Ia Faamuamua le Atua
O e loto e faamuamua le Atua i lou olaga? O e loto e avea le Atua ma faatosinaga sili ona taua i lou olaga?
O’u uso e ma tuafafine pele, e ma’eu lo’u faafetai mo savali ofoofogia o lenei konafesi ma lo’u avanoa e lauga atu ai ia te outou i le taimi nei.
Mo le silia ma le 36 tausaga o avea a’u ma se Aposetolo, o le aoaoga faavae o le faapotopotoina o Isaraelu ua gauai lava i ai la’u taulaiga.1 O mea uma e faatatau i ai ua faagaeetia ai a’u, e aofia ai tofi ma igoa2 o Aperaamo, Isaako, ma Iakopo; o latou olaga ma a latou āva; o le feagaiga na osia e le Atua ma i latou ma tuufaasolo mai ai i lo latou gafa;3 o le faata’ape’apeina o ituaiga e sefululua; ma le anoano o valo’aga e uiga i le faapotopotoina i o tatou aso.
Ua ou suesueina le faapotopotoina, tatalo e uiga i ai, faitau loloto i mau uma e fesootai i ai, ma ōle atu i le Alii ia faateleina lo’u malamalama.
O lea la ia vaai faalemafaufau i lo’u fiafia tele ina ua taitai atu a’u talu ai nei i se malamalamaaga fou. Faatasi ai ma le fesoasoaniga a ni polofesa Eperu se toalua, na ou iloa ai o se tasi o uiga FaaEperu o le upu Isaraelu o le “ia faamuamua le Atua.”4 O lea o le igoa moni o Isaraelu e faasino i se tagata o loo loto e faamuamua le Atua i lona olaga. O lena manatu faavae ua gaepuina lo’u agaga!
O le upu loto e taua i lenei faauigaga o Isaraelu.5 E tofu i tatou uma ma lo tatou faitalia. E mafai ona tatou filifili ia avea ma Isaraelu, pe leai. E mafai ona tatou filifili e faamuamua le Atua i o tatou olaga, pe leai. E mafai ona tatou filifili e avea le Atua ma faatosinaga sili ona mamana i o tatou olaga, pe leai.
Mo se taimi, se’i o tatou mafaufau i se vaega taua na liua ai le olaga o Iakopo, le atalii o le atalii o Aperaamo. I le nofoaga na faaigoaina e Iakopo o Penieli (o lona uiga “o le fofoga o le Atua”),6 sa tauivi ai Iakopo ma se luitau ogaoga. Sa tofotofoina lana faitalia. I lenei tauiviga, na faamaonia ai e Iakopo le mea na sili ona taua ia te ia. Na ia faaali atu sa loto o ia e faamuamua le Atua i lona olaga. I se tali mai, sa suia ai e le Atua le igoa o Iakopo ia Isaraelu7 o lona uiga “ia faamuamua le Atua.” Ona folafola atu lea e le Atua ia Isaraelu o faamanuiaga uma na folafola atu i luga o le ao o Aperaamo o le a avea foi ma ana.
O le mea e faanoanoa ai, na solia e le fanauga a Isaraelu a latou feagaiga ma le Atua. Na latou fetogia perofeta i maa ma sa le’i loto e faamuamua le Atua i o latou olaga. Mulimuli ane, na faata’ape’apeina i latou i tulu’iga e fa o le lalolagi.9 Ma le alofa mutimutivale, sa Ia folafola mai ai mulimuli ane e faapotopoto i latou, e pei ona ta’ua i le Isaia: “Sa ou lafoaiina oe [Isaraelu] mo sina minute itiiti, ae o le a ou faapotopoto mai oe ma le alofa mutimutivale tele.”10
Faatasi ma le uiga FaaEperu o le Isaraelu i le mafaufau, ua tatou iloa ai o le faapotopotoina o Isaraelu ua i ai ma lona uiga faaopoopo. O loo faapotopotoina e le Alii i latou o loo loto e faamuamua le Atua i o latou olaga. O loo faapotopotoina e le Alii i latou o le a filifili e avea le Atua ma faatosinaga sili ona taua i o tatou olaga.
Mo le tele o seneturi, na valo’ia ai lava e perofeta lenei faapotopotoina,11 ma o loo tupu i le taimi nei lava! I le avea ai ma se teuteu ala taua i le Afio Mai Faalua o le Alii, o le galuega aupito sili ona taua lea i le lalolagi!
O lenei faapotopotoina a o lumanai ai le meleniuma o se talatuu faaletagata lava ia o le faalauteleina o le faatuatua ma le lototele faaleagaga mo le faitau miliona o tagata. Ma i le avea ai ma tagata O Le Ekalesia a Iesu Keriso o le Au Paia o Aso e Gata Ai, po o le “feagaiga a Isaraelu o aso e gata ai,”12 ua poloaiina ai i tatou e fesoasoani i le Alii i lenei galuega taua tele.13
Pe a tatou talanoa e uiga i le faapotopotoina o Isaraelu i itu uma e lua o le veli, o le mea moni o loo tatou faasino atu i le galuega faafaifeautalai, malumalu, ma talafaasolopito o aiga. O loo tatou faasino atu foi i le fausiaina o le faatuatua ma le molimau i loto o i latou o loo tatou ola faatasi, galulue, ma auauna i ai. Soo se taimi tatou te faia ai soo se mea e fesoasoani ai i soo se tasi—po o le fea lava itu o le veli—i le osia ma le tausia o feagaiga ma le Atua, ua tatou fesoasoani i le faapotopotoina o Isaraelu.
E le’i leva tele atu, sa tauivi ai faaleagaga le toalua o se tasi o atalii o le ma fanau. O le a ou faaigoa o ia ia “Jill.” E ui i le anapogi, tatalo, ma faamanuiaga faaleperisitua, sa vaivai lava le tama o Jill a talioti. Sa lofituina o ia i le fefe ina ne’i maliu lona tama ma leiloa ai ma lana molimau.
I le leva o se tasi afiafi, sa faamatala mai ai e lo’u toalua o Wendy le tulaga o Jill. O le taeao na sosoo ai sa uunaia Wendy e faasoa atu ia Jill e faapea o la’u tali i lana tauiviga faaleagaga, e na o le tasi lava le upu! O le upu o le myopic.
Mulimuli ane, sa tautino e Jill ia Wendy sa muamua lava faanoanoa i la’u tali. Sa ia fai mai, “Sa ou faamoemoe ia Tama matua na te folafola mai ia te a’u se vavega mo lo’u tama. O lea ou te tuufesili pe aisea na ia lagona ai o le upu myopic o le upu lea e tatau ona ta’u mai.
Ina ua mavae le maliu o le tama o Jill, sa oo mai pea le upu myopic i lona mafaufau. Sa ia tatala lona loto ia malamalama atili ai i le loloto o le uiga o le myopic o le “vaai lata mai.” Ma na amata ona suia lona mafaufau. Ona fai mai lea o Jill, o le “Vaai lata mai [Myopic] na mafua ai ona ou tu, mafaufau, ma faamaloloina. O lena upu ua faatumulia ai nei a’u i le filemu. Ua faamanatu mai ai ia te a’u ia faalautele la’u vaai ma saili atu i le faavavau. Ua faamanatu mai ia te a’u o loo i ai se fuafuaga paia ma o loo ola pea lo’u tama ma e alofa ma popole pea mo a’u. O le vaai lata mai na taitai atu ai a’u i le Atua.”
Ua ou mitamita lava i le ma afafine faaletulafono faapelepele. I lenei taimi o le lofituina tele o lona olaga, o loo aoao ai le pele ia Jill e talia le finagalo o le Atua mo lona tama, i se vaaiga e faavavau mo lona lava ia olaga. E ala i le filifili e faamuamua le Atua, ua ia mauaina ai le filemu.
Afai o le a tatou faatagaina, o loo tele lava auala i lenei faauigaga FaaEperu o le Isaraelu e mafai ona fesoasoani ia i tatou. Vaai faalemafaufau i le auala e mafai ona suia ai a tatou tatalo mo a tatou faifeautalai—ma mo a tatou taumafaiga e faapotopoto Isaraelu—pe a mafaufau i lenei manatu faavae. E tele ina tatou tatalo ia taitai atu i tatou ma faifeautalai ia i latou ua saunia e taliaina upumoni o le talalelei toefuataiina a Iesu Keriso. Ou te tomanatu, pe o ai o le a taitai atu i ai i tatou pe a tatou aioi atu ia saili i latou o ē ua loto e faamuamua le Atua i o latou olaga?
Atonu e taitai atu i tatou i se tasi e le’i talitonu lava i le Atua po o Iesu Keriso ae o loo naunau nei ia aoao e uiga ia te i La’ua ma le La fuafuaga o le fiafia. O isi atonu na “fananau i le feagaiga”14 ae ua fai si umi o se ese mai le ala o feagaiga. Atonu ua saunia nei i latou e salamo, toefoi mai, ma faamuamua le Atua. E mafai ona tatou fesoasoani ia i latou e ala i le talileleia o i latou i limamatala ma lotomatala. Ma o nisi atonu e taitai atu i ai i tatou atonu na lagonaina i taimi uma sa i ai lava se mea na misi i o latou olaga. O i latou foi o loo faanaunau mo le atoatoa ma le olioli lea e oo mai ia i latou o ē ua loto e faamuamua le Atua i o latou olaga.
O le upega o le talelelei ua faapotopoto ai Isaraelu ua faata’ape’apeina ua matua lautelē. O loo i ai se avanoa mo tagata taitoatasi o le a taliaina atoatoa le talalelei a Iesu Keriso. O tagata liliu mai taitoatasi e avea ma se tasi o fanau o le feagaiga a le Atua,15 pe na fanau mai ai pe ala i le vaetamaina. E avea tagata taitoatasi o se suli atoatoa i mea uma na folafolaina e le Atua i fanau faamaoni a Isaraelu!16
E tofu i tatou ma se gafatia paia ona o tagata taitoatasi o se atalii po o se afafine o le Atua. E tutusa tagata uma i Lana silafaga. O le aafiaga o lenei upumoni e loloto. Uso e ma tuafafine, faamolemole faalogo ma le toto’a i le mea o le a ou fai atu ai. E le sili le alofa o le Atua i le tasi ituaiga i lo le isi. Ua manino Lana aoaoga faavae i lenei mataupu. Ua Ia valaaulia tagata uma e o mai ia te Ia, “uliuli pe paʼepaʼe, e pologa pe saoloto, o tane ma fafine.”17
Ou te faamautinoa outou o lo tou tutu i luma o le Atua e le o fuafuaina i le lanu o lou pa’u. O le fiafia po o le le fiafia i le Atua e le faamoemoe i lou tuuto atu i le Atua ma Ana poloaiga ma e le o le lanu o lou pa’u.
Ou te faanoanoa i le onosa’ia e o tatou uso ma tuafafine Uli i le lalolagi atoa ia tiga o le faailoga lanu ma le faailoga tagata. O le asō ou te valaau atu ai i o tatou tagata o le Ekalesia i soo se mea ia taimua i le lafoa’i o uiga ma soo se faatinoga o le faailoga lanu. Ou te aioi atu ia te outou ina ia faailoa atu le faaaloalo mo tagata uma o fanau a le Atua.
O le fesili mo i tatou taitoatasi, tusa lava po o le a le lanu, e tutusa lava. O e loto e faamuamua le Atua i lou olaga? O e loto e avea le Atua ma faatosinaga sili ona taua i lou olaga? Pe o le a e faatagaina Ana afioga, Ana poloaiga, ma Ana feagaiga e faatosinaina mea e te faia i aso taitasi? Pe o le a e faatagaina Lona siufofoga ia faamuamua i lo se isi lava leo? O e loto e faataga soo se mea o finagalo o Ia e te faia ia faamuamua i lo isi faamoemoega uma? O e loto e tofatumoanaina lou loto i Lona finagalo?19
Mafaufau i le auala e mafai ona faamanuiaina ai oe i se loto faapena? Afai e te le’i faaipoipo ma o loo sailia se soa e faavavau, o lou manao ina ia avea ma se “Isaraelu” o le a fesoasoani ia te oe e filifili po o ai e te lua tafafao faamasani ma pe faapefea.
Afai o loo e faaipoipo i se soa ua ia solia ana feagaiga, o lou loto ina ia faamuamua le Atua i lou olaga o le a faatagaina ai au feagaiga ma le Atua ia tumau mausali. O le a faamaloloina e le Faaola lou loto nutimomoia. O le a matala le lagi a o e saili atu ia iloa pe faapefea ona agai i luma. E lē manaomia ona e fesesea’i pe fenumia’i.
Afai e i ai ni au fesili faamaoni e uiga i le talalelei po o le Ekalesia, a o e filifili e faamuamua le Atua, o le a taitai atu oe e maua ma malamalama i upumoni atoatoa e faavavau ia o le a taialaina lou olaga ma fesoasoani ia e tumau mausali ai i luga o le ala o feagaiga.
Pe a e feagai ma faaosoosoga—e tusa lava pe oo mai le faaosoosoga i le taimi ua e lēlavā ai pe lagonaina le tuuatoatasi pe malamalama sese foi—mafaufau i le lototele e mafai ona e aoina mai a o e filifili e faamuamua le Atua i lou olaga ma a o e aioi atu ia te Ia e faamalosi oe.
Afai o lou mana’o silisili o le faamuamua o le Atua, avea ma se vaega o Isaraelu, e tele faai’uga o le a faigofie atu ona fai. E tele na’ua faafitauli o le a lē avea ma ni fafitauli! E te iloa le auala sili e teuteu ai oe lava ia. E te iloa po o a mea e matamata ma faitau ai, po o fea e faaalu ai lou taimi, ma po o ai tou te fegalegaleai. E te iloa le mea e te manao e ausia. E te iloa le ituaiga o tagata e te manao moni lava e avea ai.
Ia, o’u uso e ma tuafafine pele, e manaomia uma le faatuatua ma le lototele e faamuamua ai le Atua. E manaomia ai le galue tumau ma le mae’ae’a faaleagaga ia salamo ma tuu ese le tagata natura e ala i le Togiola a Iesu Keriso.19 E manaomia ai taumafaiga faifai pea i aso taitasi e atia’e ni mausa patino e suesue le talalelei, ia aoao atili e uiga i le Tama Faalelagi ma Iesu Keriso, ma ia saili ma tali atu i faaaliga faaletagata lava ia.
I nei taimi faigata lea sa valo’iaina e le Aposetolo o Paulo,20 e le o toe taumafai Satani e nana ana osofaiga i le fuafuaga a le Atua. Ua salalau solo manatu faatiapolo. O le mea lea, e na’o le pau le ala i le saogalemu faaleagaga o le filifili lea e faamuamua le Atua i o tatou olaga, ia aoao e lagona Lona siufofoga, ma ia faaaoga lo tatou malosi e fesoasoani ai e faapotopoto Isaraelu.
Ia, o le a se lagona o le Alii e uiga i tagata o le a faamuamuaina le Atua? Sa aoteleina lelei e Nifae: “E alofa [le Alii] ia te i latou o ē e mananao e avea o ia ma o latou Atua. Faauta, sa alofa o ia i o tatou tamā, ma sa osifeagaiga o ia ma i latou, ioe, o Aperaamo lava, Isaako, ma Iakopo; ma sa manatua e ia feagaiga na ia faia.”21
Ma o le a le mea e finagalo le Alii e fai mo Isaraelu? Ua tauto le Alii o le a Ia “tauina a [tatou] taua, ma taua a a [tatou] fanau, ma [taua a] fanau a a [tatou] fanau … e oo i le tupulaga e tolu ma le fa.”!22
A o e suesueina au tusitusiga paia i le isi ono masina e sosoo ai, ou te uunaia oe ia faia se lisi o mea uma ua folafola mai e le Alii o le a Ia faia mo Isaraelu o le feagaiga. Ou te manatu o le a e maofa! Mafaufau loloto i nei folafolaga. Talatalanoa e uiga i na [folafolaga] faatasi ma lou aiga ma uo. Ona soifua lea ma vaavaai i le faataunuuina o nei folafolaga i lou lava olaga.
O’u uso e ma tuafafine, a o e filifili e faamuamua le Atua i o outou olaga, o le a outou lagonaina mo outou lava o lo tatou Atua o “se Atua o vavega.”23 I le avea ai ma se nuu, o i tatou o Lana fanau o le feagaiga, ma o le a valaauina i tatou i Lona suafa. Ou te molimau atu ai i nei mea i le suafa paia o Iesu Keriso, amene.