![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F43%2Ffe%2F43fe4508b354e456d1052eb31b4012a5ecf1b476%2F43fe4508b354e456d1052eb31b4012a5ecf1b476.jpeg/full/!250,/0/default)
Gipangga sa Ginoo
Mga panahon sa kalisdanan ug kasagmuyo dili mousab sa mabinantayong mata sa Ginoo samtang Siya mapinanggaong nagtan-aw diha kanato, nagpanalangin kanato.
Usa ka adlaw sa mga tuig nga nanglabay, isip usa ka batan-ong misyonaryo nga naghago sa usa ka gamay nga branch diha sa usa ka gamay nga isla sa Amami Oshima, Japan, ang akong kompanyon ug ako nalipay pag-ayo sa pagkahibalo nga si Presidente Spencer W. Kimball mobisita sa Asya ug nga ang tanang mga miyembro ug mga misyonaryo sa Japan gidapit ngadto sa Tokyo aron personal nga makapaminaw sa propeta diha sa usa ka komperensya sa area. Ang mga miyembro sa branch, ang akong kompanyon ug ako mahinamong misugod sa paghimo og mga plano alang sa komperensya, nga mokabat og 12 ka oras nga pagsakay sa barko tabok sa Silangang Dagat sa Tsina [East China Sea] ngadto sa kinadak-ang yuta [mainland] sa Japan, sundan og 15 ka oras nga pagsakay og tren ngadto sa Tokyo. Sa kasubo, bisan pa niana, kini dili mao ang nahitabo. Nakadawat kami og balita gikan sa among presidente sa misyon nga tungod sa gilay-on ug sa oras, ang akong kompanyon ug ako dili makahimo sa pagtambong sa komperensya sa Tokyo.
Samtang ang mga miyembro sa among gamay nga branch misakay padulong sa Tokyo, kami mipabilin. Ang misunod nga mga adlaw ingon og hilum ug walay mga tawo. Nagpahigayon kami og panagtigum sa sakramento nga kami ra didto sa gamay nga chapel, samtang ang mga Santos sa Ulahing mga Adlaw ug ang mga misyonaryo sa Japan mitambong sa komperensya.
Ang akong personal nga pagkanasagmuyo misamot bisan og malipayon akong naminaw sa mga miyembro sa branch nga nanguli gikan sa komperensya human sa pila ka adlaw aron sa pagreport nga gi-anunsyo ni Presidente Kimball ang usa ka templo nga pagatukuron sa Tokyo. Naukyab sila sa ilang kahinam samtang ilang gipakigbahin ang katumanan sa ilang damgo. Gihulagway nila kon sa unsang paagi, sa pagkadungog sa pag-anunsyo sa templo, ang mga miyembro ug mga misyonaryo wala makapugong sa ilang kalipay ug dungan milanog ang ilang pagpamakpak.
Mga katuigan nanglabay, apan makahinumdom gihapon ako sa kasagmuyo nga akong gibati gikan sa wala makatambong sa makasaysayanong miting.
Sa bag-ohay nga mga bulan akong nahinuktukan kini nga kasinatian, samtang akong na-obserbahan ang uban nga nag-atubang og grabing kasagmuyo ug kaguol––mas grabe pa kaayo kay sa akoa isip usa ka batan-ong misyonaryo––nga gidala sa tibuok kalibutan nga pandemya sa COVID-19.
Sayo niini nga tuig, samtang nagkataas ang pandemya, ang Unang Kapangulohan misaad nga “ang Simbahan ug ang mga miyembro niini matinud-anong mopakita sa among pasalig sa pagkamaayong mga lungsuranon ug maayong mga silingan”1 ug “mogamit og dakong pagmatngon.”2 Busa, atong nasinati ang paghunong sa mga pagpundok sa Simbahan sa tibuok kalibutan, ang pagpauli sa labaw sa katunga sa pwersa sa mga misyonaryo sa Simbahan ngadto sa ilang mga nasud nga gipuy-an, ug ang pagsira sa tanang mga templo sa tibuok Simbahan. Liboan kaninyo nag-andam sa pagsulod sa templo alang sa mga ordinansa sa mga buhi––lakip ang templo nga mga pagsilyo. Ang uban kaninyo nakakompleto og sayo sa inyong serbisyo isip mga misyonaryo o temporaryo nga gi-release ug gibalhin.
Atol niini nga panahon, mga lider sa gobyerno o sa edukasyon mipasira sa mga eskwelahan––diin agi og sangputanan nausab ang mga gradwasyon ug napugos sa pagkansela sa mga dula, sosyal, kultural, ug pang-edukasyon nga mga hitabo ug mga kalihokan. Kadaghanan kaninyo nangandam alang sa mga hitabo nga wala mahinayon, mga pasundayag nga wala mahibaloi, ug mga panahon sa pagdula nga wala madula.
Apan ang labing makapatandog mao ang mga paghunahuna sa mga pamilya kinsa nawad-an og minahal atol niini nga panahon; ang kadaghanan dili makahimo sa mga paglubong o ubang mabination nga mga pagpundok ingon nga ilang gilauman.
Sa laktod, daghan, daghan kaninyo ang nakaatubang og hilabihan nga kasagmuyo, kaguol, ug pagkawala sa kadasig. Busa sa unsa nga paagi kita mamaayo, molahutay, ug mopadayon sa pag-uswag kon ang mga butang ingon og naguba?
Si propeta Nephi misugod sa pagkulit sa gagmay nga mga palid sa dihang siya usa ka hamtong nga tawo. Samtang iyang gihinumduman ang nangagi sa iyang kinabuhi ug pangalagad, mihatag siya og usa ka importante nga panghunahuna diha gayud sa unang bersikulo sa Basahon ni Mormon. Kini nga bersikulo naghulma og usa ka importante nga baruganan alang kanato nga hunahunaon sa atong panahon. Nagsunod sa iyang pamilyar nga mga pulong, “Ako, si Nephi, natawo sa matarung nga mga ginikanan … ,” siya nagsulat, “ug nakasinati sa daghan nga mga kasakit sa akong panahon, bisan pa, gipangga sa Ginoo sa tanan ko nga mga panahon.”3
Isip mga estudyante sa Basahon ni Mormon, kita pamilyar sa mga kasakit nga gipasabut ni Nephi. Gani human magpasalamat sa iyang mga kasakit sa iyang panahon, naghatag si Nephi sa iyang ebanghelyo nga panan-aw sa pagkapinangga sa Ginoo sa tanan niya nga panahon. Mga panahon sa kalisdanan ug kasagmuyo dili mousab sa mabinantayong mata sa Ginoo samtang Siya mapinanggaong nagtan-aw diha kanato, nagpanalangin kanato.
Si Lesa ug ako bag-ohay nga nagkita sa virtual nga paagi sa 600 ka mga misyonaryo sa Australia, kadaghanan ubos sa pagdili nga pagawson kalabut sa COVID-19, kadaghanan nagtrabaho gikan sa ilang mga apartment. Magkauban namong gihunahuna ang mga indibidwal diha sa Bag-ong Tugon, Basahon ni Mormon, ug Doktrina ug mga Pakigsaad kinsa gipanalanginan sa Dios sa pagtuman sa pagkamatarung ubos sa kalisdanan. Ang tanan mas napatin-aw pinaagi sa unsay ilang nahimo uban sa panabang sa Ginoo kay sa pinaagi sa unsay wala nila mahimo isip resulta sa ilang pagkadili pagawason ug pagkapinugngan.
Atong mabasa ang kabahin ni Pablo ug Silas, kinsa, samtang gipriso sa dapit nga makita sa publiko, nag-ampo, nag-awit, nagtudlo, nagpamatuod––ug gani nakabunyag sa tinugyanan sa karsel.4
Ug usab kabahin ni Pablo, sa Roma, kinsa gibilanggo diha sa balay sulod sa duha ka mga tuig, diin atol niana nga panahon padayon niya nga “gipasabut ug gipamatud-an ang gingharian sa Dios,”5 “nagtudlo siya mahitungod sa Ginoong Jesukristo.”6
Kabahin ni Nephi ug Lehi, ang anak nga mga lalaki ni Helaman, kinsa human sa pagkanaabuso ug pagkabilanggo giliyokan og kalayo sa panalipod samtang ang sa Ginoong “hagawhaw nga tingog nga hingpit sa kalumo … midulot sa [ilang mga mananakop] bisan ngadto sa kinahiladman sa kalag”7
Kabahin ni Alma ug Amulek didto sa Ammonihah, kinsa nakakita nga daghan “ang mituo … ug misugod sa paghinulsol, ug sa pagsiksik sa mga kasulatan,”8 bisan sila gibiay-biay ug walay pagkaon, tubig, o mga saput, gigapos ug gibilanggo.9
Ug sa katapusan si Joseph Smith, kinsa, samtang nag-antus diha sa Bilangguan sa Liberty, gibati nga biniyaan ug tinalikdan, dayon nakabati sa mga pulong sa Ginoo: “Kining tanan nga mga butang … alang sa imong kaayohan”10 ug ang “Dios mouban kanimo hangtud sa kahangturan.”11
Tanan sila nakasabut unsay nahibaloan ni Nephi: nga bisan sila nakasinati og daghang mga kasakit sa ilang mga panahon, sila pinangga sa Ginoo.
Kita usab makahimo og mga pagkasusama isip indibidwal nga mga miyembro ug isip usa ka simbahan sa paagi diin kita gipangga sa Ginoo atol sa mahagiton nga mga panahon nga atong nasinati sa milabay nga pipila ka mga bulan. Samtang ako naghatag og mga pananglitan, himoa usab kini nga molig-on sa inyong pagpamatuod kabahin sa pagkamanalagna sa atong buhi nga propeta, kinsa miandam kanato og mga pahiangay sa wala pa ang bisan unsa nga timailhan sa pandemya, naghimo kanato sa paglahutay sa mga hagit nga nangabut.
Una, mahimong mas nakasentro sa panimalay ug gisuportahan sa Simbahan.
Duha ka tuig ang milabay, si Presidente Russell M. Nelson miingon: “Naandan na nato nga maghunahuna sa ‘simba’ isip usa ka butang nga mahitabo sa atong mga meetinghouse, nga gisuportahan sa unsa ang gipangbuhat sa panimalay. Nagkinahanglan kita og pagpahiangay niini nga sundanan. … Usa ka nakasentro sa panimalay nga Simbahan, gisuportahan sa unsa ang gipangbuhat sa sulod sa atong … mga gambalay.”12 Unsa ka propetikanhon nga pahiangay! Ang nakasentro sa panimalay nga pagkat-on sa ebanghelyo nabansay uban sa temporaryo nga pagsira sa mga meetinghouse. Bisan og ang kalibutan nagsugod sa pagka-normal ug kita mobalik ngadto sa mga chapel, gusto natong ipabilin ang atong nakasentro sa panimalay nga mga sundanan sa pagtuon ug pagkat-on sa ebanghelyo nga napalambo atol sa pandemya.
Ang ikaduhang ehemplo sa pagkapinangga sa Ginoo mao ang pagpadayag kalabut sa pagpangalagad sa mas taas ug mas balaan nga paagi.
Kaniadtong 2018, mipailaila si Presidente Nelson sa pagpangalagad isip usa ka pahiangay “sa paagi nga kita moatiman sa usag usa.”13 Ang pandemya mipailaila og daghang mga oportunidad sa pagbaid sa atong mga kahanas sa pagpangalagad. Ang tigpangalagad nga kaigsoonang mga lalaki ug mga babaye, batan-ong mga babaye ug batan-ong mga lalaki, ug uban pa nagtabang aron sa pagkontak, pakigsultihanay, pag-atiman sa nataran, mga pagkaon, mga mensahe pinaagi sa teknolohiya, ug sa ordinansa sa sakramento aron sa pagpanalangin niadtong nagkinahanglan. Ang Simbahan mismo nangalagad usab ngadto sa uban atol sa pandemya sa wala sukad mahitabo nga pagpang-apud-apod og mga gamitunon ngadto sa mga balay tipiganan sa mga pagkaon [food banks], pasilonganan sa mga walay panimalay, ug mga sentro sa pagsuporta sa mga langyaw ug uban sa mga proyekto nga giderekta ngadto sa labing seryoso nga sitwasyon sa kagutom sa kalibutan. Ang mga Relief Society sister ug ang ilang mga pamilya mitubag ngadto sa hagit sa paghimo og minilyon nga mga mask alang sa mga health-care worker.
Usa ka katapusang ehemplo sa pagka–napanalanginan atol sa kalisdanan mao ang pagkakaplag og hilabihang kalipay sa pagbalik sa mga ordinansa sa templo.
Kini labing maayo nga gihulagway sa usa ka istorya. Sa dihang nadawat ni Sister Kaitlyn Palmer ang iyang tawag sa misyon sa miaging Abril, naukyab siya nga gitawag isip usa ka misyonaryo apan gibati usab nga importante ug espesyal ang pag-adto sa templo aron sa pagdawat sa iyang pagtuga [endowment] ug sa paghimo og sagrado nga mga pakigsaad. Wala madugay, human niya ma-iskedyul ang iyang pagtuga, ang pahibalo miabut nga ang tanan nga mga templo temporaryo nga sirhan tungod sa tibuok kalibutan nga pandemya. Human madawat kining makaguol nga impormasyon, iyang nahibaloan dayon nga siya motambong sa missionary training center (MTC) sa virtual nga paagi gikan sa iyang panimalay. Bisan pa niining mga kasagmuyo, gipunting ni Kaitlyn ang paghupot sa iyang espiritu nga madasigon.
Sa tunga-tunga nga mga bulan, wala gayud si Sister Palmer kawad-i og paglaum sa pagtambong sa templo. Nagpuasa ang iyang pamilya ug nag-ampo nga ang mga templo moabli sa dili pa siya molarga. Kasagaran si Kaitlyn mosugod sa iyang mabuntag nga MTC pinaagi sa pag-ingon, “Karon ba nga adlaw ang adlaw nga kita makadawat og usa ka milagro ug ang mga templo hingpit nga moabli pag-usab?”
Sa Agosto 10, ang Unang Kapangulohan mipahibalo nga ang templo ni Kaitlyn mobalik sa pag-abli alang sa mga ordinansa sa mga buhi sa eksakto nga adlaw nga ang iyang sayo sa buntang nga paglarga ngadto sa iyang misyon na-iskedyul. Dili siya makahimo sa pagtambong sa templo ug mahinayon sa iyang paglarga. Uban sa gamay nga paglaum alang sa kalampusan, gikontak sa iyang pamilya ang presidente sa templo kon aduna bay bisan unsa nga paagi nga ang milagro nga kanunay nilang giampo matuman. Ang ilang pagpuasa ug mga pag-ampo natubag!
Sa alas 2:00 sa buntag, mga oras sa dili pa ang iyang paglupad, si Sister Palmer ug ang iyang pamilya, mga luhaan, giabi-abi diha sa mga pultahan sa templo sa mapahiyumong presidente sa templo, uban sa mga pulong, “Maayong buntag pamilya Palmer. Maayong pag-abut sa templo!” Sa nahuman na niya ang iyang pagtuga, giawhag sila sa pagdali ingon nga ang sunod nga pamilya naghulat diha sa mga pultahan sa templo. Misakay sila diretso ngadto sa airport igo gyud sa oras nga makasakay sa iyang paglupad ngadto sa iyang misyon.
Ang mga ordinansa sa templo nga kita wala makatambong sulod sa daghang mga bulan ingon og mas nindot kay sa gihanduraw kaniadto samtang ang mga templo sa tibuok kalibutan moabli sa hinay-hinay nga hugna.
Sa akong pagtapos, palihug paminaw ngadto sa makaawhag, makadasig, makabayaw nga mga pulong ni Propeta Joseph Smith. Walay tawo nga makatagna gayud nga siya misulat niini diha sa kasakit ug pag-inusara, gipugngan ug gidid-an didto sa usa ka panimalay sa Nauvoo, nagtago gikan niadtong kinsa nangita sa pagdakop kaniya sa ilegal nga paagi:
“Karon, unsa ang atong nadungog mahitungod sa ebanghelyo nga atong nadawat? Usa ka tingog sa kalipay! Usa ka tingog sa kalooy gikan sa langit; ug tingog sa kamatuoran gikan sa ilawom sa yuta; malipayon nga mga balita alang sa mga patay; usa ka tingog sa kalipay alang sa mga buhi ug sa mga patay; malipayon nga mga balita sa hingpit nga kalipay. …
“… Kita dili ba mopadayon sa hilabihan ka mahinungdanon nga katuyoan? Padayon ug ayaw pagsibug. Pagmaisugon, … ug sa kanunay, ngadto sa kadaugan! Himoa ang inyong mga kasingkasing nga magmaya, ug paglipay sa hilabihan. Himoa ang yuta sa kalit motungha ngadto sa pag-awit.”14
Mga kaigsoonan, ako nagtuo nga usa ka adlaw niana, matag usa kaninyo mohinumdom sa gi-kanselar nga mga hitabo, sa kaguol, sa mga kasagmuyo, ug sa pag-inusara nga kauban sa mahagitong mga panahon nga kita nagsinati nga nagtan-aw niini nga gipandungan og mga pinili nga mga panalangin ug nagtubo nga hugot nga pagtuo ug mga pagpamatuod. Nagtuo ako nga niini nga kinabuhi, ug sa umaabut nga kinabuhi, ang inyong mga kasakit, ang inyong mga Ammonihah, ang inyong Bilanggoan sa Liberty, ihalad alang sa inyong kaayohan.15 Nag-ampo ako nga, uban ni Nephi, kita makadawat sa mga kasakit sa atong kinabuhi samtang sa samang higayon makahibalo nga kita pinangga sa Ginoo.
Motapos ako uban sa akong pagpamatuod ni Jesukristo, kinsa Siya Mismo anad sa kasakit ug isip kabahin sa Iyang mahangturong Pag-ula mikunsad ubos kanilang tanan.16 Nakasabut siya sa atong kaguol, kasakit, ug pagkawalay paglaum. Siya ang atong Manluluwas, atong Manunubos, atong paglaum, atong kahupayan, ug atong Tigluwas. Niini ako mopamatuod diha sa Iyang balaang ngalan, si Jesukristo, amen.