Nāhea te autahu’ara’a ’ia ha’amaita’i i te feiā ’āpī
Nā roto i te autahu’ara’a, e ti’a ia tātou ’ia fa’ateiteihia. E tu’u mai te autahu’ara’a i te māramarama i roto i tō tātou nei ao.
’Ua ’oa’oa vau i te taera’a mai. I te paraura’ahia mai ē e paraparau vau ia ’outou i teie mahana, ’ua ’ana’anatae roa vau, ’ua tupu ato’a rā te mana’o ha’eha’a. ’Ua feruri maoro vau nō n’ia i te mea e parau, ’e maita’i ē, e paraparau ’āfaro atu te Vārua ia ’outou nā roto i tā’u a’ora’a.
I roto i te Buka a Moromona, ’ua hōro’a Lehi i te hō’ē ha’amaita’ira’a i tāna nā tamaiti tāta’itahi hou ’a pohe ai, nō te tauturu ia rātou ’ia ’ite i tō rātou pūai ’e te fāito pūai mure ’ore. E va’u tamari’i mātou, ’o vau te hope’a, ’e i te matahiti i ma’iri ’o vau ana’e tei toe mai i tō mātou fare, nō te taime mātāmua. E mea pa’ari roa nō’u, ’aita fa’ahou tō’u mau taea’e e tuahine i pīha’i iho iā’u nō te paraparau atu. I te tahi mau pō, e mana’o mo’emo’e rahi tei tae mai. Māuruuru rā i tō’u nā metua tei fa’aitoito roa i te tauturu iā’u. Te tahi hi’ora’a nō te reira, ’o te hōro’ara’a ïa tō’u pāpā iā’u i te hō’ē ha’amaita’ira’a tāmāhanahanara’a i te hō’ē taime fifi rahi. I muri mai i te ha’amaita’ira’a, ’aita te mau mea i taui rahi, e mana’o hau rā ’e te here tā’u i putapū nō ’ō mai i te Metua i te Ao ra ’e i tō’u pāpā. ’Ua māuruuru roa vau i tō’u metua tāne ti’amā tei hōro’a mai i te mau ha’amaita’ira’a autahu’ara’a i te taime ’ua hina’aro roa vau i te reira, ’e ’o tē tauturu ho’i iā’u ’ia ’ite i tō’u mau pūai ’e tō’u fāito pūai mure ’ore, mai tā Lehi i rave ’a ha’amaita’i ai ’oia i tāna mau tamari’i.
Ta’a ’ē noa atu tō ’outou vaira’a, e nehenehe ’outou e fāri’i i te mau ha’amaita’ira’a autahu’ara’a i te mau taime ato’a. E fāri’i ’outou i te reira nā roto i te mau melo o te ’utuāfare, te mau hoa, te mau taea’e aupuru, te feiā fa’atere autahu’ara’a ’e maoti te Metua i te Ao ra ’o tē ’ore roa e fa’aru’e ia ’outou. ’Ua parau Elder Neil L. Andersen : « Te mau ha’amaita’ira’a o te autahu’ara’a, ’ua hau atu ïa i te tāne iho tei anihia e fa’atere i te reira… Mai te mea ē, e vai ti’amā noa tātou, e ha’afaufa’a te mau ’ōro’a o te autahu’ara’a i tō tātou orara’a ».1
’Eiaha e tūtāperepere te mana’o nō te ani i te hō’ē ha’amaita’ira’a i te taime e tītau ’outou i te tahi atu ā arata’ira’a. Tei roto i te mau taime fifi e tītau-roa-hia nei te Vārua ’ia tāuturu mai. ’Aita hō’ē i tae i te fāito maita’i roa ’e e mau fifi tō tātou pā’āto’a. Tē vai nei te ahoaho, te fa’aturumara’a, te hia’ai fa’atītī ’aore rā te mana’o ē e’ita e haere ia tātou. E nehenehe te mau ha’amaita’ira’a autahu’ara’a e tauturu ia tātou ’ia upo’oti’a i ni’a i teie mau tāmatara’a ma te fāri’i i te hau ’a nu’u noa ai i mua. Maita’i ē tē tūtava nei tātou i te ora ti’amā nō te fāri’i i teie mau ha’amaita’ira’a.
Te tahi ato’a rāve’a e ha’amaita’i te autahu’ara’a ia tātou, ’o te mau ha’amaita’ira’a patereareha ïa. ’Ua ha’api’i au i te fāriu i ni’a i tō’u ha’amaita’ira’a patereareha ’ia tae mai te mana’o ’oto ’e te mo’emo’e. E tauturu te reira ’ia ’ite i tō’u fāito pūai ’e te ’ōpuara’a ta’a ’ē a te Atua nō’u. E tāmāhanahana ’e e tauturu te reira ia’u ’ia hi’o i’ō atu i tā’u hi’ora’a tāhuti nei. E fa’aha’amana’o te reira i te mau hōro’a ’e te mau ha’amaita’ira’a tā’u e fāri’i mai te mea e ora ti’amā vau. E tauturu ato’a te reira ia’u ’ia ha’amana’o ’e ’ia fa’atupu ho’i i te mana’o hau ē, e pāhono mai te Atua ’e e ’īriti ’oia i te ’ūputa nō’u i te taime e tītau-roa-hia nō’u.
E tauturu te mau ha’amaita’ira’a patereareha ’ia fa’aineine ia tātou nō te ho’i e ora i pīha’i iho i tō tātou Metua i te Ao ra. ’Ua ’ite au ē, nō ’ō mai te mau ha’amaita’ira’a patereareha i te Atua, ’e e tauturu te reira i te taui i tō tātou paruparu ’ei pūai. E ’ere teie i te parau nā te ta’ata tarutaru ; tē fa’a’ite nei teie mau ha’amaita’ira’a i tei tītauhia ia tātou ’ia fa’aro’o. Mai te huru i te Liahona nō tātou tāta’itahi. Mai te mea e tu’u tātou i te Atua nā mua roa ’e e tupu tō tātou fa’aro’o iāna, e arata’i mai ’oia ia tātou i roto i tō tātou iho medebara.
Mai tā te Atua i ha’amaita’i ia Iosepha Semita i te autahu’ara’a, ’ia fa’aho’i-fa’ahou-hia mai te mau ha’amaita’ira’a o te ’evanelia, e ti’a ia tātou ’ia fāri’i i te mau ha’amaita’ira’a o te ’evanelia i roto i te orara’a maoti te autahu’ara’a. I te mau hepetoma ato’a, ’ua fāna’o tātou i te ha’amaita’ira’a e rave i te ’ōro’a. Nā roto i teie ’ōro’a o te autahu’ara’a, e nehenehe te Vārua ’ia vai noa i pīha’i iho ia tātou, nō te horoi ’e nō te tāmā ia tātou. Mai te mea e tae mai te mana’o e fa’a’ore i te hō’ē mea i roto i tō tātou orara’a, ’a paraparau i te hō’ē ti’a fa’atere tei ti’aturihia, ’o tē nehenehe e tauturu ia ’oe ’ia ho’i i ni’a i te ’ē’a ’āfaro. E ti’a i tō ’outou feiā fa’atere e tauturu ia ’outou ’ia noa’a te mana hope o te tāra’ehara a Iesu Mesia.
’Aua’a a’e te autahu’ara’a, e nehenehe ato’a tātou e fāri’i i te ha’amaita’ira’a nō te mau ’ōro’a o te hiero. Mai te taime ’a haere ai au i te hiero, ’ua ha’amau vau i te fā ’e ’ua fa’ariro ’ei ’ohipa mātāmua roa ’ia haere tāmau i reira. Maoti te fa’ata’ara’a i te taime ’e te fa’atusiara’a nō te ha’afātata i tō’u Metua i te Ao ra i roto i tōna fare mo’a, ’ua ha’amaita’ihia vau i te fari’ira’a i te heheura’a ’e te mau muhumuhu tei tauturu mau iā’u i roto i tō’u orara’a.
Nā roto i te autahu’ara’a, e ti’a ia tātou ’ia fa’ateiteihia. E tu’u mai te autahu’ara’a i te māramarama i roto i tō tātou nei ao. ’Ua parau ’ō Elder Robert D. Hales ē : « ’Āhani ’aita e mana autahu’ara’a, ‘e riro te ao ato’a nei ’ei mea faufa’a ’ore » (hi’o PH&PF 2:1–3). ’Aita e māramarama, ’aita e tīa’ira’a—e pōiri ana’e ».2
Tē fa’aitoito nei te Atua ia tātou. ’Ua hina’aro ’oia ’ia ho’i tātou iāna ra. ’Ua ’ite maita’i ’oia ia tātou. ’Ua ’ite ’oia ia ’outou. ’Ua here ’oia ia ’outou. Tē ’ite māite noa nei ’oia ia tātou ’e tē ha’amaita’i nei ia tātou, noa atu ā tō tātou mana’o ē, e’ita e ti’a ia tātou ’ia fari’i i te reira. ’Ua ’ite ’oia e aha tō tātou hina’aro ’e ahea e hina’arohia ai.
« E ani, e hōro’ahia mai tā ’outou ; e ’imi, e ’itea ïa ia ’outou ; e pātōtō atu, e ’īritihia mai te ’ōpani ia ’outou :
« ’O tei ani ra ho’i, ’ua noa’a ïa ; ’e ’o tei ’imi ra, ’ua ’itea ïa ; ’e te fēiā ato’a i pātōtō ra, ’ua ’īritihia ïa te ’ōpani » (Mataio 7:7–8).
Mai te mea ’aita ā tō ’outou e ’itera’a pāpū nō ni’a i te autahu’ara’a, tē fa’aitoito nei au ia ’outou ’ia pure ’e ’ia ani ’ia ’ite ’outou iho i tō te reira mana, ’ei reira e tai’o atu ai i te mau pāpa’ira’a mo’a nō te fa’aro’o i te parau a te Atua. ’Ua ’ite au ē, mai te mea e fa’aitoito tātou ’ia ’ite i te mana autahu’ara’a o te Atua i roto i tō tātou orara’a, e ha’amaita’ihia tātou. I te i’oa ’o Iesu Mesia, ’āmene.