Go Fored Wetem Fet
Mi blesem yufala wetem pis mo moa bigfala fet long Lod.
Ol brata mo sista we mi lavem. Taem yumi stap kam blong klosem histri konfrens ia, yumi talem tangkyu long Lod. Miusik i bin gud tumas, mo ol mesej oli givim insperesen.
Long taem blong konfrens ia, yumi bin kasem plante haelaet. Long tu handred yia aniveseri ia, mifala i bin presentem wan ofisol toktok i go long wol we i talemaot se Restoresen blong Gospel blong Jisas Kraes, we i fulwan, i wan ril samting.
Yumi makem Restoresen wetem Hosana Singaot.
Yumi presentem wan niu simbol we i saen blong fet blong yumi long Lod Jisas Kraes, mo bae i stap long evri ofisol Jos infomesen mo tul.
Mifala i singaotem wan wol dei blong livim kaekae mo prea, se wol sik ia we i stap naoia, bae oli save kontrolem, blong olgeta we oli givim kea oli gat proteksen, blong ekonomi i kam strong bakegen, mo laef i kambak nomol bakegen. Dei blong livim kaekae hem i long Gud Fraedei, 10 Epril. !Mo bae i wan gudfala Fraedei wantaem!
Nekis Sandei, hem i Ista Sandei, mo bae yumi makem bakegen Atonmen mo Laef Bakegen long Ded blong Lod blong yumi Jisas Kraes. From Atonmen blong Hem, presen ia blong Hem we i laef bakegen long ded, bae i kam long evriwan we i bin laef. Mo presen ia we i laef we i no save finis, bae i kam long evriwan we bae i kwalifae from oli fetful long ol odinens mo ol kavenan we oli bin mekem insaed long ol tabu tempol ia.
Plante pat blong Epril 2020 jeneral konfrens ia we i givim insperesen—tabu wik ia we yumi statem—bae yumi talem sot long fo tabu toktok we heven i talem: “!Lisin gud long Hem!1 Yumi prea se bae stret lukluk blong yufala long Papa long Heven, we i bin talem ol toktok ia, mo stret lukluk blong yufala long Pikinini blong Hem we Hem i Lavem Tumas, Jisas Kraes, bae i stap bigwan long memori blong yufala abaot evri samting we i bin hapen. Mifala i stap prea se bae yufala i stat niu bakegen wetem tru hat mo tingting, blong harem, blong lisin gud, mo blong mekem folem ol toktok blong Sevya.2 Mi promes se, afta long hemia, fraet bae i go daon, mo fet i kam antap.
Tangkyu long tingting mo hat blong yufala blong mekem hom blong yufala i ol tru tabu ples blong fet, ples we Spirit blong Lod i save stap long hem. Gospel stadi kurikulom blong yumi, Kam Folem Mi, bae i gohed blong blesem laef blong yumi. Ol strong efot we i gohed oltaem blong mekem wok ia—iven long ol taem we yu save filim se yu no gat tumas sakses long hem—bae i jenisim laef blong yu, hemia blong famli blong yu, mo wol ia. Bae yumi kam strong moa taem yumi kam ol moa strong disaepol blong Lod, we yumi stanap mo toktok from Hem, long weaples yumi stap long hem.
Naoia yumi tokbaot ol tempol. Yumi bin dediketem 168 tempol raon long wol. Ol narawan oli stap mekem plan from mo sam oli stap bildim. Taem oli stap anaonsem ol plan blong stanemap wan niu tempol, hem i kam pat blong tabu histri blong yumi.
Bae i luk defren blong stap anaonsem ol niu tempol taem we evri tempol blong yumi oli stap klos blong sot taem.
Ova long wan handred yia i pas, Presiden Wilfod Wudrof i bin luk finis ol situesen olsem hemia blong yumi, olsem hem i rekodem insaed long dedikesen prea blong Sol Lek Tempol, long 1893. Sam long yufala i bin ridim sam pat blong naesfala prea ia long sosol media finis.
Harem ol strong prea ia we i kam long wan strong profet blong God: “Taem Ol Pipol ia blong Yu bambae oli no save gat janis blong kam long tabu haos ia … mo oli hevi wetem ol trabol, mo ol hadtaem i raonem olgeta … mo bae oli tanem fes blong olgeta i go long tabu haos blong Yu, Papa, mo askem Yu blong mekem olgeta oli kam fri, blong oli kasem help, from bae Yu Yu sendem paoa blong Yu from olgeta, mifala i stap plis long Yu Papa, aot long tabu ples we Yu stap long Hem, blong yu luk i kam daon wetem sore … mo lisin long ol krae blong olgeta. O taem we ol pikinini blong Ol Pipol blong Yu, long ol yia we oli stap kam yet, bae oli seperet, from eni risen, long ples ia, … mo bae oli krae long Yu Papa, dip aot long hadtaem blong olgeta mo harem nogud, blong yu sendem help i go mo mekem olgeta oli kam fri, mifala i askem hemia long Yu Papa, wetem tingting i stap daon … harem mo lisin gud long ol krae blong olgeta, mo givim olgeta ol blesing ia we oli stap askem.”3
Ol brata mo sista. Long ol taem we yumi stap long bigfala hadtaem, taem we ol tempol oli klos, yu save yusum paoa blong ol tempol kavenan mo endaomen blong yu, taem yu stap ona long ol kavenan ia. Plis yusum taem ia, taem we ol tempol oli klos i stap, blong gohed blong laef long wan laef we i klin inaf blong kam long tempol, o blong kam blong stap klin inaf blong go long tempol.
Tokbaot tempol insaed long famli mo fren blong yu. From se Jisas Kraes i stap long medel blong evri samting we yumi stap mekem long tempol, taem yu stap tingting moa abaot tempol, bae yu stap tingting moa abaot Hem. Stadi mo prea blong lanem moa abaot paoa mo save we Lod i kavremap yu long hem long tempol—o paoa ia we bambae Lod i kavremap yu yet wetem.
Tedei, mifala i glad tumas blong anaonsem ol plan blong bildim eit niu tempol long olgeta ples ia: Bahia Blanka, Ajentina; Talahasi, Florida; Lubumbasi, Dimokratik Ripablik blong Kongo; Pitsbeg, Pensilvania; Benin Sisti, Naejeria; Sirakus, Yuta; Dubae, Yunaeted Arab Emiret; mo Sangae, Pipol Ripablik blong Jaena.
Long evriwan long ol eit ples ia, ol akitek blong Jos bae oli wok wetem ol lokol ofisol blong mekem se tempol i go stret wetem ples, mo i stap olsem wan naes bilding blong wanwan komuniti.
Plan blong gat wan tempol long Dubae i kam olsem wan ansa long invitesen blong olgeta, mo mifala i wantem luksave hemia
Wanem i stap raon long plan blong Sangae, i impoten tumas. Blong moa long tu handred yia, ol memba we oli klin inaf blong go long tempol insaed long Pipol Ripablik blong Jaena oli bin stap go long Hong Kong Jaena Tempol. Be long Julae 2019, tempol ia i klos blong mekem wan longfala mo plante ripea wok blong mekem i niu bakegen.
Long Sangae, bae i gat wan gudfala ples we oli save yusum long plante samting, bae i stap olsem wan wei blong ol memba long Jaena blong gohed blong tekpat long ol odinens blong tempol—insaed long Pipol Ripablik blong Jaena—blong olgeta mo blong ol bubu blong olgeta.4
Long evri kantri, Jos ia i stap tijim ol memba blong hem blong givim ona, blong obei mo blong sapotem loa.5 Yumi tijim hamas i impoten blong gat famli, blong stap olsem ol gudfala papa mo mama, mo ol sitisen we i eksampol. From se yumi stap respektem ol loa mo ol rul blong Pipol Ripablik blong Jaena, Jos i no sendem ol misinari blong mekem misinari wok longwe; mo bae yumi no mekem olsem tu naoia.
Ol nara kongregesen mo ol Jaenis kongregesen bae oli gohed blong mit long seperet ples. Ples we Jos i stanap long hem folem loa, i stap semmak nomo, i no jenis. Blong statem yus blong ol bilding ia, bae taem wan i wantem yusum, i mas mekem apoenmen nomo. Sangae tempol ia, bae i no wan tempol blong ol turis we oli kam long ol narafala kantri.
Ol eit niu tempol ia, bambae oli blesem laef blong plante pipol long tugeta saed blong vel blong ded. Ol tempol oli nambawan pat blong Restoresen blong ful gospel blong Jisas Kraes. Long gud fasin mo bigfala hat blong Hem, God i stap tekem ol blesing blong tempol oli kam kolosap moa long ol pikinini blong Hem long evri ples.
Taem we Restoresen i stap gogohed, mi save se God bambae i gohed blong soemaot mo talemaot plante bigfala mo impoten samting long saed blong kingdom blong Hem long wol ia.6 Kingdom ia, hem i Jos Ia blong Jisas Kraes blong Ol Lata-dei Sent.
Ol dia brata mo sista, mi wantem talemaot lav we mi gat long yufala. Long taem we tingting i fas mo no sua long samting, mo mi yusum atoriti we oli bin givim long mi, mi wantem givim yufala wan blesing blong wan aposol.
Mi blesem yufala wetem pis mo moa bigfala fet long Lod.7
Mi blesem yufala wetem wan tingting long hat blong sakem sin mo kam smol moa olsem Hem, evri dei we i stap pas.8
Mi blesem yufala blong save se Profet Josef Smit i profet blong Restoresen blong gospel blong Jisas Kraes, we i fulwan.
Sapos i gat sik long medel blong yufala o olgeta we yufala i lavem, mi livim wan blesing blong hiling, we i go stret wetem tingting blong Lod.
Mi blesem yufala olsem, mo talemaot wan moa taem we mi lavem yufala wanwan, long tabu nem blong Jisas Kraes, amen.