O Oa Faaleagaga
A e faatinoina le faatuatua i le Alii ma Lona mana o le perisitua, o lou tomai e utuvai ai mai lenei ‘oa faaleagaga ua faaavanoa mai e le Alii o le a faateleina.
Faafetai mo lena musika matagofie. Ao tatou laulaututu uma e lagiina lena viiga ogatotonu, “Ia Viia Oe Le Atua” e lua ni mafaufauga malolosi na oo mai ia te a’u. O se tasi na faatatau i le Perofeta o Iosefa Samita, o le perofeta o lenei tisipenisione. O lou alofa ma le faamemelo ia te ia e tuputupu ae i le mavae ai o aso taitasi. O le mafaufauga lona lua na tupu ao ou tilotilo atu i lo’u toalua, o’u afafine, afafine a le fanau, ma afafine a fanau a fanau. Sa ou lagona e pei ou te manao e avea outou taitoatasi ma se vaega o lo’u aiga.
I nai masina talu ai,i le faaiuga o se sauniga o le faaeega paia o le malumalu, sa ou fai atu ai i lo’u toalua o Wendy, “Ou te faamoemoe o loo malamalama tuafafine i ‘oa faaleagaga e ā latou o i totonu o le malumalu.” Tuafafine, e tele lava ina ou mafaufau ia te outou, e aofia ai le lua masina talu ai ina ua ma asiasi atu ma Wendy i Heremoni, Penisilevania.
O le ma malaga lona lua lea iina. O taimi uma ia e lua na matua ootia ai lava i ma’ua a o ma savavali ai i luga o lena eleele paia. E lata i Heremoni lea sa faaali mai ai Ioane le Papatiso ia Iosefa Samita ma toefuatai mai ai le Perisitua Arona.
O iina na faaali mai ai foi Aposetolo o Peteru, Iakopo, ma Ioane e toefuatai mai le Perisitua Mekisateko.
O iina foi i Heremoni sa avea ai Ema Hale Samita ma uluai tusiupu a lana tane a o faaliliuina e le Perofeta le Tusi a Mamona.
O Heremoni foi na maua ai e Iosefa Samita se faaaliga sa faaali mai ai le finagalo o le Alii ia Ema. Sa faatonu e le Alii ia Ema e faamalamalama ia tusitusiga paia, ia faamalosiau i le Ekalesia, ia maua le Agaga Paia, ma ia faaalu lona taimi e “aoao tele” ai. Na fautuaina foi Ema ia “tuu ese mea o lenei lalolagi, ma saili mo mea o se lalolagi sili atu ona lelei” ma ia pipiimau i ana feagaiga ma le Atua. Na faaiuina e le Alii Ana faatonuga i upu faatauanau nei: “O loʼu leo lenei i tagata uma.”
O mea uma na tutupu i lenei eria o loo i ai ni taunuuga loloto i o tatou olaga. O le toefuataiga o le perisitua, faatasi ma le fautuaga a le Alii ia Ema, e mafai ona taialaina ma faamanuiaina ai i tatou taitoatasi. Ou te matua naunau mo outou ia malamalama o le toefuataiga o le perisitua e tutusa lava le fitoitonu ia te oe o se tamaitai e pei ona i ai i soo se alii. Ona ua toefuatai mai le Perisitua Mekisateko, ua tofu maua uma ai e tamaitai ma alii tausi-feagaiga le avanoa i “faamanuiaga uma faaleagaga o le ekalesia” pe, e mafai ona tatou faapea, i ‘oa faaleagaga uma ua i ai i le Alii mo Ana fanau.
O tamaitai uma ma alii uma e osia ni feagaiga ma le Atua ma tausia na feagaiga, ma o e auai ma le agavaa i sauniga o le perisitua, e mauaina le avanoa tuusao i le mana o le Atua. O i latou ua maua faaeega paia i le maota o le Alii ua mauaina se meaalofa o le mana o le perisitua a le Atua e tusa ma le paia o a latou feagaiga, faatasi ma se meaalofa o le poto e iloa ai le auala e utuvai ai mai lena mana.
E tutusa lava le matala o le lagi i tamaitai ua maua faaeega paia i le mana o le Atua e tafe mai ia latou feagaiga faaleperisitua e pei ona matala ai foi i alii o loo umiaina le perisitua. Ou te tatalo ina ia faamalamalamaina lena upumoni i o outou loto taitoatasi ona ou te talitonu o le a suia ai lou olaga. Tuafafine, ua ia te oe le aia e maua ai e le aunoa le mana o le Faaola e fesoasoani ai i lou aiga ma isi e te alofa i ai.
Ia, atonu o e fai ifo ia te oe lava ia, “e maeu tele lenei mea, ae faapefea ona ou faia? E faapefea ona ou mauaina le mana o le Faaola i lo’u olaga?
E te le mauaina se faamatalaga auiliili o lenei faagasologa i soo se tusi lesona. O le a avea le Agaga Paia ma ou faiaoga patino a o e saili atu ia malamalama i mea e finagalo le Alii e te iloa ma faia. O lenei faagasologa e le vave pe faigofie, ae e faatupu malosi faaleagaga. O le a se isi mea e sili atu ona faafiafiaina nai lo le galulue faatasi ma le Agaga ia malamalama i le mana o le Atua—le mana o le perisitua?
O le mea e mafai ona ou ta’u atu ia te oe, o le mauaina o le mana o le Atua i lou olaga e manaomia ai mea lava e tasi ia na faatonuina ai e le Alii ia Ema ma outou taitoatasi e fai.
O lea la, ou te valaaulia ai outou ia suesue ma le agaga tatalo i le vaega 25 o le Mataupu Faavae ma Feagaiga ma iloa po o a mea o le a aoaoina ai e le Agaga Paia oe. O au taumafaiga faaleagaga faaletagata lava ia, o le a aumaia ia te oe le olioli a o e mauaina, malamalama, ma faaaogaina le mana lea ua faaeeina atu ia te oe [i le faaeega paia].
O se vaega o lenei taumafaiga o le a manaomia ai ona e tuu ese le tele o mea o lenei lalolagi. O nisi taimi toetoe lava a tatou talanoa faasamasamanoa e uiga i le savavali ese mai le lalolagi ma ona talitonuga, faaosoosoga e tele, ma filosofia sese. Ae o le faia moni o lena mea e manaomia ai ona e suesueina soo lou olaga ma le faaeteete. A e faia lena mea, o le a uunaia oe e le Agaga Paia e uiga i mea e le o toe manaomia, mea e le o toe aoga ona alu ai lou taimi ma le malosi.
A aveese lou taulaiga mai mea faalavefau o le lalolagi, o nisi o na mea e foliga mai e taua ia te oe i le taimi nei o le a faaitiitia le taua. O le a manaomia ona e fai atu leai i nisi mea, e ui e foliga mai e le afaina. Pe a e malaga ai ma faaauau lenei faagasologa o le olaga atoa o le faapaiaina o lou olaga i le Alii, o suiga i lau vaai, lagona, ma le malosiaga faaleagaga o le a e maofa ai!
O sina upu itiiti lenei o le lapataiga. O loo i ai i latou o le a faavaivaia lou tomai e valaau atu i le mana o le Atua. E i ai nisi o le a uunaia oe ia e masalosalo ia te oe lava ma faaitiitia lou gafatia faaleagaga tulagaese o se tamaitai amiotonu.
O le mea e sili ona mautinoa, e le manao le fili ia e malamalama i le feagaiga na e osia i le papatisoga, po o le faaeega paia maoae o le poto ma le mana na e mauaina pe o le a e mauaina i totonu o le malumalu—le maota o le Alii. Ma e mautinoa lava e le manao Satani ia e malamalama o taimi uma e te auauna ai ma le agavaa ma tapuai atu i totonu o le malumalu, e te aluese mai ua faaauupegaina oe i le mana o le Atua ma maua le “tausiga” a agelu i ou luga.
O le a faufau pea e Satani ma ana ‘au ni faafitauli e taofia ai oe mai le malamalama i meaalofa faaleagaga ia ua faamanuiaina ai oe ma e mafai ona faamanuiaina ai oe. O le mea e leaga ai, o nisi o ia faafitauli atonu o le taunuuga o se amioleaga a se isi tagata. Ou te faanoanoa pe mafaufau sa i ai se isi o outou na lagonaina le le manaomiaina, pe sa le talitonuina e se taitai perisitua pe sa sauaina pe faalataina e se tane, tama, po o se tasi na e manatu i ai o se uo. Ou te matua faanoanoa pe afai sa i ai se tasi o outou na lagonaina le le amanaiaina, le faaaloaloina, pe faamasinoseseina. O sauaga faapena e leai ma se avanoa i le malo o le Atua.
I se isi itu, e faagaeetia a’u pe a ou iloaina ni taitai perisitua o e saili ma le naunautai e faaauai tamaitai i talanoaga a aufono a uarota ma siteki. E uunaia a’u e tane taitasi e faaalia mai o lona tiute sili ona taua faaleperisitua o le popole lea mo lona toalua. Ou te viia lena alii e matua faaaloalo i le tomai o lona toalua e maua ai faaaliga ma faapelepele ia te ia o se paaga tutusa i le la faaipoipoga.
Pe a malamalama se alii i le mamalu ma le mana o se tamaitai amiotonu, sailiili, o le Au Paia o Aso e Gata Ai ua maua faaeega paia, pe o se mea ea e ofo ai lona lagonaina e pei o tu o ia a o ulufale atu lona toalua i le potu?
Mai le amataga o taimi, ua faamanuiaina lava tamaitai i se taiala tulagaese o amioga mama—le tomai e iloatino ai le sa’o mai le sese. O lenei meaalofa e faaleleia ia i latou o e osia ma tausia feagaiga. Ma e faaitiitia ia i latou o e le amanaiaina ma le loto i ai ia poloaiga a le Atua.
Ou te faaopoopo atu faanatinati ou te le folafola atu ua saoloto alii i soo se auala mai mea ua manaomia e le Atua mo i latou foi e iloatino ai le va o le sa’o ma le sese. Ae o’u tuafafine pele, o lou tomai e iloatino ai le mea moni mai le mea sese, ina ia avea ma ē e puipuia le amiomama i nuu [ma malo], e matua taua tele i nei aso e gata ai. Ma e matou te faalagolago atu ia te outou e aoao isi ia faia lena mea e tasi. Se’i o’u matua faamanino atua le mea lenei: afai e le toe i ai i le lalolagi le amiomama ma le amiotonu o ona tamaitai, o le a lē toe foi lava le lalolagi i se lelei.
O i tatou o le Au Paia o Aso e Gata Ai e le o ni ō o le lalolagi; o i tatou o tagata o le feagaiga a Isaraelu. Ua valaauina i tatou e saunia se nuu mo le Afio Faalua Mai o le Alii.
Ia, se’i o’u faamanino atua nisi manatu faaopoopo e faatatau i tamaitai ma le perisitua. Ina ua vaetofia oe e auauna atu i soo se valaauga i lalo o le taitaiga a se tasi e umia ki o le perisitua—e pei o lou epikopo po o le peresitene o le siteki—ua tuu atu ia te oe le pule o le perisitua e galue ai i lena valaauga.
E faapena foi, i totonu o le malumalu paia ua faatagaina oe e faatino ma taitai i sauniga faaleperisitua i taimi uma e te auai ai. E saunia oe e lou faaeega paia o le malumalu e faia lena mea.
Afai ua maua ou faaeega paia ae e te lei faaipoipo atu i se alii i le taimi nei o lē umia le perisitua ma fai atu se tasi ia te oe, “Faamalie atu e le o i ai se perisitua i totonu o lou aiga,” faamolemole ia malamalama e le sa’o lena faamatalaga. Atonu e le o i ai sē o umia le perisitua i totonu o lou aiga, ae ua e mauaina ma osia feagaiga paia ma le Atua i totonu o Lona malumalu. Mai na feagaiga e tafe mai ai se faaeega o Lona mana o le perisitua i ou luga. Ma ia manatua, afai e maliu lau tane, o oe o le a pulefaamalumalu i totonu o lou aiga.
I le avea ai ma se tamaitai amiotonu o le Au Paia o Aso e Gata Ai ua maua faaeega paia, e te tautala atu ma aoao atu i le mana ma le pule mai le Atua. Pe o se faamalosiauga po o se talanoaga, matou te manaomia tou leo e aoao atu le mataupu faavae a Keriso. Matou te manaomia o outou manatu i totonu o aufono a aiga, uarota ma siteki. O lou auai i talanoaga e taua ma e lē faatauvaa.
O’u tuafafine pele, o le a faatupulaia lou mana pe a e auauna atu i isi. O au tatalo, anapogi, taimi mo tusitusiga paia, auauna atu i le malumalu, ma galuega o talafaasolopito o aiga o le a matala ai le lagi ia te outou.
Ou te aioi atu ia te outou ia suesue ma le agaga tatalo upumoni uma e te maua e uiga i le mana o le perisitua. Atonu e te amata i le Mataupu Faavae ma Feagaiga vaega 84 ma le 107. O na vaega o le a taitai atu ai oe i isi fuaitau. O tusitusiga paia ma aoaoga a perofeta, tagatavaai, ma talifaaaliga o aso nei ua faatumulia i nei upumoni. A o faateleina lou malamalama ma a o e faatinoina le faatuatua i le Alii ma Lona mana o le perisitua, o lou tomai e utuvai ai mai lenei ‘oa faaleagaga ua faaavanoa mai e le Alii o le a faateleina. A outou faia lena mea, o le a outou iloaina lo outou gafatia sili atu e fesoasoani e fatua’i ni aiga e faavavau ia e tuufaatasia, faamauina i le malumalu o le Alii, ma faatumulia i le alofa mo lo tatou Tama Faalelagi ma mo Iesu Keriso.
O a tatou taumafaiga uma e auauna atu i le tasi ma le isi, folafola atu le talalelei, faaatoatoa le Au Paia, ma togiolaina e ua maliliu e tau atu uma i le malumalu paia. Ua 166 nei a tatou malumalu i le lalolagi atoa, ma e tele isi o le a fausia.
E pei ona outou silafia, o le Malumalu o Sate Leki, Lotoa o le Malumalu, ma le palasa e sosoo atu e lata ane i le Maota o Ofisa o le Ekalesia o le a faafouina i se galuega tele o le a amataina i le faaiuga o lenei tausaga. O lenei malumalu paia e tatau ona faasaoina ma saunia e uunaia tupulaga o le lumanai, e pei ona ia faatosinaina i tatou i lenei tupulaga.
A o faatupulaia ai le Ekalesia, o le a fausia pea malumalu ina ia mafai ai e le tele o aiga ona maua le avanoa i lena faamanuiaga aupito silisili o faamanuiaga uma, o le ola e faavavau lea. Tatou te faaaloalo i se malumalu o le maota sili ona paia lea i le Ekalesia. Soo se taimi lava e faasilasila atu ai ni fuafuaga e fausia se malumalu fou, e avea lava ma se vaega taua o la tatou talafaasolopito. E pei ona tatou talanoaina iinei i lenei po, e taua tele outou tuafafine i le galuega o malumalu, ma o le malumalu o le nofoaga lea o le a outou maua ai a outou ‘oa faaleagaga aupito silisili.
Faamolemole ia faalogo ma le totoa ma le faaaloalo ao ou faasilasila atu nei ni fuafuaga e fausia ai ni malumalu fou se valu. Afai o se tasi [o malumalu] e faasilasila atu e i se nofoaga e taua ia te oe, ou te fautua atu ia na o le punou o lou ao ma le agaga tatalo ma le agaga faafetai i lou loto. Ua matou fiafia lava e faasilasila atu ni fuafuaga e fausia ni malumalu i nofoaga nei: Freetown, Sierra Leone; Orem, Iuta; Port Moresby, Papua Niu Kini; Bentonville, Arkansas; Bacolod, Filipaina; McAllen, Texas; Cobán, Kuatemala; ma Taylorsville, Iuta. Faafetai atu, tuafafine.pele Matou te matua talisapaia lo outou mauaina o nei fuafuaga ma la outou tali faaaloalo.
Ia, i le faaiuga, ou te fia tuua se faamanuiaga i o outou luga, ina ia outou malamalama i le mana o le perisitua lea ua faaee atu ia te outou [i le faaeega paia] ma o le a outou faaaogaina lena mana e ala i le faatinoina o lou faatuatua i le Alii ma i Lona mana.
Tuafafine pele, faatasi ai ma le faaaloalo ma le lotofaafetai tele, ou te faailoa atu ai lo’u alofa mo outou. Ma le lotomaualalo, ou te folafola atu ai o loo soifua le Atua! O Iesu o le Keriso. O Lana Ekalesia lenei. Ou te molimau atu ai i le suafa paia o Iesu Keriso, amene.