Sifilpac Luhlahlfongi

Sel Elder Gerrit W. Gong

Ke U luhn Mwet Sap Singucul Luo ah

Luhlahlfongi ke God ac kais sie use mwe ahkinsewowo inkuhsrao me.

Sie pacl ah, ke nga tuh srihk ah, nga tuh nuhnkuh in kahinglac liki lohm ah. Nga nuhnak in tuhlihk srihsrihk, nga puhla muh wacngihn mwet luhngse nga.

Ninac kiyuck el lohng ac ahkwoyeyuc. Nga muhta na wo ke lohm sihk.

Kuh kom nuh puhla muh kom kahinglac liki lohm sum? Inkaiyacn pacl uh, srihpac se oruh kuht kahinglac liki lohm sesr uh pa luhlahlfongi uh kuhnausyucklac—luhlahlfongi kacsr sifacna, nuh sin kais sie, nuh sin God. Ke luhlahlfongi uh kuhnanuclac uh, kuht nuhnkuh lah kuht e sifilpac luhlahlfongi fuhkah.

Mwe fahkwack luhk mihsenge uh, lah kuht tuhkuh nuh lohm sesr kuh som nuh lohm sesr, God El ac tuhkuh ohsun nuh sesr.¹ Kuht kuh in konwacack luhlahlfongi ac kuh in El, lahlmwetmwet ac kahlwem, in sifilpac luhlahlfongi. El siyuck kuht in liyacacng kais sie sie, in yohkwelihk nuhnak muhnahs ac srihkeni nuhnuhnkuh mwet sahyac ac kuht sifacna, Alu Lal pa sie acn ma kuht puhla pah we, lah pacl se emeet kuht in som wi kuh kuht sifil fohlohk nuh kac.

Suwohswohs uh el fahko luhn luhlahlfongi. God El sruokyac na luhlahlfongi in wi kuht. Tuhsruhk, luhlahlfongi luhn mwet uh kuh in kuhnanuclac ke pacl se ma:

Kawuck se, mwet se ma wi kom orekma, kuh mwet se ma kuht luhlahlfongi uh tiac pwacye, ahkngalye, kuh ahklahlfonye kuht.²
Mwet se ma pahyuck sum an tiac pwacye.
Sahp, mwet se ma kuht luhngse el sun misac, kihnet, kuh mas.
Oasr kihsensiyuck soko tuhkuh sun kuht, sahp ma ke ma sikyak met ke Alu uh ke ma ke masap luhn Alu uh, ac mwet se fahk muh alu lasr uh okanlah kuh tiac fahkwack ke ma pwacye.

Kuhtuh ma ac sikyak uh kuh in tiac arlac kahlwem lah mac se ngwacn tuhsruhk yohk elyah kac.

Sahp kuht tiac liye muh kuht wi alu uh, tiac puhla muh kuht fal, puhla muh kuht nuhnuhnkweyuck sin mwet sahyac.

Kuh, finne kuht oruh nohfohn ma kuht liye ma enenuh in oreklac, ma uh soenna eklac wo. Sahyacn ma kuht puhlakihn sin Nguhn Muhtahl, kuht kuh in tiac sa puhla muh kuht etuh lah God el moul kuh wosasuc uh pwacye.

Puhkantwen mwet mihsenge puhla muh yohk na upac eneneyac in fohlohkohnwack luhlahlfongi inmahsrlon mwet uh ac acn sesr uh.³

Ke kuht nuhnkuh ke luhlahlfongi uh, kuht etuh lah God El God pwacye se ac “tiac kuh in kikiacp.”⁴ Kuht etuh lah ma pwacye uh pa etuh lasr ke ma uh ingena, met, ac ke pacl ac fah tuhkuh uh.⁵ Kuht etuh lah fwackyuck ma kalweniyuck ac mwe kolyuck uh fal nuh ke ma pwacye ma wacngihn eklac la nuh ke kain in ma muhta sikyak in moul lasr uh.

Kuht etuh lah olwelah ma kuhnaosyucklac uh ahksuhpwacrye mwet. “Nga oraclah ma na koluk,” el fahk. “Kom kuh in nuhnak muhnahs nuh sihk?” Pahyuck se kuh in asruhpoi, finsraki tuh in sifilpac luhlahlfongi sie sin sie. Ke siena acn ac pacl, sie mwet ma kaul fahk, “Fin nga liyacacng masap ke Kahs in lahlmwetmwet, Nga ac tiac oasr inse.”

Kuht etuh engan ke kuht ukwe inkacnek lal Leum, ac pahng in kuhlwacnsap ke Alu lal ma suli kuht in puhla luhlahlfongi ac luhngse lal God nuh sesr ac nuh sin sie sin sie. Mempucr ke Alu uh, weacng pac mwet mahtuh ma soenna pahyuck, kuhlwacnsap ke Alu uh ac ke acn sesr.

Ke kolyuck, pisap se el pahngon siyacnyacn fuhsr se in kuhlwacnsap ke kuhlahs luhn tuhlihk srihsrihk ke ward se. Ke muhtwacwacackiyac ah, mukul se muhta na ke insroasrihk ah, muhkwenalac ac nuhnak loeloes. Kais kuhtuhsrihk na, el muhtwacwacack wi tuhlihk srihsrihk ah isrwacsr. Tohkohyang, pahyuck se inge ahkkahlwemye kuloh lalos. Met, elos fahk lah, muhtwacn sac ke in oasr tuhlihk nahtuhlos, ac mukul sac tiac luhngse. Ingena, kuhlwacnsap ekuhllah ac orwacltahlweni. El oacyacpac use tuhlihk nuh ke pahyuck lalos ac lohm selos.

Ke siepacna siti, ninac fuhsr se wi tuhlihk srihsrihk nahtuhl ac mukul tuhmwacl elos lut ac nuhkanlah tuhsruhk el eis pacna ke pahng el in kuhlwacnsap in ekihn prestuhn luhn Rilif Sosaiti. Tohkohyang na, pahkah kuhnahoslah sahrom uh, pwacnwacng kanon stoh uh wacngihnlac ac lohm uh ohu oacna aes pohk uh. Ke srihpen oasr sahrom ac mwe ahkfuhsrfuhsryelos, sucu fuhsr se inge ikucslah lohm selos nuh sin sucu pohs ac mwet in muhta we ke pacl pahkah sac.

Luhlahlfongi uh eklac pwacye ke kuht oruh ma upac uh ke luhlahlfongi. Kuhlwacnsap ac kihsackuhnlah ahkyohkyelihk kuhiyac ac ahkwoyelah insiyac. Luhlahlfongi in God ac kais sie use mwe ahkinsewowo inkuhsrao me.

Tukun pain moullac liki cancer se, mukul wowo se fakfucklac ke stosah soko. Liki na in puhla koluk kacl sifacna, el siyuck ke pruhe, “Meac nga kuh in lotwelah ke ma se sikyak inge?” Ke acn se karihngihnyuck el we ah, el lihksrweni na akihlen nurse se suc elyahkihn mukul tuhmwacl ac tuhlihk nahtuhl. Mwet mas se ma kweok el konwacack top lal ke el luhlahlfongi God ac kahsruh mwet sahyac uh.

Ke tamuhlwel se ma elyah ke petsac koluk muhta lihkihn ohfohs luhn stek prestuhn lal, stek prestuhn sac pruhe in etuh lah el ac kahsruh fuhkah. Nuhnak na kahlwem se tuhkuh ohinge, “Ikucslah sruhnguhl an ac lwelah el an utyak.” Ke luhlahlfongi lal Ke God muh el ac fah kahsruh, mwet kol sac suc oasr pristut la el ikucslah sruhnguhl sac ac sruokyac tamuhlwel lal. Kais sie selos puhla luhngse ac luhlahlfongi nuh sin God ac nuh sin sie sin sie. Ke el fokokoi, tamuhlwel se inge kuh in muhtwacwacack in auliyak ac eklac.

Kuhtuh ma sikyak nuh sesr uh ma nuh sesr sifacna, masap ke wosasuc uh ac Nguhn muhtahl kuh in kahsrwe kuht in etuh lah kuht ac, kuh fuhkah, ac ngac in sifilpac luhlahlfongi mwet sahyac uh. Ke luhlahlfongi uh kuhnaosyucklac uh, suhpwacr ac ahsor uh e pwacye; pa pacna enenuh se nuhke in kuh in liye ma wo liki ma koluk in etuh lah ngiac luhlahlfongi ac puhlaik uh fal in sifilpac luhlahlfongi sie mwet.

Tuh, ke ahkfuhlwact nuh sin God ac fwackyuck ma utuhkuh nuh sesr, Prestuhn Russell M. Nelson el fahk, “Kom tiac enenuh in nuhnkuh lah suc kom kuh in luhlahlfongi uh.”⁶ Kuht kuh in luhlahlfongi ke God pacl nuhkwewa. Leum el etwe kuht ac luhngse kuht yohk liki na kuht etwekuht ac luhngse kuht sifacna. Luhngse lal ac etuh lal ke ma som tari, ma ingena, ac ma ac fah tuhkuh uh oruh olwelah lal tiac eklac ac pwacye.

Luhlahlfongi ke ma suhmuhslah uh fahk muh “fahsr luhn puhluhn pacl.”⁷ Ke ahkinsewowo luhn God, fahsr luhn pacl, ac tuhtahflah luhn luhlahlfongi ac ahkostwen, kuht kuh in konwacack top ac mihs.

Leum El sramsram ahkwoye:

“Tuhng kuh in kuhtanglah fong se, tuhsruhk engan el tuhkuh ke litutacng an.”⁸

“Sang toasr lom nuh sel Leum ac luhlahlfongi ke karihngihnyuck lal.”⁹

“Wacngihn ahsor luhn facluh inkuhsrao tiac kuh in onwelah.”¹⁰

Luhlahlfongi ke God¹¹ ac ke mwenmwen Lal. Inmahsrlosr nuh sin mwet uh ac kuht pacna kuh in eklac. Ke Iwaclah luhn Kraist suc Leum, kuht kuh in sislah nuhnak in sifacna lasr ac eklac tuhlihk nuhtin God, mihs, puhsisacl,¹² nwacnwaclah ke luhlahlfongi. Ke kuht auliyak uh, ke kuht fahkwack ac forlah liki ma koluk lasr, Leum el muhlkuhnlah ma koluk inge.¹³ Tiac kalmac pa El muhlkuhnlah; ke ohiyac wolacna se, El sulaclah na in tiac esam ma koluk inge, ac kuht tiac pac enenuh in esam.

Luhlahlfongi ke kohkoh luhn God in liye ma uh ke kahlwem. Kuht kuh in nuhnak muhnahs nuh sin mwet sahyac ke pacl fal ac ohiyac fal oacna ke Leum el fahk ma kuht enenuh uh,¹⁴ in ekihn “lahlmwetmwet oacna serpents, ac tiac mwe sensen oacna won dove uh.”¹⁵

Kuhtuh pacl uh ke insiyacsr ahsor ac pwacye uh, kuht ikucskuhtlac nuh ke ahkkweyeyuck ac kolyuck luhn Nguhn Muhtahl.¹⁶ Ahkkoluk ac nuhnak muhnahs tuhkweni na muhtwacwacack ke pacl se ma ahkihlenyuckyak ma koluk se uh. Inkaiyacn pacl uh ahkkoluk uh ngwet yohk na nuh ke ma somsomlah tari. Nuhnak muhnahs uh el ngwet na nuh ke pacl fahsruh uh. “Tuh God el tiac suhpwacma Wen nahtuhl in tuh nununku faclu, tuh faclu in eis moul kacl.”¹⁷

Mwet sap Paul el siyuck, “Suc e srikutlac liki lungse luhn Christ?” El topuk, “Tia misa ku moul, … tia ma oan lucng liki faclu, ku ma oan ten liki faclu, … su a fah kuh in srikutla liki lungse lun God, su ma lasr ke Christ Jesus Leum lasr.”¹⁸ Tuh, oasr mwet se kuh in srikuhtlac liki God ac Jisus Kraist—ac mwet se ingacn pa kuht sifacna. Oacna ke Isaiah el fahk, “Ma koluk lowos srikowosla liki God.”¹⁹

Ip yohk se ahkluo luti kuht muh oasr kunohkohn lasr ke mukwikwi lasr sifacna fin facluh. Tuhsruhk luhngse luhn Mwet Molwelah lasr “wacngihn sahflahiyac ac ma pahtpaht.”²⁰ Ke kuht ahkolah in tuhkuh nuh ke acn sesr, finne ke kuht ac “loesla liki,”²¹ God el ahkolah ke luhngse na yohk in paing kuht, in use ma wo emeet ma oasr sel uh.²²

Prestuhn J. Reuben Clark el tuh fahk, “Nga luhlahlfongi muh Pahpah Tuhmasr Inkuhsrao el ke molwelah nohfohnna tuhlihk nahtuhl, … ke wo lal ac pahkotwen lal el ac use nuh sesr opi ke orekma lasr, use nuh sesr ma nuhkwewa ma el kuh in use, ac in sang ahol, nga luhlahlfongi muh el ac use nuh sesr mwe kaiyuck na srihk ma el kuh in use uh.”²³

Ke sahksin soko fin acn Calvary, ke acn ma Jisus El misac ke ma koluk lasr uh, El orekmakihn ma El luti ke El pruhe, “Papa, nunak munas nu selos, tuh elos tia etu ma elos oru uh.”²⁴ Orekma ac sukohsohk lasr uh oasr kalmeyac mweyen oasr ma kunacsr sifacna in liye kuht yang ye muhtahl God, ke ma kuht etuh ac oruh uh. Kulohlacna, kuht kuh in luhlahlfongi orekma wowo luhn God ac pahkotwen wo in nuhnuhnkuh fal ma kuht oruh uh.

Kuht kaliyac oacna ke kuht muhtwacwacack ah—ke luhngse lal God ke kuht tuhkuh nuh ke lohm sesr in konwaclwack ac konwacack kais sie sie uh.

Yac kom esam puhpuhlyuck se lal Jisus Kraist ke mukul se ma oasr tuhlihk mukul luo nahtuh ah?²⁵ Sie tuhlihk mukul nahtuhl ah som liki lohm sel ac sislah ma pahpah tuhmwacl sang lal. Ke el acsmaklac ah, tuhlihk mukul se inge suk el in fohlohk nuh lohm sel. Tuhlihk mukul se sahyac ah, puhla lah el karihngihn masap “liye, yac puspis,”²⁶ tiacna ke lwelah tamuhlwel wiyacn nuh in lohm selos.

Tamuhlwel ac tahmtahel, kom kuh in nuhnak muhnahs nuhnkuh ke Jisus el siyuck sesr in ikucslah insiyacsr, kahlwem lasr, luhngse, ac puhsisacl, ac in liye kuht sifacna ke kwewa na ohiyac inge?

Oacna tuhlihk mukul kuh tuhlihk muhtwacn se met ah, kuht kuh in som liki lohm sesr ac tok kuhtuh suk in fohlohklac. God El sanwe kuht in pain kuht.

Ac oacna tuhlihk mukul kuh tuhlihk muhtwacn se sahyac ah, God El fahk ke insemuhlahlah nuh sesr in tuhkweni enganwack ke kais sie sesr tuhkuh nuh Yohrohl uh. El suli kuht in oruh alu lasr, u, kuhlahs, ac toeni uh in ikack nuh sin mwet nuhkwewa, kolyuck sin mwet oasr wal la, ac karihngihnyuck wo nuh sin kais sie mwet. Ke kuhlwacng, kahlwem, ac ahkfuhlwact nuh sin kais sie sie, kuht kais sie puhsisacl in suk Leum ac pruhe ac eis mwe insewowo ma tuhkuh ke wosasuc lal ma fohlohkyak nuh fin facluh.

Fuhfahsryucsr lasr fin facluh kuht sifacna kac, tuhsruhk kuht kuh in sifil tuhkuh nuh sel God Pahpah tuhmasr ac Wen Kuloh Nahtuhl ke luhlahlfongi lasr ke God, kais sie sesr, ac sesr sifacna.²⁷ Jisus El suli, “Nimet fosrnga, a lulalfongi na.”²⁸ Oacna Mwet Pahluh Joseph, lwelah kuht in tiac sahngweng in luhlahlfongi ke karihngihyuck lal Pahpah tuhmasr Inkuhsrao.²⁹ Nuhnak muhnahs sifilpac suk ke luhlahlfongi—ma usrnguck se El olwelah nuh sum misenge. Ke ine muhtahl luhn Jisus Kraist, amen.