Haere i mua ma te fa’aro’o
Tē ha’amaita’i nei au ia ’outou i te hau ’e i te fa’aro’o rahi i te Fatu.
E au mau taea’e ’e e au mau tuahine here, ’ua tae tātou i te hope’a o teie ’āmuira’a tua’ā’ai, tē fa’atae atu nei mātou i tō mātou māuruuru rahi i te Fatu. E mea nehenehe mau te mau hīmene ’e te mau parau poro’i fa’auruhia.
I te roara’a o teie ’āmuira’a, ’ua ’ite mai tātou e rave rahi mau taime ha’apāpūra’a. Nō teie ha’amana’ora’a o te piti-hānere-ra’a o te matahiti, ’ua fa’aō mai tātou i te hō’ē parau poro’i nā te ao nei e fa’a’ite ra i te tupura’a mau o te fa’aho’i-fa’ahou-ra’a mai o te ’Evanelia a Iesu Mesia i roto i tōna ’īra’a.
’Ua fa’ahanahana tātou i te fa’aho’i-fa’ahou-ra’a mai nā roto i te tuōra’a Hosana.
’Ua hōhorahia mai ia tātou i te hō’ē taipe ’āpī ’ei fa’a’itera’a i tō tātou fa’aro’o i te Fatu ia Iesu Mesia, ’e nō te ’ite-mata-ra’a i te mau ha’amāramaramara’a ’e te mau pu’e parau pāpū a te ’Ēkālesia.
’Ua ti’aorohia tātou nō te hō’ē mahana ha’apaera’a mā’a ’e te pure nā te ao ato’a nei, ’ia araihia teie ma’i pe’e, ’ia pāruruhia te feiā utuutu ma’i, ’ia ha’apūaihia te fa’arava’ira’a faufa’a, ’e ’ia ho’i fa’ahou te orara’a i tōna ra huru mau. E ravehia teie ha’apaera’a mā’a i te Farairē mo’a 10 nō ’Ēperēra. ’Auē ïa farairē nehenehe ē !
I te sābati i muri nei, e sābati pāsa ïa, i reira tātou e fa’ahanahana fa’ahou ai i te tāra’ehara ’e i te ti’afa’ahoura’a o tō tātou Fatu o Iesu Mesia. Maoti tāna tāra’ehara, e fāri’i te mau ta’ata ato’a i ora nā i tāna hōro’a o te ti’afa’ahoura’a. ’E tāna hōro’a nō te ’ora mure ’ore, e tae mai te reira i ni’a i te mau ta’ata ato’a i ti’amā nā roto i te ha’apa’ora’a i te mau ’ōro’a ’e te mau fafaura’a i ravehia i roto i tōna mau hiero mo’a.
Te mau ’ohipa fa’auru e rave rahi o teie ’āmuira’a rahi nō ’Ēperēra 2020—’e te hepetoma mo’a tā tātou e ha’amata nei—e nehenehe ïa e ha’apotohia nā roto e toru ta’o i ha’amau-hanahana-hia : « A fa’aro’o iāna ».1 Te pure nei mātou ’ia ti’a i tā ’outou fa’atumura’a i ni’a i te Metua i te ao ra, tei fa’ahiti i teie mau parau, ’e i ni’a i tāna tamaiti here, o Iesu Mesia, ’ia fa’a’ī i te pae rahi a’e o tā ’outou mau ha’amana’ora’a i te mau mea ato’a i tupu. Tē pure nei mātou ’ia ha’amata fa’ahou mau ’outou i te fa’aro’o, i te ha’afatafata mai i te tari’a, ’e i te ha’apa’o i te mau parau a te Fa’aora.2 Tē fafau atu nei au ē, e topa te mata’u ’e e rahi te fa’aro’o.
Māuruuru ia ’outou nō tō ’outou hina’aro ’ia fa’ariro i tō ’outou fare ’ei vāhi mo’a nō te fa’aro’o, i reira ho’i te Vārua o te Fatu e nehenehe ai e pārahi. E tāmau noa tā tātou fa’anahora’a ha’api’ira’a, Mai, pe’e mai, i te ha’amaita’i i tō ’outou orara’a. Tā ’outou mau tauto’ora’a itoito i roto i teie ’ohipa—noa atu i roto i te mau taime tē mana’o ra ’outou ē, ’aita ’outou e manuia ra—e taui te reira i tō ’outou orara’a, i tō tō ’outou ’utuāfare, ’e i tō te ao nei. E ha’apūaihia tātou nā roto i te rirora’a tātou ’ei mau pipi itoito nā te Fatu, ma te ti’a i ni’a ’e i te paraura’a nōna i te mau vāhi ato’a tei reira tātou.
E paraparau ana’e tātou i teie nei nō ni’a i te mau hiero. Tē vai nei tā tātou e 168 hiero ha’amo’ahia nā te ao nei. Tei roto te tahi i te fa’aineinera’a ’e i te patura’a. ’Ia fa’aara-ana’e-hia te mau fa’anahora’a nō te hāmani i te hō’ē hiero āpī, e riro mai te reira ’ei tuha’a nō tō tātou ’ā’amu mo’a.
E mea huru ’ē ri’i paha ’ia fa’aara i te mau hiero ’āpī inaha ho’i, ’ua ’ōpani pauroa tā tātou mau hiero nō te hō’ē taime.
Hau atu i te hō’ē tenetere i teie nei, ’ua ’ite ātea mai te peresideni Wilford Woodruff i te mau huru mai tō tātou nei, mai tei pāpa’ihia i roto i te pure ha’amo’ara’a o te hiero nō Roto Miti i te matahiti 1893. ’Ua ’ite paha te tahi pae o ’outou, ’aita i maoro a’e nei, i te tahi mau tuha’a o te reira pure fa’ahiahia i ni’a i te mau tūreiara’a tōtiare.
’A fa’aro’o mai i teie mau tāparura’a a te hō’ē peropheta pūai a te Atua : « I te taime ho’i e ’ore ai e ti’a i tō ’oe nūna’a ’ia tomo i roto i teie fare mo’a […] ’e ’ua hāmani-’ino-hia rātou, ‘e ’ua ha’ape’ape’ahia, ’ua fa’a’atihia rātou i te mau fifi […] ’e e fāriu rātou i tō rātou mata i ni’a i teie Tō ’oe fare mo’a ’e ’ia ani ia ’oe i te fa’aorara’a, i te tauturu, i tō ’oe mana ’ia tae mai i ni’a ia rātou, tē tāparu atu nei mātou ia ’oe, ’ia hi’o mai na ’oe i raro ma te aroha, mai ni’a mai i tō ’oe nohora’a mo’a… ’e ’ia fa’aro’o mai i tā rātou mau ’auēra’a. ’Aore rā, ’ia tae i te taime te mau tamari’i o tō ’oe nūna’a, i te mau matahiti i muri nei, e fa’ata’a-’ē-hia ai i teie vāhi, nā roto i te mau huru tumu ato’a… ’e ’a ti’aoro ai rātou ia ’oe mai roto mai i te hōhonura’a o tō rātou pe’ape’a ’e te ’oto ’ia fa’atae mai i te tauturu ’e i te fa’aorara’a ia rātou, tē tāparu atu nei mātou ’ia ’oe ma te ha’eha’a, ’ia… fa’aro’o mai i tā rātou mau ’auē, ’e ’ia hōro’a ia rātou i te mau ha’amaita’ira’a tā rātou e ani atu ».3
E te mau taea’e ’e te mau tuahine, i te mau taime nō tō tātou ahoaho ’a ’ōpanihia ai te mau hiero, e nehenehe ā ’outou e ti’aoro i te mana o tā ’outou mau fafaura’a ’e te mau ’ōro’a nō te hiero ’a fa’atura ai ’outou i tā ’outou mau fafaura’a. ’A fa’a’ohipa i teie taime ’ōpanira’a o te mau hiero nō te ora tāmau noa i te hō’ē orara’a ti’amā nō te hiero, ’aore rā, ’ia ti’amā nō te haere i te hiero.
’A paraparau nō ni’a i te hiero i tō ’outou ’utuāfare ’e i te mau hoa. I te mea ho’i ē, tei rōpū ’o Iesu Mesia i te mau mea ato’a tā tātou e rave nei i roto i te hiero, mai te mea e rahi atu tō ’outou ferurira’a nō ni’a i te hiero, e rahi atu ïa tā ’outou ferurira’a nō ni’a iāna. ’A tuatāpapa ’e ’a pure nō te ha’api’i rahi mai atu ā nō ni’a i te mana ’e i te ’ite i hōro’ahia ia ’outou—’aore rā, ’o tē hōro’ahia mai ia ’outou.
I teie mahana, tē ’oa’oa nei mātou i te fa’aara atu i te mau ’ōpuara’a patura’a nō e va’u hiero ’āpi i te mau vāhi i muri nei : Bahía Blanca, Rāparata ; Tallahassee, Floride ; Lubumbashi, Rēpupirita manahune o Tōnetto ; Pittsburgh, Pennsylvanie ; Benin City, Nītēria ; Syracuse, Utaha ; Dubai, ’Āmuira’a Emirat ’Arapia ; ’e Shanghai, Nūna’a manahune nō Taina.
I roto i nā vāhi e va’u, e ’ohipa te mau tāmuta fare a te ’Ēkālesia ’e te feiā fa’atere o te fenua iho ’ia tano au maita’i te hiero i reira ’e ’ia riro ’ei hō’ē ’utari nehenehe nō te ’oire tāta’itahi.
E anira’a hanahana te ’ōpuara’a nō te patura’a i te hō’ē hiero i Dubaï, ’o tā mātou e ha’amāuruuru rahi maita’i nei.
Te huru fa’anahora’a nō Shanghai e mea faufa’a roa ïa. ’Ua hau e piti ’ahuru matahiti, tō te mau melo ti’amā nō te hiero nō te Nūna’a manahune nō Taina haerera’a i te hiero nō Hong Kong Taina. I te ’āva’e Tiurai 2019 rā, ’ua tāpiri teie hiero nō te mau fa’a’āpīra’a i fa’anahohia e mea māoro i teienei ’e e mea tītau-mau-hia.
I Shanghai, e fa’ati’a te hō’ē vāhi au maita’i nō te fārereira’a fa’ahiahia, i te mau melo tinitō ’ia tāmau ā i te ’āmuira’a atu i te mau ’ōro’a o te hiero—i te Nūna’a mahahune nō Taina—nō rātou ’e tō rātou mau tupuna.4
I roto i te mau fenua tāta’itahi, tē ha’api’i nei teie ’Ēkālesia i tāna mau melo ’ia fa’atura, ’ia ha’apa’o’e ’ia pāturu i te ture.5 Tē ha’api’i nei mātou i te faufa’a o te ’utuāfare, ’ia riro ’ei mau metua maita’i ’e ’ei mau huira’atira hi’ora’a maita’i. Nō te mea te ha’apa’o nei mātou i te mau ture ’e te mau arata’ira’a a te Nūna’a manahune nō Taina, e’ita te ’Ēkālesia e tono atu i te mau misiōnare poro ’evanelia ; e’ita roa mātou e nā reira i teienei.
E tāmau ā te mau ’āmuira’a nō te fenua ’e’ē ’e te mau tinitō i te fārerei ta’a ’ē noa. ’Aita te ti’ara’a mau i te pae o te ture o te ’Ēkālesia i roto i teie fenua i taui. I roto i te tuha’a mātāmua nō te fa’a’ohipara’a o te fare, e rave-noa-hia te tomora’a i roto nā ni’a i te hō’ē parau anira’a. E’ita te fare o te Fatu i Sanghai e riro ’ei vāhi e haere nō te mau rātere nō te tahi atu mau fenua.
E ha’amaita’i teie mau hiero e va’u i te orara’a o te mau ta’ata e rave rahi i nā pae e piti o te pāruru o te pohe. E tuha’a faufa’a rahi te mau hiero nō te fa’aho’i-fa’ahou-ra’a mai o te ’īra’a o te ’evanelia a Iesu Mesia. I roto i te maita’i ’e te ’ā’au hōro’a o te Atua, tē hōpoi nei ’oia i te mau ha’amaita’ira’a o te hiero i pīha’i iho roa i tāna mau tamari’i i te mau vāhi ato’a.
’A tāmau noa ai te fa’aho’i-fa’ahou-ra’a mai, ’ua ’ite au ē, e tāmau noa te Atua i te heheu mai e rave rahi mau mea rarahi ’e te faufa’a nō tōna bāsileia i ni’a i te fenua nei.6 Taua bāsileia ra ’o Te ’Ēkālesia ïa a Iesu Mesia i te Feiā Mo’a i te mau Mahana Hope’a Nei.
E te mau taea’e ’e te mau tuahine here, tē fa’a’ite atu nei au i tō’u here nō ’outou. I roto i teie taime ’ume’umera’a ’e te pāpū ’ore, ’e ma te ti’aoro i te mana i tu’uhia mai i ni’a iā’u, tē hina’aro nei au e hōro’a atu ia ’outou i te hō’ē ha’amaita’ira’a ’āposetōlo.
Tē ha’amaita’i nei au ia ’outou i te hau ’e i te fa’aro’o rahi i te Fatu.7
Tē ha’amaita’i nei au ia ’outou ma te hō’ē hina’aro ’ia tātarahapa ’e ’ia riro hau atu mai iāna i te mau mahana tāta’itahi.8
Tē ha’amaita’i nei au ia ’outou ’ia ’ite ē, ’o Iosepha Semita te peropheta nō te fa’aho’i-fa’ahou-ra’a mai o te ’evanelia a Iesu Mesia i roto i tōna ’īra’a.
Mai te mea ē, tē vai ra te ma’i i rotopū ia ’outou ’aore rā, i tei herehia e ’outou, tē vaiiho atu nei au i te hō’ē ha’amaita’ira’a nō te fa’aorara’a, ’ia ti’a i te hina’aro o te Fatu.
Tē ha’amaita’i atu nei au ia ’outou, ma te fa’a’ite fa’ahou atu i tō’u here ia ’outou tāta’itahi, i te i’oa mo’a o Iesu Mesia, ’āmene.