Faatalitali i le Alii
O le faatuatua o le faalagolago lea i le Atua i taimi lelei ma taimi leaga, e tusa lava pe aofia i lena mea sina puapuaga se’ia oo ina tatou vaaia Lona aao [laveai] o faaalia mo tatou.
O’u uso e ma tuafafine pele, o loo tatou naunau uma—ma e leai se tasi e sili atu i lo a’u—e fia faalogo atu i le malelega faai’u mai lo tatou perofeta pele, Peresitene Russell M. Nelson. Ua ofoofogia lenei konafesi, ae o le taimi lona lua lenei ua suia ai e le KOVITI-19 a tatou faatasiga e masani ai. Ua matou lelavavā lava i lenei faama’i, ua matou lagona ai le pei e saeia o matou lauulu. Ma o le mea moni lava, o nisi o o’u Uso ua uma ona faia lena ala o faatinoga. Faamolemole ia iloa o loo matou tatalo e le aunoa mo i latou ua aafia i soo se itu, aemaise lava mo soo se tasi ua maliliu nisi e pele ia i latou. E ioeina e tagata uma ua fai si umi tele o lenei faama’i.
O le a ea le umi tatou te faatali ai mo se toomaga mai faigata ua oo mai i o tatou luga? Ae ā le onosaia o tofotofoga patino a o tatou faatali ma faatali pea, ma foliga mai ua fai si telegese o le oo mai o se fesoasoani? Aisea ua faatuai ai a o avega ua foliga mai ua mamafa atu nai lo mea e mafai ona tatou lavātia?
A o fesiligia ai fesili faapea, e mafai ona tatou lagona atu, pe afai tatou te taumafai, le tagi a se isi tagata mai le tuanai, mai se potu malulu ma pogisa o le falepuipui i se tasi o taumalulu aupito malulu na faamaumauina i lena taimi.
“Le Atua e, o fea o i ai oe?” tatou te lagona atu mai le loloto o le Falepuipui o Liperate? “Ma o fea o i ai le faapaologa ua ufi ai lou afio’aga lafi? O le a le umi e taofi ai lou aao?”1 O le a le umi, le Alii e, o le a le umi?
O lea la, e le o i tatou o tagata muamua pe o tatou foi o tagata mulimuli e fesiligia ni fesili faapea pe a lofituina i tatou e faanoanoaga po o se tiga faifai pea i o tatou loto. Ou te le o lauga atu la i le taimi nei i faama’i pipisi po o falepuipui ae o outou, tou aiga, ma tou tuaoi o loo feagai ma soo se tele o ia luitau. Ou te lauga atu i le naunau o le toatele e fia faaipoipo ae e le o faaipoipo, po o ē ua faaipoipo ae o loo mo’omo’o ma’imau pe ana faaselesitila teisi atu le mafutaga. Ou te lauga atu ia i latou e ao ona taulimaina foliga vaaia lē manaomia o se tulaga ogaoga faalesoifua maloloina—masalo o se ma’i ua leai se togafiti—po o se tasi o loo feagai ma se tauiviga i le olaga atoa ma se faaletonu tau kenera ua leai sona vaifofo. Ou te lauga atu i le tauiviga faifai pea ma lu’itau faalesoifua maloloina, faalelagona ma faalemafaufau ia ua mamafatū i agaga o le anoanoa’i o ē ua mafatia mai ai, faapea ma loto o i latou e alolofa ma mafatia faatasi ma i latou. Ou te lauga atu i ē matitiva, o ē na faatonu i tatou e le Faaola ia ‘aua lava ne’i faagaloina, ma ou te lauga atu ia te outou o loo faatalitali pea mo le toefoi atu o se tamaitiiti, po o le a lava le matua, o lē ua filifilia se ala e ese mai le ala na e tatalo na te uia.
Ma le isi, ou te faailoa atu e ui lava i lenei lisi umi o mea tatou te ono faatalitali ai patino ae e le o taumafai e taulima ai atugaluga tetele faaletamaoaiga, faaupufai, ma faaleagafesootai ua tatou fetaia’i ai o se lalolagi. Ua manino lava le faamoemoeina o i tatou e lo tatou Tama o i le Lagi ia taulimaina nei faafitauli lofituina lautele faapea ai foi ma faafitauli patino, ae o le a i ai taimi i o tatou olaga ia e oo lava i a tatou taumafaiga sili faaleagaga ma naunautai, ua le maua ai mai tatalo faatauanau ni manumalo mo mea na tatou naunau i ai, pe faatatau i ni faafitauli tetele faalelalolagi po o ni faafitauli iti faaletagata lava ia. O lea la, a o tatou galulue ma faatalitali faatasi ai mo ni tali i nisi o a tatou tatalo, ou te ofo atu ia te outou la’u folafolaga faaaposetolo o loo faafofogaina ma taliina, e ui atonu e le o taimi tonu po o le ala tonu na tatou mananao i ai. Ae e tali mai lava tatalo e le aunoa i le taimi ma i le ala e tatau ai i se mătua ua silafia aoao mea uma ma le agaalofa e faavavau ona tali mai ai na tatalo. O’u uso e ma tuafafine pele, faamolemole ia malamalama o Ia e le moe e lē tautulemoe lava2 e popole mo le fiafia ma le faaeaga mulimuli o Lana fanau e sili atu i lo mea uma e ao ona faia e se tagata paia. O Ia o le alofa lē pona, o le tagata ua faamamaluina, ma o Lona suafa o Tamā Alofa Mutimutivale.
“Ia, afai o le tulaga lea,” e mafai ona e faapea, “pe lē tatau ea i Lona alofa ma le alofa mutimutivale ona faigofie ona vaeluaina ai o tatou Sami Ulaula patino ma faataga i tatou e savavali atu i o tatou puapuaga i luga o le eleele matūtū? Pe lē tatau ea ona Ia auina maia ni gogosina [e pei ona auina atu i le au paionia] i le seneturi 21 e felelei mai se mea ma ‘aina uma iniseti faalafuā ua fai ma faafitauli ia i tatou?”
O le tali i fesili faapena o le “Ioe, e mafai e le Atua ona faia vavega i le taimi lava lena, ae i se taimi vave pe mulimuli ane tatou te aoaoina ai o taimi ma vaitau o la tatou malaga faaletino e na o Ia lava e faatonutonuina.” Na te faatautaia mea e tutupu ma le taimi e tutupu ai i olaga eseese o i tatou uma taitoatasi. Mo tagata mama’i uma na faamaloloina i lena lava taimi a o faatalitali o ia e tofu i le Taelega i Petesa,3 ae o se isi tagata o le a faaaluina le 40 tausaga i le toafa e faatalitali ai e ulufale atu i le nuu folafolaina.4 Mo Nifae ma Liae uma na puipuia faalelagi e se afi musaesae faataali’oli’o ona o lo latou faatuatua,5 ae sa i ai foi se Apinati na susunuina i se faaputuga afi musaesae ona o lona faatuatua.6 Ma e tatou te manatua le Elia lava e tasi lea sa ia valaau vave atu i le afi e to ifo mai le lagi e molimau atu ai e faasaga i faitaulaga a Paala7 o le Elia lava lea e tasi na onosa’ia se vaitau lea sa leai ai se timu mo le tele o tausaga ma o lē, mo se taimi, sa fagaina i sina toe luutaga sa na o matiu’u o le oreva e mafai ona mau ai. I la’u fua faatatau, o lena mea e le mafai ona tatou ta’ua o se “happy meal.”
O le a la le manatu? O le manatu la e faapea, o le faatuatua o le faalagolago lea i le Atua i taimi lelei ma taimi leaga, e tusa lava pe aofia i lena mea sina puapuaga se’ia oo ina tatou vaaia Lona aao [laveai] o faaalia mo tatou.9 E ono faigata lena mea i lo tatou lalolagi i nei aso pe a talitonu le toatele o le lelei aupito maualuga i le olaga o le alo’ese lea mai puapuaga uma, ma e leai se tasi e tatau ona tiga i soo se mea.10 Ae o lena talitonuga o le a le taitaia atua i tatou i le “fua o le tumu o Keriso.”11
Faatasi ma se faatoesega ia Elder Neal A. Maxwell mo le lototele e suia ma faalautele se mea na ia saunoa ai muamua, ou te fautua atu foi e faapea “o le olaga o se tagata … e le mafai ona tumu i le faatuatua ma saoloto mai atuatuvalega.” O le a lē aoga lava “le ola e pei e leai ni mea e tutupu i le olaga,” ma faapea atu a o inu se isi ipu vaitipolo, “Le Alii e, foai mai ia te a’u ou uiga mama silisili uma, ae ia mautinoa e ‘aua ne’i aumai ia te a’u se lotofaavauvau, po o se faanoanoa, po o se tiga, po o ni mea faafeagai. Faamolemole ‘aua ne’i faatagaina se tasi e le fiafia mai ia te a’u pe faalata a’u, ma le sili i lo mea uma, ‘aua lava ne’i e tuu mai ia te a’u ia lagonaina le tuulafoaiina e Lau Afio po o i latou ou te alofa iai. O le mea moni, le Alii e, ia faaeteete ia taofia a’u mai aafiaga uma na faia Lau Afio ia paia. Ma afai, e mavae atu puapuaga na uia e isi, faamolemole tuu a’u e sau ma mau faatasi ma Lau Afio, lea e mafai ona ou mitamita ai i le talitutusa o i ta’ua a o ou faaopeopea ai ma le fiafia i luga o ao o le ola fifilemu FaaKerisiano.”12
O’u uso e ma tuafafine pele, o le FaaKerisiano e toafimalie, ae e tele lava ina le toafimalie. O le ala i le pa’ia ma le fiafia iinei ma le olaga a sau o se ala umi ma o nisi taimi e gaoā ai. E alu ai le taimi ma le naunautaiga e savali ai. Ae, o le mea moni, o le taui mo le faia o lena mea e silisili lava. O lenei upumoni o loo aoaoina mai ma le manino ma le faatauanau i le mataupu 32 o le Alema i le Tusi a Mamona. O iina o loo aoao mai ai lenei faitaulaga sili maoae e faapea afai e totoina le afioga a le Atua i o tatou loto o se fatulaau, ma afai tatou te popole tele ma faasūsū, vele, tausi, ma faamalosiau i ai, o le a fua mai i le lumanai i fua “ua sili ona pele, … suamalie i luga o mea uma ua suamalie,” ma o le taumafa i ai o le a taitai atu ai i se tulaga e le toe galala pe toe matelaina.13
E tele lesona ua aoaoina mai lenei mataupu ofoofogia, ae o le totonugalemu o na mea uma o le ‘auga autu e faapea, o le fatu e ao ina tausia ma e tatau ona tatou faatalitali mo le fatu ina ia mătua, “tepa taulai i luma ma le mata o le faatuatua i lona fua.”14 Na fai mai Alema, o le tatou seleselega ua “lata le aso” e oo mai ai.15 E leitioa faamaea mai lana aoaoga ofoofogia i le ta’ua faatolu o se valaau mo le filiga ma le onosai i le tausiga o le afioga a le Atua i totonu o o tatou loto, “faatalitalima le “”tali-tiga,” a o ia fai mai, “mo le laau e fua mai fua mo outou.”16
O le KOVITI ma le kanesa, masalosalo ma le lē fiafia, faafitauli tautupe ma tofotofoga faaleaiga. O afea o le a aveesea ai nei avega? O le tali, ua “lata le aso.”17 Ma pe o lena aso o se taimi puupuu po o se taimi umi, e le o sa tatou lena e ta’u atu, ae e ala i le alofa tunoa o le Atua, o le a oo mai ai faamanuiaga ia i latou e pipiimau i le talalelei a Iesu Keriso. O lena mataupu na faamautuina i se faatoaga tuufua lava ma i luga o se mauga faitele i Ierusalema i se taimi ua leva lava.
A o tatou faalogologo atu nei i lo tatou perofeta pele o tapunia lenei konafesi, tau ina ia tatou manatua, e pei ona faaalia e Russell Nelson i lona soifuaga atoa, o i latou e “faatalitali i le Alii e toe faafouina lo latou malosi [ma] latou te sii ae apaau e pei o aeto; latou te femoeai, a e le vaivai; … latou te savavali, a e le [matapogia].”18 Ou te tatalo ia “lata mai le aso”—pe vave oo mai pe tuai—o na faamanuiaga o le a oo mai i tagata uma o outou o e saili atu i toomaga mai i o outou faanoanoaga ma le saolotoga mai lo outou lotofaavauvau. Ou te molimau atu i le alofa o le Atua ma le Toefuataiga o Lana talalelei mamalu, lea i se tasi itu po o se isi, o le tali lea i faafitauli uma ua tatou fetaiai i le olaga. I le suafa togiolaina o le Alii o Iesu Keriso, amene.