Usa ka Talagsaong Balaanon nga Tawag

Ni Joy D. Jones

Kinatibuk-ang Presidente sa Primary

Isip kababayen-an nga adunay hugot nga pagtuo, makakuha kita og mga baruganan sa kamatuoran gikan sa mga kasinatian ni Propeta Joseph nga makahatag og mga panabut alang sa pagdawat sa atong kaugalingong pagpadayag.

Ako mapasalamaton nga motutok sa akong pakigpulong karon sa nagpadayon nga mga tahas sa kababayen-an diha sa Pagpahiuli. Kini tataw nga sa kinatibuk-an sa kasaysayan ang kababayen-an naghupot og talagsaon nga dapit sa plano sa atong Langitnong Amahan. Si Presidente Russell M.Nelson mitudlo, “Imposibleng masukod ang impluwensya sa … mga babaye, dili lamang sa mga pamilya apan diha usab sa Simbahan sa Ginoo, isip mga asawa, mga inahan, ug mga apohan; isip mga igsoon ug iyaan; isip mga magtutudlo ug lider; ug ilabi na isip mga ehemplo ug mapahinungurong mga tigpanalipod sa tinuohan.” ¹

Sa nag-una nga Relief Society sa Nauvoo, 178 ka katuigan na ang milabay, si Propeta Joseph Smith mitambag sa mga sister sa “pagpakabuhi subay sa [ilang] pribilehiyo.” ² Ang ilang ehemplo nagtudlo kanato karon. Sila nagkahiusa sa pagsunod sa tingog sa usa ka propeta ug nagpuyo uban sa lig-on nga pagtuo diha ni Jesukristo samtang sila mitabang sa pag-andam sa pundasyon nga atong gibarugan karon. Mga sister, ato na karon nga higayon. Kita adunay balaan nga buluhaton gikan sa Ginoo, ug ang atong matinud-anon, talagsaon nga mga kontribusyon mahinungdanon.

Si Presidente Spencer W. Kimball mipasabut: “Ang mahimong matarung nga babaye sa panahon sa katapusang dispensasyon niini nga yuta, sa dili pa ang ikaduhang pag-anhi sa atong Manluluwas, usa ka talagsaong balaanon nga tawag. Ang kalig-on ug impluwensya sa matarung nga babaye karon mahimong kapulo pil-on sa unsa kini sa mas malinawon nga mga panahon.” ³

Si Presidente Nelson usab nangamuyo: “Naghangyo ko sa akong mga sister [sa] Simbahan … sa pag-abante! Angkuna ang inyong tukma ug importanting dapit diha sa inyong panimalay, diha sa inyong komunidad, ug diha sa gingharian sa Dios—labaw pa kay sa inyong nabuhat sukad.” ⁴

Bag-ohay lang, ako adunay pribilehiyo, kauban sa usa ka grupo sa mga batang Primary, nga mahimamat si Presidente Russell M. Nelson sa hulad [replica] nga panimalay sa pamilyang Smith sa Palmyra, New York. Paminaw samtang ang atong pinalanggang propeta nagtudlo sa kabataan kon unsa ang ilang mahimo aron moabante.

1:55

Sister Jones: “Ako nakuryuso lang nga mahibalo kon anaa ba kaha kamoy pangutana nga gusto ninyong ipangutana ni Presidente Nelson. Kamo naglingkod karon uban sa propeta. Aduna ba moy gusto kaayo nga ipangutana sa propeta? Sige, Pearl.”

Pearl: “Lisud ba mahimong propeta? Ikaw ba, busy kaayo?”

Presidente Nelson: “Oo lisud gyud. Tanang butang nga kinahanglan buhaton para mas mahisama sa Manluluwas lisud. Sama pananglit, sa dihang ang Dios gusto mohatag sa Napulo ka mga Sugo ngadto kang Moises, asa Niya gipaadto si Moises? Didto sa ibabaw sa usa ka bukid, sa ibabaw sa Bukid sa Sinai. Mao nga si Moises kinahanglan molakaw paingon sa ibabaw niana nga bukid aron makuha ang Napulo ka mga Sugo. Karon, ang Langitnong Amahan pwede unta moingon, ‘Moises, pagsugod diha, ug magsugod ko diri, ug sugaton tika sa tunga-tunga.’ Pero dili, ang Ginoo ganahan og paningkamot, tungod kay ang paningkamot maghatag og mga ganti nga dili moabut kon wala kini. Sama pananglit, nagtuon ba mo og piano?”

Kabataan: “Oo.”

Pearl: “Ako kay nag-violin.”

President Nelson: “Ug nagpraktis ba kamo?”

Kabataan: “Oo.”

President Nelson: “Unsa ang mahitabo kon dili mo magpraktis?”

Pearl: “Makalimot ka.”

Presidente Nelson: “Oo, dili ka mouswag, dili ba? Mao nga ang tubag kay oo, Pearl. Nagkinahanglan og paningkamot, daghan nga kakugi, daghan nga pagtuon, ug wala gayud kini katapusan. Maayo kana! Maayo kana, tungod kay kita kanunay nga miuswag. Bisan sa sunod nga kinabuhi mohimo gihapon kita og kauswagan.”

Ang tubag ni Presidente Nelson ngadto niining bililhon nga kabataan mahatag usab sa matag usa kanato. Ang Ginoo ganahan og paningkamot, ug ang paningkamot magdala og mga ganti. Kita magpadayon sa pagbansay. Kita kanunay nga mouswag samtang kita maningkamot sa pagsunod sa Ginoo. ⁵ Siya wala maglaum og pagkahingpit karon. Kita padayon nga motungas sa atong personal nga Bukid sa Sinai. Sama sa nangaging mga panahon, ang atong panaw sa pagkatinuod magkinahanglan gayud og paningkamot, kakugi, ug pagtuon, apan ang atong pasalig sa pag-uswag magdala og mahangturong mga ganti. ⁶

Unsa pa ang atong makat-unan gikan kang Propeta Joseph Smith ug sa Unang Panan-awon kabahin sa paningkamot, kakugi, ug pagtuon? Ang Unang Panan-awon naghatag kanato og direksyon sa atong talagsaon, nagpadayon nga mga tahas. Isip kababayen-an nga adunay hugot nga pagtuo, makakuha kita og mga baruganan sa kamatuoran gikan sa mga kasinatian ni Propeta Joseph nga makahatag og mga panabut alang sa pagdawat sa atong kaugalingong pagpadayag. Sama pananglit:

Kita mitrabaho taliwala sa mga kalisud.
Kita midangup sa mga kasulatan aron makadawat og kaalam sa paglihok.
Atong gipakita ang atong hugot nga pagtuo ug pagsalig sa Dios.
Atong gigamit ang atong gahum sa pagpangamuyo sa Dios aron tabangan kita nga mapugngan ang impluwensya sa kaaway.
Atong gihalad ang mga gipangandoy sa atong mga kasingkasing ngadto sa Dios.
Kita motutok sa Iyang kahayag nga naggiya sa atong mga pagpili sa kinabuhi ug nagpundo diha kanato kon kita modangup ngadto Kaniya.
Kita nakaamgo nga Siya nakaila sa ngalan sa matag usa kanato ug adunay tinagsa-tagsa ka mga tahas nga ipatuman kanato. ⁷

Agig dugang, si Joseph Smith mipahiuli sa kahibalo nga kita adunay balaanong potensyal ug mahangturong bili. Tungod niana nga relasyon uban sa atong Langitnong Amahan, ako nagtuo nga Siya naglaum nga kita modawat og pagpadayag gikan Kaniya.

Ang Ginoo mitudlo ni Emma Smith sa “[pag]dawat sa Espiritu Santo,” magkat-on pag-ayo, “mosalikway sa mga butang niini nga kalibutan, … [pagpangita sa] mga butang nga maayo,” ug “[mo]hupot ngadto sa [iyang] pakigsaad” sa Dios. ⁸ Ang pagkat-on mahinungdanon sa pag-uswag, ilabi na nga ang makanunayong pakig-uban sa Espiritu Santo nagtudlo kanato unsa ang kinahanglanon natong isalikway—buot ipasabut kanang makabalda kanato o makalangay sa atong pag-uswag.

Si Presidente Nelson miingon, “Mohangyo ko kaninyo sa pagpalambo sa inyong espirituhanong kapasidad sa pagdawat og pagpadayag.” ⁹ Ang mga pulong sa atong propeta padayon nga nag-uban kanako samtang ako namalandong sa abilidad sa kababayen-an sa pag-abante. Siya mihangyo kanato, nga nagpakita og prayoridad. Siya nagtudlo kanato unsaon nga mabuhi sa espirituhanong paagi diha sa kalibutan nga puno sa kasal-anan pinaagi sa pagdawat ug pagsunod sa pagpadayag. ¹⁰ Samtang ato kining gihimo, nagtahud ug nagsunod sa mga sugo sa Ginoo, kita gisaaran, sama ni Emma Smith, og “korona sa pagkamatarung.” ¹¹ Ang Propeta Joseph nagtudlo sa kamahinungdanon sa pagkahibalo nga ang dalan nga atong gisunod niini nga kinabuhi giaprubahan sa Dios. Kon wala kana nga kahibalo, kita “maluya sa [atong] hunahuna, ug malup-og.” ¹²

Niini nga komperensya, kita makadungog og mga kamatuoran nga modasig kanato sa pag-usab, paglambo, ug pagpaputli sa atong kinabuhi. Pinaagi sa personal nga pagpadayag, kita makalikay sa unsay gitawag sa uban og “nasobrahan sa kinatibuk-ang komperensya nga pagbati”—nga kita mobiya nga determinadong himoon kining tanan karon. Ang kababayen-an adunay daghang nagkalain-laing mga responsibilidad, apan imposible kini, ug dili kinahanglan, nga buhaton kining tanan og dungan diha-diha dayon. Ang Espiritu motabang kanato nga makaila asa nga buhat ang tutukan karon. ¹³

Ang mahigugmaong impluwensya sa Ginoo pinaagi sa Espiritu Santo motabang nato nga mahibalo sa Iyang prayoridad alang sa atong pag-uswag. Ang pagsunod sa personal nga pagpadayag mogiya ngadto sa personal nga pag-uswag. ¹⁴ Kita maminaw ug mobuhat. ¹⁵ Ang Ginoo miingon, “Pangayo sa Amahan pinaagi sa akong ngalan, sa hugot nga pagtuo nga ikaw makadawat, ug ikaw makabaton sa Espiritu Santo, nga nagpadayag sa tanan nga mga butang nga angay.” ¹⁶ Ang atong nagpadayon nga tahas mao ang pagdawat og nagpadayon nga pagpadayag.

Samtang kita makakab-ot og mas taas nga kahanas sa pagbuhat niini, kita makadawat og dugang nga gahum sa atong tinagsa-tagsa nga mga tahas sa pagpangalagad ug pagtuman sa buhat sa kaluwasan ug kahimayaan—aron tinud-anay nga “mosalikway sa mga butang niini nga kalibutan, ug [mangita sa] mga butang nga maayo.” ¹⁷ Kita dayon mas epektibo nga makaawhag sa atong umaabut nga henerasyon sa paghimo sa ingon.

Mga kaigsoonan, kitang tanan nangita sa gahum sa Dios diha sa atong kinabuhi. ¹⁸ Adunay maanindot nga panaghiusa tali sa kababayen-an ug kalalakin-an sa pagtuman sa buhat sa Dios karon. Kita makaangkon sa gahum sa pagkapari pinaagi sa mga pakigsaad, nga unang gihimo sa dihang kita gibunyagan ug dayon diha sa sulod sa balaang mga templo. ¹⁹ Si Presidente Nelson mitudlo kanato, “Ang matag babaye ug matag lalaki kinsa mohimo og mga pakigsaad uban sa Dios ug motuman niadto nga mga pakigsaad, ug kinsa takus nga moapil sa mga ordinansa sa pagkapari, direktang makaangkon sa gahum sa Dios.” ²⁰

Ang akong personal nga pag-angkon karon mao nga isip usa ka babaye ako wala makaamgo, sa sayo pa sa akong kinabuhi, nga ako adunay kahigayunan nga makaangkon, pinaagi sa akong mga pakigsaad, sa gahum sa pagkapari. ²¹ Mga sister, ako nag-ampo nga kita moila ug moamping sa gahum sa pagkapari samtang kita “[mo]hupot ngadto sa [atong] pakigsaad,” ²² mohangup sa mga kamatuoran sa mga kasulatan, ug mosunod sa mga pulong sa atong buhi nga mga propeta.

Maisugon nato nga ideklarar ang atong debosyon ngadto sa atong Langitnong Amahan ug sa atong Manluluwas, “uban sa dili matarug nga hugot nga pagtuo diha kaniya, mosalig sa hingpit diha sa mga maayo nga buhat kaniya kinsa gamhanan sa pagluwas.” ²³ Kita magmalipayon sa pagpadayon niini nga panaw padulong sa atong labing taas nga espirituhanong potensyal ug motabang niadtong anaa sa atong palibut sa pagbuhat sa ingon pinaagi sa paghigugma, pagserbisyo, pagpangulo, ug pagkamanggiloloy-on.

Si Elder James E. Talmage maaghupon nga mipahinumdom kanato, “Ang pinakabantugan nga manlalaban sa kalibutan alang sa mga babaye ug pagkababaye mao si Jesukristo.” ²⁴ Sa katapusang pag-analisar sa nagpadayon nga mga tahas sa kababayen-an diha sa Pagpahiuli, ug para kanatong tanan, unsa nga tahas ang labing molabaw? Ako mopamatuod nga kini mao ang pagpaminaw Kaniya, ²⁵ ang pagsunod Kaniya, ²⁶ ang pagsalig Kaniya, ²⁷ ug ang mahimong sumpay sa Iyang gugma. ²⁸ Ako nasayud nga Siya buhi. ²⁹ Sa sagradong ngalan ni Jesukristo, amen.