2010–2019
Kim, Taaqehin—lix chaab’il k’uub’anb’il na’leb’ li Qaawa’
Jolomil ch’utub’aj-ib’ re octubre 2019
2:3

Kim, Taaqehin—lix chaab’il k’uub’anb’il na’leb’ li Qaawa’

Xb’aan laj Mark L. Pace

Awa’b’ej re li Dominkil Tzoleb’aal

Li Qaawa’ naxkawresiheb’ lix tenamit chiru lix pleetihom laj tza. Kim, Taaqehin a’an lix chaab’il k’uub’anb’il na’leb’ li Qaawa’

Nasaho’ sa’ qach’ool chi ch’utlaak sa’ li nimla jolomil ch’utub’aj-ib’ a’in re lix Iglees li Jesukristo reheb’ laj Santil Paab’anel sa’ Roso’jikeb’ li Kutan. A’an nimla osob’tesihom xk’ulb’al lix na’leb’ ut li rajom xch’ool li Qaawa’, rik’in lix k’utumeb’ lix profeet ut eb’ lix apostol. Li Awa’b’ej Russell M. Nelson, a’an lix yo’yookil profeet li Qaawa’. K’a’jo’ naq naqab’antioxi lix b’eresihom ut lix na’leb’ xqak’ul sa’ li kutan a’in.

Ninch’olob’ lix nawom inch’ool, rochb’eeneb’ li ak xe’yeeman. Ninch’olob’ xyaalal li Dios, li qaJunelikil Yuwa’. A’an yo’yo, nokoxra, ut nokoxk’aak’ale. Lix k’uub’anb’il na’leb’ re sahil ch’oolejil naxk’e li qosob’tesinkil sa’ li yu’am a’in, ut sa’ roso’jik tooxkanab’ chi sutq’iik chiru rilob’aal a’an.

Ninch’olob’ ajwi’ xyaalal li Jesukristo. A’an li Ralal li Dios, junaj chirib’il. A’an kooxkol chiru li kamk, ut naxtoj qix chiru li maak a’ yaal jo’ naqak’anjela qapaab’al chirix a’an ut naqajal qak’a’uxl. Sa’ xk’ab’a’ lix nimal ru mayej re xtojb’al rix qamaak, naru naqak’ul wankilal sa’ xb’een li kamk ut li junelik yu’am. ”B’antioxinb’ilaq taxaq re li Dios li maatan li maak’a’ xjuntaq’eetankil li kixk’e sa’ lix choxahil Alal” (“Li Yo’yookil Kristo, Lix Ch’olob’ahomeb’ li Apostol”).

Eb’ laj santil paab’anel sa’ chixjunil li ruchich’och’ osob’tesinb’ileb’ chixloq’oninkil li Jesukristo sa’eb’ lix santil ochoch. Jun reheb’ li santil ochoch a’an yoo chi kab’lamank sa’ Winnipeg, Canada. Laa’in, wochb’een li wixaqil xAnne Marie, xinru chirula’aninkil li na’ajej yoo chi kab’lamank wi’ sa’ agosto. Li santil ochoch a’an k’uub’anb’il reetalil chi chaab’il, ut ch’olch’o ru naq ch’ina-usaq naq taachoymanq. A’b’anan, ink’a’ naru nawan jun li xchaq’al ru santil ochoch sa’ Winnipeg, malaj b’araq chik, wi moko kaw ta lix k’ojleb’aal.

Rik’in naq nasaqb’acho’ li ch’och’ rajlal chihab’ sa’ Winnipeg, kinawman naq taach’a’ajko’q xk’eeb’al xk’ojob’ankil li santil ochoch. Chi jo’kan, kik’uub’aman naq choq’ xk’ojob’ankil li santil ochoch a’in, te’wanq 70 oqech re kawil ch’iich’, tz’aptz’ookeb’ sa’ cemento. Eb’ li oqech ch’iich’ a’in jun may metro xterameb’, ut jo’ xyijach jun metro xnimaleb’ ru. Ke’tene’ sa’ li ch’och’ toj neke’kana sa’ pek, maare wuqlaju metro rub’el xb’een li ch’och’. Chi jo’ka’in, eb’ li 70 oqech ch’iich’ neke’xk’e jun xk’ojob’ankil li santil ochoch sa’ Winnipeg li kaw rib’ ut ink’a’ taa’eek’anq.

Jo’ aj Santil Paab’anel sa’ Roso’jikeb’ li Kutan, laa’o ajwi’ naqasik’ jun kawil k’ojleb’aal choq’ re li qayu’am—jun musiq’ejil k’ojleb’aal li na’aje’ ru choq’ re li qab’eenik chiru li yu’am a’in toj sa’ li qachoxahil ochoch. Li k’ojleb’aal a’an xaqab’anb’il sa’ xb’een xpekal lix nawom qach’ool chirix li Qaawa’ Jesukristo.

Najultiko’ qe li raatin laj Helaman sa’ lix Hu laj Mormon: “Ut anajwan, ex walal, chijultiko’q, chijultiko’q eere naq a’ sa’ xb’een lix saqoonaq laj Tojol qix, a’an li Kristo, li Ralal li Dios, naq tento teek’e eek’ojob’ankil; re naq jo’q’e tixtaqla laj tza lix kawil iq’, relik chi yaal, lix tzimaj sa’ li sut iq’, relik chi yaal, naq chixjunil lix saqb’ach ut lix kawil kaq-sut-iq’ taatenoq sa’ eeb’een, maak’a’aq xwankil chekelonkil taq’a sa’ li jul re rahilal ut rahil ch’oolejil li maak’a’ roso’jik, sa’ xk’ab’a’ li saqoonaq li kab’lanb’ilex wi’, a’an jun k’ojleb’aal ch’olch’o ru, jun k’ojleb’aal b’ar wi’ wi te’kab’laq li winq sa’ xb’een ink’a’ taaruuq te’t’ane’q” (Helaman 5:12).

Naqab’antioxi naq wanko sa’ jun kutan naq eb’ li profeet ut li apostol nokohe’xtzol chirix li Kolonel Jesukristo. Wi naqataaqe lix b’eresihomeb’, xaqxooq chi kaw li qak’ojleb’aal sa’ xb’een li Kristo.

Jun chihab’ chaq, jo’ xye li Awa’b’ej Russell M. Nelson sa’ li jolomil ch’utub’aj-ib’ sa’ li octubre xnume’, “Li tz’aqal rajom li Iglees, wanjenaq chalen chaq junxil, a’an xtenq’ankil chixjunileb’ li komon chixnimob’resinkileb’ xpaab’aal chirix li Qaawa’ Jesukristo ut lix tojb’al rix li maak kixb’aanu, xtenq’ankileb’ chixb’aanunkil ut chixpaab’ankileb’ lix sumwank rik’in li Dios, ut xkawob’resinkileb’ ut xtz’apb’aleb’ sa’ junajil chi junelik lix junkab’aleb’. Sa’ li ruchich’och’ anajwan, jwal ch’a’aj a’an. Laj tza yoo chixk’ihankil lix pleetihom chirix li paab’aal, chiqix laa’o, ut chirix li qajunkab’al. Re naq ink’a’ toosachq sa’ musiq’ej, tento xpleetinkil a’an rik’in li qachaab’il k’uub’anb’il na’leb’” (“Aatin sa’ xtiklajik,” Jolomil ch’utub’aj-ib’ re octubre 2018; tiqb’il xkawil li aatin).

Chirix li raatin li Awa’b’ej Nelson, li Elder Quentin L. Cook re lix Molameb’ li Kab’laju chi Aspotol kixk’utb’esi li hu Kim, Taaqehin choq’ reheb’ li komon ut li junkab’al. Sa’ aatinak, kixyeheb’ li ch’ol aatin a’in:

Sa’ xtiklajik enero sa’ li chihab’ a’in, eb’ laj santil paab’anel sa’ chixjunil li ruchich’och’ xe’ok chixtzolb’al li Ak’ Chaq’rab’, chi k’amb’il qab’e xb’aan li hu Kim, Taaqehin. Rik’in lix tusulal re li junjunq xamaan, Kim, Taaqehin nokoxtenq’a chixtzolb’aleb’ li loq’laj hu, li tzol’leb’ chirix li evangelio, ut lix k’utumeb’ li profeet ut li apostol. A’an jun chaab’il k’anjeleb’aal choq’ qe chiqajunilo.

Chirix b’eleeb’ po li yoo wi’ chi uxmank li tzolok a’in sa’eb’ li loq’laj hu, k’a’ru naqil anajwan? Naqileb’ laj Santil Paab’anel sa’ Roso’jikeb’ li Kutan, li yalaq b’ar yookeb’ chi nimank xpaab’aaleb’ ut rajomeb’ chixtaaqenkil li Qaawa’ Jesukristo. Naqileb’ li komon ut li junkab’al li yookeb’ chixk’eeb’al xhoonaleb’ chiru li xamaan re xtzolb’al li raatin li qaKolonel. Naqil chi chaab’ilo’k li k’utuk sa’eb’ li qaDominkil Tzoleb’aal, naq naqatzoleb’ li loq’laj hu sa’ kab’l ut naqawotz sa’ iglees li na’leb’ xqataw. Naqil xnimal chik li sahil ch’oolejil ut li junajil sa’ junkab’al naq naqakanab’ yal rilb’aleb’ ru li loq’laj hu, ut noko’ok chixtzolb’aleb’ chi k’a’jo’ wi’chik xchamal.

Laa’in xinru chirula’aninkil naab’aleb’ aj Santil Paab’anel sa’ Roso’jikeb’ li Kutan, ut chirab’inkil k’a’ru xe’xk’ul rik’in roksinkil Kim, Taaqehin. Sa’ rab’inkil resil lix paab’aaleb’, nanumta xsahil inch’ool. A’in junjunq li aatin wab’ihom chixyeeb’al junjunqeb’ li komon sa’ li Iglees chiru li ruchich’och’:

  • Jun li yuwa’b’ej kixye: “Ninyal xsahil Kim, Taaqehin xb’aan naq nikinixkanab’ chixyeeb’al lix nawom inch’ool reheb’ inkok’al.”

  • Sa’ jun chik ochoch, jun li alalb’ej kixye: “A’in nikinixkanab’ chirab’inkileb’ inna’ inyuwa’ chixyeeb’al xnawomeb’ xch’ool.”

  • Jun na’b’ej kixye: “A’in xooxmusiq’a chixk’eeb’al li Dios xb’een wa sa’ qayu’am. Sa’ qach’ool naq maak’a’ qahoonal, a’ut xnujak li hoonal a’an rik’in yo’onink, sahil ch’oolejil, tuqtuukilal, ut li xik chi uub’ej, jo’ ink’a’ xqak’oxla naq taaruuq chiqu.”

  • Jun sumal ke’xye: “Jalan wi’ chan ru naq naqileb’ ru li loq’laj hu chiru li qab’aanuhom chaq junxil. K’a’jo’ wi’chik li yooko chixtzolb’al chiru li naqatzol chaq junxil. Li Qaawa’ naraj naq taqil chi jalan li k’a’aq re ru. Li Qaawa’ yoo chiqakawresinkil.”

  • Jun na’b’ej kixye: “Nawulak chiwu naq yooko chixtzolb’al li na’leb’ sa’ junajil. Junxil, yal rilb’al ru yooko. Anajwan, yooko chixtzolb’al.”

  • Jun komon ixq kixye li na’leb’ a’in: “Junxil, wan jun li tzolok, ut eb’ li loq’laj hu wan choq’ tenq’. Anajwan, wankeb’ li loq’laj hu, ut a’ li tzolok li wan choq’ tenq’.”

  • Jun chik komon ixq kixye: “Jalan naweek’a naq ninb’aanu, chiru naq ink’a’ ninb’aanu. Nink’e reetal naq moko ch’a’aj ta chik aatinak rik’ineb’ qas qiitz’in chirix li Jesukristo ut li qapaab’aal.”

  • Jun na’chinb’ej kixye: “Ninb’oqeb’ li walal ink’ajol ut eb’ li wimam sa’ domingo, ut naqawotz chiqib’il qib’ li k’a’ru xqatzol sa’ Kim, Taaqehin.”

  • Jun komon ixq kixye: “Rik’in Kim, Taaqehin, naweek’a naq li Kolonel ajwi’ yoo chi k’anjelak chiwu. A’an musiq’anb’il chaq sa’ choxa.”

  • Jun yuwa’b’ej kixye: “Naq naqoksi Kim, Taaqehin, chanchano li ralal xk’ajol laj Israel, yooko chixk’eeb’al eetalil chiru roqechal li rokeb’aal li qochoch, ut chixkolb’al rix li qajunkab’al chiru lix wankilal laj sachonel.”

Ex was wiitz’in, nasaho’ inch’ool chi wulak eerik’in ut chirab’inkil chan ru naq roksinkil Kim Taaqehin yoo chirosob’tesinkil eeyu’am. B’antiox eere lee paab’aal.

Sa’ xtzolb’aleb’ li loq’laj hu rik’in Kim, Taaqehin, yooko chixkawob’resinkil lix jalajik qach’ool chirix li Jesukristo ut lix evangelio. Ink’a’ yal yooko chixk’osb’al ru jun hoor re li iglees sa’ domingo ut chixtiqb’al jun hoor re xtzolb’aleb’ li loq’laj hu sa’ kab’l. Naqatzol li evangelio rajlal chiru li xamaan. Jo’ kixye jun li komon ixq, “Li qajayalihom maawa’ naq taak’osmanq jun hoor re li iglees, a’an naq li iglees taakanaaq waqib’ kutan chik.”

Anajwan, ab’ihomaq wi’chik lix tijom li qaprofeet, li Awa’b’ej Nelson, sa’ xtiklajik li jolomil ch’utub’aj-ib’ re octubre 2018:

“Laj tza yoo chixk’ihankil lix pleetihom chirix li paab’aal, chiqix laa’o, ut chirix li qajunkab’al. Re naq ink’a’ toosachq sa’ musiq’ej, tento xpleetinkil a’an rik’in qachaab’il k’uub’anb’il na’leb’” (“Aatin sa’ xtiklajik”).

Ut jun kutan chik chirix a’an (29 hoor), sa’ li domingo ewu, xraqe’ rik’in li aatin a’in: “a’ yaal jo’ chanru li junjunq li junkab’al naxyal x’qe chixjalb’al li ochoch jo’ jun santil na’ajej re paab’aal, … taak’osq lix wankil laj tza sa’ lee yu’am ut sa’ lee rochoch” (“Li ok choq’ jun aj santil paab’anel sa’ roso’jikeb’ li kutan jwal chaab’il,” Jolomil ch’utub’aj-ib’ re octubre 2018).

Chan ru naq laj tza yoo chixk’ihankil lix pleetihom, a’ut jo’kan ajwi’ yoo chi k’osk lix wankil laj tza? Naru nak’ulman, ut yoo chi k’ulmank sa’ chixjunil li Iglees, xb’aan naq li Qaawa’ naxkawresiheb’ lix tenamit chiru lix pleetihom laj tza. Li hu Kim, Taaqehin a’an lix chaab’il k’uub’anb’il na’leb’ li Qaawa’. Jo’ kixye li Awa’b’ej Nelson, “Li ak’ tzolok li jayalinb’il sa’ li ochoch ut tenq’anb’il xb’aan li Iglees wan xwankil chirach’ab’ankil lix wankilaleb’ li junkab’al.” A’ut aajel ru naq toowanq chi k’anjelak; aajel ru naq “taqayal qaq’e chixjalb’al li qochoch jo’ jun santil na’ajej re paab’aal” (“Li ok choq’ jun aj Santil Paab’anel sa’ Roso’jikeb’ li Kutan jwal chaab’il”).

Xb’aan naq jo’ chanru kixye li Awa’b’ej Nelson, “Teneb’anb’il sa’ xb’een li junjunq qe sa’ junesal li k’iik sa’ musiq’ej” (“Aatin sa’ xtiklajik”).

Rik’in li k’anjeleb’aal Kim, Taaqehin li Qaawa’ yoo chiqakawresinkil “choq’ re li xuwajel kutan li wanko wi’ anajwan” (“Jalok ch’oolej li cham ut nakana”). A’an yoo chiqatenq’ankil chixk’ojob’ankil “jun k’ojleb’aal ch’olch’o ru, jun k’ojleb’aal b’ar wi’ wi te’kab’laq li winq sa’ xb’een ink’a’ taaruuq te’t’ane’q” (Helaman 5:12)—a’an xk’ojleb’aal lix nawom qach’ool, li xaqxo chi kaw sa’ xb’een xpekil lix jalajik qach’ool chirix li Qaawa’ Jesukristo.

Li qak’anjel re xtzolb’aleb’ li loq’laj hu chooxkawob’resi ut chixk’ehaq qak’ulub’il re taaruuq taqak’ul li osob’tesink a’in li yeechi’inb’il. Nintz’aama a’in sa’ xk’ab’a’ li Jesukristo, amen.