Girekomendar ngadto sa Ginoo
Sugdi ang proseso karon nga mahimong “girekomendar ngadto sa Ginoo” aron ang Iyang Espiritu magauban kaninyo kanunay.
Maayong buntag, mga kaigsoonan. Isip usa ka disipulo sa atong Manluluwas, si Jesukristo, naghinam-hinam ko sa panagpundok sa virtual nga paagi gikan sa tanang dapit sa kalibutan alang niini nga komperensya.
Usa gayud kini ka talagsaon nga tuig. Alang nako nagsugod kini sa usa ka buluhaton gikan sa Unang Kapangulohan sa pagpahinungod sa usa ka balaang templo ngadto sa Ginoo didto sa Durban, South Africa. Dili gayud nako makalimtan ang tumang kaanindot sa gambalay [building]. Apan labaw pa sa dapit, kanunay nakong ibahandi ang kaligdong sa mga tawo nga hilabihan ka andam nga mosulod nianang sagrado nga edipisyo. Miabut sila nga andam nga moambit sa usa sa labing mahinungdanong mga panalangin sa Pagpahiuli: ang pagpahinungod sa usa ka balay sa Ginoo. Miabut sila nga ang mga kasingkasing puno sa gugma alang Kaniya ug sa Iyang Pag-ula. Miabut sila nga puno sa pasalamat sa atong Amahan sa Langit sa paghatag sa sagradong mga ordinansa nga modala ngadto sa kahimayaan. Miabut sila nga takus.
Ang mga templo, bisan asa pa kini, molabaw gayud sa mga paagi sa kalibutan. Ang matag templo sa mga Santos sa Ulahing mga Adlaw sa kalibutan—tanang 168 niini—nagbarug isip mga testamento sa atong hugot nga pagtuo sa kinabuhing dayon ug sa hingpit nga kalipay sa paggahin niini uban sa atong mga pamilya ug sa atong Langitnong Amahan. Ang pagtambong sa templo mopalambo sa atong panabut bahin sa Dios nga Kapangulohan ug sa walay katapusang ebanghelyo, sa atong pasalig nga magpakabuhi ug motudlo sa kamatuoran, ug sa atong kaandam nga mosunod sa ehemplo sa atong Ginoo ug Manluluwas, nga si Jesukristo.
Sa gawas sa matag templo sa Simbahan mao ang haum nga mga pulong nga “Kabalaan ngadto sa Ginoo.” Ang templo mao ang balay sa Ginoo ug kadangpan gikan sa kalibutan. Ang Iyang Espiritu molukop niadtong mosimba sa sulod nianang sagrado nga mga bongbong. Gitakda Niya ang mga sumbanan diin kita mosulod isip Iyang mga bisita.
Ang akong ugangang lalaki, si Blaine Twitchell, usa sa pinakamaayong tawo nga akong nailhan sukad, mitudlo kanako og mahinungdanon nga leksyon. Si Sister Rasband ug ako mibisita kaniya sa dihang nagkaduol na siya sa katapusan sa iyang mortal nga panaw. Sa among pagsulod sa iyang kwarto, padulong na nga mobiya ang iyang bishop. Sa among pagtimbaya sa bishop, naghunahuna ko, “Pagkabuotan nga bishop. Ania siya nga nagbuhat sa iyang pagpangalagad sa usa ka matinud-anong sakop sa iyang ward.”
Mihisgot ko ni Blaine, “Dili ba nindot nga ang bishop mobisita.”
Mitan-aw si Blaine kanako ug mitubag, “Mas labaw pa niana. Mihangyo ko sa bishop nga moanhi kay gusto kong mainterbyu alang sa akong rekomend sa templo. Gusto kong mopanaw nga girekomendar ngadto sa Ginoo.” Ug mao gayud ang iyang gibuhat!
Kanang hugpong sa mga pulong, “girekomendar ngadto sa Ginoo,” nagpabilin kanako. Nakahatag kini og bag-ong panglantaw bahin sa pagpainterbyu kanunay sa atong mga lider sa Simbahan. Hilabihan ka importante ang usa ka rekomend sa templo nga sa bag-o pa ang Simbahan, hangtud pagka-1891, ang matag rekomend sa templo giendorso sa Presidente sa Simbahan. 1
Alang man sa mga batan-on o mga hamtong, ang inyong interbyu alang sa rekomend sa templo dili mahitungod sa mga angayang buhaton o mga dili angayang buhaton. Ang usa ka rekomend dili usa ka listahan, usa ka dokumento nga nagtugot sa tawo nga molapas sa lagda [hall pass], o tiket alang sa espesyal nga kalingkuran. Kini adunay mas labaw pa ug mas balaan nga katuyoan. Aron makwalipikado alang sa dungog nga makabaton og rekomend sa templo, kinahanglan kamong magpakabuhi nga nahiangay sa mga pagtulun-an sa Ang Simbahan ni Jesukristo sa mga Santos sa Ulahing mga Adlaw.
Sa inyong interbyu kamo adunay oportunidad sa pagsiksik sa inyong kalag mahitungod sa inyong personal nga hugot nga pagtuo diha ni Jesukristo ug sa Iyang Pag-ula. Kamo adunay panalangin sa pagpahayag sa inyong pagpamatuod bahin sa gipahiuli nga ebanghelyo; sa inyong kaandam nga mopaluyo niadtong gitawag sa Ginoo nga mangulo sa Iyang Simbahan; sa inyong hugot nga pagtuo diha sa doktrina sa ebanghelyo; sa inyong pagtuman sa mga responsibilidad sa pamilya; sa inyong mga hiyas sa pagkamatinuoron, kaputli, pagkamatinud-anon, pagkamasulundon, ug pagsunod sa Pulong sa Kaalam, sa balaod sa ikapulo, ug sa kabalaan sa adlaw nga Igpapahulay. Kadto ang pundasyon nga mga baruganan sa usa ka kinabuhi nga gipahinungod ngadto ni Jesukristo ug sa Iyang buhat.
Ang inyong rekomend sa templo nagpakita sa usa ka tinud-anay, espirituhanong tinguha nga naningkamot kamo sa pagsunod sa mga balaod sa Ginoo ug nahigugma sa Iyang mga gihigugma: pagkamapainubsanon, kalumo, pagkamakanunayon, gugmang putli, kaisug, kalooy, pagpasaylo, ug pagkamasulundon. Ug mopasalig kamo sa inyong kaugalingon niadtong mga sumbanan sa inyong pagpirma sa inyong ngalan nianang sagrado nga dokumento.
Ang inyong rekomend sa templo moabli sa mga ganghaan sa langit alang kaninyo ug sa uban nga adunay mga tulumanon ug mga ordinansa nga mahinungdanon sa kahangturan, lakip na ang mga bunyag, mga pagtuga, mga kaminyoon, ug mga pagsilyo.
Aron mahimong “girekomendar ngadto sa Ginoo” mao ang mapahinumduman sa unsay gilauman sa usa ka Santos sa Ulahing mga Adlaw nga nagtuman sa pakigsaad. Ang akong ugangan nga lalaki, si Blaine, nakakita nga bililhon kini nga pagpangandam alang sa adlaw nga mapainubsanon siyang mobarug sa atubangan sa Ginoo.
Ikonsiderar sa dihang si Moises mitungas sa Bukid sa Horeb ug ang Ginoo nga si Jehova mipakita kaniya sa usa ka nagdilaab nga sagbut. Ang Dios misulti kaniya, “Huboa ang imong sandalyas, kay balaan ang dapit nga imong gitindogan.” 2
Ang paghubo sa atong sandalyas diha sa pultahan sa templo mao ang pagsalikway sa kalibutanong mga tinguha o mga kalingawan nga makabalda kanato gikan sa espirituhanong paglambo, pagpadaplin niadtong mga butang nga makasamok sa atong bililhong mortalidad, dili magpakontrolar sa mabingkilon nga kinaiya, ug pagpangita og panahon aron mahimong balaan.
Pinaagi sa balaan nga plano, ang atong pisikal nga lawas usa ka nilalang sa Dios, usa ka templo alang sa atong espiritu, ug kinahanglang tagdon uban sa balaang pagtahud. Tinuod gayud ang mga pulong sa awit sa Primary: “Ang akong lawas usa ka templo [nga] nagkinahanglan sa hilabihan nga pag-atiman.” 3 Sa dihang ang Ginoo mipakita ngadto sa mga Nephite, Siya mimando, “Mahimo nga pagasantoson pinaagi sa pagdawat sa Espiritu Santo, aron mobarug nga walay lama sa akong atubangan.” 4 “Unsa nga matang sa mga tawo kamo mahisama?” nangutana ang Ginoo ug dayon mitubag, “Gani sama nga Ako mao.” 5 Aron mahimong “girekomendar ngadto sa Ginoo,” maningkamot kita nga mahisama Kaniya.
Nahinumdom ko nga naminaw ni Presidente Howard W. Hunter sa iyang unang pakigpulong sa kinatibuk-ang komperensya isip ika-14 nga Presidente sa Simbahan. Miingon siya: “Mao kini ang labing dakong tinguha sa akong kasingkasing nga ang matag miyembro sa Simbahan takus nga mosulod sa templo. Makapahimuot kini sa Ginoo kon ang matag hamtong nga miyembro mahimong takus—ug magdala—og usa ka magamit nga temple recommend.” 6 Akong idugang nga ang usa ka rekomend nga adunay limitasyon ang paggamit motakda og usa ka klaro nga dalan alang sa atong bililhong kabatan-onan.
Si Presidente Russell M. Nelson nahinumdom sa mga pulong ni Presidente Hunter: “Nianang adlawa, Hunyo 6, 1994, ang rekomend sa templo nga atong gidala nahimong usa ka lahi nga butang diha sa akong pitaka. Sa wala pa kana, nahimo kadtong usa ka pamaagi nga buhaton lamang aron makab-ot ang usa ka katuyoan. Usa kadto ka pamaagi nga magtugot kanako nga makasulod sa sagrado nga balay sa Ginoo; apan human siya mihimo niana nga pamahayag, nahimo na kanang usa ka katuyoan mismo. Kini nahimo nga akong simbolo sa pagkamasulundon ngadto sa usa ka propeta sa Dios.” 7
Kon modawat pa kamo og rekomend o kon ang inyong rekomend mi-expire na, paglinya diha sa pultahan sa bishop sama nga ang nag-unang mga Santos milinya didto sa pultahan sa Templo sa Nauvoo niadtong 1846. 8 Ang akong mga katigulangan apil niadtong mga matinud-anon. Gibiyaan nila ang ilang nindot nga siyudad ug mopaingon sa kasadpan, apan nasayud sila nga adunay sagradong mga kasinatian nga naghulat kanila didto sa templo. Misulat si Sarah Rich gikan sa lisud nga agianan didto sa Iowa, “Kon wala pa ang hugot nga pagtuo ug kahibalo nga gihatag ngari kanamo didto niana nga templo …, ang among biyahe mahimo unta nga … paglayat diha sa kangitngit.” 9 Kana ang mawala kanato kon moagi kita niining kinabuhia nga mag-inusara nga wala ang inspirasyon ug kalinaw nga gisaad diha sa templo.
Sugdi ang proseso karon nga mahimong “girekomendar ngadto sa Ginoo” aron ang Iyang Espiritu magauban kaninyo kanunay ug ang Iyang mga sumbanan magdala kaninyo og “kalinaw sa tanlag.” 10
Ang inyong mga lider sa kabatan-onan, presidente sa korum sa mga elder, presidente sa Relief Society, ug tigpangalagad nga mga kaigsoonan motabang kaninyo sa pag-andam, ug ang inyong bishop o presidente sa branch mahigugmaong mogiya kaninyo.
Nakasinati kita og panahon nga ang mga templo gisirad-an o gilimitahan ang paggamit. Alang ni Presidente Nelson ug kanamo nga nagserbisyo sa iyang kiliran, ang dinasig nga desisyon nga sirad-an ang mga templo “sakit” ug “puno sa hilabihan nga kabalaka.” Si Presidente Nelson mismo nangutana, “Unsay akong isulti ni Propeta Joseph Smith? Unsay akong isulti ni Brigham Young, Wilford Woodruff ug sa ubang mga Presidente, hangtud ni Presidente Thomas S. Monson?” 11
Karon, hinay-hinay ug mapasalamaton kitang miabli pagbalik sa mga templo alang sa mga pagsilyo ug mga pagtuga sa limitado nga paagi.
Ang mahimong takus nga motambong sa templo, hinoon, gikinahanglan gihapon. Akong ipasabut og maayo, makaadto man kamo sa templo o dili, magkinahanglan kamo og magamit nga rekomend sa templo aron magpabiling lig-on diha sa dalan sa pakigsaad.
Sa ulahing bahin sa miaging tuig si Sister Rasband ug ako adunay buluhaton didto sa New Zealand nga mamulong sa dakong pundok sa mga young single adult. Dili dayon sila makaadto sa templo; ang usa sa Hamilton gibag-o [renovate], ug naghulat pa sila sa groundbreaking alang sa templo sa Auckland. Hinoon, mibati ko nga naaghat sa pagdasig kanila sa pagbag-o [renew] o pagdawat og mga rekomend sa templo.
Bisan tuod nga dili kini makapresentar kanila sa templo, ilang mapresentar ang ilang kaugalingon sa atubangan sa Ginoo nga putli ug andam nga moserbisyo Kaniya. Ang pagkahimong takus nga maghupot og magamit nga rekomend sa templo usa ka proteksyon gikan sa kaaway, tungod kay mihimo kamo og lig-ong pasalig ngadto sa Ginoo mahitungod sa inyong kinabuhi, ug usa ka saad nga ang Espiritu magauban kaninyo.
Naghimo kita og buhat sa templo kon mosiksik kita sa atong mga katigulangan ug mosumiter sa ilang mga ngalan alang sa mga ordinansa. Samtang ang atong mga templo gisirad-an, makahimo pa gihapon kita sa pagsiksik sa atong mga pamilya. Uban sa Espiritu sa Dios diha sa atong kasingkasing, kita, pinaagi sa proxy, magbarug alang kanila nga mahimong “girekomendar ngadto sa Ginoo.”
Sa dihang nagserbisyo ko isip Executive Director sa Temple Department, nakadungog ko ni Presidente Gordon B. Hinckley nga mipasabut niini nga kasulatan nga gipamulong sa Ginoo mahitungod sa Templo sa Nauvoo: “Himoa ang buluhaton sa akong templo, ug ang tanan nga mga buluhaton diin Ako mitudlo nganha kaninyo, magpadayon ug dili mohunong; ug himoa ang inyong mga kakugi, ug ang inyong malungtaron, ug mapailubon, ug ang inyong mga buluhaton madugangan pag-usab, ug dili gayud mawala ang inyong ganti, miingon ang Ginoo sa mga Panon.” 12
Ang atong trabaho diha sa templo adunay kalabutan sa atong mahangturong ganti. Bag-ohay lang gisulayan kita. Ang Ginoo mitawag kanato nga magtrabaho diha sa mga templo uban sa “kakugi, … malungtaron, ug mapailubon.” 13 Ang mahimong “girekomendar ngadto sa Ginoo” nagkinahanglan niadtong mga hiyas. Kinahanglan gayud nga magmakugihon kita sa pagsunod sa mga sugo, molahutay diha sa atong pagtagad sa atong mga pakigsaad sa templo, ug magmapasalamaton sa unsay padayon nga gitudlo sa Ginoo mahitungod niini ug magmapailubon samtang maghulat kita nga ang mga templo hingpit na nga maabli pag-usab.
Kon ang Ginoo motawag kanato nga “doblehon pa” ang atong mga paningkamot, naghangyo Siya nga kita molambo diha sa pagkamatarung. Sama pananglit, mahimo natong lugwayan ang atong pagtuon sa mga kasulatan, ang atong pagsiksik sa family history, ug ang atong mga pag-ampo inubanan sa hugot nga pagtuo nga atong mapaambit ang atong gugma alang sa balay sa Ginoo niadtong nangandam nga modawat og rekomend sa templo, ilabi na ang mga sakop sa atong pamilya.
Mosaad ko kaninyo nga isip usa ka Apostol ni Ginoong Jesukristo nga samtang maninguha kamo nga doblehon pa ang inyong matarung nga mga paningkamot, mobati kamo nga nabag-o diha sa inyong debosyon ngadto sa Dios nga Amahan ug ni Jesukristo, mobati kamo kanunay sa Espiritu Santo nga naggiya kaninyo, magmapasalamaton kamo alang sa inyong sagradong mga pakigsaad, ug mobati kamo og kalinaw nga masayud nga kamo “girekomendar ngadto sa Ginoo.” Sa ngalan ni Jesukristo, amen.