Te mana o te Buka a Moromona i roto i te fa’afāriura’a

Nā Elder Benjamin M. Z. Tai

Nō te Hitu ’Ahuru

E hōro’a mai te Buka a Moromona i te mā’a vārua, e fa’a’ite mai i te hō’ē fa’anahora’a ’ohipa, ’e e fa’atū’ati ia tātou i te Vārua Mo’a.

I muri a’e, i te hi’ora’a i te parau fa’a’ite pae tino ’aita i maoro a’e nei, ’ua ha’api’i mai au ē e ti’a iā’u ’ia rave i te tahi mau fa’atanora’a nō te huru orara’a. Nō te tauturu iā’u, ’ua hōro’a mai tō’u taote i te hō’ē fa’anahora’a nō te mā’a ’e nō te fa’a’eta’etara’a tino, mai te mea ē, e mā’iti au i te pe’e i te reira, e taui te reira iā’u ’ei ta’ata maita’i a’e i te pae o te ea.

Mai te mea e rave tātou tāta’itahi i te hō’ē hi’opo’ara’a pae vārua, e aha ïa tā tātou e ha’api’i mai nō tātou iho ? E aha te mau fa’atanora’a tā tō tātou taote pae vārua e hōro’a mai ia tātou ? Nō te riro mai ’ei ta’ata ’o te tītauhia ia tātou ’ia riro mai, e mea faufa’a roa ’ia ’ite tātou e aha te ’ohipa e rave, ’e ’ia rave i te mea tā tātou i ’ite.

ʼO Iesu Mesia te Taote rahi.¹ Nā roto i tāna tāra’ehara, e rāpa’au ’oia i tō tātou mau pēpē, e rave i ni’a iāna i tō tātou mau paruparu, ’e e fa’aora i tō tātou ’ā’au oto.² Nā roto i tōna aroha, e nehenehe tō tātou mau paruparu e riro mai ’ei mea pūai.³ Tē ani mai nei ’oia ia tātou ’ia pe’e iāna⁴ nā roto i te ha’api’ira’a mai nō ni’a iāna, te fa’aro’ora’a i tāna mau parau, ’e te haerera’a nā roto i te marū o tōna Vārua.⁵ ’Ua fafau mai ’oia e tauturu ia tātou⁶ i roto i teie fa’anahora’a o te fa’afāriura’a nō te orara’a tā’āto’a, ’o tē fa’ataui ia tātou ’e ’o tē hōro’a mai i te ’oa’oa hope ’ore.⁷

’Ua hōro’a mai te Fa’aora i te Buka a Moromona ia tātou ’ei mauha’a mana nō te tauturu i roto i te fa’afāriura’a. E hōro’a mai te Buka a Moromona i te mā’a vārua, e fa’a’ite mai i te hō’ē fa’anahora’a ’ohipa, ’e e fa’atū’ati ia tātou i te Vārua Mo’a. ’Ua pāpa’ihia nō tātou,⁸ tei roto i te reira te parau a te Atua ma te māramarama maita’i⁹ ’e tē parau nei nō tō tātou ihota’ata, tā tātou fā ’e tō tātou hope’ara’a.¹⁰ Mai te Bibilia, tē fa’a’ite pāpū nei te Buka a Moromona nō Iesu Mesia¹¹ ’e tē ha’api’i nei nāhea tātou e nehenehe ai e ’ite i te parau mau ’e ’ia riro mai iāna te huru.

E 58 matahiti tō te taea’e Saw Polo ’a fa’a’itehia ai iāna te ’evanelia tei fa’aho’i-fa’ahou-hia mai a Iesu Mesia. I tō’u fārereira’a iāna, tē tāvini ra ’oia ’ei peresideni ’āma’a e rave rahi matahiti, terā rā, ’ua ha’api’i mai au ē ’aita roa ’oia i tai’o a’e i te Buka a Moromona nō te mea ’aita ā te reira e vai ra nā roto i tōna reo tumu te birman. I tō’u anira’a iāna ē, e mea nāhea tōna ’itera’a ē, e parau mau te buka ma te ’orera’a e tai’o i te reira, ’ua pāhono mai ’oia ē, ’ua tuatāpapa ’oia pauroa te mahana, i te buka hōho’a o te mau ’ā’amu o te Buka a Moromona nā roto i te hi’ora’a i te mau hōho’a, te fa’a’ohipara’a i te hō’ē buka fa’atoro parau nō te ’īriti i te mau ta’o Peretāne, ’e te pāpa’i-maita’i-ra’a i te mau nota o te mau mea tāna i ha’api’i mai. ’Ua fa’ata’a mai ’oia ē, « i te mau taime ato’a e tuatāpapa vau, e pure au nō ni’a i te mea tā’u i ha’api’i mai, ’e e ’ite au i te hau ’e te ’oa’oa, e māramarama tō’u ferurira’a, ’e e marū tō’u ’ā’au. E fāri’i au i te Vārua Maita’i i te fa’a’ite-pāpū-ra’a mai iā’u ē, e parau mau te reira. ’Ua ’ite au ē, te Buka a Moromona, ’o te parau ïa a te Atua ».

Mai te taea’e Saw Polo, e nehenehe tātou tāta’itahi e tuatāpapa i te Buka a Moromona mai te au i tā tātou e nehenehe. ’A hia’ai ai tātou i te ti’aturi ’e i te feruri i tāna mau ha’api’ira’a i roto i tō tātou ’ā’au, e ti’a ia tātou e ani i te Atua ma te fa’aro’o e parau mau ānei te mau ha’api’ira’a.¹² Mai te peu e ’ā’au maita’i tō tātou i roto i tō tātou hia’ai ’ia ’ite ’e te hina’aro mau ’ia rave, e pāhono mai ’oia ia tātou nā roto i te Vārua Maita’i. ’E nā roto i te mana o te Vārua Maita’i e ’ite ai tātou i te parau mau i te mau mea ato’a.¹³ ’Ia fāri’i ana’e tātou i te hō’ē ’ite hanahana o te Buka a Moromona, e ’ite ato’a tātou nā roto i taua ā mana ē ’o Iesu Mesia te Fa’aora o te ao nei ē, ’o Iosepha Semita tāna peropheta ē, ’o Te ’Ēkālesia a Iesu Mesia i te Feiā Mo’a i te mau Mahana Hope’a Nei tāna ’Ēkālesia tei fa’aho’i-fa’ahou-hia mai.¹⁴

I tō’u ’āpīra’a ’a ha’amata ai au i tā’u tāvinira’a misiōnare, ’ua ta’uma vau i ni’a i te hō’ē manureva e tere ra i Auteraria. Ma te mana’o mo’emo’e, te hepohepo ’e te tano ’ore, ma te hina’aro mau rā e tāvini, e hia’ai rahi mau tō’u ’ia ha’apāpūhia mai iā’u ē e parau mau ānei te mea tā’u e ti’aturi nei. ’Ua pure au ’e ’ua tai’o pāpū vau i tā’u mau pāpa’ira’a mo’a, terā rā, ’a tere noa ai te manureva, te rahi noa atu ra tō’u mana’o tapitapi ’e ’ua fifi roa tō’u huru i te pae tino. I muri a’e e rave rahi hora tō’u ’arora’a, ’ua haere mai te hō’ē tuati manureva nā roto i te aro’a, ’e ’ua tāpe’a mai ra i pīha’i iho i tō’u pārahira’a. ’Ua rave mai ’oia i te Buka a Moromona tā’u e tai’o ra, i tō’u rima. ’Ua hi’o a’era ’oia i te ’api tāpo’i ’e ’ua nā ’ō mai ra, « e buka maita’i roa teie ! » i muri iho, fa’aho’i mai nei i te buka, ’e haere fa’ahou atura. ’Aita roa atu vau i ’ite fa’ahou iāna.

’A tāvevo noa ai tāna mau parau i roto i tō’u tari’a, ’ua fa’aro’o vau ’e ’ua ’ite pāpū maita’i i roto i tō’u māfatu, « tei ’ō nei au, ’e ’ua ’ite au tei hea ’oe. ’A rave i te vāhi e mara’a ia ’oe, nā’u e ha’apa’o i te toe’a ». I roto i taua manureva ra i ni’a a’e i te moana Patifita, ’ua fāri’i au i te hō’ē ’itera’a pāpū nō’u iho nā roto i tā’u tuatāpapara’a i te Buka a Moromona ’e te mau muhumuhura’a a te Vārua Maita’i ē, ’ua ’ite tō’u Fa’aora o vai au ’e e parau mau te ’evanelia.

’Ua ha’api’i ’o Elder David A. Bednar ē : « Te ’itera’a ē, e parau mau te ’evanelia ’o te ora ïa ’o te ’itera’a pāpū. Te ha’apa’o-tāmau-ra’a i te ’evanelia, ’o te ora ïa o te fa’afāriura’a ».¹⁵ E tītau te fa’afāriura’a ia tātou ’ia riro « ’ei feiā rave i te parau nei, ’eiaha ’ei feiā fa’aro’o noa ».¹⁶ Te fa’anahora’a ’ohipa a te Fatu nō tātou—te ha’api’ira’a tumu a te Mesia—’ua ha’api’ihia ïa ma te māramarama i roto i te Buka a Moromona.¹⁷ ’Oia ho’i :

’A tahi, te fa’a’ohipara’a i te fa’aro’o ia Iesu Mesia nā roto i te ti’aturira’a iāna, te ha’apa’ora’a i tāna mau fa’auera’a, ’e te ’itera’a ē, e tauturu mai ’oia ia tātou.¹⁸
Te piti, te tātarahapara’a i tā tātou mau hapa i te mau mahana ato’a ’e te fāri’ira’a i te ’oa’oa ’e te hau ’ia fa’a’ore ana’e ’oia i tā tātou mau hapa.¹⁹ E tītau te tātarahapa ia tātou ’ia fa’a’ore i te hapa a vetahi ’ē²⁰ ’e e tauturu ia tātou ’ia haere i mua. ’Ua fafau mai te Fa’aora e fa’a’ore ’oia i tā tātou mau hapa ’ia tātarahapa pinepine ana’e tātou.²¹
Te toru, te ravera’a ’e te ha’apa’ora’a i te mau fafaura’a ’e te Atua nā roto i te mau ’ōro’a mai te bāpetizora’a. Nā te reira e tāpe’a ia tātou i ni’a i te ’ē’a nō te fafaura’a ’o tē arata’i atu iāna ra.²²
Te maha, te fāri’ira’a i te hōro’araʼa o te Vārua Maita’i. Nā roto i teie hōro’a e fāri’i ai tātou i te auhoara’a tāmau o te hō’ē ’o tē ha’amo’a, ’o tē tāmāhanahana ’e ’o tē arata’i ia tātou.²³
Te pae, te fa’a’oroma’ira’a e tae noa atu i te hope’a ma te haere ti’a atu i mua ma te ’oa’oa i te mau mahana ato’a i te ’ite i te parau a te Mesia.²⁴ ’A ’oa’oa ai tātou i te Buka a Moromona ’e ’ia tāpe’a māite i tāna mau ha’api’ira’a, e nehenehe tātou e upo’oti’a i ni’a i te mau fa’ahemara’a ’e e fāri’i i te mau arata’ira’a ’e te pārurura’a i te roara’a o tō tātou orara’a.²⁵

Nā roto i te fa’a’ohipa-tāmau-ra’a i te ha’api’ira’a tumu a te Mesia i roto i tō tātou orara’a, e upo’oti’a tātou i ni’a i te ’ohipa ’ore ’o tē tāpe’a nei i te tauira’a, ’e te mata’u ’o tē tāpe’a nei i te ’ohipara’a. E fāri’i tātou i tā tātou iho heheura’a, nō te mea, nā te Vārua Maita’i « e fa’a’ite mai ia ’outou i te mau mea ato’a tā ’outou e rave »,²⁶ ’e nā « te parau a te Mesia e fa’a’ite ia ’outou i te mau mea tā ’outou e ha’apa’o ».²⁷

E 20 matahiti tō te taea’e Huang Juncong ’arora’a i te ’ava, te ’ava’ava ’e te ha’uti moni. I tōna fa’a’itera’ahia ia Iesu Mesia ’e i tāna ’evanelia i fa’aho’i-fa’ahou-hia mai, ’ua hina’aro te taea’e Huang e taui nō te maita’i o tōna ’utuāfare ’āpī roa. Tāna tītaura’a rahi roa a’e o te puhipuhira’a ïa i te ’ava’ava. ’Ei ta’ata puhipuhi ’ava’ava rahi, ’ua tāmata ’oia i te fa’a’ore e rave rahi taime, ’aita rā i manuia. I te hō’ē mahana, ’ua puta mai teie mau parau o te Buka a Moromona i roto i tōna ferurira’a : « ma te ’ā’au hina’aro mau, ma te mana’o pāpū ».²⁸ Noa atu ē, ’aita i manuia tāna mau tāmatara’a nā mua atu, ’ua mana’o ’oia ē, e nehenehe paha ’oia e taui nā roto i te tauturu a te Metua i te ao ra ’e a Iesu Mesia.

’Ua tāhō’ē te mau misiōnare rave tāmau i tō rāua fa’aro’o ’e i tōna ’e ’ua hōro’a iāna i te hō’ē fa’anahora’a fārereira’a, ’e tae noa atu i te pure ’ū’ana ’e te tuatāpapara’a i te parau a te Atua. Ma te ’ā’au tae ’e te hina’aro mau, ’ua ha’a te taea’e Huang ma te hina’aro pāpū ’e ’ua ’ite a’era ’oia ē, ’a fa’atumu rahi atu ai ’oia i ni’a i te mau peu tāna i hina’aro e fa’ahotu, mai te tuatāpapara’a i te Buka a Moromona, ’ua iti ïa tāna fa’atumura’a i ni’a i te mau peu tāna i hina’aro e fa’aru’e.

’A ha’amana’o ai ’oia i te ’ohipa i tupu a 15 matahiti i ma’iri, ’ua parau ’oia ē, « ’aita vau e ha’amana’o nei e aha mau te taime ’a fa’aru’e ai au i te ’ava’ava, terā rā, ’a tāmata ai au i te mau mahana ato’a, ma te itoito, ’ia rave i te mau mea tā’u i ’ite ē, e tītauhia iā’u ’ia rave nō te ani i te Vārua o te Fatu i roto i tō’u orara’a, ’e ’ia tāmau noa i te rave i te reira, ’aita vau i huti-fa’ahou-hia i ni’a i te ’ava’ava ’ē tae roa mai i teienei ». Nā roto i te fa’a’ohipara’a i te mau ha’api’ira’a a te Buka a Moromona, ’ua tauihia te orara’a o te taea’e Huang, ’e ’ua riro mai ’oia ’ei tāne fa’aipoipo ’e ’ei metua tāne maita’i a’e.

’Ua fafau mai te peresideni Russell M. Nelson ē : « Mai te mea ē, e tuatāpapa ’outou i te Buka a Moromona nā roto i te pure i te mau mahana ato’a, e rave ïa ’outou i te mau fa’aotira’a maita’i a’e—i te mau mahana ato’a. Tē parau fafau atu nei au ē, ’ia feruri māite ’outou i tā ’outou i tuatāpapa, e matara mai te mau ha’amāramarama o te ra’i ’e e fāri’i mai ’outou i te pāhonora’a i tā ’outou iho mau uira’a ’e te arata’ira’a nō tō ’outou iho orara’a. Tē parau fafau atu nei au ē, ’ia utuhi ’outou ia ’outou iho i roto i te Buka a Moromona i te mahana tāta’itahi, e nehenehe ’outou e pāruruhia i te mau ’ino o terā mahana, ’e tae roa atu i terā ma’i fifi nō te hōho’a faufau ’e tē tahi atu mau hia’ai fa’atītī ’e te fa’ata’ero ».²⁹

E hoa here mā, te Buka a Moromona o te parau ïa a te Atua, ’e e ha’afātata atu tātou iāna mai te mea ē, e tuatāpapa tātou i te reira.³⁰ ’A fa’a’ohipa ai tātou i tāna mau parau, e noa’a ia tātou te ’itera’a pāpū o tāna parau mau.³¹ ’A ora tāmau noa ai tātou mai te au i tāna mau ha’api’ira’a, e’ita ïa tātou e hina’aro fa’ahou e rave i te ’ino.³² E tauihia tō tātou ’ā’au, tō tātou huru, ’e tō tātou nātura ta’ata nō te riro hau atu mai te Fa’aora te huru.³³ Tē fa’a’ite atu nei au i tō’u ’itera’a pāpū ē, o Iesu te Mesia, tō tātou Fa’aora, te Ārai ’e te Hoa. I te i’oa o Iesu Mesia, ’āmene.