’eb’ aj k’amol b’e, tinwotz eerik’in jun li seraq’. Li xCloe kib’oqe’ jo’ awa’b’ej re li tzoleb’aal. Lix chaab’il jolominel re li tijonelil kixwaklesi xch’ool chixsik’b’al xtenq’ li Qaawa’ re naq tixye ani te’wanq sa’ li awa’b’ejil rik’in. Li xCloe kitijok ut kixk’ul xmusiq’ankil sa’ junpaat chirix aniheb’ li tento tixye naq te’wanq jo’ aj tenq’ re. Naq ki’ok chi k’oxlak ut chi tijok chirix laj tz’iib’, kisach xch’ool naq li Musiq’ej kixk’am lix k’a’uxl k’iila sut rik’in jun li saaj ixq— li ink’a’ mas nawulak sa’ li iglees malaj sa’eb’ li kok’ k’anjel.

Naq kireek’a naq maare moko ch’olch’o ta ru li kireek’a, xChloe ki’aatinak rik’in lix na’, ut a’an kixch’olob’ chiru naq naru neke’qak’ul k’utb’esinb’il na’leb’ rik’ineb’ li k’oxlahom neke’chal chi k’iilasutinb’il. Chi kawresinb’il xch’ool, xChloe kireek’a naq tixk’e xk’ab’a’ li saaj ixq a’an. Li obiisp kixk’e xb’oqb’al ut li saaj ixq kixk’ulub’a. Chirix naq kixaqab’aak, li q’un xch’ool aj tz’iib’ kixye, “Maajun wa week’ahom naq laa’in ta raj komon sa’ junaq na’ajej, chi moko naq ajb’il ta raj wu. Moko week’ahom ta naq wan inna’aj. A’b’an rik’in lin b’oqb’al a’in, naweek’a naq chanchan naq lin Choxahil Yuwa’ wan jun rajom choq’ we ut jun na’ajej choq’ we.” Naq li xChloe ut lix na’ ke’el sa’ li ch’utam, xChloe kiril lix na’ ut kixye re rik’in xya’al ru: “Li k’utb’esinb’il na’leb’ tz’aqal yaal! Li k’utb’esinb’il na’leb’ nak’anjelak!”

Ex awa’b’ejil reheb’ li tzoleb’aal, laa’ex b’oqb’ilex xb’aan li Dios ut kanab’anb’il sa’ eeruq’ xjolominkileb’ jun ch’uut reheb’ lix rab’in a’an. “Li Qaawa’ naxnaw eeru. … A’an kixsik’ eeru” Xexxaqab’aak xb’aan ani wan lix wankilal li tijonelil rik’in; a’an naraj naxye naq sa’ xb’aanunkil li k’anjel re lee b’oqb’al, nekek’anjela lix wankilal li tijonelil. Wan jun li aajel ru k’anjel li teeb’aanu. Cherab’ihaq lix hasb’ li Santil Musiq’ej ut k’anjelanqex jo’ chanru naxye a’an. Naq teeb’aanu, naru texk’anjelaq chi kaw eech’ool, xb’aan naq moko texk’anjelaq ta eejunes!

Ex awa’b’ej reheb’ li tzoleb’aal, naqaj ru lee nawom, lee k’oxlahom ut lee metz’ew sa’ li ak’il ch’utam reheb’ li saaj re li teep ki’aatinak wi’ li Elder Quentin L. Cook anajwan. Aajel eeru sa’ xtzaqob’resinkil ru li k’a’ru aajel ru choq’ reheb’ lee ras eeriitz’in.

Eb’ li jalok a’in sa’ xk’uub’ankileb’ ru li tzoleb’aal ut eb’ laj jolominel naru neke’tikib’aman chi seeb’ naq eb’ li teep ut eb’ li uq’ej kawresinb’ilaqeb’, a’b’an tento naq ak k’uub’anb’ilaqeb’ ru sa’ li 1 re enero re 2020.

Ex inraarookil komon ixq, ninch’olob’ xyaalal naq eb’ li jalok xin’aatinak wi’ anajwan, a’aneb’ musiq’anb’il b’eresinel re li Qaawa’. Naq te’k’anjelamanq rik’in yalok q’e, nintz’aama naq ink’a’ taqajal li qilob’aal chiru li rajom: xkawob’resinkil li qajom chixtaaqenkil li Jesukristo ut xtenq’ankileb’ li qas qiitz’in chi chalk rik’in a’an. Ninch’olob’ xyaalal naq a’in lix Iglees. Ninb’antioxi tz’aqal naq mokoxkanab’ chi wank chi aajel qu sa’ lix loq’laj k’anjel.

Nintz’aama naq a’ ajwi’ li Musiq’ej xb’eresin reheb’ li jalok a’in texxb’eresi naq yooqex chi b’eek sa’ xb’ejil li sumwank. Ninch’olob’ xyaalal a’an, sa’ xk’ab’a’ li Jesukristo, amen.