Konafesi Aoao
Ua Matou Tautalatala e uiga ia Keriso
Konafesi Aoao ia Oketopa 2020
15:1

Matou te Tautalatala e uiga ia Keriso

Saunia e Elder Neil L. Andersen

O Le Korama a Aposetolo e Toasefululua

A o faaitiitia le tautalatala o le lalolagi e uiga ia Iesu Keriso, tau ina ia faateleina lo tatou tautalatala e uiga ia te Ia.

Ou te ta’u atu lo’u alofa mo outou, a tatou uo peleina ma le au soo. Ou te faamemelo i lo outou faatuatua ma le lototetele i nei masina ua mavae atu, a o faasalaveia e lenei faama’i pipisi i le lalolagi atoa o tatou olaga ma aveese atu tagata pele o o tatou aiga ma uo peleina.

I lenei vaitau o le fememea’i, ua ou lagonaina ai se agaga faafetai e le masani ai mo lo’u malamalama moni ma mautinoa o Iesu o le Keriso. Pe na faapena ni ou lagona? E i ai faigata e mamafatu i luga o i tatou taitoatasi, ae e i ai pea i o tatou luma o Ia o le na folafola mai ma le faamaulalo, “O A’u o le ala, upumoni, ma le ola.”1 E ui ina tatou onosaia se vaitau o le tuu vavamamao faaletino o i tatou lava mai i isi, e le tatau lava ona tatou onosaia se vaitau o le tuu vavamamao faaleagaga o i tatou lava mai ia te Ia o le o loo valaau mai ma le alofa ia i tatou, “O mai ia te a’u.”2

E faapei o se fetu taiala i se lagi manino, ma pouliuli, e faamalamalama e Iesu Keriso lo tatou ala. Na afio mai o Ia i le lalolagi i se falemanu faatauvaa. Sa soifua o Ia i se olaga atoatoa. Sa Ia faamalolo i e mamai ma faatulai mai e na oti. Sa avea o Ia o se uo i e na tuulafoaiina. Sa Ia aoao i latou ia fai mea lelei, ia usitai, ma ia alofa le tasi i le isi. Na faasatauroina o Ia i luga o le satauro, ma toetu mamalu mai ina ua mavae aso e tolu, ua mafai ai e i tatou ma i latou tatou te alolofa i ai ona ola i tua atu o le tuugamau. Faatasi ai ma Lona alofa mutimutivale ma le alofa tunoa e le mafaatusalia, na Ia tauaveina ai Ona lava luga a tatou agasala ma o tatou puapuaga, aumaia le faamagaloga pe a tatou salamo ma le toafilemu i afā o le olaga. Tatou te alolofa ia te Ia. Tatou te tapuai ia te Ia. Tatou te mulimuli ia te Ia. O Ia o le taula o o tatou agaga.

O le mea e malie ai, e ui o lenei talitonuga maumaututu faaleagaga o loo faatupulaia i totonu o i tatou, ae e toatele o i le lalolagi, e itiiti so latou iloa e uiga ia Iesu Keriso, ma i nisi o itu o le lalolagi lea ua fia seneturi o folafolaina ai Lona suafa, ua faaitiitia ai le faatuatua ia Iesu Keriso. Ua vaaia e le Au Paia totoa i Europa le fai ifo o le talitonuga i o latou atunuu i le aluga o le tele o tausaga.3 O le mea e faanoanoa ai, o iinei i le Iunaite Setete, ua faaitiitia foi le faatuatua. Ua faaalia i se suesuega lata mai nei, o le 10 tausaga ua mavae atu e 30 miliona tagata i le Iunaite Setete ua laa ese mai le talitonu i le paia o Iesu Keriso.4 A tilotilo i le lalolagi atoa, ua valoia e se isi suesuega e faapea, o le tele o tausaga o lumanai, e sili atu i le faaluaina le toatele o le a tuua le faaKerisiano o le a taliaina.5

O le mea moni, tatou te faaaloalo i aia tatau a tagata taitoatasi e filifili ai, ae na folafola mai e le Tama Faalelagi: “O lo’u Atalii pele lenei, faalogo ia te ia.”6 Ou te molimau atu, o le a oo mai le aso o le a tootutuli ai tulivae uma ma ta’uta’u atu e laulaufaiva uma o Iesu o le Keriso.7

O le a faapefea ona tatou tali atu i lo tatou lalolagi fesuisuiai? E ui ua tuulafoai e nisi o latou faatuatua, ae o loo saili lava isi mo le upumoni. Ua tatou tauaveina i o tatou lava luga le suafa o le Faaola. O le a la se mea tatou te faia?

O Le Sauniuniga a Peresitene Russell M. Nelson

O se vaega o la tatou tali e mafai ona oo mai pe a tatou manatua le ala na aoaoina ai e le Alii ia Peresitene Russell M. Nelson i masina a o lumanai ai lona valaauga o le Peresitene o le Ekalesia. I le saunoa atu ai i le tasi le tausaga a o le’i valaauina o ia, na valaaulia ai e Peresitene Nelson i tatou ina ia suesue loloto atili i faalaniga e 2,200 o le suafa o Iesu Keriso o loo lisiina i le Taiala o Autu.8

Peresitene Nelson o loo suesue i tusitusiga paia

O le tolu masina mulimuli ane i le konafesi aoao ia Aperila, sa ia saunoa ai i le ala, e ui i le tele o tausaga o le avea ma soo tuuto, na matuai aafia ai o ia i lenei suesuega loloto atili ia Iesu Keriso. Na fesili Sister Wendy Nelson ia te ia e uiga i lona aafiaga ai. Sa tali o ia, “Ua avea a’u ma se tagata ua ese!” O ia o se tagata ese? I le 92 o tausaga, o se tagata ese? Na faaopoopo mai Peresitene Nelson:

“A tatou faaalu aoga le taimi e aoao ai e uiga i le Faaola ma Lana taulaga togiola, tatou te tosina atu ia te [Ia]. …

“… O la tatou taulaiga e [faapea] ona tāmau i le Faaola ma Lana talalelei.”9

Sa fetalai mai le Faaola, “Vaai mai ia te a’u i mafaufauga uma.”10

I se lalolagi o galuega, popolega, ma taumafaiga aoga, tatou te tuu atu ai o tatou loto, o tatou mafaufau, ma o tatou manatu ia te Ia o lē o lo tatou faamoemoe ma le faaolataga.

Afai sa fesoasoani se suesuega faafouina e uiga i le Faaola ia Peresitene Nelson, mata e le mafai ona saunia ai foi i tatou?

Peresitene Russell M. Nelson

I le faamamafaga o le igoa o le Ekalesia, na aoao mai ai Peresitene Nelson, “Afai … e tatau ona tatou maua le mana o le Togiola a Iesu Keriso—e faamama ma faamalolo ai tatou, e faamalosia ma faalauteleina ai tatou, ma mulimuli ane faaeaina ai i tatou—e tatau ona tatou faamamaluina ma le manino o Ia o le puna o lena mana.”11 Na aoao mai Peresitene Nelson ia i tatou, o le faaaogaina i taimi uma o le igoa sa’o o le Ekalesia, o se mea e ono foliga mai e itiiti, e le o se mea itiiti, ma o le a matuai mamanu ai le lumanai o le lalolagi.

O Se Folafolaga mo Au Sauniuniga

Ou te folafola atu ia te outou ao tou saunia outou lava, e pei ona sa faia e Peresitene Nelson, o le a outou ese foi, o le a mafaufau atili e uiga i le Faaola, tautalatala soo atili e uiga ia te Ia, ma le tau lē musuā. A oo ina outou iloa ma atili loloto le alofa ia te Ia, o le a solo lelei a outou upu, e pei ona i ai pe a outou talanoa e uiga i se tasi o a outou fanau po o se uo pele. O i latou o loo faalogo ia te oe o le a itiiti le lagona e pei o felafolafoai pe e le o amanaiaina oe ma sili atu ona pei o loo aoao mai ia te oe.

O outou ma a’u o loo tautalatala e uiga ia Iesu Keriso, ae e mafai ona tatou faia ma sina lelei teisi atu. Afai o le a faaitiitia ona tautalatala le lalolagi e uiga ia te Ia, o ai o le a talanoa atili e uiga ia te Ia? O i tatou! Faatasi ai ma isi au Kerisiano tuuto!

Talanoa e uiga ia Keriso i o Tatou Aiga

Pe o i ai ni ata o le Faaola i totonu o tatou maota? Pe o tatou talanoa soo ia tatou fanau e uiga i faataoto a Iesu? “O tala ia Iesu [ua] pei o se matagi e tapili ai malala ola o le faatuatua i loto o a tatou fanau.”12 A fesili atu lau fanau ia te oe, ia mafaufau ma le iloa lelei e aoao atu e uiga i mea na aoao mai e le Faaola. Mo se faataitaiga, afai e fesili atu lou atalii, “Tama, aisea tatou te tatalo ai? Atonu e te tali atu, “Manaia tele lena fesili. E te manatua le taimi na tatalo ai Iesu? Ta talanoa i le mafuaaga na Ia tatalo ai ma le ala na Ia tatalo ai.”

“Ua matou tautalatala e uiga ia Keriso, … ina ia mafai ona iloa e a matou fanau po o le a le puna e mafai ona latou tepa taulai i ai mo se faamagaloga o a latou agasala.”13

Talanoa e uiga ia Keriso i le Ekalesia

Ua faaopoopo mai lenei lava mau faapea “tatou te tala’i atu Keriso.”14 I a tatou sauniga tapuai, tau ina ia tatou taulai atu i le Faaola o Iesu Keriso ma le meaalofa o Lana taulaga togiola. E le faapea e le mafai ai ona tatou faamatala e uiga i se aafiaga mai o tatou lava olaga pe faasoa atu manatu mai isi. E ui o a tatou autu atonu e faatatau i aiga po o auaunaga po o malumalu po o se misiona talu ai nei, o mea uma i la tatou tapuaiga e tatau ona faasino atu i le Alii o Iesu Keriso.

O le tolusefulu tausaga ua mavae, na saunoa ai Peresitene Dallin H. Oaks e uiga i se tusi sa ia mauaina “mai i se alii o lē na fai mai, sa auai i se sauniga [faamanatuga] ma faalogologo ai i ni molimau se sefulufitu sa le’i ta’uaina ai le Faaola.”15 Ona saunoa lea o Peresitene Oaks, “Atonu ua faateleina lena faamatalaga [ae] ua ou sii maia ona e tuuina atu ai se faamanatu manino mo i tatou uma.”16 Ona ia valaaulia lea o i tatou ia faateleina ona talanoa e uiga ia Iesu Keriso ia tatou lauga ma talanoaga i le vasega. Ua ou matauina ua faateleina pea lava pea ona tatou taulai atu ia Keriso i a tatou sauniga faaleEkalesia. Ia faaauau pea ona tatou mataala i nei taumafaiga lelei.

Talanoa e uiga ia Keriso faatasi ma Isi

Faatasi ai ma i latou o siomia i tatou, ia faateleina ona tatou talanoa faamaoni, ma faateleina le naunau e talanoa e uiga ia Keriso. Sa saunoa mai Peresitene Russell M. Nelson, “O soo moni o Iesu Keriso ua loto e tutu atu, tautatala atu, ma ia ese ai mai tagata o le lalolagi.”17

O nisi taimi tatou te manatu ai o se talanoaga ma se isi tagata e tatau ona iu ane ua latou o mai ai i le lotu pe vaai ai faifeautalai. Ia tuu i le Alii e taiala i latou pe a latou loto i ai, a o tatou mafaufau atili e uiga i lo tatou tiutetauave ia avea ma fofoga mo Ia, ia magafagafa ma faamaoni e uiga i lo tatou faatuatuaga. Na aoao i tatou e Elder Dieter F. Uchtdorf e faapea, a fesili mai se tasi ia i tatou pe na faapei mai le faaiuga o la tatou vaiaso, e tatau ona tatou naunau e tali fiafia atu faapea, sa tatou fiafia lava e faalogologo i le pepese o tamaiti o le Peraimeri, “O loo o’u taumafai e avea e pei o Iesu.”18 Tau ina ia tatou molimau agalelei atu i lo tatou faatuatua ia Keriso. Afai e faasoa mai e se tasi se faafitauli i lona olaga patino, atonu tatou te faapea atu, “Ioane, Maria, ua e iloa ou te talitonu ia Iesu Keriso. Sa ou mafaufau lava i se mea sa Ia fetalaia mai e ono fesoasoani ia te oe.”

Ia atili faamaoni i ala o faasalalauga faaagafesootai i le talanoa e uiga i lou faatuatuaina o Keriso. O le a faaaloalogia e le toatele lou faatuatua, ae afai e tetee se tasi pe a e tautala e uiga i le Faaola, ia lototele i Lana folafolaga: “Amuia outou pe a latou upu leaga … ia te outou … ona o a’u. … Aua o i le lagi lo outou taui e tele.”19 E sili atu ona tatou popole i le avea ma Ona soo nai lo le “fiafia” mai o o tatou lava soo. Sa fautua mai Peteru: “Ia saunia pea lava outou e tali atu [mo] le faamoemoe o loo ia te outou.”20 Ia tatou tautalatala e uiga ia Keriso.

O le Tusi a Mamona o se molimau mamana ia Iesu Keriso. E toetoe lava o itulau uma e molimau mai i le Faaola ma Lana misiona paia.21 O se malamalamaaga e uiga i Lana Togiola ma le alofa tunoa ua faatumulia ai ona itulau. I le avea ai o se soa i le Feagaiga Fou, ua fesoasoani le Tusi a Mamona tatou te malamalama lelei ai i le pogai na afio mai ai le Faaola e laveai i tatou ma le ala e mafai ai ona faaloloto atili lo tatou o atu ia te Ia.

O nisi o o tatou uso a Kerisiano e i ai taimi, e le mautonu ai i o tatou talitonuga ma popole i o tatou faamoemoega. Ia tatou olioli moni faatasi ma i latou i lo tatou faatuatua tuufaatasi ia Iesu Keriso ma i mau o le Feagaiga Fou lea tatou te fiafia uma i ai. I tausaga o lumanai, o i latou o e talitonu ia Iesu Keriso o le a manaomia le faauooga ma le lagolago a le tasi ma le isi.22

O Le Malamalama o le Lalolagi

A o faaitiitia le tautatala o le lalolagi e uiga ia Iesu Keriso, tau ina ia faateleina lo tatou tautatala e uiga ia te Ia. A o faaali atu o tatou lanu moni o ni Ona soo, o le toatele o loo siomia i tatou o le a saunia e faalogo. A o tatou faasoa atu le malamalama ua tatou mauaina mai ia te Ia, o Lona malamalama ma Lona mana laveai paia o le a susulu atu i luga o i latou o e naunau e tatala o latou loto. Na fetalai Iesu, “Ua ou sau o [se] malamalama i le lalolagi.”23

Siitia o o Tatou Manaoga e Talanoa e uiga ia Keriso

E leai se mea e faaosofia ai lo’u manao e tautala e uiga ia Keriso nai lo le vaai atu faalemafaufau i Lona toe afio mai. E ui tatou te le iloa pe o afea o le a Ia toe foi mai ai, ae o mea e tutupu i Lona toe afio mai o le a ofoofogia! O le a afio mai o Ia i ao o le lagi i le mamalu ma le matagofie faatasi ma Ana agelu paia uma. E le na’o ni nai agelu, ae o Ana agelu uma lava. E le o le kerupi alafau mūmū na valiina e Lafaele lea tatou te vaaia uma i luga o a tatou kata Valenitina. O agelu nei o seneturi, o agelu na auina mai e tapunipuni gutu o leona,24 e talai faitotoa o falepuipui,25 e fofoga mai Lona soifua mai ua leva ona talitalia,26 e faamafanafana o Ia i Ketesemane,27 e faamautinoa i Ona soo i Lona Afio A’e,28 ma ia tatala le Toefuataiga matagofie o le talalelei.29

O Le Afio Mai Faalua

Pe mafai ona tatou vaai faalemafaufau ua aveina a’e i tatou e faafetaiai o Ia a le o i le itu lenei, po o le isi itu o le veli?30 O Lana folafolaga lena i e amiotonu. O lenei aafiaga ofoofogia o le a faailoga ai o tatou agaga e faavavau.

Tatou te matuai faafetai mo lo tatou perofeta peleina o Peresitene Russell M. Nelson, o lē ua siitiaina lo tatou manao ia alolofa i le Faaola ma tautino atu Lona paia. O a’u o se molimau vaaitino i le aao o le Alii i ona luga ma le meaalofa o faaaliga o loo taiala ai o ia. Peresitene Nelson, matou te faatalitali atu ma le naunautai i au fautuaga.

A’u uo pele i le salafa o le lalolagi, tatou tautalatala e uiga ia Keriso, manatua Lana folafolaga matagofie, “Ai se … ta’uta’u a’u i luma o tagata, … ou te ta’uta’uina o ia i luma o lo’u Tama.”31 Ou te molimau o Ia o le Alo o le Atua. I le suafa o Iesu Keriso, amene.

Faamatalaga

  1. Ioane 14:6.

  2. Mataio 11:28

  3. Tagai Niztan Peri-Rotem, “Religion and Fertility in Western Europe: Trends across Cohorts in Britain, France and the Netherlands,” European Journal of Population, May 2016, 231–65, ncbi.nlm.nih.gov/pmc/articles/PMC4875064.

  4. “[E onesefulu-lima pasene] o tagata matutua Amerika ua faamatalaina i latou lava o ni Kerisiano pe a fesiligia e uiga i a latou tapuaiga, ua pau i lalo i le 12 pasene ‘ai i le silia ma le sefulu tausaga talu ai. O le taimi nei, o le faitau aofai o i latou e le aofia ai i tulaga faalelotu, e aofia ai tagata ua faamatalaina o latou faasinomaga tau lotu e le talitonu i se atua, e faafitia le mea moni pe ‘leai se e patino,’ ua tulai mai nei i le 26%, ua sii i luga mai le 17% i le 2009” (Pew Research Center, “In U.S., Decline of Christianity Continues at Rapid Pace,” Oct. 17, 2019, pewforum.org).

  5. Tagai Pew Research Center, “The Future of World Religions: Population Growth Projections, 2010–2050,” Apr. 2, 2015, pewforum.org

  6. Mareko 9:7; Luka 9:35; tagai foi Mataio 3:17; Iosefa Samita—Talafaasolopito 1:17.

  7. Tagai i le Filipi 2:9–11.

  8. Tagai Russell M. Nelson, “O Perofeta, Taitaiga, ma le Tulafono Faalelagifaigalotu i le lalolagi atoa mo talavou matutua, 8 Ian, 2017), broadcasts.ChurchofJesusChrist.org.

  9. Russell M. Nelson, “Mauaina o le Mana o Iesu Keriso i o Tatou Olaga,” Liahona, Me 2017, 39–42.

  10. Mataupu Faavae ma Feagaiga 6:36.

  11. Russell M. Nelson,“O Le Igoa Sa’o o le Ekalesia,” Liahona, Nov. 2018, 88.

  12. Neil L. Andersen, “Ta’u Mai Tala ia Iesu,” Liahona, Me 2010, 108.

  13. 2 Nifae 25:26.

  14. 2 Nifae 25:26.

  15. Dallin H. Oaks, “Another Testament of Jesus Christ” (faeasaite a le Iunivesite a Polika Iaga, 6 Iuni, 1993), 7, speeches.byu.edu.

  16. Dallin H. Oaks, “Witnesses of Christ,” Ensign, Nov. 1990, 30.

  17. Russell M. Nelson, “Mauaina o le Mana o Iesu Keriso i o Tatou Olaga,” 40.

  18. Tagai Dieter F. Uchtdorf, “Galuega Faafaifeautalai: Faasoaina Atu o Mea o Loo i Totonu o Lou,” Liahona, Me 2019, 17; “O Loo Ou Taumafai e Avea e Pei o Iesu,” Tusipese a Tamaiti, 78.

  19. Mataio 5:11–12.

  20. 1 Peteru 3:15.

  21. “E pei ona tusia e [tusitala faaperofeta o le Tusi a Mamona] a latou molimau e uiga i le Mesia na folafolaina, sa latou ta’ua nisi o ta’uga o lona suafa i se averesi o le 1.7 o fuaiupu uma. Sa [latou] faasino atu ia Iesu Keriso e ala i, suafa moni, eseese e 101. … Pe a tatou iloaina o se mau e masani lava ona aofia ai se fuaiupu e tasi, e foliga mai, i se averesi, e le mafai ona tatou faitaua ni fuaiupu se lua i le Tusi a Mamona e aunoa ma le vaaia o ni ta’uga o le suafa o Keriso” (Susan Easton Black, Finding Christ through the Book of Mormon [1987], 5, 15).

    “E ui o upu totogi po o le togiola, i soo se ituaiga, e na o le faa-tasi ona alia’e mai i le faaliliuga o le King James o le Feagaiga Fou, ae e faa-35 ona alia’e mai i le Tusi a Mamona. I le avea ai o se molimau ia Iesu Keriso, o loo faasoa maia le malamalama taua o Lana Togiola” (Russell M. Nelson, “O Le Togiola,” Ensign, Nov. 1996, 35.)

  22. O i latou ua tuua le faaKerisiano i le Iunaite Setete e talavou. “E silia ma le toavalu-mai-le toasefulu tagata o le Tupulaga Le Leoa (o i latou na fananau mai i le va o le 1928 ma le 1945) ua faamatalaina i latou lava o Kerisiano (84%), e faapena foi le tolu-kuata o Baby Boomers (76%). I se faatusatusaga iloga, e na o le afa o le faitauga Faameleniuma (49%) ua faamatalaina i latou lava o Kerisiano; e toafa-mai-le toasefulu o ni ituaiga” faalelotu, ae tasi-mai-le toasefulu le faitauga faaMeleniuma e faitaulia ma faatuatuaga e le-FaaKerisiano” (“I le U.S., Decline of Christianity Continues,” pewforum.org)

  23. Ioane 12:46.

  24. Tagai i le Tanielu 6:22.

  25. Tagai i le Galuega 5:19.

  26. Tagai i le Luka 2:2–14.

  27. Tagai i le Luka 22:42–43.

  28. (Tagai i le Galuega 1:9-11.)

  29. Tagai i le Mataupu Faavae ma Feagaiga 13; 27:12–13; 110:11–16; Iosefa Samita—Talafaasolopito 1:27–54.

  30. Tagai i le 1 Tesalonia 4:16–17; Mataupu Faavae ma Feagaiga 88:96–98.

  31. Mataio 10:32.