2010–2019
Aatin re xraqb’al li jolomil ch’utub’aj-ib’
Jolomil ch’utub’aj-ib’ re octubre 2019
2:3

Aatin re xraqb’al li jolomil ch’utub’aj-ib’

Xb’aan li Awa’b’ej Russell M. Nelson

Li k’ulub’ej sa’ junesal naraj jun tz’aqal xjalajik li k’a’uxlej ut li ch’oolej re wank jo’ chanru li Qaawa’.

Ex raarookil was wiitz’in, naq nokowulak sa’ xraqik li nimla jolomil ch’utub’aj-ib’ a’in, naqab’antioxi re li Qaawa’ xb’aan li musiq’anb’il aatin ut b’ich li xooxmusiq’a. Chi yaal xqayal xsahil jun musiq’ejil ninq’e.

Naqanaw naq lix evangelio li Jesukristo li k’ojob’anb’il wi’chik tixk’am xyo’onihomeb’ ut xsahileb’ xch’ool li kristiaan li te’rab’i ut te’xpaab’ lix tzol’leb’. Naqanaw ajwi’ naq li junjunq ochochnal naru taa’ok choq’ jun santil na’ajej re paab’aal, b’ar wi’ wan li tuqtuukilal, li rahok, ut lix Musiq’ li Qaawa’.

Chi yaal, li taqenaqil chaab’ilal re lix k’ojob’ankil wi’chik li evangelio, a’an li santil ochoch. Eb’ li k’ojob’anb’il k’anjel ut sumwank neke’b’aanuman chi sa’ aajeleb’ ru re xkawresinkil jun tenamit li yo’oon wankeb’ re xk’ulb’al li Kolonel sa’ li xkab’ xk’ulunik. Anajwan wankeb’ 166 chi santil ochoch, ut toj te’kab’lamanq xkomoneb’.

Wanq li hoonal re rilb’al xsa’ li junjunq li ak’ malaj ak’ob’resinb’il santil ochoch rub’elaj naq osob’tesinb’il. Naab’aleb’ li qamiiw sa’ jalan jalanq paab’aal te’tz’aqonq sa’ rilb’aleb’ xsa’ li santil ochoch a’an ut te’tzoloq chirixeb’ li osob’tesink re li santil ochoch. Ut junjunq reheb’ li ula’ a’an te’eek’asiiq re xnawb’al xkomon. Wankeb’ li te’xpatz’ chi maak’a’ xb’alaq’eb’ chan ru naru te’xk’uleb’ li osob’tesink re li santil ochoch.

Jo’ komon sa’ li Iglees, tento kawresinb’ilaqo chixsumenkileb’ lix patz’om. Naru naqach’olob’ naq yalaq ani naru nak’uluk re li osob’tesink re li santil ochoch wi naxkawresi rib’ chixk’ulb’aleb’. A’b’an, rub’elaj naq naru te’ok sa’ jun li santil ochoch li osob’tesinb’il, tento naq wanqeb’ xk’ulub’. Li Qaawa’ naraj naq chixjunileb’ li ralal xk’ajol te’tz’aqonq sa’eb’ li junelikil osob’tesink re li santil ochoch. A’an kixxaqab’ li tento tixb’aanu li junjunq kristiaan re taawanq xk’ulub’ re ok sa’ li santil ochoch.

Re xtikib’ankil xtzolb’al anihaq chirix a’in, naru xk’utb’al chiruheb’ li aatin li tz’iib’anb’il chirix xtz’akil li santil ochoch: “Santilal re li Qaawa’; li rochoch li Qaawa’.” Li raatin li Awa’b’ej Henry B. Eyring ut xkomoneb’ chik anajwan xooxmusiq’a chixnimankil li qasantilal. Li junjunq santil ochoch a’an jun na’ajej sant; li junjunq li naxik sa’ li santil ochoch naxyal xq’e chixnimob’resinkil lix santilal xjunes rib’ a’an.

Chixjunil li na’ajman ru re ok sa’ li santil ochoch wan rilom rik’in li qasantilal sa’ junesal. Re xtz’ilb’al rix ma wan xk’ulub’, li junjunq kristiaan li naraj xk’ulb’aleb’ li osob’tesink re li santil ochoch tento taa’aatinaq rik’in wiib’eb’ li kristiaan: xb’een, rik’in li obiisp, jun tenq’ aj k’ehol na’leb’ sa’ li obispil, malaj li awa’b’ej re uq’ej; xkab’, rik’in li awa’b’ej re mision malaj oqech, malaj jun reheb’ lix tenq’ aj k’ehol na’leb’. Sa’ li aatinak a’an, wankeb’ junjunq li patz’om.

Junjunq reheb’ li patz’om a’an toje’ xe’jalman b’ayaq re naq saqen wi’chik ruheb’. Nawaj raj xyeeb’aleb’ eere anajwan:

  1. Ma wan aapaab’aal ut xnawom aach’ool chirix li Dios, li Junelik Yuwa’b’ej, li Jesukristo li Ralal, ut li Santil Musiq’ej?

  2. Ma wan xnawom aach’ool chirix lix tojb’al rix li maak xb’aan li Jesukristo, ut chirix lix k’anjel a’an jo’ aj Kolol aawe ut aj Tojol aawix?

  3. Ma wan xnawom aach’ool chirix naq k’ojob’anb’il wi’chik lix evangelio li Jesukristo?

  4. Ma nakaxaqab’ xwankil li Awa’b’ej re lix Iglees li Jesukristo reheb’ laj Santil Paab’anel sa’ Roso’jikeb’ li Kutan jo’ li profeet, aj ilol na’leb’, ut aj k’utb’esinel, ut jo’ li jun chi winq sa’ ruchich’och’ li k’eeb’il xwankil re xk’anjelankil chixjunileb’ lix laawil li tijonelil?

    Ma nakaxaqabeb’ xwankil eb’ lix komonil li Xb’eenil Awa’b’ejil ut li Molam reheb’ li Kab’laju chi Apostol jo’ profeet, aj ilol na’leb’, ut aj k’utb’esineleb’?

    Ma nakaxaqab’eb’ xwankil li jun siir chik chi jolomil aj b’eresinel re li Iglees, ut eb’ laj b’eresinel sa’ li wankat wi’?

  5. Li Qaawa’ xye naq chixjunil li k’a’aq re ru tento taab’aanumanq “chi ch’ajch’o” chiru a’an (Tzol’leb’ ut Sumwank 42:41).

    Ma nakayal aaq’e re naq saqaq ru aak’oxlahom ut aab’aanuhom?

    Ma nakapaab’ li chaq’rab’ re li saq ru ch’oolej?

  6. Ma nakataaqe li k’a’ru k’utb’il sa’ lix Iglees li Jesukristo sa’ laa b’aanuhom sa’ k’utk’u ut sa’ muqmu rik’ineb’ li komon sa’ laa junkab’al ut rik’in anihaq chik?

  7. Ma nakaxaqab’ xwankil malaj nakawaklesi yalaq k’utum, b’aanuhom, malaj tzol’leb’ li moko naxk’am ta rib’ rik’in li k’utb’il sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan?

  8. Ma nakayal aaq’e chixk’uulankil chi sant li hilob’aal kutan, sa’ kab’l jo’ ajwi’ sa’ ilgees, chi wulak sa’eb’ aach’utam, chixkawresinkil aawib’ ut chixk’ulb’al chi tiik li loq’laj wa’ak, ut chi wank sa’ aayu’am jo’ chanruheb’ li chaq’rab’ ut li taqlahom re li evangelio?

  9. Ma nakayal aaq’e re naq maak’a’aq li b’alaq’ sa’ chixjunil li nakab’aanu?

  10. Ma nakatoj li lajetqil chi tzʼaqal?

  11. Ma nakataw ru ut ma nakat-ab’ink chiru li Aatin re Chaab’il Na’leb’?

  12. Ma wan junaq aateneb’ankil, re tumin malaj re k’a’aq chik re ru, choq’ re anihaq li wanjenaq choq’ aasum aatin, malaj choq’ reheb’ kok’al?

    Wi wan, ma us wankat sa’ xtz’aqob’resinkil ru li teneb’ank a’an?

  13. Ma nakapaab’eb’ li sumwank xat-ok wi’ sa’ li santil ochoch, sa’ li wan wi’ xk’amb’al chawix li loq’laj aq’ej re li santil ochoch, jo’ ch’olob’anb’il sa’ li loq’laj tiqib’aak?

  14. Ma wankeb’ li nimla maak sa’ aayu’am li tento raj xtuqub’ankil rik’ineb’ li wankeb’ xwankil sa’ li tijonelil re taaruuq taajal aak’a’uxl?

  15. Ma nakaweek’a naq k’ulub’ejat chi ok sa’ rochoch li Qaawa’ ut chi tz’aqonk sa’eb’ li k’ojob’anb’il k’anjel re li santil ochoch?

Wulaj, li ak’ patz’om a’in re li tz’ilok-ix re xk’ulb’al li ch’ina hu re ok sa’ li santil ochoch te’jek’imanq reheb’ laj jolominel re li Iglees sa’ chixjunil li ruchich’och’.

Rik’in ajwi’ naq tento xsumenkileb’ li patz’om a’in chi maak’a’ li b’alaq’il, na’ajman naq chixjunileb’ ninqi komon li naxik sa’ li santil ochoch te’xtiqib’ rib’ rik’in li loq’laj aq’ej re li tijonelil chirub’el li raq’eb’. A’an a’in reetalil naq junaq kristiaan k’eek’o xch’ool chixyalb’al xq’e wulaj wulaj chi wank jo’ chanru li Qaawa’. Naxjultika ajwi’ qe naq tento tookanaaq chi tiik rik’ineb’ li qasumwank rajlal kutan ut toob’eeq sa’ xb’ehil li sumwank wulaj wulaj chi taqenaq ut sant wi’chik chan ru naqab’aanu a’an.

Anajwan ut, chiru yal junpaat, nawaj aatinak rik’ineb’ li qasaaj. Naqapatz’ eere naq k’ulub’aqex re xk’ulb’al li ch’ina hu re ok sa’ li santil ochoch re xb’aanunil li kub’iha’ choq’ reheb’ li kamenaq. Ka’ajwi’ taapatz’manq eere li k’a’ru wan rilom rik’in lee kawresinkil choq’ reheb’ li k’ojob’anb’il k’anjel re li kub’iha’ ut li k’ojob’aak chi uuchilej. Jwal naqab’antioxi eere lee k’ulub’ ut lee rajom chi tz’aqonk sa’ li loq’laj k’anjel a’an sa’ li santil ochoch. B’antiox eere!

Li k’ulub’ej sa’ junesal re ok sa’ li rochoch li Qaawa’ naxpatz’ naab’al li kawresink-ib’ sa’ musiq’ej. A’b’an rik’in xtenq’ li Qaawa’, maak’a’aq li k’a’ru ink’a’ naru taab’aanumanq. Wan naq q’axal ch’a’aj wi’chik xk’iresinkil jun tenamit li kawresinb’il choq’ re li santil ochoch chiru xkab’lankil jun li santil ochoch. Li k’ulub’ej sa’ junesal naraj jun tz’aqal xjalajik li k’a’uxlej ut li ch’oolej re wank jo’ chanru li Qaawa’, re wank chi maak’a’ xb’alaq’, re xk’utb’al rajlal li chaab’ilal, ut re wank jo’ jun santil kristiaan.

Ninch’olob’ xyaalal naq li kawresink-ib’ a’an naxk’ameb’ li osob’tesink maak’a’jo’ rajlankileb’ sa’ li yu’am a’in ut li osob’tesink maji’ naru xtawb’al ru sa’ li yu’am chalel, jo’ lix k’iijik laa junkab’al chiru li junelik q’e kutan sa’ jun wanjik re “sahil ch’oolejil li maajo’q’e na’oso’.”

Anajwan, nawaj aatinak chirix jun chik na’leb’: li k’a’ru k’uub’anb’il choq’ re li chihab’ chal re. Sa’ xtiklajik li saq’ehil re li chihab’ 2020, a’anaq tz’aqal 200 chihab’ chaq naq laj Jose Smith kixk’ul li k’utb’esinb’il matk’ naqanaw ru jo’ li Xb’een K’utb’esink. Li Dios Yuwa’b’ej ut li Jesukristo, lix raarookil Alal, ke’xk’ut rib’ chiru laj Jose, jun saaj aj kaalaju chihab’. Li k’utb’esink a’an chaq xtiklajik lix k’ojob’ankil wi’chik lix evangelio li Jesukristo sa’ xtz’aqalil, jo’ yeeb’il resil chi rub’elaj sa’ li Santil Hu.

Chirix a’an ke’chal xkomoneb’ laj taql re choxa, jo’ laj Moroni, laj Jwan aj Kub’sihom Ha’, ut eb’ li apostol aj Pedro, aj Santiago, ut aj Jwan. Ke’wan xkomon, jo’ laj Moises, laj Eliyah, ut laj Elias. Li junjunq kixk’am chaq choxahil wankilal re rosob’tesinkil wi’chik li ralal xk’ajol li Dios sa’ ruchich’och’.

Jo’ sachb’a-ch’oolej, xqak’ul ajwi’ lix Hu laj Mormon: Jun chik ch’olob’anb’il esil chirix li Jesukristo, jun loq’laj hu li wan jo’ rochb’een li Santil Hu. Eb’ li k’utb’esinb’il na’leb’ li neke’puktesiman sa’ li Tzol’leb’ ut Sumwank ut li Q’ol Nim Xtz’aq k’a’jo’ naq neke’xchaab’ilob’resi li qanawom chirixeb’ lix taqlahom li Dios ut chirix li junelikil yaal.

Eb’ li laaw ut li opiis re li tijonelil k’ojob’anb’ileb’ wi’chik, jo’eb’ li opiis re apostol, setenta, yuwa’b’ejil aj k’anjel, taqenaqil aj tij, xb’eenil, obiisp, aj tij, aj tzolonel, ut aj tenq’anel. Ut eb’ li ixq li neke’xra li Qaawa’ neke’k’anjelak chi kaw sa’ li Komonil re Tenq’ank, li Tzoleb’aal reheb’ li Kok’al, li Saaj Ixq, li Dominkil Tzoleb’aal, ut xkomoneb’ chik li b’oqb’al sa’ li Iglees—chixjunil aajeleb’ ru sa’ lix k’ojob’ankil wi’chik lix evangelio li Jesukristo sa’ lix tz’aqalil.

Jo’kan naq li chihab’ 2020 taa’eetaliiq jo’ jun chihab’ re xninq’ehinkil li 200 chihab’ a’in. Li jolomil ch’utub’aj-ib’ re abril jalan taawanq chiru yalaq ch’utub’aj-ib’ ak numenaq. Sa’eb’ li waqib’ po chalkeb’ re, nawoyb’eni naq li junjunq komon ut junkab’al te’xkawresi rib’ choq’ re jun chaab’il ch’utub’aj-ib’ li tixninq’ehi lix k’ojleb’aal li evangelio k’ojob’anb’il wi’chik.

Maare teeraj xtikib’ankil xkawresinkil eerib’ rik’in rilb’al wi’chik ru li resil laj Jose Smith chirix li Xb’een K’utb’esink jo’ tz’iib’anb’il sa’ li Q’ol Nim Xtz’aq. Jo’kan ajwi’ tootzoloq chirix lix Hu laj Mormon sa’ Kim, Taaqehin sa’ li chihab’ chal re. Maare teeraj xtz’ilb’aleb’ rix li patz’om jo’, “Chan raj ru inyu’am wi ta isinb’il chaq lin nawom xintaw sa’ lix Hu laj Mormon?” malaj “Chan ru naq jalan inyu’am ut xyu’ameb’ lin raarookil komon xb’aan li k’a’ru kichal rik’in li Xb’een K’utb’esink?” Jo’kan ajwi’, rik’ineb’ li ak’ video chirix lix Hu laj Mormon, maare teeraj rilb’aleb’ naq nekextzolok sa’ junesal ut jo’ junkab’al.

Sik’omaqeb’ lee patz’om. K’uub’omaq eena’leb’. Sub’umaq eerib’ sa’ lix chaq’al ruhil saqen re lix k’ojob’ankil wi’chik li evangelio. Naq nekeb’aanu, ink’a’ ka’ajwi’ chaab’ilaq li jolomil ch’utub’aj-ib’ re li abril chal re, maajo’q’e raj taasachq sa’ eech’ool.

Anajwan, re xchoyb’al li waatin, ninkanab’ eerik’in lin rahom ut li wosob’tesihom, naq li junjunq eere sahaq eech’ool ut santaqex chik rajlal kutan. Chenawaq naq wan li k’utb’esinb’il na’leb’ k’eeb’il re li Iglees anajwan ut toj taawanq xkomon rub’el lix b’eresihom li Qaawa’ “toj reetal naq li rajom li Dios taatz’aqob’resiiq ru, ut li Nimla Jehova tixye naq choyb’il li k’anjel.”

Chi jo’kan nekexwosob’tesi, ut ninka’jultika inrahom choq’ eere, rik’in xnawom inch’ool naq yo’yo li Dios! Li Jesus a’an li Kristo! A’an a’in lix Iglees, ut laa’o lix tenamit. Sa’ lix loq’laj k’ab’a’ li Jesukristo, amen.