Usa ka Maayong Patukuranan alang sa Umaabut
Sa umaabut nga katuigan, unta atong tugutan kining mga pagpalambo nga gihimo sa Templo sa Salt Lake sa pagpalihok ug padasig nato.
Kasaysayan sa Templo sa Salt Lake
Mobiyahe kita balik ngadto sa usa ka init nga kahapunon niadtong Hulyo 24, 1847, mga alas 2:00 sa hapon. Human sa lisud kaayo nga 111 ka adlaw nga panaw uban sa 148 ka miyembro sa Simbahan kinsa milangkub sa unang grupo nga mipadulong sa kasadpan, si Brigham Young, niadtong panahona Presidente sa Korum sa Napulog Duha ka mga Apostoles, masakiton ug luya gikan sa hilanat, misulod sa Walog sa Salt Lake.
Duha ka adlaw ang milabay, samtang nagpaayo gikan sa iyang sakit, si Brigham Young nangulo sa pipila ka sakop sa Korum sa Napulog Duha ka mga Apostoles ug uban pa sa usa ka pag-usisa nga ekspedisyon. Si William Clayton mirekord, “Mga 1.2 ka kilometro gikan sa amihanan sa kampo, kami miabut sa maanindot nga patag sa yuta, lebel ug inanay nga nagbakilid ngadto sa kasadpan.”1
Samtang gisuhid ang dapit uban sa grupo, si Brigham Young kalit nga mihunong ug gitugsok iyang sungkod sa yuta, nagsinggit, “Dinhi mobarug ang Templo sa atong Dios.” Usa sa iyang kauban mao si Elder Wilford Woodruff, kinsa miingon nga kining pamahayag “misulod [niya] sama sa kilat,” ug siya miugsok og sanga ngadto sa yuta sa pagtimaan sa dapit nga gimarkahan sa sungkod ni Presidente Young. Dise sais ka ektarya ang gipili alang sa templo, ug nahukman nga ang siyudad kinahanglan nga ipahimutang “nga ang mga dalan ideretso padulong sa Amihanan & Habagatan, silangan & kasadpan gikan niini” nga ang templo anaa sa sentro.2
Sa kinatibuk-ang komperensya sa Abril 1851, ang mga miyembro sa Simbahan nagkahiusang miboto sa pagpaluyo og sugyot sa pagtukod og templo “sa ngalan sa Ginoo.”3 Duha ka tuig ang milabay, niadtong Pebrero 14, 1853, ang luna gipahinungod ni Heber C. Kimball sa usa ka publikong seremonya nga gitambongan sa liboan ka mga Santos, ug gisugdan pagkalot ang yuta alang sa konstruksyon sa patukuranan sa Templo sa Salt Lake. Pipila ka bulan ang milabay, niadtong Abril 6, ang dagkong bato sa pamag-ang sa templo gipahimutang ug gipahinungod uban sa nindot nga mga seremonya nga naglakip sa nakauniporme nga grupo sa mga tawo nga nagdala og bandera ug mga banda ug prosesyon nga gipangulohan sa mga lider sa Simbahan gikan sa karaang tabernakulo padulong sa luna sa templo, diin gihalad ang mga pakigpulong ug pag-ampo sa matag usa sa upat ka bato.4
Sa seremonya sa groundbreaking, si Presidente Young mihinumdum nga siya nakakita og panan-awon sa dihang siya unang miadto sa yuta samtang gisusi nila ang tiilan sa walog, nagsulti, “Ako nasayud [kaniadto], sama nga ako nahibalo gyud karon, nga kini ang yuta diin tukuron ang usa ka templo—klaro kaayo ni sa akong panan-awon.”5
Napulo ka tuig ang milabay, si Brigham Young mitanyag sa mosunod nga mapanagnaong panglantaw sa kinatibuk-ang komperensya sa Oktubre 1863: “Ako gusto nga makakita nga [ang] templo matukod sa paagi nga kini molungtad hangtud sa milenyum. Kini dili lang ang templo nga atong tukuron, dunay gatosan niini nga tukuron ug ipahinungod ngadto sa Ginoo. Kini nga templo mailhan isip unang templo nga natukod sa kabukiran pinaagi sa mga Santos sa Ulahing mga Adlaw. … Gusto ko kana nga templo … mobarug isip mapasigarbuhong monumento sa pagtuo, pagkamalahutayon ug kakugi sa mga santos sa Dios sa kabukiran.”6
Sa pagribyu niining mubong kasaysayan, ako natingala sa pagkamanalagna ni Brigham Young—una, sa iyang pagsiguro nga, kutob sa mahimo ug, gamit ang mga pamaagi sa pagtukod nga anaa niadto nga panahon ug dapit, ang Templo sa Salt Lake pagatukuron sa paagi nga molungtad sa tibuok Milenyum ug, ikaduha, sa iyang pagpanagna sa pagtubo sa umaabut nga mga templo sa tibuok kalibutan, gani sa gidaghanon nga gatusan.
Ang Pagbag-o sa Templo sa Salt Lake
Sama ni Brigham Young, ang atong propeta karon nagpabakana sa Templo sa Salt Lake ug sa tanang ubang templo sa tumang pag-amping. Latas sa mga katuigan, ang Unang Kapangulohan, matag karon ug unya, nagtambag sa Presiding Bishopric sa pagsiguro nga lig-on ang patukuranan sa Templo sa Salt Lake. Sa dihang ako nagserbisyo sa Presiding Bishopric, sa hangyo sa Unang Kapangulohan, kami mihimo og kinatibuk-ang pagribyu sa pasilidad sa Templo sa Salt Lake, lakip ang pagtuki sa labing bag-ong kalamboan sa seismic nga desinyo ug mga paagi sa pagtukod.
Ania ang mga porsyon sa ribyu nga gihatag ngadto sa Unang Kapangulohan niadtong panahona: “Sa desinyo ug pagtukod sa Templo sa Salt Lake, ang labing maayong engineering, hanas nga trabaho, konstruksyon nga materyales, kagamitan, ug ubang mga kapanguhaan nga anaa niadtong panahona mao ang gigamit. Sukad sa pagpahinungod niini niadtong 1893, ang templo nagbarug nga lig-on ug nagsilbing simbolo sa pagtuo [ug] paglaum ug usa ka kahayag ngadto sa katawhan. Tumang pag-amping ang gihimo sa pagpadagan, paglimpyo, ug pag-atiman sa templo aron magpabiling anaa sa maayong kondisyon. Ang gawas nga granite ug mga suliras sa salog sa sulod ug suporta nga mga sagbayan anaa sa maayong kondisyon. Bag-ong mga pagtuon nagmatuod nga ang dapit nga gipili ni Brigham Young alang sa templo dunay maayo kaayo nga yuta ug maayong mga kalidad sa pagkabantok.”7
Ang ribyu mihukom nga gikinahanglan ang normal nga mga pag-ayo ug pagpalambo aron sa pagbag-o ug pag-update sa templo, lakip ang deck sa gawas ug mga hawanan, dili na magamit nga mga utility system, ug mga dapit sa pagbunyag. Hinoon, konsiderasyon sa usa ka lahi, mas malukpanong seismic nga pagpalambo gikan sa patukuranan sa templo pataas girekomendar usab.
Ang Patukuranan sa Templo
Sama sa inyong mahinumdoman, si Presidente Brigham Young mismo miapil gyud sa daghang ditalye sa pagtukod sa orihinal nga patukuranan sa templo, nga maayong misilbi sa templo sukad sa pagkahuman niini 127 ka tuig na ang milabay. Ang bag-ong gisugyot nga package sa seismic nga pagpalambo sa templo mogamit og base isolation nga teknolohiya, diin wala pa gani mahunahunai sa panahon sa pagtukod niini. Kini giisip nga labing bag-o, labing state-of-the-art nga engineering alang sa proteksyon sa linog.
Kini nga teknolohiya, nga bag-o lang namugna, magsugod sa patukuranan gayud sa templo, maghatag og lig-on nga panalipod batok sa kadaut gikan sa linog. Buot ipasabut, kini naglig-on sa estraktura sa templo aron mobarug nga lig-on, bisan og ang yuta ug ang palibut niini mosinati og pagtay-og sa yuta nga seismic nga panghitabo.
Ang pagbag-o sa templo nga mogamit niining teknolohiya gipahibalo sa Unang Kapangulohan miaging tuig. Ubos sa direksyon sa Presiding Bishopric, ang konstruksyon nagsugod na pipila ka bulan ang milabay, sa Enero 2020. Kini gibanabana nga makompleto sulod sa mga upat ka tuig.
Pagsiguro sa Imong Personal nga Patukuranan
Samtang ako namalandong sa sunod upat ka tuig sa kinabuhi niining matahom, halangdon, mahimayaon ug kahibulongan nga Templo sa Salt Lake, akong mas gilantaw kini isip panahon sa pagbag-o kay sa panahon sa pagsarado! Sa samang paagi, kita tingali makapangutana sa atong kaugalingon, “Sa unsang paagi kining malukpanong pagbag-o sa Templo sa Salt Lake makapadasig nato nga moagi sa atong kaugalingong espiritwal nga pagbag-o?”
Usa ka mahinuklugong pagsusi sa atong kaugalingon mahimong mopakita nga kita usab ug atong mga pamilya makabenepisyo sa atong paghimo sa gikinahanglan nga buhat sa pagmintinar ug pagbag-o, gani usa ka seismic nga pagpalambo! Mahimong sugdan nato kana nga proseso pinaagi sa pagpangutana:
“Unsay hitsura sa akong patukuranan?”
“Unsay gilangkuban sa baga og bungbong, lig-ong mga bato sa pamag-ang nga parte sa akong personal nga patukuranan, diin anaa nahimutang ang akong pagpamatuod?”
“Unsay sukaranang mga elemento sa akong espiritwal ug emosyonal nga kinaiya nga makapahimo nako ug sa akong pamilya nga magpabiling makanunayon ug dili matarug, gani sa pagbuntog sa pagtay-og sa yuta ug sa kaguliyang sa seismic nga mga panghitabo nga siguradong mahitabo sa atong kinabuhi?”
Kining mga panghitabo, nga sama sa linog kasagaran lisud matag-an ug moabut sa nagkalainlaing mga ang-ang sa kakusog—pakigbisog sa mga pangutana o pagduhaduha, pag-atubang sa kasakit o kalisdanan, pagsagubang sa personal nga mga kahiubos sa mga lider sa Simbahan, mga miyembro, doktrina, o polisiya. Ang labing maayong depensa batok niini anaa sa atong espiritwal nga patukuranan.
Unsa kaha ang espiritwal nga mga bato sa pamag-ang sa atong pamilya ug sa personal nga kinabuhi? Kini mahimong ang simple, yano, ug bililhong mga baruganan sa pagsunod sa ebanghelyo—pag-ampo sa pamilya, pagtuon sa kasulatan, lakip ang Basahon ni Mormon; pagtambong sa templo ug pagkat-on sa ebanghelyo pinaagi sa Dali, Sunod Kanako ug home evening. Ubang makatabang nga mga kapanguhaan sa paglig-on sa inyong espiritwal nga patukuranan mahimong maglakip sa mga Artikulo sa Hugot nga Pagtuo, sa pamahayag sa pamilya, ug “Ang Buhi nga Kristo.”
Alang kanako, ang mga baruganan nga nalakip sa mga pangutana nga gihisgutan isip kabahin sa pagdawat og usa ka rekomend sa templo nagserbisyo isip lig-on nga basehan alang sa usa ka espiritwal nga patukuranan—ilabi na ang unang upat ka pangutana. Ako nagkonsiderar niini nga espiritwal nga mga bato sa pamag-ang.
Kita, syempre, pamilyar niini nga mga pangutana, kay si Presidente Russell M Nelson mibasa niini kanato tagsa-tagsa sa miaging kinatibuk-ang komperensya.
-
Ikaw ba adunay pagtuo ug pagpamatuod sa Dios, ang Amahan sa Kahangturan; sa Iyang Anak, si Jesukristo; ug sa Espiritu Santo?
-
Ikaw ba adunay pagpamatuod sa Pag-ula ni Jesukristo ug sa Iyang tahas isip imong Manluluwas ug Manunubos?
-
Ikaw ba adunay pagpamatuod sa Pagpahiuli sa ebanghelyo ni Jesukristo?
-
Ikaw ba nagpaluyo sa Presidente sa Ang Simbahan ni Jesukristo sa mga Santos sa Ulahing mga Adlaw isip propeta, manalagna, ug tigpadayag ug isip mao ang bugtong tawo sa yuta nga gitugutan sa pagdumala sa tanang mga yawe sa pagkapari?8
Inyo bang nakita kon sa unsang paagi inyong makonsiderar kini nga mga pangutana isip bililhon nga mga elemento sa inyong personal nga patukuranan sa pagtabang ninyo sa pagtukod ug pagpalig-on niini? Si Pablo mitudlo sa mga Taga-Efeso sa usa ka simbahan nga ““tinukod ibabaw sa patukuranan nga mao ang mga apostoles ug mga propeta, nga niini si Jesukristo mao ang ulohang bato sa pamag-ang”; diha kaniya ang tibuok nga tinukod nausa ug nagatubo ngadto sa pagka-templo nga balaan diha sa Ginoo.”9
Usa sa dakong kalipay sa akong kinabuhi mao ang mahimamat ug madasig sa mga miyembro sa Simbahan sa tibuok kalibutan kinsa maoy buhi nga mga ehemplo sa pagtuo kang Jesukristo ug sa Iyang ebanghelyo. Sila dunay lig-ong personal nga mga patukuranan nga nagtugot nila sa pagbuntog sa mga kalisud sa kinabuhi uban sa lig-on nga panabut, bisan pa sa ilang mga kasakit.
Sa pagpakita niini sa mas personal nga lebel, ako bag-o lang namulong sa haya sa usa ka matahum, madasigong batan-ong asawa ug inahan (usa usab ka pamilya nga higala namo). Siya determinado nga Division 1 nga magdudula sa soccer sa dihang nahimamat ug naminyoan ang iyang bana nga dental nga estudyante. Sila napanalanginan og matahum, hingkod og kaalam nga anak nga babaye. Siya maisugong nakigbisog sa lain-laing matang sa kanser sulod sa unom ka mahagitong mga tuig. Bisan pa sa kanunayng emosyonal ug pisikal nga kasakit nga iyang nasinati, siya misalig sa iyang mahigugmaong Langitnong Amahan ug kanunayng gikutlo sa iyang mga sumusunod sa social media sa iyang inilang panultihon: “Ang Dios anaa sa mga detalye.”
Sa usa sa iyang mga post sa social media, siya misulat nga usa ka tawo nangutana niya, “Giunsa nimo nga ikaw adunay pagtuo gihapon bisan pa sa tanang kasakit nga naglibut nimo?” Siya hugot nga mitubag niining mga pulong: “Tungod ang pagtuo maoy makatabang nako niining mangitngit nga mga panahon. Ang pagbaton og pagtuo wala magpasabut nga walay dautan nga mahitabo. Ang pagbaton og pagtuo nagtugot nako nga motuo nga may kahayag na usab nga moabut. Ug kana nga kahayag mas mohayag kay ako milakaw sa kangitngit. Ingon sa daghang kangitngit nga akong nasaksihan sa katuigan, ako nakasaksi og mas labaw nga kahayag. Ako nakakita og mga milagro. Ako nakabati og mga anghel. Ako nasayud nga ang akong Langitnong Amahan nag-agak nako. Wala niana ang masinati kon ang kinabuhi sayon pa. Ang kaugmaon niining kinabuhia mahimong wala mahibaloi, apan ang akong pagtuo dili. Kon ako mopili nga dili magbaton og pagtuo nan ako mipili nga maglakaw lang sa kangitngit. Kay kon walay pagtuo, kangitngit lang ang mahibilin.”10
Ang iyang dili matarug nga pagpamatuod sa pagtuo diha ni Ginoong Jesukristo—sa iyang mga pulong ug buhat—usa ka inspirasyon sa uban. Bisan tuod ang iyang lawas mahuyang, siya mibayaw sa uban aron mahimong mas lig-on.
Ako naghunahuna sa daghang ubang miyembro sa Simbahan, mga manggugubat sama niini nga sister, kinsa naglakaw sa pagtuo matag adlaw, naningkamot nga mahimong matinud-anon ug walay kahadlok nga mga disipulo sa atong Manluluwas, Si Jesukristo. Sila nagkat-on bahin kang Kristo. Sila nagsangyaw kang Kristo. Sila naningkamot sa pagsunod Niya. Bisan kon ang mga adlaw sa ilang kinabuhi nag-atubang man og malig-on o huyang nga yuta, ang ilang espiritwal nga patukuranan lig-on ug dili matarug.
Kini mao sila ang mapahinungurong mga kalag kinsa nakasabut sa lawom nga kahulugan sa mga pulong sa himno “Unsa kaligon atong tukuranan” ug “Sa Manluluwas nga atong dangpanan.”11 Ako mapasalamaton labaw pa sa akong masulti nga nakauban kadtong kinsa nag-andam og usa ka espiritwal nga patukuranan nga takus sa ngalan sa mga Santos ug kinsa lig-on ug luwas sa paglahutay sa daghang mga kalisud sa kinabuhi.
Ako wala nagtuo nga kita makasulti pa og labaw sa kaimportante niana nga lig-ong patukuranan sa atong personal nga kinabuhi. Bisan sa sayong edad, ang atong mga bata sa Primary gitudloan samtang sila nagkanta niini gyud nga kamatuoran:
Ang tawong maalam nagtukod og balay,
Ug ang ulan mibuhagay. …
Mibundak ang ulan ug mibaha,
Ang balay’s bato wa maguba.12
Ang kasulatan nagpalig-on niining patukuranang doktrina. Ang Manluluwas mitudlo sa katawhan sa Amerika:
“Ug kon kamo sa kanunay magbuhat niini nga mga butang bulahan kamo, kay kamo natukod diha sa ibabaw sa akong lig-on nga sukaranan.
“Apan kon kinsa diha kaninyo magbuhat kapin ug kulang niini wala matukod sa akong lig-on nga sukaranan, apan natukod sa usa ka balason nga tukuranan; ug sa pagbundak sa ulan, ug sa pag-abut sa mga lunop, ug sa paghuros sa mga hangin, ug mohampak diha kanila, sila matumba.”13
Kini sinsero nga paglaum sa mga lider sa Simbahan nga ang mahinungdanong mga pagbag-o sa Templo sa Salt Lake makatabang sa katumanan sa tinguha ni Brigham Young nga makakita nga “ang templo matukod sa paagi nga kini molungtad hangtud sa milenyum.” Sa umaabut nga katuigan, unta atong tugutan kining mga kalamboan nga gihimo sa Templo sa Salt Lake sa padasig nato, isip mga indibidwal ug pamilya, aron kita sab—sa pinasumbingay—“matukod sa paagi nga molungtad hangtud sa milenyum.”
Ato kining mabuhat kon kita motuman sa sugo ni Apostol Pablo nga “sa ingon niini [gibutang nato] alang sa [atong] kaugalingon ang maayong patukuranan alang sa umaabut, aron [atong] makuptan kanang kinabuhi nga mao ang tinuod gayud nga kinabuhi.”14 Kini akong sinsero nga pag-ampo nga ang atong espiritwal nga patukuranan mahimong sigurado ug lig-on, nga ang atong pagpamatuod sa Pag-ula ni Jesukristo ug sa Iyang tahas isip Manluluwas ug Manunubos mahimong alang kanato nga atong kaugalingong ulohang bato sa pamag-ang, kinsa ako mopamatuod sa Iyang ngalan, nga mao si Jesukristo, amen.